Иртсе кайнӑ канмалли кунсенче пирӗн республикӑри патшалӑхӑн ҫул-йӗр хӑрушсӑрлӑхӗн автоинспекторӗсем 63 ӳсӗр водителе тытса чарнӑ.
«Нетрезвый водитель» (чӑв. Ӳсӗр водитель) рейда утӑ уйӑхӗн 14-16-мӗшӗсенче ирттернӗ. Мероприятие волонтёрсемпе общественниксем хутшӑннӑ. Республикӑн аякри районӗсене ҫул-йӗр патруль службин уйрӑм ятарлӑ батальонне янӑ.
Рейд вӑхӑтӗнче хӗрӗнкӗ 63 водителе тытса чарнӑ. Вӗсен транспортне ятарлӑ стоянкӑна ӑсатнӑ.
Тытса чарнӑ водительсенчен 40 ытларахӑшӗн е водитель прави пулман, е вӗсен правине унчечн туртса илнӗ. Ҫул ҫитмен 7 ҫамрӑк та усӗрле руль умне ларнӑ. Сӑмахран, утӑ уйӑхӗн 16-мӗшӗнче 23 сехет те 30 минутра Йӗпреҫ районӗнче 16 ҫамрӑк мопедпа пынӑ. Хӑйӗн прави те пулман, ҫитменнине тата ӳсӗр пулнӑ.
Шӑмӑршӑ районӗнчи Карапай Шӑмӑршӑ ялӗнче 53 ҫулти арҫынна ывӑлӗпе пӗлӗшӗ вӗлернӗ.
Кӑҫалхи утӑ уйӑхӗн 10-мӗшӗнче арҫыннӑн 28 ҫулти ывӑлӗ тата хайхисемпе пӗр ялта пурӑнакан 37 ҫулти арҫын кил хуҫипе харкашма пуҫланӑ. Хӑна та, арҫыннӑн ывӑлӗ те ӳсӗр пулнӑ. Вӗсем арҫынна тапса-ҫапса пӗтернӗ. Суранланса пӗтнӗ арҫын кӑштахран вилсе кайнӑ.
Алли-урине ирӗке янӑ арҫынсене пакунлисем тытса чарнӑ. Вӗсем тӗлӗшпе РФ Пуҫиле кодексӗн 111-мӗш статйин 4-мӗш пайӗпе килӗшӳллӗн пуҫиле ӗҫ пуҫарнӑ. Халӗ ӗҫе малалла тӗпчеҫҫӗ.
Ҫулталӑк пуҫланнӑранпа пирӗн республикӑра 15 ҫын шыва путса вилнӗ. 15 ҫынтан пиллӗккӗшӗ — ачасем.
Шӑматкун, утӑ уйӑхӗн 8-мӗшӗнче, 16 сехет те 30 минутра 39 ҫулти арҫын пурнӑҫӗ татӑлнӑ. РФ Инкеклӗ ӗҫсен министерствин Чӑваш Енри управленийӗнче пӗлтернӗ тӑрӑх, шар курнӑ Улатӑр арҫынни ӳсӗр пулнӑ тесе шухӑшлаҫҫӗ.
Специалистсем шывра асӑрхануллӑ пулмалли пирки аса илтереҫҫӗ, ятарлӑ вырӑнсенче ҫеҫ шыва кӗме сӗнеҫҫӗ.
Ҫӗнӗ Шупашкарта 28 ҫулти каччӑ 20-ри ҫамрӑка вӗлернӗ. Усал ӗҫ тунӑ этеме тытса чарнӑ.
Тӗпчевҫӗсем шухӑшланӑ тӑрӑх, утӑ уйӑхӗн 1-мӗшӗнче ирхи 5 сехетре Ҫӗнӗ Шупашкарти нумай хваттерлӗ ҫуртсенчен пӗрин картишӗнче 28 ҫулти ӳсӗр ҫамрӑкпа 20-ри ҫамрӑк хушшинче ниме тӑман сӑлтавшӑнах тавлашу сиксе тухнӑ.
Сӑмахпа тавлашнипех ҫырлахман — ҫапӑҫма тытӑнса кайнӑ. Ҫав самантра аслӑрах каччӑ кӗсьерен пекӗ туртса кӑларнӑ та кӗҫӗнреххине унпа кӑкӑрӗнчен яшлаттарнӑ.
Пӑтӑрмаха асӑрханисем васкавлӑ пулӑшу чӗннӗ, анчах каччӑ больницӑри реанимаци уйрӑмӗнче кӑштахран вилсе кайнӑ.
Пӑрачкав районӗнчи пӗр арҫын машинӑсӑр тӑрса юлнӑ. Йӑлтах — хӑй айӑпне пула.
39 ҫулти арҫын автомобиль рулӗ умне унччен те ӳсӗрле ларнӑ. Кӑҫалхи нарӑс уйӑхӗн 12-мӗшӗнче ҫав этем каллех ӳсӗр пуҫпа ҫула тухнӑ. «Нива Шевроле» машинӑпа вӑл «Шупашкар-Сурски-Мишуково-Ардатов» автоҫулпа пынӑ чухне хирӗҫ килекен транспортпа пырса ҫапӑннӑ.
