64.rodina.news сайтри сӑн

Чӑваш Енре кӑшӑлвируса пула йышӑннӑ ятарлӑ режима сирнӗ. Кун пирки республика правительствин сайтӗнче хыпарланӑ.

ЧР Элтеперӗ Олег Николаев ҫакна республикӑра эпидемиологи лару-тӑрӑвӗ йӗркеленнипе тунӑ. «Ку эпир ку чире тимлӗх сахалрах уйӑратпӑр тенине пӗлтермест. ЧР Сывлӑх сыхлавӗн министерстви лару-тӑрӑва сӑнаса тӑрӗ, чирлекенсен йышӗ ӳсме пуҫласан тивӗҫлӗ мерӑсем йышӑнӗ», - тенӗ Олег Николаев.

Аса илтерер: 2020 ҫулхи пуш уйӑхӗнче кӑшӑлвирус сарӑлнине пула ятарлӑ режим пулнине йышӑннӑ.

Шупашкар хулинчи йӗрке хуралҫисене паян, ҫу уйӑхӗн 16-мӗшӗнче, ирхи 6 сехетре хулара ӳсӗр водителе асӑрхани пирки систерекенсем тупӑннӑ.

«Mерседес» автомобиле тытса пыракан водитель пакунлисем чарӑнма ыйтнине итлемен, вӗсенчен тарса ӳкме хӑтланнӑ. Етӗрне шоссипе Университет урамӗсем хӗресленнӗ вырӑнта машина светофор тӗлӗнче чарӑннӑ «Форд Фокус» автомобиль ҫине пырса кӗнӗ. Инкекре «Фордӑн» 28 ҫулти водителӗ тата салонти пассажир аманнӑ, вӗсене больницӑсене ӑсатнӑ.

«Mерседес» машинӑна тытса пынӑ 33 ҫулти арҫынна руль умне ӳсӗрле ларнӑшӑн 2020 ҫулта явап тытарнӑ иккен-ха, ун чухне хайхин водитель правине туртса илнӗ.

vsluh.ru сӑнӳкерчӗкӗ

Шупашкар хулинче пурӑнакан 56 ҫулти арҫын 2,5 миллион тенкӗсӗр тӑрса юлнӑ. Йӑлтах — ҫынна шаннипе.

Арҫын йӗрке хуралҫисене пӗтернӗ тӑрӑх, пуш уйӑхӗнче ун патне Мускаври право хуралӗн тытӑмӗнче ӗҫлекен ҫын (шӑнкӑравлаканни хӑйӗнпе ҫавӑн пек паллаштарнӑ) ҫыхӑнни ҫинчен каласа кӑтартнӑ. Хӗрарӑм унран тӗнче тетелӗ урлӑ медицина таварӗ туяннипе кӑсӑкланнӑ. Арҫын илнине пӗлтерсен сутуҫӑна явап тыттарассине, фирма клиенчӗсене ҫур миллион тенкӗ компенсаци тӳлессине пӗлтернӗ.

Арҫынтан тӗрлӗ сӑлтав тупса икӗ уйӑх хушши укҫа ыйтнӑ, ҫывӑх вӑхӑтра ун патне инкассатор машини ярса пама шантарнӑ, вӑл вара компенсаци укҫине тавӑрса парӗ тесе ӗнентернӗ.

Арҫын тусӗсемпе пӗлӗшӗсенчен 2,5 миллион тенке яхӑн кивҫен илсе палламан ҫынсем каланӑ счётсем ҫине куҫарса янӑ. Ултавҫӑсен капкӑнне лекнине вӑл хӑйӗнчен тата тепӗр ҫур миллион тенкӗ ыйтсан тӗшмӗртсе илнӗ.

21.мвд.рф сӑнӳкерчӗкӗ

Ҫу уйӑхӗн 13-мӗшӗнче Канашра пурӑнакан 32 ҫулти хӗрарӑм самокат ҫинчен персе анса аманнӑ.

Пӑтӑрмаха вӑл «Канаш-Ҫӗнӗ Туҫа-Славаш» ҫулпа пынӑ чухне лекнӗ.

Анат Вӑрманъял ялӗ тӗлӗнче вӑл ҫул ҫине йӑтӑнса аннӑ. Пуҫне амантнӑ хӗрарӑма больницӑна ӑсатнӑ.

cheb-centr.soc.cap.ru сӑнӳкерчӗкӗ

Шупашкарта пурӑнакан ватӑсем хатха-йога занятине пуҫтарӑнаҫҫӗ. Ӑна хулари халӑха социаллӑ пулӑшу кӳрекен комплекслӑ центрӑн «Манӑн социаллӑ центр» клубӗнче йӗркеленӗ.

