cap.ru сайтри сӑн

Шупашкар хула администрацийӗн пуҫлӑхӗн ҫумӗ Кирилл Мухин ӗҫрен кайнӑ. «Чеб.ру» сайт хыпарланӑ тӑрӑх, вӑл Запорожье облаҫӗнчи Бердянск районӗн администрацине ертсе пыма пуҫлӗ. Халӗ вӑл унта-мӗн.

Кирилл Мухин – 30 ҫулта. Администраци пуҫлӑхӗн ҫумӗнче вӑл кӑҫал нарӑс уйӑхӗнче ӗҫлеме тытӑннӑ. Унччен администраци пуҫлӑхӗн канашҫи пулнӑ.

Кирилл Сергеевич И.Н.Ульянов ячӗллӗ ЧПУран вӗренсе тухсан Раҫҫей Хӗҫ-пӑшаллӑ вӑйӗсен ҫарӗнче контрактпа пулнӑ.

"Контактри" сӑн

Паян ЧР прокурорӗ Эдуард Гиматов Хӗрлӗ Чутай округӗн ҫӗнӗ прокурорӗпе паллаштарнӑ. Ку вырӑна юстицин аслӑ канашҫи Денис Антонов йышӑннӑ.

Денис Витальевич Шупашкарта 1983 ҫулта ҫуралнӑ. И.Н.Ульянов ячӗллӗ ЧПУн юридици факультетне пӗтерсен Куславкка районӗн прокуратурин следователӗнче ӗҫленӗ. Унтан прокурорӑн аслӑ пулӑшуҫи те пулнӑ. 2020 ҫултанпа пуҫласа паянхи кунччен Шупашкарта юсанмалли учрежденисенче саккунасене епле пӑхӑннине тӗрӗслекен прокурорта вӑй хунӑ. Паянтан вӑл – Хӗрлӗ Чутай округӗн прокурорӗ.

Чӑваш Республикин прокурорӗн пӗрремӗш ҫумӗ пулмашкӑн Михаил Шпакова ҫирӗплетнӗ. Ку хушӑва РФ Президенчӗ Владимир Путин ҫу уйӑхӗн 7-мӗшӗнчех алӑ пуснӑ.

Михаил Шпаков – Ростов облаҫӗнчен, вӑл Вешенская станцӑра 1980 ҫулта ҫуралнӑ, Питерти ШӖМ университетне пӗтернӗ. Прокуратура органӗсенче вӑл 2008 ҫултанпа ӗҫлет.

Михаи Шпаков юлашки икӗ ҫулта Ленинград облаҫӗнчи Тихвин хула прокурорӗнче ӗҫленӗ. Сӑмах май, унччен ЧР прокурорӗн пӗрремӗш ҫумӗ Илья Жилин пулнӑ. Вӑл пӗлтӗр кӗркунне тивӗҫлӗ канӑва тухнӑ.

cap.ru сайтри сӑн

Паян ЧР промышленноҫ министрӗн пӗрремӗш ҫумне Александр Голубева ӗҫрен кӑларнӑ. Вӑл ку вырӑнта 4 уйӑх ӗҫленӗ.

Александр – 35 ҫулта. Министрӑн пӗрремӗш ҫумӗнче вӑл кӑрлачӑн 15-мӗшӗнче ӗҫлеме тытӑннӑ. 2021-2022 ҫулсенче «Чӑвашгаза» ертсе пынӑ. Хӑй вӑл Казахстанра ҫуралнӑ, Омск облаҫӗнче ӗҫленӗ.

Аса илтерер: нумаях пулмасть министр пулнӑ Борис Марковцев ӗҫрен кайнӑ, халӗ министерствӑра Дмитрий Гринев ертӳҫӗ тивӗҫӗсене пурнӑҫлать.

cap.ru сӑнӳкерчӗкӗ

ЧР промышленноҫ министрӗ Борис Марковцев ӗҫрен кайнӑ. Вӑл ҫу уйӑхӗн 3-мӗшӗнче отпуска кайнӑ. Ӗнер вара ӗҫе тухсан хӑйӗн ирӗкӗпе каймашкӑн заявлени ҫырнӑ.

Ырантан министр тивӗҫӗсене Дмитрий Гринев пурнӑҫлӗ. Вӑл - министр ҫумӗ.

