Паян «Чӑваш халӑх сайчӗ» вӑхӑтлӑха ӗҫлеме пӑрахма пултарӗ. Ку техникӑлла ӗҫсемпе ҫыхӑнӗ: сайт вырнаҫнӑ сервера улӑштаратпӑр.

Эпир усӑ куракан хостера — «Инфобокса» — «Rusonyx» хостер туяннӑ. Вӗсем Инфобоксӑн инфраструктури кивӗ тесе ӑна ҫӗнетесшӗн, ҫавна май пире ҫӗнӗ вырӑна куҫараҫҫӗ.

Шупашкар хулинче пӗр каччӑ тракторпа пилӗк машина ҫине пырса кӗнӗ. Пӑтӑрмах пуш уйӑхӗн 23-мӗшӗнче, ҫурҫӗр иртни 1 сехет те 10 минутра пулса иртнӗ.

Машинӑсем Гладков урамӗнчи 34 тата 36-мӗш ҫуртсен умӗнче ларнӑ. Вӗсем ҫине пӗри тракторпа пырса кӗнӗ. Ҫавна чӳречерен асӑрхакан пулнӑ. Вӑлах йӗрке хуралҫисене пӗлтернӗ. Каччӑна тытса чарма ҫав ҫын пулӑшнӑ.

Трактор «Калина», «Шкода», «Mitsubishi», «Hyundai» тата «Веста» автомобильсем ҫине пырса кӗнӗ. Трактор рулӗ умӗнчи инкек вырӑнӗнчен такси ҫине ларса тарас тенӗ имӗш. 22 ҫулти каччӑ ӳсӗр пулни сисӗннӗ, анчах вӑл тӗрӗсленме килӗшмен. Трактор хуҫи каччӑ унччен ӗҫленӗ организаци пулнӑ. Ҫамрӑк унта ҫулталӑк каялла ӗҫлеме пӑрахнӑ.

ЧР Вӗренӳ институчӗн сӑнӳкерчӗксемпе усӑ курса Таисия Ташней хатӗрленӗ коллаж

Чӑваш Республикин Вӗренӳ институтӗнче «Ҫамрӑк ертӳҫӗсен азбуки» проекта савӑнӑҫлӑ лару-тӑрура уҫнӑ.

Мероприятире сӑмах каланӑ Вӗренӳ институчӗн ректорӗ Юрий Исаев палӑртнӑ тӑрӑх, ку проект питех те кирлӗ тата пӗлтерӗшлӗ. Ҫӗнӗлӗх ертсе пыракан должноҫре ҫулталӑкран сахалтарах тӑрӑшакансене ӗҫе хӑнӑхма пулӑшӗ.

Тин ҫеҫ пуҫлӑх тилхепине тытнисене пуян опытлӑ наставниксем пулӑшӗҫ. Вӗсем: Шупашкарти 59-мӗш шкул директорӗ Ольга Курмаева, 4-мӗш лицей директорӗ Наталия Коновалова, 49-мӗш вӑтам шкул директорӗ Герман Ильин, 64-мӗш вӑтам шкул директорӗ Наталья Зотова, 203-мӗш ача пахчин заведующийӗ Вероника Хаялутдинова, 11-мӗш ача пахчин заведующийӗ Марина Осина, 106-мӗш ача пахчин заведующийӗ Луиза Григорьева, 182-мӗш ача пахчин заведующийӗ Ирина Одерякова.

Проекта хутшӑнакан 24 директорпа 19 заведующи валли ӑсталӑх сахечӗсем, тренингсем, ӗҫлӗ вӑйӑсем, стажировкӑсем тата ытти мероприяти ирттерӗҫ. «Ҫамрӑк ертӳҫӗ азбуки» кӑҫалхи вӗренӳ ҫулӗн вӗҫӗнче вӗҫленмелле.

Кӑсалхи пуш уйӑхӗн 26-мӗшӗнче Чӑваш Ен Правительствинче ҫӗнӗ ҫын ӗҫе кӳлӗннине Чӑваш халӑх сайчӗ пӗлтернӗччӗ. Аса илтерер: вице-премьер тивӗҫне пурнӑҫлама 46 ҫулти Павел Данилова шаннӑччӗ. Вӑл Строймин, Транспорт министерствин тата Патшалӑх ҫурт-йӗр инспекцийӗн ӗҫне йӗркелесе пырасси пирки хыпарланӑччӗ. Паян тата тепӗр ҫӗнӗ хыпар пӗлтӗмӗр. Данилова строительство, архитектура тата ҫурт-йӗрпе коммуналлӑ хуҫалӑх министрӗн тивӗҫне пурнӑҫлама шаннӑ. Ҫав вӑхӑтрах вӑл Министрсен Кабинечӗн Председателӗн ҫумӗ те пулӗ.