Занятие тава тивӗҫлӗ канури Валентина Горычева ирттерет.

«Хатха-йогӑна ватӑ ҫынсем те тума пултараҫҫӗ. Вӑл ҫулланнисемшӗн те питӗ усӑллӑ», – тет тренер.

Хатха-йога кӑмӑл-туйӑма та лайӑхлатма пулӑшать. Ҫакна занятие хутшӑнакан ватӑсем те ҫирӗплетсе параҫҫӗ. «Хатха-йога хыҫҫӑн шӑм-шак ҫӑмӑллансах каять, чунра савӑнӑҫ хуҫаланма тытӑнать», – тет 82 ҫулти Мария Сироткина.

И.Н. Ульянов ячӗллӗ Чӑваш патшалӑх университетӗнче Чӑваш чӗлхин шкулӗ ӗҫлӗ. Вӑл кӑҫалхи ҫурла уйӑхӗнче уҫӑлӗ. Унта чӑваш халӑх культурипе, чӗлхипе, йӑли-йӗркипе паллашас кӑмӑллисене хапӑл тӑвӗҫ.

Аслӑ шкулӑн чӑваш тата вырӑс филологийӗпе журналистика факультечӗн деканӗ Алена Иванова пӗлтернӗ тӑрӑх, «университет преподавателӗсемпе пӗрле чӑвашла вӗренни, «Еткерлӗх» этнокультура центрӗнче чӑваш сувенирӗсем ӑсталани, Чӑваш Енри илемлӗ вырӑнсенче пулса курни чылайлӑха асра юлӗ».

Шкула хутшӑнас кӑмӑллисем discurs2020@mail.ru почтӑна ҫырса пӗлтерме пултараҫҫӗ.

"На связи" форумри сӑн

Чӑваш Ене кӑҫалхи пӗрремӗш кварталта туристсем ытларах килнине палӑртнӑ. Ҫакна пӗлтӗрхи пӗрремӗш кварталпа танлаштарнӑ. Кӑҫал туристсен хисепӗ 2,2 хут ытларах пулнӑ.

Отельсенче, хӑна ҫурчӗсенче те ҫӗр каҫакансем 82 процент нумайрах пулнине палӑртнӑ.

Сӑмах май, пӗлтӗр Шупашкарти юханшыв порчӗ 449 теплохода йышӑннӑ. Пӗтӗмпе вӗсемпе 65133 турист килнӗ.

ҪҪХПИ тунӑ сӑн

Элӗк тӑрӑхӗнче вӑйлах ӳсӗр водителе тытса чарнӑ. Ӑна водитель прависӗр хӑварӗҫ.

Малтанах арҫын ҪҪХПИ инспекторӗсенчен тарма хӑтланнӑ. Анчах ӑна чарнӑ. Кун хыҫҫӑн ӳсӗр водитель сӑра кӗленчипе машина тӑррине хӑпарса ларнӑ. Арҫынна иртӗхме чарнӑ.

Машинӑна ятарлӑ стоянкӑна эвакуациленӗ. Водителе вара явап тыттарӗҫ - правине туртса илӗҫ.

"Про Город" сайтӗнчи сӑн

Паян 20 сехет 6 минутра Шупашкарта хӗр 7-мӗш хутран ӳкнӗ. Кун пирки "Про Город" хаҫата халӑх корреспонденчӗ пӗлтернӗ.

Ку пӑтӑрмах Ленин Комсомолӗн 34/8-мӗш ҫуртӑн 1-мӗш корпусӗнче пулнӑ. Хӗр ӳксен хускалнӑ - чӗрӗ пулнӑ. Вӑл 30-35 ҫулсенчи пек курӑннӑ. Вырӑна кӗҫех васкавлӑ медпулӑшу ҫитнӗ.

mel.fm сайтри сӑн ӳкерчӗк

Вырӑс патшалӑх драма театрӗнче 2024 ҫулта Жюль Вернӑн «Вокруг света за 80 дней: 150 лет спустя» ятлӑ спектакльне лартма палӑртнӑ. Ҫавна май унта ҫыравҫӑн кӗҫӗн мӑнукне Жан Верна кӗтсе илме хатӗрленеҫҫӗ. Франци ҫыравҫи ку шухӑша ырланӑ, спектакль вӑйлӑ пуласса иккӗленмен.

Ҫавӑн пекех, Вырӑс патшалӑх драма театрӗн директорӗ пӗлтернӗ тӑрӑх, премьерӑна Федор Кнюхов ҫулҫӳревҫе чӗннӗ.