Чӑваш наци радиовӗн архивӗнчи сӑнӳкерчӗк

Шупашкар районӗнчи тӑватӑ ялта кӑҫал фельдшерпа акушер пункчӗсем тӑвассине эпир унчечн пӗлтернӗччӗ-ха. Етӗрне тӑрӑхӗнчи Вӑрманкас Асламасра та фельдшерпа акушер пункчӗ хӑпартма тытӑннӑ.

Чӑваш наци радиовӗ пӗлтернӗ тӑрӑх, строительсем никӗс хывнӑ. Вӑрманкас Асламас ялне хальхи вӑхӑтра «автобус ҫинчи медпункт килсе ҫӳрет, тухтӑрсене ял-йыша тӗрӗслеме май парать».

Ҫӗнӗ фельдшерпа акушер пунктне ҫӑва тухсан хута ярӗҫ.

Маларах асӑннӑ ҫӑлкуҫ пӗлтернӗ тӑрӑх, ҫӗнӗ медпункт Ҫӗрпӳ тӑрӑхӗнчи Рынкӑ салинче пулӗ.

Владимир Викторов страницинчен илнӗ сӑнӳкерчӗк

Шупашкар районӗнчи темиҫе ялта кӑҫал ҫӗнӗ фельдшерпа акушер пункчӗсене тума палӑртнӑ. Вӗсенчен пӗрне, Вӑрманкас Тӑрӑнтине, хӑпартнипе паллашма Шупашкар районӗнчи тӗп больницӑн тӑп тухтӑрӗ Владимир Викторов нумаях пулмасть вырӑна ҫитсе килнӗ.

Унта хальхи вӑхӑтра ӗҫе пуҫӑннӑ, кӗҫех никӗс яма тытӑнӗҫ.

Кӑҫал Шупашкар районӗнче 4 ФАП тума палӑртса хунӑ. Ҫав шутра — Уйкасра, Хыркассинче, Ваҫликассинче.

cap.ru сӑнӳкерчӗкӗ

Республикӑн клиника онкологи диспансерӗнче хырӑм ай пырӗнче усал шыҫӑ пуррипе ҫуккине палӑртма ҫӗнӗ йышши меслетпе усӑ кураҫҫӗ.

Асӑннӑ меслет ультрасасӑпа эндоскоппа ҫыхӑннӑ. Ҫав мел эндосонографи (эндоУЗИ) ятлӑ. Кӑҫалхи икӗ уйӑхра ҫав меслетпе 13 ҫынна тӗрӗсленӗ.

Тӗрӗслеве организма пӗтӗмӗшле наркоз тунӑ хыҫҫӑн ирттереҫҫӗ иккен. Пӗр ҫынна тӗрӗслеме 1,5-2 сехет иртет.

Стопкоронавирус.рф сайтри сӑн

Юлашки вӑхӑтра кӑшӑлвирус пирки калаҫма пӑрахрӗҫ тесен те юрать. Анчах ку чир пӗтмен-ха. Чирлекенсем кӑна мар, вилекенсем те пур.

Иртнӗ талӑкра республикӑра 20 ҫын инфекциленнине палӑртнӑ. 41 ҫын сывалнӑ. 11 ҫынна пульницӑна вырттарнӑ.

Нарӑс уйӑхӗнче 6 ҫын кӑшӑлвируса парӑнтарайман. Нарӑсӑн 22-мӗшӗнче ӑна пула 2 ҫын вилнӗ. Танлаштармашкӑн: кӑрлач уйӑхӗнче – 9 пациент, раштавра - 5 ҫын, чӳк уйӑхӗнче 3 ҫын кӑшӑлвируса пула пурнӑҫран уйрӑлнӑ.

https://vk.com/wall-35906750_197507 страницӑран илнӗ скриншот

Шупашкар районӗнче пурӑнакан пӗр арҫын Кӳкеҫре вырнаҫнӑ поликлиникӑпа стационар территорине таксистсене кӗртменшӗн пӑшӑрханнине халӑх тетелӗсенчен пӗринче пӗлтернӗ.

Тӗрӗсрех каласан, таксистсене кӗртеҫҫӗ-ха, ҫуран пулсан. Автомобильсене вара чараҫҫӗ.

Арҫын пӗлтернӗ тӑрӑх, вӑл кӑнтӑрлахи стационарта сипленет. Ирпе тата каҫпа ӑна капельница лартаҫҫӗ. Анчах хӗрарӑм-хуралҫӑ таксие шлагбаумран ирттермест иккен. «Мӗншӗн манӑн сивӗре урама тухмалла? Енчен эпӗ хама япӑх туятӑп пулсан...», — тенӗ арҫын.