Борис Марковцев ЧР Промышленноҫ министерствине пӗлтӗр утӑ уйӑхӗнче килнӗ. Вӑл 1978 ҫулта Владивостокра ҫуралнӑ, 2016-2021 ҫулсенче РФ Промышленноҫ министерствинче ӗҫленӗ.

Наци телерадиокомпанийӗн директорне Алексей Гурьянова ӗҫрен кӑларни пирки ӗнер кӑна пӗлтернӗччӗ. Ӗнерех, ҫу уйӑхӗн 14-мӗшӗнче, ЧР Элтеперӗ тепӗр хушӑва алӑ пуснӑ – Алексей Гурьянов ЧР цифра министрӗн ҫумӗ пулса тӑнӑ. Вӑл массӑллӑ коммуникацисен тата МИХ тытӑмӗнче патшалӑх политикишӗн яваплӑ пулӗ. Халӗ ЧР цифра министрӗн Михаил Степановӑн икӗ ҫум: Екатерина Грабко тата Алексей Гурьянов.

Аса илтерер: унччен Алина Федорова министр ҫумӗ пулнӑ. Вӑл унта 4 уйӑх ӗҫленӗ.

Чӑваш патшалӑх академи юрӑпа ташӑ ансамбльне директор кирлӗ. Кун пирки республикӑн Культура, наци ӗҫӗсен тата архив ӗҫӗн министерстви пӗлтернӗ.

Пуҫлӑх пуканне йышӑнас кӑмӑллӑ ҫыннӑн аслӑ пӗлӳллӗ

(экономика, юридици, культура тата ӳнер, педагогика, техника) пулмалла, ертсе пыракан должноҫра 5 ҫултан кая мар тӑрӑшни кирлӗ.

Документсене паянтан, ҫу уйӑхӗн 14-мӗшӗнчен, пуҫласа ҫу уйӑхӗн 27-мӗшӗччен йышӑнӗҫ.

Паянтан Алексей Гурьянов Наци телерадиокомпанийӗн директорӗ мар. Хушӑва ЧР Элтеперӗ Олег Николаев алӑ пуснӑ.

Алексей Гурьянов ку должноҫре 2022 ҫулхи авӑн уйӑхӗн 1-мӗшӗнченпе ӗҫленӗ. Унччен 7 ҫул вӑл Шупашкар хула администрацийӗн ҫыхӑну тата информаципе аналитика ӗҫӗн пайӗнче тӑрӑшнӑ. Унӑн ашшӗ Юрий Гурьянов – ЮТВ телеканал директорӗ.

«Чеб.ру» портал пӗлтернӗ тӑрӑх, 35 ҫулти Алексей Гурьянов ҫывӑх вӑхӑтра ЧР цифра министрӗн ҫумӗ пулма пултарать.

www.cap.ru сӑнӳкерчӗкӗ

Чӑваш Енӗн Правительствинче кадрсемпе ҫыхӑннӑ улшӑну пулса иртнӗ.

Республикӑн экономика тата пурлӑх хутшӑнӑвӗсен министрӗн пӗрремӗш ҫумне Надежда Столяровӑна ӗҫрен кӑларнӑ. Ҫавӑн пек йышӑнӑва республика Элтеперӗ Олег Николаев ҫу уйӑхӗн 8-мӗшӗнче алӑ пуснӑ. Документа республикӑн влаҫ органӗсен официаллӑ порталӗнче вырнаҫтарнӑ.

cap.ru сайтри сӑн

ЧР Патшалӑх Канашӗ 30 ҫул тултарасси пирки кӑшт маларах пӗлтертӗмӗр. Ҫӗнтерӳ кунӗ умӗн депутатсем Шупашкарти Ҫӗнтерӳ паркӗнче 30 ҫӑка лартнӑ. Ҫапла унта аллея ӳсӗ.

«Аллея республикӑпа пӗрле ӳсӗ, ҫирӗпленӗ, эпир вара тӑрӑшӑпӑр», - тенӗ чӑваш парламенчӗн спикерӗ Леонид Черкесов.

Сӑмах май, Патшалӑх Кнашӗ йӗркеленнӗренпе 25 ҫул ҫитнине халалласа ун чухне республика Элтеперӗ пулнӑ Михаил Игнатьевпа Правительство ҫурчӗ хыҫӗнчи велоҫул ҫинче Туслӑх аллейи пуҫарса янӑ. Ун чухне 33 вӗрене тата 9 чӑрӑш лартнӑ.