Аса илтерер: ӗнер, пуш уйӑхӗн 22-мӗшӗнче, Чӑваш Ен строительство, архитектура тата ҫурт-йӗрпе коммуналлӑ хуҫалӑх министрӗ Александр Героев ӗҫрен хӑй кӑмӑлӗпе ӗҫрен пӑрахнӑ.

Павел Данилов юлашки ҫулсенче «Раҫҫей Стройминӗн проект дирекцийӗ» автономи учрежденине ертсе пынӑ. Мускавран килнӗ пулин те Чӑваш Еншӗн ют мар. Вӑл кунта ҫуралнӑ, 2000-мӗш ҫулсенче Шупашкар хула администрацийӗн пуҫлӑхӗн Анатолий Емельяновӑн финанспа экономика енӗпе ҫумӗ пулса ӗҫленӗ.

ozdemirgruptemizlik.com сӑнӳкерчӗкӗ

Икӗ алла пӗр ӗҫ тенӗ мӗн ӗлӗкрен чӑваш. Этем тени пысӑкрах шалуллӑ вырӑна туртӑнать. Ҫав вӑхӑтрах тирпейлӳҫӗ те, урам шӑлакан та кирлӗ. Вӗсене тивӗҫлипе хаклама пӗлмелле.

Ӗнер Чӑваш Ен Элтеперӗ Олег Николаев республикӑри черетлӗ ҫынсене хисеплӗ ят парасси ҫинчен калакан хушӑва алӑ пуснӑ. 38-мӗш номерлӗ хушура — виҫӗ ҫын. Вӗсенчен пӗри «Чӑваш Республикин халӑха тивӗҫтерекен сферин тава тивӗҫлӗ ӗҫченӗ» ята илнӗ, иккӗшӗ — «Чӑваш Республикин тава тивӗҫлӗ юрисчӗ» ята.

«Чӑваш Республикин халӑха тивӗҫтерекен сферин тава тивӗҫлӗ ӗҫченӗ» ята Чӑваш Республикин Элтепер Администрацийӗнче тирпейлӳҫӗре тӑрӑшакан Елена Иванова тивӗҫнӗ, «Чӑваш Республикин тава тивӗҫлӗ юрисчӗ» ята — Шупашкарти Лариса Ильина тата Елена Рыбакова нотариуссем.

Ӗнер, пуш уйӑхӗн 22-мӗшӗнче, Чӑваш Ен строительство, архитектура тата ҫурт-йӗрпе коммуналлӑ хуҫалӑх министрне Александр Героева ӗҫрен кӑларнӑ.

Республика Элтеперӗн хушӑвӗнче палӑртнӑ тӑрӑх, министр пулнӑ Александр Валерьевич ӗҫрен кайма хӑй кӑмӑл тунӑ. Ҫавна май ӑна РФ Ӗҫ кодексӗн 77-мӗш статйин 3-мӗш пайӗпе килӗшӳллӗн ӗҫрен хӑтарнӑ.

Александр Героев 1977 ҫулхи ака уйӑхӗн 6-мӗшӗнче Шупашкарта ҫуралнӑ. Строительство отраслӗнче 18 ҫул ытла ӗҫленӗ. Пӗлӗве вӑл И.Н. Ульянов ячӗллӗ Чӑваш патшалӑх университетӗнче илнӗ. Министр тивӗҫне пурнӑҫлама ӑна пӗлтӗрхи нарӑс уйӑхӗн 10-мӗшӗнче шаннӑ, ҫав ҫулхи пуш уйӑхӗн 13-мӗшӗнче министр тилхепине тыттарнӑ.

Чӑваш Республикин Цифра аталанӑвӗн, информаци политикин тата массӑллӑ коммуникацисен министрне Кристина Майнинана тутарсен октрыткисем килӗшнӗ. Вӑл кӑна та мар.

Иртнӗ эрнере министр Тутарстанра пулнӑ. Унти «Литература кафинче» Тутар кӗнеке издательствин ҫӗнӗ кӑларӑмӗсемпе паллашма тата вӗсене туянма пулать. Унта тутар чӗлхипе кӑларнӑ открыткӑсем те пур. «Питӗ лайӑх шухӑш. Шута илӗпӗр», — тенӗ министр.

«ТАТМЕДИА» медиахолдингра пулнӑ май унта чӑвашла тухса тӑракан хаҫатсемпе те паллашма май килнӗ. Тутарстан Республикинчи «Сувар» чӑвашла хаҫат, Аксу районӗнчи «Ял пурнӑҫӗ», Нурлат районӗнчи «Дуслык», Пӑва районӗнчи «Ялав», Ҫӗпрел районӗнчи «Тӑван ен» хаҫатсенче ӗҫлекенсем хӑйсем кулленхи тӑрӑшӑвӗпе паллаштарнӑ. Унти журналистсем Чӑваш Енри ӗҫтешӗсенчен чӑваш литература чӗлхине тарӑнрах вӗренесшӗн.

