cap.ru сӑнӳкерчӗкӗ

Раштав уйӑхӗн 28-мӗшӗнче Шупашкарта пурӑнакан Александра Пайзерова 100 ҫул тултарнӑ. Тыл ӗҫченӗ патне РФ Президентӗнчен саламлӑ открытка ҫитнӗ. Ҫавӑн пекех кинемее саламлама килекенсем шурӑ кӗлчечек ҫыххи тыттарнӑ.

Александра Пайзерова Шупашкар районӗнчи Чулкаҫ ялӗнче ҫуралнӑ. 8 класс хыҫҫӑн медицина колледжӗнче тата суту-илӳпе экономика техникумӗнче вӗреннӗ. Вӑрҫӑ вӑхӑтӗнче колхозра ӗҫленӗ, окоп чавнӑ. Вӑрҫӑ хыҫҫӑн вӑл суту-илӳ тытӑмӗнче, бухгалтерта ӗҫленӗ. Александра Пайзерова пӗтӗмпе 40 ытла ҫул вӑй хунӑ. Вӑл 2 ачана ура ҫине тӑратнӑ. Ачисем ӑна виҫӗ мӑнукпа савӑнтарнӑ.

"Контактри" сӑн

Канаш хулинче пурӑнакан Владимир Рожков ӗнер 100 ҫул тултарнӑ. Владимир Васильевич - Тӑван ҫӗршывӑн Аслӑ вӑрҫин ветеранӗ.

Ӑна саламлама Канаш хулин пуҫлӑхӗ Виталий Михайлов, халӑха социаллӑ пулӑшу паракан комплекслӑ центр директорӗ Наталия Иванова та ҫитнӗ. Ветерана Ҫӗнӗ ҫулпа та саламланӑ.

Юбиляр патне РФ Президенчӗн Владимир Путинӑн салам ҫырӑвӗ ҫитнӗ. Чӑваш Ен Правительствинчен те парнесем пулнӑ.

cap.ru сӑнӳкерчӗкӗ

Хӗрлӗ Чутай районӗнчи Ҫӗнӗ Атикассинче пурӑнакан, Тӑван ҫӗршывӑн Аслӑ вӑрҫине хутшӑннӑ Клавдия Ижетникова раштавӑн 29-мӗшӗнче 100 ҫулхи юбилейне паллӑ тунӑ. Ӑна саламлама тӳре-шара кӑна мар, Хӗл мучипе Юр пике те ҫитнӗ.

Унӑн ҫамрӑклӑхӗ вӑрҫӑ тапхӑрне лекнӗ. Клавдия Гавриловна вулама юратнӑ, вӗрентекен пулма ӗмӗтленнӗ. Курссене пӗтерсен вӑл кӗҫӗн классене вӗрентме тытӑннӑ. 1942 ҫулта вара хӑйӗн ирӗкӗпе вӑрҫа кайнӑ, стрелоксен дивизийӗн автомат ротине лекнӗ. Амансан киле кӑкӑрӗ тӗлӗнче виҫӗ ванчӑкпа таврӑннӑ.

Халӗ Клавдия Гаариловнӑн 7 мӑнук, 11 кӗҫӗн мӑнук пур.

Марина Яковлева. culture.cap.ru сӑнӳкерчӗкӗ

Ҫак кунсенче республикӑри министерствӑсенче коллеги ларӑвӗсем иртеҫҫӗ. Ун пекки Культура министерствинче те пулнӑ. Ҫавӑнта Светлана Каликова министр иртнӗ ҫулхи ӗҫсене пӗтӗмлетнӗ, ӑнӑҫлӑ ӗҫленӗшӗн тав тунӑ.

Ларура хӑш-пӗр ҫынна ведомство наградисемпе чысланӑ. «Чӑваш Республиикн тава тивӗҫлӗ артисчӗ» ята Вырӑс драма театрӗн артистне Вера Боровковӑна тата Чӑваш патшалӑх академи дама театрӗн артистне Марина Яковлевӑна панӑ.

Чӑваш патшалӑх филрамонийӗнче тӗп инженерта тӑрӑшакан Александр Никитин тата Наци библиотекин пай заведующийӗ Луиза Федерова «Чӑваш Республикин культурӑн тава тивӗҫлӗ ӗҫченӗ» пулса тӑнӑ.

culture.cap.ru сӑнӳкерчӗкӗ

Чӑваш Енӗн Культура министерстви Андриян Николаев ҫуралнӑранпа 95 ҫул ҫитнине халалласа килес ҫул туса ирттермелли ӗҫсен планне ҫирӗплетнӗ.

Сӗнтӗрвӑрри муниципаллӑ округӗнчи Шуршӑлти мемориал комплексӗнче самай мероприяти иртӗ. Ҫав шутра ача-пӑча ӳкерчӗкӗсен конкурсӗ пулӗ, куравсем уҫӑлӗҫ,

Чӑваш патшалӑх академи драма театрӗ «Андриян Николаев» спектакль лартма хатӗрленет. Шупашкарти Симфони капелли куракансене ҫӗнӗ концерт программипе савӑнтарӗ.

