Шупашкар хулинчи тӳре-шара тӗп пасар умӗнче ларакан скульптурӑна – хӗвелҫаврӑнӑш сутакан карчӑка – илсе пӑрахасшӑннине Чӑваш халӑх сайчӗ пӗлтернӗччӗ. Аса илтерер: палӑк шӑпине татса парас ыйтупа хула администрацийӗ «Уҫӑ хула» порталта сасӑлав ирттерчӗ.

Ҫынсен самай пайӗ шухӑшланӑ тӑрӑх, скульптурӑна тӗкӗнме кирлӗ мар. Сасӑлава хутшӑннӑ 2276 ҫынран 72,98 проценчӗ, е 1661 ҫын, бронза палӑк хӑй вырӑнӗнчех юлтӑр тесе каланӑ. 27,02 проценчӗ пасар территорине куҫарса лартмалла тенӗ.

300 килограмм таякан пӑхӑр скульптурӑна 2016 ҫул вӗҫӗнче лартнӑ. Кайран ӑна илсе пӑрахнӑ, анчах 2017 ҫулта ҫӗнӗрен вырнаҫтарнӑ.

Шупашкар администрацийӗнче пӗлтернӗ тӑрӑх, юпа уйӑхӗн 16-мӗшӗнчен хулари 7-мӗш тата 22-мӗш номерлӗ автобуссене пӗрлештерӗҫ.

7-мӗш маршрута «4-мӗш лицей» чарӑну патне ҫити тӑсма палӑртнӑ, 22-мӗшне — пӑрахӑҫлама. Пӗрлештернӗ маршрутпа 18 автобус хутлӗ. Хальхи вӑхӑтра шӑп та лӑп ҫавӑн чухлӗ единица техника асӑннӑ икӗ маршрутпа ҫӳрет. Кирлех пулсан транспорт шутне ӳстерме шантараҫҫӗ.

Ҫӗнӗ йышӑну ҫынсене Введени соборӗ тата хулари П.Н. Осипов ячӗллӗ пӗрремӗш больница патне ҫитме май парӗ тата Алькеш поселокне хулан кӑнтӑр-хӗвеланӑҫ тата ҫурҫӗр-хӗвеланӑҫ районӗсемпе ҫыхӑнтарӗ.

Ранее «Правда ПФО» писала о трудностях с проведением в Чувашии конкурсов на перевозки по маршруту «Чебоксары-Новочебоксарск».

"На связи" сайтри сӑн

Арҫыннӑн урине тӑм илсен тухтӑрсем унӑн сылтӑм енчи пӳрнисене тата сулахай уринчи ҫур тупанне татнӑ. Анчах пациент урӑхла шухӑшлать: шурӑ халатлисем вӗсене татмасӑрах сиплеме пултарнӑ. Ҫавӑнпа вӑл тухтӑрсене суда панӑ.

Арҫын урине темиҫе ҫул каяллах тӑм илтернӗ. Хирург патне кайнӑ, лешӗ тепӗр кунхине сурана тасатма килме хушнӑ. Темиҫе кунран арҫын каллех хирург патӗнче пулнӑ, лешӗ ним пӑхмасӑр ӑна стационара выртма направлени панӑ. Унта ӑна тепӗр кунхине пӑхнӑ, нимӗн те туман. Виҫҫӗмӗш кунхине операци туса татнӑ. Ҫапла ҫырнӑ арҫын суда тӑратнӑ тавӑҫра.

Операци хыҫҫӑн вӑл ӗҫлеймест. Ҫавӑнпа вӑл Ҫӗнӗ Шупашкарти хула пульницин хирурги уйрӑмӗн тухтӑрӗсенчен 2 млн тенкӗ шыраса илесшӗн пулнӑ. Анчах суд тавӑҫа тивӗҫтермен.

«Начар шӳт-и е лайӑх антитеррор-и? Шупашкарти колледжра никам та пемен». Ҫакӑн пек хыпарланӑ паян кӑнтӑрла «Ҫыхӑнура» форумра «Антидилер» юхӑм пӗлтернине шута илсе.

Юпа уйӑхӗн 6-мӗшӗнчи ҫӗрле темле ҫамрӑк Шупашкарти строительство техникумне пырассине, унта перессине пӗлтернӗ имӗш.

Ҫийӗнчех ку хыпара мӗнпур ятарлӑ службӑсене систернӗ, колледжа

Федерацин хӑрушсӑрлӑх службин республикӑри управленийӗн, полици тата Росгварди ӗҫченӗсем пырса ҫитнӗ.

Хыпара такам шӳтлесе пӗлтернӗ-и е чӑнласах усал тума ӗмӗтленнӗ-и — ҫакна Федерацин хӑрушсӑрлӑх службин республикӑри управленийӗн ӗҫченӗсем палӑртӗҫ.

Строительство техникумӗнче паян занятисем иртнӗ. Ҫуртра хӗрарӑм-хуралҫӑсемпе пӗрлех пакунлисем ӗҫленӗ.

Ырантан, юпа уйӑхӗн 6-мӗшӗнчен, маска тӑхӑнман пассажирсене общество транспортне кӗртме пӑрахӗҫ. Ҫапла асӑрхаттарать Шупашкар хула администрацийӗн ЖКХ, энергетика, транспорт тата ҫыхӑну управленийӗ.

Ырантан йӗрке ҫирӗп пулӗ: маска тӑхӑнман пассажира билет сутмӗҫ. Ҫак йӗркене пӑхӑнманнисене салона кӗртмӗҫ. Административлӑ йӗркене пӑснӑшӑн протокол ҫырма тивӗҫлӗ ҫынсене чӗнсе илме пултарӗҫ.

