ridus.ru сайтри сӑн

Ҫу уйӑхӗн 30-мӗшӗнче чикӗ леш енчен тепӗр 6 ҫын Чӑваш Ене таврӑннӑ. Вӗсем Германире, Индонезире, Турцире, Иорданире тата Индонезире пулнӑ.

Тепӗр ҫын Аслӑ Британире каннӑ, вӑл та тӑван тӑрӑха таврӑннӑ. Вӗсене пурне те Мускаври «Шереметьево» аэропортне илсе килнӗ. Чикӗ леш енчен таврӑннӑ ҫынсем Чӑваш Ене ҫитсенех вӗсене обсерватора 14 кунлӑха вырнаҫтарӗҫ.

Чикӗ леш енне кайнӑ республика ҫыннисем пурте таврӑнайман-ха. Тепӗр 287 ҫын ют тарӑхра, вӗсенчен 38-шӗ – ачасем. Чылайӑшӗ Таиландран, АПШран, Индирен таврӑнаймасть.

Палӑртмалла: ака уйӑхӗн 10-мӗшӗнченпе республикӑна 88 ҫын чикӗ леш енчен таврӑннӑ.

Паян Шупашкар тата Чӑваш Ен митрополичӗ Варнава вилнӗ. Вӑл 89 ҫулта пулнӑ. Унӑн ӳпки икӗ енӗпе шыҫнӑ. Вӑл пульницӑра выртнӑ.

Варнава хӑйӗн ӗмӗрӗн пысӑк пайне, 43 ҫулне, Чӑваш Енре ирттернӗ. Ӑна Чӑваш автономи облаҫне йӗркеленӗренпе 100 ҫул ҫитнине халалласа кӑларнӑ медальпе чысланӑччӗ. Ҫавӑн чухне Варнава Чӑваш Ене питӗ юратнине, кунтах куҫне ӗмӗрлӗхе хупассине каланӑччӗ.

Варнава (Владимир Кедров) 1931 ҫулхи ака уйӑхӗн 21-мӗшӗнче Рязань облаҫӗнчи Высокое ялӗнче чиркӳ ҫыннисен ҫемйинче ҫуралнӑ. 1976 ҫултанпа вӑл – Шупашкар тата Чӑваш митрополичӗ.

Чӑваш Ен Элтеперӗн тивӗҫӗсене вӑхӑтлӑх пурнӑҫлакан Олег Николаев митрополита пытарма ятарлӑ ушкӑн йӗркелеме хушнӑ.

shop.p-el.ru сайтри сӑн

Ӗнер республикӑра аслатиллӗ ҫумӑр вырӑнӑн-вырӑнӑн ҫунӑ. Ҫурҫӗр енчи районсенче аслати ытлах кӗмсӗртетмен. Кӑнтӑр енче вара пӑр та ҫукаланӑ. Ҫынсем пӑрҫа пысӑкӑш пӑр ҫунине халӑх тетелӗсенче ӳкерсе лартнӑ.

Комсомольски районӗнчи Урмаелте вара пӗр ҫурт аҫа ҫиҫӗмрен шар курнӑ. Унта каҫхи 6 сехетре аслати кӗмсӗртетнӗ, кирпӗч ҫурта аҫа ҫапнӑ. Ҫуртра пушар тухнӑ. Ӑна сӳнтернӗ-ха, анчах пӳртӗн стенисем хуралса ларнӑ, телевизор ҫунса кайнӑ.

ЧР Инкеклӗ лару-тӑру патшалӑх комитечӗ пӗлтернӗ тӑрӑх, пушар аҫа ҫапнӑран тухнӑ.

Паян Раҫҫей почтин Чӑваш Енри тӗп филиалӗнче, 42800-мӗш уйрӑмра, «Чӑваш тӗрри» маркӑна ҫӳретме пуҫланӑ. Ҫавна ҫирӗплетсе почта ӗҫченӗсем ятарлӑ штемпельпе паллӑ тунӑ.