Район больницин администрацийӗнче пӗлтернӗ тӑрӑх, сывлӑх сиплев учрежденийӗн территорине ятарлӑ транспорта ҫеҫ кӗртме пӑхса хӑварнӑ. Ҫитменнине халӗ тата терроризмпа ҫыхӑннӑ хӑрушсӑрлӑх мерисене те пӑхӑнма тивет.

cap.ru сӑнӳкерчӗкӗ

Чӑваш Енӗн сывлӑх сыхлав министрӗ Владимир Степанов салтаксен шӑлне юсанӑ тухтӑрсене чысланӑ. Ҫав енӗпе Шупашкар хулинчи стоматологи поликлиникинче ӗҫлекен стоматологсем тӑрӑшнӑ. Вӗсем мобилизациленӗ 1000 ытла салтак шӑлне юсанӑ.

Шӑл тухтӑрӗсем Чӗмпӗре кайнӑ. Мобилизациленисен унти вӗренӳ центрне ҫитсе пулӑшу кӳнӗ. Ҫав енӗпе 2022 ҫул вӗҫӗнче Хулари стоматологи поликлиникин 13 тухтӑрӗ тимленӗ.

Чӑваш Енри стоматологсем ҫӗршывӑн тӗрлӗ кӗтесӗнчи салтаксене 938 пломба лартнӑ, кариеслӑ пине яхӑн шӑла юсанӑ, шӑл та кӑларма тивнӗ.

forum.zarulem.ws порталтан илнӗ сӑнӳкерчӗк

Чӑваш Енре чирлисене вертолётпа больницӑна илсе каякан организацие ылмаштарнӑ. Кӑҫалхи ака уйӑхӗн 1-мӗшӗнчен ҫак енӗпе «Национальная служба санитарной авиации» (чӑв. Санитари авиацйӗн наци служби) акционер обществи ӗҫлеме тытӑнӗ.

Аукциона пӗртен-пӗр организаци ҫеҫ хутшӑннӑ. Ҫулталӑк вӗҫӗччен вӑл ӗҫе 35 миллион та 943 пин тенкӗпе пурнӑҫласа тӑма килӗшнӗ. Тепӗр майлӑ каласан, 1 сехет вӗҫнишӗн 219 пин тенкӗ тенкӗ тӳлемелле.

2020-2022 ҫулсенче пирӗн республикӑра «Русские вертолетные системы» (чӑв. Вырӑс вертолёт тытӑмӗсем) общество ӗҫленӗ.

t.me/Chuv_today каналтан илнӗ сӑнӳкерчӗк

Канашра ҫуралнӑ Кирилл Баранов «СмартКардио» портативлӑ аппарат шухӑшласа кӑларнӑ. Пӗччен мар. Темиҫен пӗрле пулса.

Мини-гаджет пӗр харӑсах темиҫе ӗҫ пурнӑҫлама пултарать-мӗн: электрокардиограмма ӳкерсе илет, юнри гемоглобинра кислород мӗн чухлине, ӳт температурине, ҫын епле сывланине, юн тымарӗ епле тапнине виҫейрет.

«Халӗ эпир телемедицина сервисне шухӑшласа кӑлараканпа ҫыхӑну тытса ӗҫлетпӗр. ЭКГ ӳкерсе илнӗ хыҫҫӑн ҫывӑх вӑхӑтра онлайн-консультаци илме май килӗ. Ҫакӑ пирӗн прибора ыттисенчен уйрӑлса тӑма май парать, тӗнчере ун пекки ҫук», — тесе каланӑ Кирилл.

Стопкоронавирус.рф сайтри сӑн

Раштав уйӑхӗнче республикӑра 5 ҫын кӑшӑлвирусран вилнӗ, кӑрлач уйӑхӗнче - 9 ҫын. Эппин, ку инфекцирен вилесси 2 хут ӳснӗ.

Стопкоронавирус.рф сайт пӗлтернӗ тӑрӑх, кӑрлачӑн 22-28-мӗшӗсенче 6 ҫыннӑн пурнӑҫӗ татӑлнӑ. Пӗлтӗр юпа уйӑхӗнче 12 ҫын вилнӗ, чӳк уйӑхӗнче - 3 ҫын.

Пандеми пуҫланнӑранпа республикӑра 4706 ҫыннӑн пурнӑҫӗ кӑшӑлвируса пула татӑлнӑ.

cap.ru сӑнӳкерчӗкӗ

Шупашкарти Президент пепкелӗх центрӗнче пӗлтӗр чӳк уйӑхӗнче 890 грамм таякан, 32 сантиметр ҫӳллӗш хӗрача ҫуралнӑ. Амӑшӗ пульницӑна чылай маларах лекнӗ, тухтӑрсем варти пепкене упраса хӑварас тесе тӑрӑшнӑ. Ҫапах ача кун ҫути курма васканӑ - вӑл 28-мӗш эрнере ҫуралнӑ.

Ача 1,5 уйӑх реанимацире выртнӑ. Кайран ӑна тин ҫуралнӑ ачасен патологи уйрӑмне куҫарнӑ. Унта амӑшӗ те пӗрле выртнӑ. Офтальмологсем ачан куҫне операци тунӑ.

Кан хыҫҫӑн виҫӗ эрнерен пепкепе амӑшне киле кӑларнӑ. Ача 2,5 кг тайнӑ, 44 сантиметр тӑршшӗ пулнӑ.