Чӑваш кӗрешӗвне йӗркелесе янӑ Николай Петров пурнӑҫран уйрӑлнӑ. Вӑл 67 ҫулта пулнӑ.

Николай Петров - спортсмен, каратэ енӗпе СССР спорт мастерӗ. Вӑл 1955 ҫулхи чӳк уйӑхӗн 28-мӗшӗнче Елчӗк районӗнчи Ҫӗнӗ Пӑва ялӗнче ҫуралнӑ. Кривой Рогри авиаци училищине, И.Н.Ульянов ячӗллӗ Чӑваш патшалӑх университечӗн истори тата юридици факультечӗсене пӗтернӗ. Вӑл шотокан-каратэ, самбо, кунг-фу вӗреннӗ.

Николай Петровпа паян 12 сехетре Ҫӗнӗ Шупашкарти Владимир соборӗнче сывпаллашӗҫ.

cheb-centr.soc.cap.ru сӑнӳкерчӗкӗ

Шупашкарта пурӑнакан Александра Пайзерова паян 100 ҫул тултарнӑ. Юбиляра республикӑ ӗҫ тата социаллӑ хӳтлӗх министрӗ Алёна Елизарова, Шупашкар хулинчи халӑхӑн социаллӑ ыйтӑвӗсене тивӗҫтерекен комплекслӑ центрӗн директорӗн тивӗҫӗсене пурнӑҫлакан Аркадий Скворцов саламланӑ.

Александра Ивановна Шупашкар районӗнич Чулкасси ялӗнче ҫуралнӑ. Медицина тата суту-илӳпе экономика техникумӗсенче вӗреннӗ. Шупашкарти лавккасенче сутуҫӑра тата бухгалтерта ӗҫленӗ.

Паян кинемей хӗрӗпе пӗрле пурӑнать.

Чӑваш Енӗн Наци вулавӑшӗнче нумаях пулмасть Любовь Фёдорова сӑвӑҫӑн ҫӗнӗ кӗнекине хӑталнӑ.

Чӑваш Енри профессионал писательсен союзӗн халӑх тетелӗнче Марина Карягинӑпа Екатерина Янгалакова телесюжечӗ тӑрӑх пӗлтернӗ тӑрӑх, «Ӑшӑх вырӑн ҫук тинӗсре» сӑвӑ пуххи — Любовь Фёдорован 9-мӗш кӗнеки.

Автор чӑваш литературинче иртнӗ ӗмӗрӗн 70-мӗш ҫулӗсенчех палӑрма пуҫланӑ иккен. Елчӗк районӗнчи (халӗ — муниципаллӑ округ) Энтепе хӗрӗ малтан тӑван тӑрӑхӗнче, унтан Шупашкарти шкулсенче чӑваш чӗлхипе литературине вӗрентнӗ. Виталий Родионов, Любовь Мартьянова, Раиса Сарпи, Юлия Силэм пек пултаруллӑ тантӑшӗсемпе, «ҫилҫунатҫӑсемпе» литература тӗнчине кӗнӗ.

"Чӑваш Ен" ПТРК тунӑ видео скринӗ

Ӗнер ЧР тава тивӗҫлӗ тухтӑрӗ Николай Григорьев пурӑннӑ ҫурт ҫине, Шупашкарта, астӑвӑм хӑми ҫакнӑ. Пурӑннӑ тӑк Николай Григорьевич ӗнер 90 ҫул тултарӗччӗ. Анчах вӑл кӑҫал ҫулла пурнӑҫран уйрӑлнӑ.

Вӑл чаплӑ хирург пулнӑ, медицинӑра 55 ҫул ӗҫлесе 15 пин ытла операци тунӑ. Николай Григорьев ЧР Сывлӑх сыхлавӗн министерствине 15 ҫул ертсе пынӑ. Ҫав тапхӑрта 150 сиплев комплексӗ, поликлиника, ача ҫуратмалли ҫурт, санатори тунӑ.

Унӑн ывӑлӗ Вадим Николаев халӗ Ветерансен госпиталӗнче хирурги уйрӑмне ертсе пырать.

cap.ru сӑнӳкерчӗкӗ

Ҫак кунсенче тыл ӗҫченӗ тата ӗҫ ветеранӗ Анастасия Егорова 100 ҫул тултарнӑ. Ҫак ятпа ун патне РФ Президентӗнчен Владимир Путинран саламлӑ ҫыру килнӗ.

Анастасия Александровна Шупашкарта пурӑнать. Вӑрҫӑ вӑхӑтӗнче вӑл Йӗпреҫри лесопилкӑра ӗҫленӗ, лашапа ҫӗрулми турттарнӑ. Вӑрҫӑ пӗтсен колхозра тӑрӑшнӑ.

Анастасия Егорова виҫӗ ача ҫуратса ӳстернӗ. Халӗ унӑн икӗ мӑнук, пӗр кӗҫӗн мӑнук пур. Вӗсемпе савӑнса пурӑнать вӑл.