Раҫҫей почтин Чӑваш Енри тӗп филиалӗн халӑхпа ҫыхӑну тытакан пайӗн пуҫлӑхӗ Оксана Иванова Фейсбукра пӗлтернӗ тӑрӑх, маркӑна Чӑваш автономи облаҫне йӗркеленӗренпе 100 ҫул ҫитнине халалласа кӑларнӑ.

Сӑмах май каласан, юбилея халалласа каярах тата тепӗр марка ҫӳреме тытӑнӗ. Вӑл Чӑваш Ен гербӗллӗ пулӗ. Ӑна ҫӗртме уйӑхӗн 24-мӗшӗнче, Республика кунӗнче, ҫӳретме тытӑнӗҫ.

«Лиза Алерт» сӑнӳкерчӗкӗ

Шупашкар районӗнче пурӑнакан Яковлева Елизавета Леонидвнӑна ҫу уйӑхӗн 180-мӗшӗнченпе шыраҫҫӗ. 64 ҫулти хӗрарӑм ӑҫталла тухса кайни паллӑ мар.

Тивӗҫлӗ канӑва тухнӑ хӗрарӑм 156 сантиметр ҫӳллӗш, ҫӳҫӗ хӗрлӗ сарӑ (ӑна сӑрланӑ), куҫӗ сӑрӑ тӗслӗ. Тухса кайнӑ кун вӑл ҫутӑ кӗрен тӗслӗ куртка, тӗттӗм джинс шӑлавар тӗттӗм кӑвак тапочка тӑхӑннӑ пулнӑ.

Эсир ҫак хӗрарӑма курнӑ-и? Ун пирки мӗн те пулин пӗлетӗр-и? Апла 8(800)700-54-52 е 112 (Роман), 89053435033 телефон номерӗсемпе шӑнкӑравласа пӗлтерӗр.

ШӖМ тунӑ сӑн

Ҫу уйӑхӗн 30-мӗшӗнче Канаш районӗнче 9 ҫулти арҫын ачана шыранӑ. Вӑл асламӑшӗпе (е кукамӑшӗпе) ҫӑва ҫине кайнӑ. Лешӗ вилтӑприне майланӑ вӑхӑтра арҫын ача вӑрман еннелле утнӑ та утнӑ.

Ачча ялӗ ҫӑви ҫинче пулса иртнӗ пӑтӑрмах пирки Канаш районӗнчи ШӖМе пӗлтернӗ. Полицейскисем вырӑна пӗр тӑхтамасӑр ҫитнӗ. Районти пай пуҫлӑхӗ Александр Шакшин та пӗрле пулнӑ.

Персей ятлӑ нимӗҫ овчарки ача йӗрне ҫӑва ҫинчи сак патӗнче тупнӑ та ӑна малалла йӗрленӗ. Михаил Андриянов кинолог ун хыҫҫӑн пынӑ.

Арҫын ача 1 ҫухрӑм ҫурӑ кайма ӗлкӗрнӗ. 9-ти ача шывлӑ вырӑна лекнӗ, пилӗкӗ таран шурлӑхра тӑнӑ. Унӑн сывлӑхӗ йӗркеллех, ӑна тухтӑрсен пулӑшӑвӗ кирлӗ пулман.

Роспотребнадзорӑн Чӑваш Енри управленийӗ Ҫимӗкре те масар ҫине кайма тӑхтама сӗннӗ. Паян

кӑшӑлвирус инфекцийӗпе кӗрешессипе ӗҫлекен оперативлӑ штабӑн ларӑвне иртнӗ. Унта Роспотребнадзорӑн республикӑри управленийӗн ертӳҫи Надежда Луговская шухӑшланӑ тӑрӑх, Ҫимӗкре ҫӑва ҫинче халӑх пуҫтарӑнать, ытти регионтан та килеҫҫӗ. Ҫынсем апат-ҫимӗҫ, ӗҫме-ҫиме илеҫҫӗ, пӗр савӑт-сапапа хӑналанма тытӑнаҫҫӗ. Гигиенӑна пӑхӑнма ҫӑва ҫинче услови те ҫук. «Кун пек лару-тӑру кӑшӑлвируспа чирлекенсен йышне ӳстерме пултарать», - тенӗ республикӑри тӗп санитари врачӗ.

