cap.ru сӑнӳкерчӗкӗ

Ӑшӑ хӑҫан парӗҫ. Шупашкар ҫыннисен хваттерте тата нумай вӑхӑт шӑнмалла-и? Хула ҫыннисемшӗн ку ыйтусем халӗ чи пӑшӑрхантараканнисем.

Шупашкар хула администрацийӗн хваттерсене хӑҫан ӑшӑ парассине пӗлтернӗ. Авӑн уйӑхӗн 15-мӗшӗнче ӑшӑ пама пуҫлӗҫ. Ытарикун каҫхине социаллӑ объектсене тата пурӑнмалли ҫуртсене ӑшӑ ҫитме тытӑнӗ.

«Ку йышӑнӑва хула службисемпе пӗрле эрне тӑршшӗпе мӗнле ҫанталӑк тӑрассине шута илсе турӑмӑр. Сывлӑш температури вӑтамран 8 градусран ӑшӑрах пулмӗ», - тенӗ хула администрацийӗн пуҫлӑхӗ Алексей Ладыков.

Шупашкарти Андриян Николаев ячӗллӗ паркри «Ковчег» зоокӗтесре пурӑнакан макака юбилейне паллӑ тунӑ. Маруся ятлӑскер 30 ҫул тултарнӑ.

Макакӑсем 15-20 ҫул кӑна пурӑнаҫҫӗ Анчах ҫак упӑтесене лайӑх пӑхсан вӗсен пурнӑҫӗ вӑрӑмланать, 30-35 ҫул таранах ҫитееҫҫӗ.

Зоокӗтес ӗҫченӗсем палӑртнӑ тӑрӑх, Маруся питӗ ӑслӑ упӑте. Ӑна ҫаралнӑ кунӗнче савӑнтарас тесе уяв сӗтелӗ хатӗрленӗ: грейпфрут, арпус тата хӑяр ҫитернӗ.

ШӖМ тунӑ сӑн

Ҫӗнӗ Шупашкарта икӗ ҫӳп-ҫап контейнерӗ, ача-пӑча каруҫҫелӗ ҫухалнӑ. Ӑҫта кайса кӗнӗ вӗсем? Хулара пурӑнакан ҫын вӑрласа тимӗр-тӑмӑра кайса панӑ иккен.

Ҫурт-йӗр юлташлӑхӗ 1-мӗш май урамӗнчи 27-мӗш ҫурт картишӗнче ҫӳп-ҫап контейнерӗсем, каруҫҫельсем ҫухални пирки полицие пӗлтернӗ. Вӗсем ҫак япаласене кам тиесе тухса кайнине те каланӑ, машина номерне пӗлтернӗ. Ҫав арҫын 55 пин тенкӗлӗх пурлӑх вӑрласа кайнӑ.

Арҫынна тытса чарнӑ. Вӑл Ҫӗнӗ Шупашкарта пурӑнаканскер, 56 ҫулта, унччен судпа темиҫе хутчен айӑпланнӑскер. Ун тӗлӗшпе пуҫиле ӗҫ пуҫарнӑ.

noodlemagazine.com сайтри сӑн

Ҫурла уйӑхӗн 28-мӗшӗнче каҫхине Шупашкарти Горький проспектӗнче сусӑр каччӑ киле лавккаран таврӑннӑ. 3-мӗш ушкӑнри сусӑр патне палламан икӗ арҫын пынӑ.

Хайхискерсем унӑн вӑйсӑрлӑхӗпе усӑ курса ӑна тапӑннӑ, унӑн телефонне туртса илнӗ. Каччӑ кун пирки полицие тӳрех пӗлтернӗ.

Ҫакӑ палӑрнӑ: телефона вӑрланӑ 24-ри тата 35 ҫулти арҫынсем унччен те судпа айӑпланнӑ. Кӗҫех вӗсен телефон вӑрланӑшӑн та суд сакки ҫине ларма тивӗ.

Сусӑра вара телефона тавӑрса панӑ.

Шупашкар хулинче залива юсама тытӑннӑ. Республикӑн влаҫ органӗсен официаллӑ порталӗнче хыпарланӑ тӑрӑх, ӗҫе чӳк уйӑхӗн ҫуррисенче вӗҫлемелле.

Амӑшӗн палӑкӗ умӗнчи лапама тата картлашкасене ҫӗнетесси, шыв сетьне улӑштарасси халӗ малалла пырать. Строительство объекчӗн тӗп архитекторӗ – Филипп Якубчук. Заливра ҫуран тата велосипедпа ҫӳремелли зонӑсем, ача-пӑчапа спорт лапамӗсем, баскетболпа воркаут лапамӗсемпулӗҫ. Юсав ӗҫӗпе тӳре-шарапа пӗрлех паллашнӑ Андрей Михайлов журналист «Хыпар» сайтӗнче пӗлтернӗ тӑрӑх, «залив хӗрринче пирс тунӑ, 1,5 пин тӑваткал метр брусчатка сарнӑ, дамба ҫине боллардсемпе, вырӑн-вырӑнпа асфальт сарнӑ, светильниксене улӑштарӗҫ, йывӑҫсемпе тӗмсем лартӗҫ».

cap.ru сӑнӳкерчӗкӗ

Ҫурла уйӑхӗн 30-мӗшӗнче Шупашкарта пӗчӗк ача ӑнсӑртран хваттерте питӗрӗнсе ларнӑ. Чӑваш Енри шыравпа ҫӑлав службин ӗҫченӗсем 2 ҫулти пепкене пулӑшма ҫитнӗ.

