Пуш уйӑхӗн 31-мӗшӗнче Шупашкарти Трактор тӑвакансен культура керменӗнче ҫемье пултарулӑхӗн «Пӗр хум ҫинче» хулари IV фестиваль-конкурсӗ иртнӗ.
Унта 12 ҫемье хутшӑннӑ. Ҫав йышра: Беляевсем, Казаковсем, Павловсем, Черновсем, Ивановсем, Ямалиевсем, Муллинсем, Лысяковсем, Герасимовсем, Логиновсем, Пчеловсем, Щербаковсем.
Фестивальте Черновсем ҫӗнтернӗ. Сцена ҫине ҫулталӑкри ачине те илсе тухнӑ вӗсем.
Ҫемьесене «Химик» культура ҫурчӗн пай заведующийӗ, «Челентано» пултарулӑх пӗрлешӗвӗн проекчӗсен ертӳҫи Андрей Лазарев, Чӑваш патшалӑх филармонийӗн солистки Алина Кудрявцева, «Симӗс кролик» уяв студийӗн ертӳҫи Мария Миронова, «Кӑвак кайӑк» эстрада ташшин ансамблӗн балетмейстерӗ Татьяна Мокеева хакланӑ.
Пирӗн республикӑра ҫитес уйӑхра иртекен балет фестивалӗ ҫитиччен нумай вӑхӑт юлмасть. Аса илтерер: вӑл ака уйӑхӗн 5-14-мӗшӗсенче Чӑваш патшалӑх оперӑпа балет театрӗнче иртӗ. Пӗтӗм тӗнчери XXVIII балет фестивалӗ вӑхӑтӗнче Шупашкарта ҫулсеренех пысӑк шайри ӑстасем пуҫтарӑнаҫҫӗ. Ҫӗршыври чаплӑ театрсем вӑл вӑхӑтра пирӗн тӑрӑха гастрольсемпе килӗҫ.
Кӑҫал, сӑмахран, «Пушкиниана» премьерӑпа паллаштарӗ. Ӑна Александр Пушкинӑн «Маленькие трагедии» ярӑмне тӗпе хурса хатӗрленӗ. Ӗҫе вилӗмсӗр вырӑс классикӗ ҫуралнӑранпа 225 ҫҫитнине халалланӑ.
Фестиваль Коми Республикинчи оперӑпа балет театрӗн «Крик» балечӗпе уҫӑлӗ.
Профессионал стрит-арт художниксемпе ӳкерме юратакансем«ФормART» фестивале хутшӑнма пултараҫҫӗ. Ӑна 18 пуҫласа 35 ҫулчченхи ҫамрӑксем валли йӗркелеҫҫӗ.
Фестивалӗн кашни тематикипе пӗр ҫынран 3 заявкӑран ытла йышӑнмӗҫ. Вӗсенесумлӑ экспертсем, сӑнарлӑ тата урамри искусство, архитектура тата хула строительстви енӗпе ӗҫлекен специалистсем хаклӗҫ.
Фестиваль темиҫе номинаципе иртӗ, Ҫавна май кашниех хӑйне ҫывӑххине суйласа илме пултарӗ.
Ҫӗнтерӳҫӗсене хӑйсен ӗҫӗсене Федерацин Атӑлҫи округӗнчи 14 регионта пурнӑҫа кӗртме май туса парӗҫ.
Пӗлтӗр республикӑра ҫырла фестивалӗ пӗрремӗш хут иртнӗ. Ӑна кӑҫал та йӗркелӗҫ. Хальхинче фестивале икӗ лапамра ирттерӗҫ.
Пӗлтӗр ҫырла фестивалӗ Хыркассинче «Ивушка» питомникре пулнӑ. Кӑҫал та унтах иртӗ. Кунсӑр пуҫне Шупашкарти Машиностроительсен проспектӗнче «ЦветыТорг» базинче (1-мӗш ҫуртӑн 6-мӗш корпусӗ) тепӗр лапам пулӗ.
Фестиваль икӗ кун иртӗ. Пӗрремӗш кунхине, утӑн 20-мӗшӗнче, Шупашкарта ҫырла кӑна мар, ытти тӗмӗ хунавӗсене те сутӗҫ. Чӑваш фермерӗсем те хӑйсен продукцийӗсемпе паллаштарӗҫ. Утӑн 21-мӗшӗнче профессионалсем питомнике кайӗҫ.
«Чӑваш ачи чӑвашах» 8-мӗш фестиваль ака уйӑхӗн 6-мӗшӗнче, шӑматкун, Муркаш муниципаллӑ округӗнчи Калайкасси шкулӗнче иртӗ. Уяв 9:00 сехетре вӑйӑ картипе пуҫланӗ.
Фестивале пуҫараканӗсем тата йӗркелекенӗсем – Чӑваш Республикин вӗренӳ институчӗ, Чӑваш наци ӑслӑлӑхпа ӳнер академийӗ, Чӑваш наци конгресӗ тата Муркаш муниципалитет округӗн Калайкасси вӑтам шкулӗ.