Пирӗн республикӑра, сӑмах май, 944 масар. Ҫимӗкре ҫӑва ҫине кайма юрамӗ. Ун чух чиркӳсене те кайма тӑхтамалла тенӗ паянхи канашлӑва пухӑннисем.

Ҫӑлав служби тунӑ сӑн

Пӗр арҫын Атӑлта ишме шутланӑ. Анчах ҫакӑ чутах инкекпе вӗҫленмен. Юрать, ҫӑлавҫӑсем ӑна вӑхӑтра пулӑшнӑ.

Ҫу уйӑхӗн 28-мӗшӗнче ҫак арҫын ҫыран хӗрринче тусӗсемпе каннӑ. Вӑл шыва кӗме шутланӑ, Атӑлта самаях шала ишсе кӗнӗ. Хайхискере хумсем тата шаларах илсе кайма тӑнӑ. 15 сехет те 5 минутра Ҫӗнӗ Шупашкарти ҫӑлав станцине 1980 ҫулта ҫуралнӑ арҫын путма тытӑнни пирки шӑнкӑрав килнӗ.

Ҫӑлавҫӑсем харсӑр арҫынна катер ҫине лартса ҫыран хӗррине илсе тухнӑ. Путма арҫын питӗ хӑрана пулмалла – ҫӑлавҫӑ аллинчен шутсӑр хытӑ ярса тытнӑ, лешӗн ӳчӗ те сӗвӗннӗ.

Правительство ларӑвӗ

Кӑшӑлвируса пула Чӑваш Енри сунарҫӑсем те шар курчӗҫ. Икӗ хутчен. Сунара кайма укҫа тӳлесе ирӗк илчӗҫ те пӑшал ҫакса сунара каяймарӗҫ. Вирус алхаснӑ вӑхӑтра вӗсене те килте ларма хушрӗҫ.

Паян Чӑваш Ен правительствин ларӑвӗ иртнӗ. Унта Чӑваш Ен Ҫут ҫанталӑк ресурсӗсен тата экологи министрӗн тивӗҫӗсене пурнӑҫлакан Александр Воробьев каланӑ тӑрӑх, тӑкака саплаштарма пулать. Ҫапла тума республика ертӳҫи Олег Николаев хушнӑ.

Сунарҫӑсем патшалӑх пошлини тӳлесе тӑкакланнине каяра усӑ курайӗҫ. Ҫут ҫанталӑк ресурсӗсен тата экологи министерстви ҫавӑн пек йышӑну хатӗрленӗ. Асӑннӑ документа правительство ларӑвӗнче ырланӑ. Ҫапла вара сунарҫӑсем унччен тӳленӗ патшалӑх пошлинипе кӗркуннехи е хӗллехи сунар тапхӑрӗнче усӑ курма пултарӗҫ.

Potokmedia.ru сайтри сӑн

Республикӑра тепӗр ҫын кӑшӑлвируспа вилнӗ. Вӑл – Улатӑрти медсестра. Унӑн анализӗ вирус пуррине ҫирӗплетнӗ.

44 ҫулти хӗрарӑма Улатӑрти пульницӑн инфекци уйрӑмне ҫу уйӑхӗн 22-мӗшӗнче вырттарнӑ. Унӑн ун чухне ӳпки икӗ енчен те шыҫнӑ пулнӑ. Кунсӑр пуҫне хӗрарӑмӑн ытти чир пулнӑ: гипертони, чӗре чирӗ, сахӑр диабечӗ. Ҫитменнине, вӑл самӑр пулнипе аптӑранӑ.

Ҫу уйӑхӗн 25-мӗшӗнче сывлӑхе тата хавшанӑ, сывлама йывӑрланнӑ. Ҫавӑнпа ӑна Шупашкарти васкавлӑ медпулӑшу пульницине куҫарма шутланӑ. Анчах ҫитеймен – хӗрарӑм ҫул ҫинче вилсе кайнӑ.

Ӗнерхи кун тӗлне Чӑваш Енре 2472 ҫын кӑшӑлвируспа чирленӗ, вӗсенчен 765-шӗ сывалнӑ. Паянхи кун тӗлне каварлӑ инфекцие пула 12 ҫын вилнӗ.