Ҫӑлавҫӑсем патне шӑнкӑрав каҫхи 7 сехетре ҫитнӗ. Ашшӗ-амӑшӗ пӗлтернӗ тӑрӑх, вӗсен ачи хваттерте ӑнсӑртран питӗрӗнсе ларнӑ, аслисем алӑка хӑйсем тӗллӗн уҫайман.

Ҫӑлавҫӑсем вырӑна ҫитсен «Умелец» наборпа алӑка уҫма пултарнӑ. Ача пӳлӗмре ларнӑ, унпа нимӗн те пулман.

"Про Город" сайтран илнӗ сӑн

ЧР Инкеклӗ лару-тӑру министерстви паян республикӑра хӑрушсӑрлӑхӑн «хӗрлӗ сарӑ» шайӗ пулнине пӗлтернӗ. Ҫанталӑк чӑнах та лайӑхах мар пулчӗ, ҫумӑр ҫунӑ чухне ҫил самай вӑйланчӗ.

Шупашкарта вӑйлӑ ҫил йывӑҫсене ӳкернӗ, пралуксене татнӑ. Кун пек хыпарсене «Про Город» хаҫата халӑх корреспонденчӗсем пӗлтернӗ.

Уруков урамӗнче йывӑҫсем ӳкнӗ, палуксем татӑлнӑ. 11-мӗш ҫурт ҫывӑхӗнче йывӑҫ персе анса машинӑна лекнӗ. Ҫавӑн пекех унта электричество кабелӗ татӑлнӑ.

Ҫӗнӗ Шупашкарта кордодром уҫӑлнӑ. Самолетсен авиамоделӗсене вӗҫтермелли нумай функциллӗ лапама авӑн уйӑхӗн 2-мӗшӗнче уҫнӑ.

Савӑнӑҫлӑ мероприяти чӑваш космонавчӗн Андриян Николаевӑн ҫуралнӑ кунӗ умӗн иртни ахальтен мар. «Чайка» авиамодель клубӗн хастарӗсемшӗн вӑл тӗслӗх вырӑнӗнче.

Сӑмах май, кордодрома 2012 ҫулта тума тытӑннӑ. Анчах ку ӗҫ вӑраха тӑсӑлнӑ. Пӗлтӗр лару-тӑру йӗркеленнӗ, строительство малалла кайнӑ. Ҫӗнӗ Шупашкар хула администрацийӗ ун валли, асфальт хумашкӑн, 3,5 миллион тенкӗ уйӑрнӑ. Кунсӑр пуҫне «РусГидро» 880 пин тенкӗ уйӑрнӑ.

bez-ostanovki.ru сайтри сӑн

Шупашкарти Ленин районӗн загсӗнче ҫурла уйӑхне пӗтӗмлетнӗ. Хӑш-пӗр ашшӗ-амӑшӗ ачине сайра тӗл пулакан ят панӑ. Унашкаллисем 15 ҫемье пулнӑ.

Ҫурла уйӑхӗнче ку районта хӗрача нумайрах ҫуралнӑ: 74 ача. Арҫын ачасем вара 58 пулнӑ.

Сайра тӗл пулакан ятсен хушшинче ҫаксем: Лея, Василиса, Камилла, Серафима, Анисия, Аглая, Эмилия, Мия, Федор, Давид, Григорий, Демьян, Родислав, Лев, Семен.

Аглая ята тӑтӑшах хумаҫҫӗ. Вӑл Авалхи Грецирен килнӗ, «илем», «савӑнӑҫ» тенине пӗлтерет.

Шупашкарта 17 ҫулти яша шыранине Чӑваш халӑх сайчӗ икӗ хутчен те пӗлтерчӗ.

Каччӑна маларах «Лиза Алерт» шырав ушкӑнӗ шыранине хыпарларӗ, ӗнер — ЧР Шалти ӗҫсен министерствипе РФ Следстви комитечӗн Чӑваш Енри управленийӗ.

Паян ырӑ хыпар пӗлтӗмӗр. Ҫурла уйӑхӗн 24-мӗшӗнче 19 сехет тӗлӗнче велосипедпа тата палаткӑпа тухса кайнӑ Тимур Мохаммад Азадович Миа тупӑннӑ. Вӑл таса сывах. Ӑна никам та хур туман.

Йӗрке хуралҫисем яша шырама пулӑшнӑ ҫынсене тав тунӑ, каччӑ тупӑннине пӗлтернӗ. Яш 10 кун таран ӑҫта пулнине официаллӑ хыпарта ӑнлантарса тӑман.