Суд хайхи этеме 2 ҫуллӑха правасӑр хӑварнипех ҫырлахман, машинине конфискациленӗ.
Шупашкар хулинче пӗр ӳсӗр арҫын палламан хӗрарӑма вӗлернӗ.
Пӑтӑрмах ҫу уйӑхӗн 20-мӗшӗнчи каҫхине пулса иртнӗ. Ӳсӗр этем хӗрарӑма тапӑннӑ, ӑна тапса та ҫапса пӗтернӗ. Хӗнекен ҫын хӗрхенсе ҫапмасть ҫав ӗнтӗ. Хӗрарӑма вилмеллех хӗненӗ. Шар курни инкек вырӑнӗнчех куҫне ӗмӗрлӗхе хупнӑ.
Усал арҫын вилене Граждан урамӗнчи гаражсем патӗнче пӑрахса хӑварнӑ.
Хӗрарӑма хӗнесе вӗлернӗ тесе шухӑшлакан ҫынна йӗрке хуралҫисем кӑштахран тупса палӑртнӑ, ӑна вӗсем тытса чарнӑ.
Ҫынна вӗлернӗ тӗслӗхпе пуҫарнӑ тӗпчев халӗ малалла пырать.
Шупашкар хулинчи йӗрке хуралҫисене паян, ҫу уйӑхӗн 16-мӗшӗнче, ирхи 6 сехетре хулара ӳсӗр водителе асӑрхани пирки систерекенсем тупӑннӑ.
«Mерседес» автомобиле тытса пыракан водитель пакунлисем чарӑнма ыйтнине итлемен, вӗсенчен тарса ӳкме хӑтланнӑ. Етӗрне шоссипе Университет урамӗсем хӗресленнӗ вырӑнта машина светофор тӗлӗнче чарӑннӑ «Форд Фокус» автомобиль ҫине пырса кӗнӗ. Инкекре «Фордӑн» 28 ҫулти водителӗ тата салонти пассажир аманнӑ, вӗсене больницӑсене ӑсатнӑ.
«Mерседес» машинӑна тытса пынӑ 33 ҫулти арҫынна руль умне ӳсӗрле ларнӑшӑн 2020 ҫулта явап тытарнӑ иккен-ха, ун чухне хайхин водитель правине туртса илнӗ.
Сӗнтӗрвӑрри районӗнче пурӑнакан 35 ҫулти арҫын тӗлӗшпе пуҫарнӑ пуҫиле ӗҫе суда ярса панӑ.
РФ Следстви комитечӗн Чӑваш Енри управленийӗн пресс-службинче пӗлтернӗ тӑрӑх, пӗлтӗрхи раштав уйӑхӗн 21-мӗшӗнчи каҫхине вӑл Шупашкарти пӗлӗшӗн хваттерӗнче хӑнара пулнӑ.
Ӳсӗр арҫын тем пайлайман-ҫке — кил хуҫине тапса-ҫапса пӗтернӗ. Суранланса пӗтнӗ арҫын инкек вырӑнӗнчех вилсе кайнӑ.
Тӗпчев вӑхӑтӗнче арҫын хулари супермаркетсенчен пӗринчен апат-ҫимӗҫ тата ытти хӑш-пӗр тавара вӑрласа тухни ҫиеле тухнӑ. Ҫавӑн чухне те Сӗнтӗрвӑрри арҫынни ӳсӗр пулнӑ.
Ҫӗмӗрлере 67 ҫулти хӗрарӑма суд тӑвӗҫ. Ӑна РФ Пуҫиле кодексӗн 105-мӗш статйин 1-мӗш пайӗпе суд тӑвӗҫ.
Кӑҫалхи кӑрлачӑн 6-мӗшӗнче ӳсӗр хӗрарӑм хӑйӗн хваттерӗнче упӑшкипе хирӗҫсе кайнӑ. Сӑмахпа калани ҫитмен пек туйӑннӑ курӑнать — алла ҫӗҫӗ ярса илнӗ. Арҫынна вӑл темиҫе хутчен ҫӗҫӗпе чикнӗ. Суранланнӑ этем кӑштахран реанимацире вилсе кайнӑ.
Хӗрарӑм тӗлӗшпе пуҫарнӑ пуҫиле ӗҫе суда ярса панӑ.
Йӗпреҫ районӗнчи Буинск ялӗнче 47 ҫулти арҫынна пӗрле пурӑнакан хӗрарӑма хӗнесе вӗлернӗшӗн суд тенкелӗ ҫине лартӗҫ. Ун тӗлӗшпе РФ Пуҫиле кодексӗн 111-мӗш статйин 4-мӗш пайӗпе маларах пуҫарнӑ пуҫиле ӗҫе тӗпчесе пӗтерсе суда ярса панӑ.
Пӗлтӗрхи чӳк уйӑхӗн 10-11-мӗшӗсенче арҫын пӗрле пурӑннӑ, хӑйӗнчен виҫӗ ҫул аслӑрах хӗрарӑма кӗвӗҫнипе хӗненӗ. Ӳсӗрскер хӗрарӑма кӗленчепе те ҫапса пӗтернӗ.
Йывӑр суранланнӑ хӗрарӑм тепӗр кунхине куҫне ӗмӗрлӗхе хупнӑ.
+10.3 °C