Ҫӗпӗр мурне пула Ҫӗрпӳ тата Сӗнтӗрвӑрри районӗсенче тискер чӗрчунсене тытассине чикӗленӗ. Ку хушӑва ЧР Элтеперӗ Олег Николаев пуш уйӑхӗн 29-мӗшӗнче алӑ пуснӑ.

Хушура палӑртнӑ тӑрӑх, чӗрчунсене тытассине ака уйӑхӗн 30-мӗшӗччен чикӗленӗ.

Ытларах чухне Ҫӗпӗр мурӗ чӗрнеллӗ чӗрчунсем чирлеҫҫӗ. Ҫапах хир сыснисем, тилӗсем, йӗкехӳресем инфекциленнине те палӑртнӑ.

cap.ru сӑнӳкерчӗкӗ

Чӑваш Енре кӑҫалхи кӗркунне урӑлтаркӑч уҫӑлӗ. Кун пирки республика Элтеперӗ Олег Николаев пӗлтернӗ.

Шупашкарта урӑлтаркӑч уҫас ыйтӑва пӗлтӗр тӗрлӗ ларура пӗрмаях сӳтсе явнӑ. Вӗсене Чӑваш Енӗн Шалти ӗҫсен министерствин ӗҫченӗсем, ытти ведомствӑпа министерствӑра тӑрӑшакансем хутшӑннӑ.

Паянхи куна илсен урӑлтаркӑч хӑш тӗлте пуласси татӑклӑн паллӑ мар-ха, ӑна каярах пӗлтерӗҫ.

Аса илтерер: хӑй вӑхӑтӗнче урӑлтаркӑчсене хупса пӗтернӗччӗ. 2021 ҫулхи кӑрлачӑн 1-мӗшӗнченпе 464-мӗш номерлӗ федераци саккунӗ вӑя кӗчӗ. Эрех ӗҫсе ӳсӗрӗлнӗ е наркотикпа е ытти ҫавӑн пек япалапа минренисене пулӑшма урӑлтаркӑчсем уҫмалла.

kidsbebus.ru сайтри сӑнукерчӗк

ЧР Юстици ӗҫӗсен патшалӑх служби сайра тӗл пулакан ятсен ТОПне хатӗрленӗ. Ашшӗ-амӑшӗ ачисене мӗнлерех ятсем хураҫҫӗ-ха?

Арҫын ачасен хушшинче сайра тӗл пулакан ятсен ТОП-8: Ганим, Родриго, Одилжон, Авель, Елизар, Джабраил, Деомид, Араз.

Хӗрачасен ТОПне вара ҫаксем лекнӗ: Бушро, Эилин, Евника, Кириена, Гомирис, Сумая, Тея, Осия.

Арҫын ачасене ытларах Матвей ят хунине палӑртнӑ, хӗрачасене - София.

yakutia.mk.ru сайтри сӑн

Ҫӗнӗ Шупашкарти арҫын 19 ҫул каяллах ҫухалнӑ. Анчах вӑл ав халӗ таврӑннӑ.

Хӑй вӑхӑтӗнче, 2007 ҫулта, ӑна хыпарсӑр ҫухалнисен йышне кӗртнӗ. Арҫын халӗ таврӑнсан ӑнлантарнӑ тӑрӑх, вӑл тӗрлӗ хулара 2004 ҫултанпа вахта мелӗпе ӗҫленӗ.

Арҫын таврӑннине кура суд вӑл хыпарсӑр ҫухалнӑ тесе йышӑннине пӑрахӑҫланӑ.

chuvashia.sledcom.ru сайтран илнӗ сӑн

Юсанмалли 9-мӗш колони пуҫлӑхӗ тӗлӗшпе пуҫиле ӗҫ пуҫарнӑ. Вӑл ӗҫ вырӑнӗпе усӑ курнӑ тесе шутлаҫҫӗ.

2022 ҫулхи кӑрлач-раштав уйӑхӗсенче вӑл айӑпланнӑ пӗр ҫынна, лешӗ шалти йӗркене пӑснӑ пулин те, явап тыттарман. Ытти ӗҫчене те ҫав ҫынна тӗкӗнме хушман.

Кунсӑр пуҫне пуҫлӑх айӑпланнӑскере ҫӑмӑллатнӑ условисем ҫине куҫма пулӑшасшӑн пулнӑ. Ҫавна май лайӑх характеристика панӑ, документсене алӑ пуснӑ.

