Ӗнер, каҫ кӳлӗм, Шупашкар хулинчи «Промтрактор» савут патӗнче тӗтӗм тухнине ҫынсем хулан чылай кӗтесӗнчен курнӑ. Мӗн ҫуннӑ унта?
Инкеклӗ лару-тӑру министерствин Чӑваш Енри Тӗп управленийӗ пӗлтернӗ тӑрӑх, савутӑн пӗр цехӗнче пушар тухнӑ. Ҫулӑма пӗр сехет ҫурӑра сӳнтерсе пӗтернӗ.
Ведомство пӗлтернӗ тӑрӑх, пушар тухни пирки 17 сехет те 21 минутра пӗлтернӗ. Вырӑна ҫӑлавҫӑсем, полици ӗҫченӗсем тата тухтӑрсем ҫитнӗ. Пушара 4 техника тата 10 ҫын сӳнтернӗ. Телее, инкекре никам та шар курман.
Атӑл юханшывӗн сулахай ҫыранӗнче, Сӗнтӗрвӑрри хулине хирӗҫле, тепӗр инкек пулнӑ – пулӑҫ путса вилнӗ.
1965 ҫулта ҫуралнӑ арҫын путса вилни пирки Мари Элти Звенигово районӗнчи авари-ҫӑлав службин МАСС ушкӑнне ҫӗртме уйӑхӗн 19-мӗшӗнче 10 сехет те 13 минутра пӗлтернӗ. Вырӑна Чӑваш Енри ҫӑлавҫӑсем те ҫитнӗ. Пирӗн республика ҫӑлавҫисем эхолот пулӑшнипе арҫын путма пултарнӑ вырӑна тӗрӗсленӗ. Унтан Звенигово районӗнчи водолаз вилене тупса ҫыран хӗррине илсе тухнӑ, ӑна Чӑваш Ен транспорт полицине панӑ.
Аса илтерер: ҫӗртме уйӑхӗн 18-мӗшӗнче Ҫӗнӗ Шупашкар хулинче Атӑлта 10 ҫулти арҫын ача путса вилнӗ. Вӑл ишме пӗлмен, юраман вырӑнта шыва кӗнӗ те каялла тухайман. Ача Атӑл хӗррине юлташӗпе килнӗ.
Паян Ҫӗнӗ Шупашкар хулинче Атӑлта 10 ҫулти арҫын ача путса вилнӗ. Вӑл юраман ҫӗрте шыва кӗнӗ.
Инкек каҫ кӳлӗм хула ҫывӑхӗнче пулнӑ. 2016 ҫулта ҫуралнӑ арҫын ачан виллине водолаз-ҫӑлавҫӑ тупса ҫыран хӗррине илсе тухнӑ. Халӗ ӗҫ-пуҫа тӗпчеҫҫӗ, инкек сӑлтавне уҫӑмлатаҫҫӗ.
Аса илтерер: ҫӗртме уйӑхӗн 10-мӗшӗнче Улатӑр округӗнчи Ахматово ялӗ ҫывӑхӗнче Улатӑр юханшывӗнче 14 ҫулти арҫын ача путса вилнӗ. Вӑл тусӗсемпе шыва кӗнӗ. Тахӑш самантра шывпа чыхӑнса кайнӑ та путнӑ.
Шупашкар хулинче ҫӑлавпа шырав службин ӗҫченӗсем пӗчӗк ачана пулӑшнӑ. Вӑл ӑнсӑртран «машина тыткӑнне» лекнӗ.
Ведомство пӗлтернӗ тӑрӑх, амӑшӗ машинӑран йӑпӑртлӑха тухнӑ. Ҫав вӑхӑтра вара машина алӑкӗсем хӑйсем тӗллӗн хупӑнса ларнӑ, уҫӑ вара салонра шалта юлнӑ.
Вырӑна ҫитнӗ ҫӑлавҫӑсем алӑка асӑрханса уҫас тесе ятарлӑ хатӗрпе усӑ курнӑ. Телее, ку ӗҫ-пуҫ ӑнӑҫлах вӗҫленнӗ, пӗчӗк ача шар курман.
Ҫӑлавҫӑсем аса илтереҫҫӗ: ачасене машина салонӗнче пӗччен хӑвармалла мар. Алӑксене хупиччен уҫӑ хӑвӑр ҫумра пулнине яланах тӗрӗслемелле.
Канаш округӗнчи Уҫырма ялӗнче 15 ҫулти арҫын ача кӑмака хутма тӑрсан пиҫсе кайнӑ. Ку инкек мунча хутма тӑрсан пулнӑ.
Ҫӗртме уйӑхӗн 13-мӗшӗнче кӑнтӑрла арҫын ача кӑмакана чӗртнӗ чухне газ хатӗрӗпе усӑ курнӑ. Анчах вӑл тӑрук аллинчех ҫунма пуҫланӑ. Кайран ҫулӑм урайне, стена ҫине куҫнӑ. Юрать-ха, арҫын ача урама чупса тухма ӗлкӗрнӗ. Анчах, шел те, хӑй пиҫсе кайнӑ.