Пуш уйӑхӗн 20-мӗшӗнче Чӑваш Республикин Нотариус палатин пайташӗсен ҫулталӑкри пухӑвӗ иртнӗ. Унта Чӑваш Республикин Юстици ӗҫӗсен патшалӑх службин ертӳҫи Дмитрий Сержантов хутшӑннӑ.

Ҫав кунах Нотариус палатин президентне суйлас ыйтӑва пӑхса тухнӑ. Ку тивӗҫе пурнӑҫлама Елизавета Соколовӑнах шаннӑ. Елизавета Ильинична ҫак тилхепене 1993 ҫултанпа тытса пырать. Чӑваш Республикин Юстици ӗҫӗсен патшалӑх службинче палӑртнӑ тӑрӑх, ҫав вӑхӑтра Елизавета Соколова нотариата аталантарма пысӑк тӳпе хывнӑ.

Пухура Нотариус палатин правлени тата ревизи комиссийӗн пайташӗсене суйланӑ.

cheltv.ru сайтри сӑн

Шупашкар районӗнче пурӑнакан 22 ҫулти хӗрарӑма пӗчӗк ачине тивӗҫлӗ воспитани паманшӑн явап тыттарнӑ. Вӑл пепкине хӑварнӑ, хӑй юлташӗсемпе савӑнса ҫӳренӗ.

Ҫакӑ паллӑ: хӗрарӑм ҫур ҫулти ывӑлне Красноармейски районӗнче пурӑнакан пиччӗшӗ патӗнче хӑварнӑ, хӑй тухса кайнӑ та вӑхӑта тусӗсемпе ирттернӗ.

Ача вара 6 сехет ытла, хӗрарӑмӑн пиччӗшӗ киле киличчен, пӗччен тӑрса юлнӑ. Кун пирки ҫамрӑк хӗрарӑм питӗ лайах пӗлнӗ. Амӑшӗ ывӑлӗ патне темиҫе кунран ҫеҫ таврӑннӑ.

Судра вӑл айӑпне йышӑннӑ, ӳкӗннӗ. Суд ӑна 300 сехет ӗҫлеттерме йышӑннӑ.

Ҫӗнӗ Шупашкар хулин Ю.А. Гагарин ячӗллӗ вулавӑшӗнче Светлана Асаматӑн «Хӗрарӑм чӗри» кӗнекинчи куҫару сӑввисем тӑрӑх «Асамат вулавӗсем – 2021» пултарулӑх ӑмӑртӑвӗ иртнӗ. Ӑна Ҫӗнӗ Шупашкар хулин вӗренӳ центрӗпе чӑваш чӗлхипе литератури вӗрентекенсен методпӗрлешӗвӗ тата вулавӑш йӗркеленӗ.

Сӑвва илемлӗ калакансен ӑмӑртӑвӗн тӗп тӗллевӗ Канаш районӗнче ҫуралнӑ паллӑ ҫыравҫӑн, юрӑҫӑн Светлана Асаматӑн пултарулӑхӗпе туллин паллашса ӑна халӑхра анлӑрах сарасси, Европӑпа Вӑтаҫӗр Ази, Атӑлҫипе Кавказ, Балтикӑпа Ҫӗпӗр тӑрӑхӗнчи 39 халӑхӑн пултаруллӑ 83 хӗрарӑмӑн чӑвашла куҫарнӑ сӑввисене илемлӗ каласси, тӑван чӗлхене хисеплеме, юратма вӗрентесси пулнӑ.

Пултарулӑх конкурсне хутшӑнакансене Светлана Асамат, Константин Иванов ячӗллӗ Чӑваш академи драма театрӗн артисчӗ, И.Н. Ульянов ячӗллӗ Чӑваш патшалӑх университечӗн доценчӗ Иван Иванов, Чӑваш Республикин тава тивӗҫлӗ вӗрентекенӗ

Геронтий Никифоров тата Ҫӗнӗ Шупашкар радиовӗн тӗп редакторӗн тивӗҫӗсене пурнӑҫлакан Елена Лаврентьева саламланӑ.

Чӑваш литературинче ХХ ӗмӗр вӗҫӗпе ХХI ӗмӗр пуҫламӑшӗнче палӑрнӑ Чӑваш Республикин искусствӑсен тава тивӗҫлӗ ӗҫченӗ, Ҫеҫпӗл Мишши, Иван

Яковлев, Эмине, Фатых Карим ячӗллӗ премисен лауреачӗн, сӑвӑҫӑн, прозаикӑн, юрӑҫӑн Светлана Асаматӑн кун-ҫулӗпе тата пултарулӑхӗпе презентаци мелӗпе паллаштарнӑ.

Малалла...