мосдольщик.рф сӑнӳкерчӗкӗ

Чӑваш Енре ӗҫ укҫине вӑхӑтра тӳлемен предприятисемпе организацисем паян кун та пур. Пуш уйӑхӗн 23-мӗшӗ тӗлне илсен, ӗҫ укҫин парӑмӗ — 26,4 миллион тенкӗ. Ҫав суммӑна 18 организацире пухса тултарнӑ, пурӗ 694 ҫын шалу кӗтсе пурӑнать.

Чӑваш Енӗн Ӗҫ тата социаллӑ хӳтлӗх министерствинче пӗлтернӗ тӑрӑх, парӑм пухса янин тӗп сӑлтавӗ — организацисен укҫа ҫукки, вӗсенче производство калӑпӑшӗ чакни, пурнӑҫланӑ ӗҫшӗн заказчиксем вӑхӑтра тӳлеменни.

Республикӑн Ӗҫ инспекцине кӑҫалхи икӗ уйӑхра ӗҫ укҫин парӑмӗ пирки 74 ҫын ҫӑхавланӑ. Яваплисем тӗрӗслевпе надзор ӗҫӗ ирттернӗ хыҫҫӑн предприяти-организацисем 127 ҫын умӗнчи 7,3 миллион тенкӗ парӑма тӳлесе татнӑ.

Владимир Михайлов 2015 ҫулта тунӑ сӑн

Йӗпреҫри автовокзалта - автоматизациленӗ тытӑм. Унта алӑксем хӑйсемех уҫӑлса хупӑнаҫҫӗ. Ҫапла майпа пассажир вокзал хупӑнсан та унта кӗме пултарать. Кун валли алӑк патӗнче пускӑча кӑна пусмалла. Сигнал диспетчер патне ҫитет те вӑл алӑка уҫать.

Кунсӑр пуҫне вокзалта ЖК-телевизор пур. Унта автобуссемпе пуйӑссен расписанийӗ курӑнать. Ҫавӑн пекех залри сывлӑш температурине палӑртать вӑл. Вокзала видеокамерӑсем вырнаҫтарнӑ. Аудио- тата видеороликсем те курма пулать.

cap.ru сӑнӳкерчӗкӗ

Комсомольски районӗнче икӗ арҫын ача пӗве патӗнче пӑр тӑрӑх ҫӳренӗ те каялла тухайман. Ара, пӑр ҫӳхе. Паллах, вӗсем хӑраса кайнӑ.

Вӗсене пулӑшма пушар хуралӗн ӗҫченӗсем - пай пуҫлӑхӗ Иван Ананьев тата уйрӑм командирӗ Алексей Вунберов - ҫитнӗ. Вӗсем пусма-патакпа усӑ курса ачасене ҫыран хӗррине тухма пулӑшнӑ.

Унта вӗсен сывлӑхне тӗрӗслесе киле янӑ. Ачасем аманман, хӑранӑ кӑна.

Патӑрьел районӗнчи Люля поселокӗнче ейӳ сарӑлнӑ. Вырӑна район прокурорӗ, администраци ӗҫченӗсем ҫитнӗ.

Люля юханшывӗнче шыв шайӗ хӑпарнӑ. Ҫавна май ҫак ятлӑ поселокра ҫулсене шыв илнӗ.

Прокуратура яваплӑ органсем ейӳпе мӗнле кӗрешнине тӗрӗслӗ. Халӗ шыв шайӗ чакма пуҫланӑ. Поселокра та ейӳ чакма пуҫланӑ.

Ҫӗрпӳ районӗнчи Кивӗ Тутайкассинче Ҫӗпӗр мурӗпе чирленӗ вӑкӑра пусни пирки хыпарласах тӑнӑччӗ. Юлашки хыпар инфекциллӗ какая Шупашкар районӗнче Явӑш ялӗнче пурӑнакансем туянни пирки пулнӑччӗ.

Ҫав ҫынсем мӗн чухлӗ аш туяннине палӑртнӑ: 50 килограмм. Ҫав хуҫалӑхра дезинфекци тунӑ.

Кивӗ Тутайкассинче вара хальлӗхе карантин. Унта тислӗке ҫунтараҫҫӗ. Ҫӗпӗр мурӗпе чирленӗ ҫынсен хуҫалӑхӗнче тепӗр вӑкӑр тата пӗчӗкрех выльӑхсем пур. Вӗсем сывах пулнине палӑртнӑ.