Ҫӗртме уйӑхӗн 28-мӗшӗнче Чӑваш патшалӑх филармонийӗн директорӗ, Чӑваш Енӗн культурӑн тава тивӗҫлӗ ӗҫченӗ Максим Матросов 50 ҫул тултарнӑ.
Филармонире палӑртнӑ тӑрӑх, Максим Юрьевича пула Чӑваш Енӗн культура пурнӑҫӗ ҫӑлкуҫ пек тапса тӑрать, асра юлмалла пултарулӑх пулӑмӗсемпе пуян.
Максим Матросов И.Н. Ульянов ячӗллӗ Чӑваш патшалӑх университетӗнче тата аспирантурӑра вӗреннӗ. Тӗрлӗ ҫулта вӑл Чӑваш Енӗн патшалӑх телерадиокомпанийӗнче корреспондент, Шупашкар хула администрацийӗнче ҫамрӑксен тата культура енӗпе специалистра, Чӑваш Енӗн Президенчӗн Администрацийӗн информаципе аналитка пайӗнче тӑрӑшӑ, Чӑваш Енӗн туризм тата культура центрӗнче (халӗ Чӑваш Енри труизма аталантарс енӗпе ӗҫлекен агентство) директорӗ пулнӑ. Филармони директорӗ пулма ӑна 2021 ҫулта шаннӑ.
Шупашкарта пурӑнакан Юлия Ермолаева 100 ҫулхи юбилейне паллӑ тунӑ. Ӑна тӳре-шара саламлама килсен вӑл «Катюша» юрра шӑрантарса панӑ.
Юлия Ермолаева Куславкка районӗнчи Тӗмшер ялӗнче ҫуралса ӳснӗ. 18 ҫулта чухне, Тӑван ҫӗршывӑн Аслӑ вӑрҫи пуҫлансан, вӑл Аслӑ Куснар ялӗ ҫывӑхӗнче окоп чавнӑ. Ӑна «1941-1945 ҫулсенче Тӑван ҫӗршывӑн Аслӑ вӑрҫинче тӳрӗ кӑмӑлпа ӗҫленӗшӗн» медальпе чысланӑ.
Чӑваш Енӗн Наци вулавӑшӗнче те «Паха тӗрӗ» фабрикӑн пӗр ӗмӗрхи юбилейне халалласа ятарлӑ эрне ирттерессине эпир пӗлтернӗччӗ-ха.
авна май вулавӑшра курав уҫӑлнӑ. Экспозицире фабрикӑн малтанхи художникӗсем Е.И. Ефремова, М.В. Симакова, Т.И. Петрова тата хальхи вӑхӑтра унта ӗҫлекен А.В. Андреева, О.А. Ландышева тӗрленӗ костюмсем, платьесем, ытти япаласем вырӑн тупнӑ. Унтах ал ӑҫтисен биографийӗпе паллашма пулать.
Курав утӑ уйӑхӗн 15-мӗшӗччен ӗҫлӗ.
«Паха тӗрӗ» эрни иртнӗ май ҫӗртме уйӑхӗн 28-мӗшӗнче 10 сехетре «Бренд «Паха тӗрӗ» в истории и национальной культуре Чувашии» (чӑв. Чӑваш Енӗн истрийӗпе наци культуринче «Паха тӗрӗ» бренд») ятпа ӑслӑлӑхпа практика конференцийӗ уҫӑлӗ.
Муркаш районӗнчи Алексей Петровичпа Римма Михайловна Петровсем пӗрлешнӗренпе 70 ҫул ҫитнине паллӑ тунӑ. Ҫемье пуҫӗ Шетмӗпуҫ ял канашӗнче, Мичурин ячӗллӗ колхоз председателӗнче ӗҫленӗ. Римма Михайловна ветеринар пулнӑ. Петровсен хӗрӗ Лариса Ладыкова тухтӑрта ӗҫленӗ. Унӑн ывӑлӗ Алексей Ладыков чылай вӑхӑт Шупашкар хула администрацине ертсе пынӑ.
Ҫак кунсенче Алексей Петрович 95 ҫул тултарнӑ. Мӑшӑр юбилейӗ ячӗпе «Жизнь прожить — не поле перейти» кӗнеке кун ҫути курнӑ.
Шупашкарти К.В. Иванов ячӗллӗ Литература музейӗнче «Литература - пурнӑҫ тӗкӗрӗ» ятлӑ курава уҫма хатӗрленеҫҫӗ. Ҫӗртме уйӑхӗн 16-мӗшӗнче ӗҫлеме тытӑнакан ҫав курава чӑваш халӑх писателӗн Денис Гордеевӑн 85 ҫулхине тата Чӑваш Республикин культурӑн тава тивӗҫлӗ ӗҫченӗн Светлана Гордееван 55 ҫулхине халаллӗҫ.
Куравра авторсем пултарулӑхне кӗнекесемпе сӑнӳкерчӗксем, документсем тӑрӑх уҫса пама палӑртнӑ. Экспозицире Денис Гордеев прозаикӑн, поэтӑн, драматургӑн уйрӑм япалисемпе наградисем, Светлана Гордеева поэтӑн тата художникӑн ӳкерчӗкӗсем вырӑн тупӗҫ.
Курав ҫӗртме уйӑхӗн 16-мӗшӗнче 14 сехетре уҫӑлӗ. Пултаруллӑ ашшӗпе хӗрӗн ӑсталӑхне хаклакансене унта пурне те хапӑл тӑвӗҫ.