Вырӑна пушарнӑйсем ҫитнӗ. Вӗсем 30 тӑваткал метр лаптӑк ҫинче сарӑлнӑ ҫулӑма сӳнтернӗ. Ку ӗҫе 6 ҫӑлавҫӑ тата 2 техника хутшӑннӑ.
Ҫулӑм мунчан тӑррине тата шалти отделкине сиенлетнӗ. Арҫын ачана вара пульницӑна илсе ҫитернӗ.
Палӑртса хӑварар: пӗр талӑкра ҫӑлавҫӑсем 7 пушар сӳнтернӗ. Ҫулталӑк пуҫланнӑранпа вара республикӑра 585 пушар пулнӑ.
Ҫӗнӗ Шупашкар хулинче ачасем лачакана путса ларнӑ та хӑйсем тӗллӗн тухайман. Вӗсене пулӑшу кирлӗ пулнӑ.
Икӗ шӑпӑрлан чиркӳ патӗнчи ҫырмара вылянӑ. Анчах ку алхасни вӗсемшӗн чутах инкекпе вӗҫленмен. Ачасем лачакана самай тарӑн кӗрсе ларнӑ. Юрать-ха, ҫав вӑхӑтра ҫывӑхра иртен-ҫӳрен пулнӑ, ачасем инкеке лекнине асӑрханӑ. Вӗсем пӗр тӑхтамасӑр ҫӑлав службине шӑнкӑравланӑ.
Ҫӑлавҫӑсем вырӑна ҫитсен вӗренпе усӑ курса ачасене хӑвӑртах тухма пулӑшнӑ.
Паян ирхи 6 сехетре Ҫӗнӗ Шупашкарти Парк урамӗнчи 37-мӗш ҫуртра, общежитире, пӳлӗм ҫунма тытӑннӑ. Тӗтӗм сарӑлнине пула 9-мӗш хутри ҫынсем урама хӑйсем тӗллӗн тухайман.
Икӗ ҫынна пулӑшу кирлӗ пулнӑ. Ятарлӑ службӑсем вӗсене ҫуртран тухма пулӑшнӑ. Тепӗр 5 ҫын вара хӑйсемех урама тухма пултарнӑ.
Пушар 5 тӑваткал метр лаптӑка сиен кӳнӗ. Ӑна 7 ҫӑлавҫӑ тата 3 техника сӳнтернӗ.
Сосновка ҫывӑхӗнче Атӑлта пулӑҫ пӑр айне анса кайнӑ. Юрать, ку пысӑк инкекпе вӗҫленмен. Ҫӑлавҫӑсем вӑхӑтра килсе пулӑшнӑ.
Республикӑри шыравпа ҫӑлав служби пӗлтернӗ тӑрӑх, ку ӗнер, пуш уйахӗн 29-мӗшӗнче, пулнӑ. Ҫӑлав службине шанкӑрав ҫитнӗ: икӗ пулӑҫ ҫыран хӗррине ҫитеймеҫҫӗ, пӗри ирӗлнӗ вырӑнта шыва кайнӑ. Ҫӑлавҫӑсем пӗр тӑхтамасӑр пулӑҫсем патне «Ижора» аэрокимӗпе ҫитнӗ. Иккӗшне те ҫыран хӗррине илсе тухнӑ. Унтан вӗсене тухтӑрсене сывлӑхне тӗрӗслеме панӑ.
Ҫӗрпӳ округӗнчи Туҫи ялӗнче пӗр хуҫалӑхра пушар тухнӑ: пысӑк ҫурт ҫунма тытӑннӑ.
Ку инкек ӗнер, пуш уйӑхӗн 26-мӗшӗнче, кӑнтӑрла пулнӑ. Ҫӑлавҫӑсем килнӗ тӗле мансарда ҫуннӑ. Пушара сӳнтерес ӗҫе 3 техника, 11 ҫӑлавҫӑ хутшӑннӑ. Ҫулӑм 200 тӑваткал метр лаптӑк ҫинче сарӑлнӑ. Уҫӑ ҫулӑма 1 сехетрен сарӑлма чарнӑ.
Ҫӑлавҫӑсем ҫулӑма кӳршӗ хуралтӑсем ҫине куҫма паман. Пушарта шар курнисем ҫук.
Елчӗк округӗнчи Кивӗ Эйпеҫ ялӗнче кивӗ чиркӳ ҫунса кайнӑ. Вӑл 150 ҫул каялла, 1881 ҫулта, йывӑҫран хӑпартнӑскер пулнӑ.
Инкек пуш уйӑхӗн 24-мӗшӗнче ҫур ҫӗр хыҫҫӑн ир еннелле, 3 сехет ҫурӑра, пулнӑ. Ҫулӑм йывӑҫ чиркӗве хӑвӑрт ярса илнӗ. Пушарнӑйсем шӑнкӑрав пулсан 14 минутран вырӑна ҫитнӗ. Анчах ҫав вӑхӑт тӗлне ҫулӑм ҫур чиркӗве тӗп тума ӗлкӗрнӗ ӗнтӗ.
Пушар чиркӗве йӑлтах тӗп тунӑ, кирпӗч каркас кӑна юлнӑ. Вырӑна район прокурорӗ Александр Кудряшов ҫитнӗ. Вӑл пушар тӗлӗшпе тӗрӗслев ирттерме хушнӑ.
+1.3 °C