Фестивале тӑватӑ номинаципе хутшӑнма пулать: «Вӗрентетпӗр чӑвашла» (чӑваш чӗлхи предметне вӗрентмен учительсем хутшӑнӗҫ, чӑвашла уроксем кӑтартӗҫ); «Савӑнатӑп эп чӑваш пулнишӗн» (кӗҫӗн классенче вӗренекен ачасем чӑваш халӑхӗн пӗр-пӗр йӑлине кӑтартса парӗҫ); «Сар каччӑпа сарӑ хӗр» (7-9 классенче вӗренекен ачасем чӑваш халӑх историне, культурине, чӗлхине, йӑли-йӗркине пӗлнине ӑс-тӑн вӑййинче кӑтартӗҫ); «Тӑвалла пулсан та малалла» (чӑвашлӑх туйӑмне аталантаракан проекта вӗренӳ организацийӗн директорӗ (заведующийӗ) е унӑн ҫумӗ хӳтӗлӗ).
«Чӑваш Ен» ПТРК ӗҫченӗ Вероника Павлова Сочири ҫамрӑксен фестивальне хутшӑнать.
Сочи хулинче пуш уйӑхӗн 1-мӗшӗнче уҫӑлнӑ Пӗтӗм тӗнчери ҫамрӑксен фестивалӗ «Сириус» федераци центрӗнче иртет. Унта 190 ҫӗршывран ҫамрӑк ҫитнӗ. Ҫав шутра – Чӑваш Енри 90 ҫамрӑк.
«Эрне хушшинче вун-вун паллӑ ҫынпа паллашрӑмӑр, тӗрлӗ лекцисене ҫӳрерӗмӗр. Питӗ усӑллӑ пулчӗҫ вӗсем. Кашни хӑйне кӑсӑклӑ ен суйласа илчӗ. Кама педагогика кӑсӑклантарать, кама журналистика, кама тухтӑр ӗҫӗ кӑсӑклӑ», — каласа кӑтартнӑ Вероника Павлова.
Ҫӗмӗрле муниципаллӑ округӗнчи Хутарти культура ҫуртӗнче «С любовью к песне» (чӑв. Юрра юратса) регионсем хушшинчи конкурс-фестиваль иртнӗ. Ӑна Чӑваш Республикин культурӑн тава тивӗҫлӗ ӗҫченне Сергей Мухоморова асра тытса ирттернӗ. Кун пек фестивале вырӑнтисем тӑххӑрмӗш ҫул йӗркелеҫҫӗ.
Конкурса хор коллективӗсем, ансамбльсем, солистсем, инструменталистсем хутшӑннӑ. Сӑмах май каласан, Шупашкар хулинчи халӑхӑн социаллӑ ыйтӑвӗсене тивӗҫтерекен комплекслӑ центрти «Калинушка» ансамбль (ертӳҫи — Валентина Телей) солисчӗсем Николай Фролов тата Александр Ильин та хутшӑннӑ.
Ҫеҫпӗл Мишши ячӗллӗ Чӑваш патшалӑх ҫамрӑксен театрӗ Николай Гоголь повеҫӗ тӑрӑх лартнӑ «Шинель» драмӑна Раҫҫейри наци театрӗсен фестивалӗн программине кӗртнӗ. Вӑл ака уйӑхӗн 15-20-мӗшӗсенче Элистари Б. Басангов ячӗллӗ наци драма театрӗнче иртӗ. Унта Раҫҫейри 6 наци театрӗ хутшӑнӗ.
«Шинель» пластика драмипе чӑваш театрӗ тӗрлӗ фестивале унччен те хутшӑннӑ. Вӑл ӗҫе Мускаври, Иркутскри тата Севастопольти куракансен хаклама ӗлкӗрнӗ.
Шупашкар 555 ҫул тултарнине халалласа ирттерекен мероприятисен шутӗнче сывлӑшра вӗҫекен аппаратсен «Чебоксарское небо» (чӑв. Шупашкар пӗлӗчӗ) фестивалӗ те пулӗ. Сывлӑшри хӑмпӑсен илемӗпе киленнипе пӗрех вунӑ шартан пӗрин пассажирӗ пулса тӑма май килӗ. Унпа улӑхсан Шупашкар илемӗпе ҫӳлтен киленме май пур.
Тӗрлӗ ҫулхисем валли фестиваль вӑхӑтӗнче кӑсӑклӑ программа хатӗрлеме шантараҫҫӗ. Ҫав шутра — концертсем, ал ӑстисен куравӗсем, ӑсталӑх лаҫҫсем, фудкорт зони, сӑн ӳкерӗнме хитре вырӑнсем хатӗрлӗҫ.
Нарӑс уйӑхӗн 12-мӗшӗнче Шупашкарти Ф.П. Павлов ячӗллӗ музыка учлищинче хисеплӗ хӑнасем пулӗҫ. Вӗренӳ заведенине Чулхулари М.И. Глинка ячӗллӗ консерваторире ӗҫлекен преподавательсемпе унта вӗренекенсем килсе ҫитӗҫ.
Чӑваш Ен валли ҫамрӑк талантсене туптакан вӗренӳ заведенийӗпе музыка училищи чылайранпа туслӑ ҫыхӑну тытать. Консерваторирен килнисем хальхинче фестивале хутшӑнса «Звуки и отзвуки: инструментальные дуэты композиторов XX-XXI вв.» программӑпа паллаштарӗҫ.
Хӑнасем хальхи вӑхӑтри музыка классикӗн Альфред Шниткен камера хайлавӗсемпе, Михаил Алексеев авангард чӑваш композиторӗн, Якут Республикипе Питӗрти композитор шкулӗсен ӑстисен Герман Комраковпа Юрий Корнаковӑн, ҫавӑн пекех хальхи вӑхӑтри авторӑн Лера Ауэрбахӑн ӑсталӑхӗпе паллаштарӗҫ.
-5.7 °C