Ҫӗртме уйӑхӗн 1-мӗшӗнче Чӑваш Республикин Наци вулавӑшӗнче паллӑ прозаик, журналист, драматург, куҫаруҫӑ Ольга Туркайӑн пултарулӑх каҫӗ иртнӗ. Ӑна пултаруллӑ хӗрарӑмӑн ҫуралнӑ кунне халалланӑ. Ҫавӑн чухнех вулавӑшра авторӑн «Паянхи кун» кӗнекине хӑтланӑ.
Ольга Туркая саламлама тӳре-шара та пырса ҫитнӗ. «Пурнӑҫ йӗрки мӗнле пуласси пӗтӗмпех хамӑртан килет. Ольга Николаевна, эсир каялла ҫаврӑнса пӑхсан сирӗн ҫул илемлӗ те такӑр пулнине курма пулать, малашне те вӑл анлӑ та хитре, сарлака та чаплӑ пултӑр», – тесе саламланӑ, сӑмахран, Чӑваш Республикин Элтеперӗн Администрацийӗн Шалти политикин управленийӗн пай пуҫлӑхӗ Людмила Шурекова. Чӑваш Енӗн Патшалӑх Канашӗн секретариачӗн ертӳҫи Александр Магарин юбиляра Хисеп хучӗпе чысланӑ.
Республика влаҫӗ ҫитес ҫул хӑш паллӑ ҫыннӑн ҫуралнӑ кунне паллӑ тӑвассине палӑртнӑ. 2024 ҫулта чӑваш поэчӗ Ҫеҫпӗл Мишши ҫуралнӑранпа 125 ҫул ҫитет.
Михаил Кузьмич Кузьмин Канаш районӗнчи Касаккасси (халӗ - Ҫеҫпӗл) ялӗнче 1899 ҫулхи чӳк уйӑхӗн 16-мӗшӗнче ҫуралнӑ. "Ҫеспӗл" псевдонима вӑл 1918 ҫулта илнӗ. 1922 ҫулхи ҫӗртме уйӑхӗн 15-мӗшӗнче вӑл хӑйӗн ҫине алӑ хунӑ. Унӑн вилтӑпри - Украинӑри Остёр хулинче.
Сӑмах май, республикӑра кӑҫал Иван Яковлев ҫуралнӑранпа 175 ҫул ҫитнине паллӑ тӑваҫҫӗ.
ШӖМре ӗҫленӗ ветеран Юлия Павлова 100 ҫул тултарнӑ. Йӗрке хуралҫисем ӑна сумлӑ уявпа саламлама килнӗ.
Вӑл 1979-1991 ҫулсенче адреспа-справка бюровне ертсе пынӑ. Юлия Павлова унта ӗҫленӗ вӑхӑтра ҫынсен даннӑйӗсен банкне йӗркеленӗ. Малтан – хут ҫинче, унтан цифра формачӗпе. Унашкалли Раҫҫейре пулман та темелле. Юлия Павлова патне пӗтӗм ҫӗршывран опыт илме пынӑ.
Пенсие тухсан та вӑл ахаль ларман, ШӖМӗн профсоюз организацине ертсе пынӑ.
Паян, ҫу уйӑхӗн 25-мӗшӗнче, Ҫеҫпӗл Мишши ячӗллӗ Чӑваш патшалӑх ҫамрӑксен театрӗн директорӗ Елена Николаева 50 ҫул тултарнӑ.
Елена Николаева 1973 ҫулта Етӗрне районӗнчи Тури Ачак ялӗнче ҫуралнӑ. И.Н. Ульянов ячӗллӗ Чӑваш патшалӑх университетӗнче вӗреннӗ вӑхӑтрах шкулта чӑваш чӗлхипе литературине вӗрентме тытӑннӑ. 2002 ҫулта вӑл Республикӑн халӑх пултарулӑхӗн ӑслӑлӑхпа методика центрне ӗҫлеме пуҫланӑ, каярах вӑл Республикӑн культура программисен дирекцине куҫнӑ.
Ҫамрӑксен театрӗн директорӗнче вӑл 2011 ҫултанпа ӗҫлет. Театрта палӑртнӑ тӑрӑх, культура учрежденине Елена Николаева ертсе пыма тытӑннӑранпа театр пурнӑҫпа тан утма тытӑннӑ.
Спектакльсем лартма театра тӗрлӗ ҫӗрти пултаруллӑ режиссерсене, художниксене тата композиторсене пӗрмаях чӗнсе илеҫҫӗ. Театр ӗҫченӗсем хӑйсен пултарулӑхне Мускавра, Питӗрте тата Хусанта туптаҫҫӗ.
Муркаш районӗнче пурӑнакан Перасковия Иванова 100 ҫул тултарнӑ. Вӑл - Тӑван ҫӗршывӑн Аслӑ вӑрҫин ветеранӗ.
Ватӑскер интернатра пурӑнать. Ҫамрӑк чухне вӑл выҫлӑхне те, йывӑрлӑхне те пайтах курнӑ. Ыттисемпе пӗрле окоп чавнӑ, вӑрман каснӑ. Перасковия Иванова лаборанткӑра ӗҫленӗ.
Ӑна 100 ҫулхи юбилейпе саламлама тӑванӗсем килнӗ. Пултарулӑх ушкӑнӗ юрӑ-ташӑпа саламланӑ. Юбиляр РФ Президенчӗн Владимир Путинӑн саламлӑ ҫырӑвне те илнӗ.
+4.3 °C