Шупашкарта пурӑнакан 35 ҫулти хӗрарӑм полицие пынӑ. Вӑл ултавҫӑсен аллине лекнӗ.
Вӑл тӳлевсӗр пӗлтерӳсен сайтӗнче ӗҫ шыранӑ, резюме хӑварнӑ. Кӗҫех ун патне хӗр шӑнкӑравланӑ, килтен тухмасӑрах тупӑш тума сӗннӗ. Анчах малтан онлайн мелпе вӗренмелле, унта вара укҫа хывмалла имӗш. Кайран ку тупӑш пама тытӑнассине ӗнентернӗ.
Хӗрарӑм ӑна ӗненсе темиҫе банкра кредитсем илнӗ, укҫине лешӗ каланӑ счет ҫине куҫарнӑ. Темиҫе уйӑхра вӑл пӗр пус та ӗҫлесе илеймен, укҫине вара самаях хывнӑ – 2 миллион тенке яхӑн.
Улатӑрта пурӑнакан 72 ҫулти хӗрарӑм ултавҫӑсене 1 миллион ытла тенкӗ куҫарса панӑ. Вӑл полицире ҫапла каласа кӑтартнӑ: 2 кун каялла ун патне палламан ҫын шӑнкӑравланӑ, такамсем унӑн укҫине чикӗ леш енне куҫарма тӑни пирки каланӑ. Вӗсен ҫулне пӳлес тесен кредит илсе маларах «хӑрушсӑр счет» ҫине куҫармалла-мӗн.
Ватӑ хӗрарӑм хӑйӗн 300 пин тенкине тата кредит илнӗ 422 пин тенкине палламан ҫын каланӑ счет ҫине куҫарнӑ. Кун пирки вӑл тӑванӗсемпе те калаҫнӑ. Лешсем ӑна ку ултавҫӑсем пулнине каланӑ. Анчах кинемей ӗненмен.
Палӑртмалла: 2021-2023 ҫулсенче вӑл ултавҫӑсен аллине виҫӗ хутчен лекнӗ, ун чухне вӗсене 430 пин тенкӗ куҫарса панӑ.
Ҫӗрпӳре пурӑнакан 22 ҫулти каччӑ кӑҫалхи ҫу уйӑхӗнче интим-пулӑшу кӳрекен (ҫапла калӑпӑр ӗнтӗ) хӗр шыранӑ. Пӗлтерӗве ятарлӑ сайтра (ун пеккисем те пур-мӗн) тупнӑ.
Вӑл йӗрке хуралҫисене ӑнлантарса панӑ тӑрӑх, малтан хӗрпе калаҫнӑ, вӑл прейскурантпа паллаштарнӑ, укҫа куҫарса панӑ хыҫҫӑн пыма шантарнӑ.
Каччӑ укҫана куҫарса панӑ хыҫҫӑн ун патне темле арҫын шӑнкӑравласа программа ванни пирки пӗлтернӗ, каччӑна тӑкака саплаштарма хушнӑ. Ҫапла майпа яш 30 пин ытла тенкӗсӗр тӑрса юлнӑ.
Улталаканни 18 ҫулти Сарту облаҫӗнчи каччӑ пулнӑ. Ӑна пирӗн патри йӗрке хуралҫисем ӗҫпе комнадировкӑна кайса тытса чарнӑ. Вӑл хӗрарӑм тата арҫын сассипе хӑй калаҫнӑ иккен. Ҫӗрпӳ каччине вӑл укҫана куҫарса панӑ. Йӗрке хуралҫисем халӗ Сарту яшӗ ытти ҫынпа та ҫавӑн пек хӑтланман-ши тесе тӗрӗслеҫҫӗ.
Шупашкарти 40 ҫулти арҫын, сварщикре ӗҫлекенскер, юрату шыраса укҫасӑр тӑрса юлнӑ. Вӑл паллашу сайтӗнче Америкӑри хӗрарӑмпа паллашнӑ. Унтан вӗсем мессенджерта ҫырӑннӑ.
Кӗҫех хӗрарӑм ӑна юратни пирки пӗлтернӗ, ун патне посылкӑпа хаклӑ парне янине каланӑ.Анчах вӑл таможньӑра чарӑнса тӑнӑ-мӗн, ӑна илме укҫа тӳлемелле.
Арҫын иккӗленнӗ, полицие пырса каласа кӑтартнӑ. Полицейскисем ку, ахӑртнех, ултавҫӑ пулнине каланӑ, ӑна ҫыхӑнӑва татма хушнӑ.
Арҫын итлесе ҫапла тунӑ-ха, анчах «савнийӗ» ун патне тепӗр номертен ҫырса янӑ, ҫапла каллех калаҫса кайнӑ. Кайран сварщик пӗлӗшӗсенчен 98 пин илсе «савнийӗ» кӑтартнӑ счет ҫине куҫарнӑ. Укҫине илсен «Америкӑри савни» ҫухалнӑ.
Шупашкарта декретра ларакан хӗрарӑм инвестицисемпе ӗҫлесе илес тенӗ те хӑй пысӑк укҫа ҫухатнӑ. Вӑл ултавҫӑсен аллине лекнӗ.
35 ҫулти хӗрарӑм криптовалютӑна укҫа хывнӑ. Хӑйӗн укҫи те пулман, кредит илнӗ. Ҫапла вӑл палламан ҫын кӑтартнӑ счет ҫине 1 миллион та 200 тенкӗ куҫарнӑ. Хӑй ултавҫӑсен аллине лекнине вӑл укҫана илме тӑрсан тин ӑнланнӑ.