Аса илтерер: республикӑра маска тӑхӑнмалли режима пӗлтӗр ҫӗртме уйӑхӗн 20-мӗшӗнче йышӑннӑ.

Шупашкарти ҫӗнӗ троллейбус

Чӑваш Ен ертӳҫисем троллейбуссене перекетлӗ те тухӑҫлӑ ӗҫлеттерме пуҫласшӑн. Ҫав тӗллевпе туртакан подстанцисене модернизацилӗҫ. Асӑннӑ хатӗрсем троллейбуссене ҫутӑпа тивӗҫтереҫҫӗ.

Подстанцисене ҫӗнетни электроэнерги тӑкакне 40-50 процент таран пӗчӗклетме май парӗ. Модернизаци валли кирлӗ укҫа-тенке инфраструктура кредичӗн пӗр пайӗнчен илесшӗн. Ҫак хыпара республика Элтеперӗ Олег Николаев «Регнум» информаци агентствине пӗлтернӗ.

Троллейбус управленийӗсем (Шупашкарти те, Ҫӗнӗ Шупашкарти те) тӑкаклӑ ӗҫлеҫҫӗ. Шупашкарти управлени ҫутӑ парӑмне юлашки 5 ҫулта ниепле те тӳлесе татаймасть. 2017 ҫул вӗҫӗнче энергетиксен умӗнчи парӑм 149 миллион тенке ҫывхарнӑччӗ. Ҫавӑн чухне муниципалитет предприятийӗ панкрута тухасси патнех ҫитнӗччӗ. Ун чухне парӑма реструктуризацилени йывӑрлӑхран тухма пулӑшрӗ.

cheb-eparhia.ru сайтри сӑн

Шупашкарта ҫӗнӗ аллея пулӗ. Кедр йывӑҫӗсене Ленин Комсомолӗн урамӗнчи 68-мӗш ҫуртӑн 3-мӗш корпусӗпе юнашар лартнӑ.

Ку ӗҫе Шупашкар епархи управленийӗн элчисем, «Союзспецодежда» суту-илӳ ҫурчӗн ӗҫченӗсем хутшӑннӑ. Хунавсене тата пулас аллея вырӑнне Шупашкар епархийӗн секретарӗ Иов Маркелов иероманах сӑвапланӑ. Кӑҫал Шупашкар-Чӑваш Ен епархийӗ 75 ҫул тултарать. Аллейӑна шӑпах ҫак юбилея халалласа уҫнӑ та.

Йывӑҫ хунавӗсене вара, Ҫӗпӗр кедрӗсене, «Союзспецодежда» суту-илӳ ҫурчӗ парнеленӗ. Пӗтӗмпе – 7- хунав. Вӗсене Шупашкарти питомникре ӳстернӗ.

panoramapro.ru сайтри сӑн

Авӑн уйӑхӗн 29-мӗшӗнче Шупашкарта пурӑнакан 44 ҫулти хӗрарӑм полицие пырса банк карточкине ҫухатни пирки пӗлтернӗ. Кун хыҫҫӑнах унӑн карточки ҫинчен 2500 тенкӗ ытларах ҫухалнӑ.

Полицейскисем палӑртнӑ тӑрӑх, хӗрарӑм ҫав кун лавккара тавар туяннӑ, киле кайнӑ чухне карточкӑна ҫухатса хӑварнӑ. Вӑл ӑна киоск умӗнче ӳкернӗ. Шӑпах ҫав киоскра карточка ҫинчен ҫухалнӑ укҫапа такам таваршӑн тӳленӗ.

Карточкӑна унти сутуҫӑ тупнӑ иккен. Вӑл хӑйӗн киоскӗнче унпа усӑ курса апат-ҫимӗҫ туяннӑ. 38 ҫулти хӗрарӑма йӗрке хуралҫисем тытса чарнӑ. Вӑл айӑпне йышӑннӑ, тӑкака саплаштарма шантарнӑ.

вести35.рф сайтри сӑн

Банкра ӗҫлекен 36 ҫулти хӗрарӑм авӑн уйӑхӗн 30-мӗшӗнче полицие пырса пулӑшу ыйтнӑ. Вӑл ултавҫӑсен аллине лекнӗ.

Ҫӗнӗ Шупашкарта пурӑнакан хӗрарӑм каласа кӑтартнӑ тӑрӑх, ун патне палламан ҫын шӑнкӑравланӑ, вӑл та банк ӗҫченӗ, унпа пӗрле кредит уйрӑмӗнче тӑрӑшать тесе паллаштарнӑ. Хайхисер пӗлтернӗ тӑрӑх, такам унӑн счечӗсене хапсӑнать. Ку палламан ҫынна хӑйӗн карточкин реквизичӗсене пӗлтернӗ. Кун хыҫҫӑн унӑн счечӗ ҫинчен 80 пин тенке яхӑн ҫухалнӑ.

Кун тӗлӗшпе пуҫиле ӗҫ пуҫарнӑ.

smartik.ru сайтри сӑн

Тивӗҫлӗ канури хӗрарӑм банк картти тупнӑ та унпа лавккара тавар туяннӑ. Халӗ ун куншӑн судра явап тытма тивӗ.

ШӖМ пӗлтернӗ тӑрӑх, авӑн уйӑхӗн 25-мӗшӗнче ача пахчин воспитателӗ полицие пырса карточки ҫинчен такам 3 пин тенкӗ вӑрланине пӗлтернӗ. Йӗрке хуралҫисем ҫакна тивӗҫлӗ канури хӗрарӑм тунине палӑртнӑ.

Ҫӗнӗ Шупашкарта пурӑнакан 73 ҫулти хӗрарӑм тӗлӗшпе пуҫиле ӗҫ пуҫарнӑ. Вӑл айӑпне йышӑнса тӑкака саплаштарма шантарнӑ.