Шупашкарти сывлӑх сыхлавӗн учрежденийӗнче ӗҫлекен 63 ҫулти хӗрарӑм ултавҫӑсене ӗненсе 900 пин ытла тенкӗ ҫухатнӑ.
Ун патне мессенджерта шӑнкӑравланӑ. Экран ҫинче республикӑри Сывлӑх сыхлавӗнче ӗҫлекен ҫын ячӗ тухнӑ. Хайхискер каланӑ тӑрӑх, усал шухӑшлӑ ҫынсем даннӑйсен базине кӗнӗ, унӑн ячӗпе кредит илесшӗн-мӗн. Кӗҫех хӗрарӑм патне «йӗрке хуралҫи» шӑнкӑравланӑ, ҫав ҫынран маларах кредит илсе «хӑрушсӑр счет» ҫине куҫарма ыйтнӑ. Ҫапла медӗҫчен такамсене 916 пин тенкӗ куҫарса панӑ.
Ку тӗслӗх тӗлӗшпе пуҫиле ӗҫ пуҫарнӑ.
Шупашкарти медицина организацийӗнче ӗҫлекен 50 ҫулти хӗрарӑм хӑйӗн укҫине кӑна мар, тӑватӑ банкран тата тӑванӗсенчен кивҫен илнисене те ултавҫӑсене куҫарса панӑ. Пӗтӗмпе 9 миллион тенкӗ ытла.
Ун патне палламан ҫын шӑнкӑравланӑ. Вӑл Сывлӑх сыхлавӗн министерствин ӗҫченӗ-мӗн. Сасси те ун пекрех пулнипе хайхи хӗрарӑм ӗненнӗ. Вӑл кӗҫех ун патне йӗрке хуралӗнчен шӑнкӑравлассине пӗлтернӗ. Чӑнах та, шӑнкӑрав килнӗ. Такамсем ун ячӗпе кредит илме хӑтланаҫҫӗ тесе укҫана «хӑрушсӑр счет» ҫине куҫарма хушнӑ. Хӗрарӑм пӗр эрнере 9 миллион та 400 пин тенкӗ куҫарнӑ.
Тӑванӗсем вӑл кивҫен нумай ыйтнипе сисчӗвленнӗ, ывӑлне амӑшӗпе калаҫма сӗннӗ, мӗншӗн тесен хӑй хӗрарӑм хӑранипе ним те ӑнлантарайман. Ҫапла полицирен пулӑшу ыйтма тивнӗ.
Пӗр округри пульница заведующийӗ ултавҫӑсен аллине лекнӗ. Ӑна унччен вӗсем пирки асӑрхаттарнӑ пулсан та палламан ҫынна ӗненнӗ вӑл.
Хӗрарӑм каланӑ тӑрӑх, ун патне палламан ҫын шӑнкӑравланӑ, вӑл йӗрке хуралӗн ӗҫченӗ имӗш. Вӑл каланӑ тӑрӑх, унӑн пухнӑ укҫине такамсем вӑрласшӑн имӗш, ҫавӑнпа ӑна сыхласа хӑвармалла. Хайхискер ӑна банкомата кайса укҫана хӑй каланӑ счет ҫине куҫарма ӳкӗте кӗртнӗ.
Хӗрарӑм йӑлтах палламан ҫын каланӑ пек тунӑ. Ҫапла вӑл пухнӑ 599 пин тенкине куҫарса панӑ.
Шупашкарти 34 ҫулти арҫын патне палламан ҫын шӑнкӑравланӑ та смспа килнӗ кода калама хушнӑ. Ку сим-карттӑна ӗҫлеттермешкӗн тӑсма кирлӗ-мӗн. Чӑннипе вара вӑл Патшалӑх пулӑшӑвӗсен порталне кӗмелли код пулнӑ. Кун пирки шӑнкӑравланӑ тепӗр ҫын, «ФСБ ӗҫченӗ», каланӑ. Вӑл ултавҫӑсем кредитсем ан илччӗр тесе арҫынна хӑйне кредитсем илсе «хӑрушсӑр счет» ҫине куҫарма ыйтнӑ.
Ку кӑна мар-ха, арҫын пӗрле пурӑнакан хӗрарӑма та ҫаплах тума хушнӑ. Ҫапла вӗсем «хӑрушсӑр счет» ҫине 6 миллиона яхӑн тенкӗ куҫарнӑ.
Чӑваш Енри хына учрежденийӗсенчен пӗринче ӗҫлекен экономист ултавҫӑсене ӗненсе 700 пин тенкӗсӗр тӑрса юлнӑ.
Хӗрарӑм патне ют ҫынсем утӑ уйӑхӗн 8-мӗшнчен пуҫласа 17-мӗшӗччен ҫине-ҫинех шӑнкӑравланӑ, хӑйсемпе право тытӑмӗнче тата банкра ӗҫлекенсем тесе паллаштарнӑ.
Вӗсем ӑна преступниксем хӗрарӑмӗн счечӗпе хуҫаланаҫҫӗ, ун ячӗпе кредит илесшӗн тесе хӑратма пултарнӑ,
Ют ҫынсем каланине итлесе хӗрарӑм-экономист такамсене 700 пин тенкӗ укҫа куҫарса янӑ. Асӑннӑ укҫана хӗрарӑм банкран кредит илнӗ. Банк ӗҫченӗсем ӑна ҫав утӑма тума тыта чарасшӑн пулнӑ, анчах вӑл вӗсене итлемен.
Темиҫе кунтан хӗрарӑм хӑй улталаннине ӑнланса илнӗ, йӗрке хуралҫисенчен пулӑшу ыйтнӑ.
+20.3 °C