Паян Шупашкарта Хевеш урамӗнчи 30-мӗш ҫуртра 6-мӗш хутран арҫын ӳкнӗ. Вӑл ҫамрӑк пулнӑ.
Ку инкек 10 сехет ҫурӑра пулнӑ. Ҫамрӑк арҫын улттӑмӗш хутран подъезд тӑррине ӳкнӗ. Вырӑна экстреннӑй служба, васкавлӑ медпулӑшу, полици ӗҫченӗсем ҫитнӗ.
Шел те, арҫын ӳксе вилмеллех суранланнӑ.
Шупашкарти 28 ҫулти тухтӑр патне хӑйӗнпе ФСБ ӗҫченӗ тесе паллаштарнӑ ҫын шӑнкӑравланӑ та банкри ултавҫӑ-ӗҫченсене тытмашкӑн пулӑшма ыйтнӑ. Ҫамрӑк тухтӑр вӑл мӗн каланине туса пынӑ: кредитсем илсе укҫине «хӑрушсӑр счет» ҫине куҫарнӑ. Пӗтӗмпе - 1,5 миллион тенкӗ.
Хайхискер тепӗр эрнерен кӑна укҫана никам та каялла тавӑрса памассине ӑнланнӑ. Тухтӑр полицие кайса заявлени ҫырнӑ. Ку тӗслӗх тӗлӗшпе пуҫиле ӗҫ пуҫарнӑ.
ФСБ ӗҫченӗсем оперативлӑ шырав ирттернӗ хыҫҫӑн Ҫӗмӗрлери хваттерте ют ҫӗршывран килнӗ ҫынсем пурӑннине палӑртнӑ. Вӗсем кунта саккунпа килӗшӳллӗн пулман.
Хваттерӗ Мир урамӗнче вырнаҫнӑ. Полицейскисем Кубӑран килнӗ 9 ҫынна участока илсе ҫитернӗ. Тепӗр ҫын Узбекистанран пулнӑ. Вӗсем кута кӑҫал кӑрлач-пуш уйӑхӗсенче туризм визипе килнӗ.
Иммигрантсем тӗлӗшпе 10 протокол ҫырнӑ. Ҫитес вӑхӑтра вӗсене хӑйсен ҫӗршывне ӑсатӗҫ, Раҫҫее 5 ҫул кӗме чарӗҫ.
Шупашкарта пурӑнакан 30 ҫулти арҫын 2 миллион тенкӗ парӑма мӗнле кӗрсе кайнине ӑнланман та. Вӑл полицие кайса заявлени ҫырнӑ.
Йӗрке хуралҫисем мӗн пулса иртнине палӑртнӑ. Арҫын нумаях пулмасть телефон номерне улӑштарнӑ иккен, анчах мобильлӗ банкран ҫав номере илмен. Номерӗн ҫӗнӗ хуҫи вара кунпа усӑ курнӑ, онлайн майпа кредит илсе укҫине илнӗ.
Хальхи вӑхӑтра ҫав ҫынна шыраҫҫӗ.
Муркаш округӗнче пурӑнакан 65 ҫулти хӗрарӑм полицирен пулӑшу ыйтнӑ. Вӑл мӑнукне пула укҫасӑр юлнӑ.
14 ҫулти ача ун патне ҫуллахи каникула килнӗ. Вӑл телефонра вӑйӑ выляса ларнӑ чухне пӗлтерӳ асӑрханӑ: видеоролик пӑхса укҫа ӗҫлесе илме пулать иккен. Ача мӗн хушнине прнӑҫланӑ. Унтан унран ӳсӗмӗ пирки ыйтнӑ. 14 ҫул тесен хӑратма тытӑннӑ: 18 ҫул тултарман пирки штраф тӳлеттерӗҫ-мӗн. Хӑраса ӳкнӗскер асламӑшӗн /е кукамӑшӗн/ карттин реквизичӗсене, смскӑпа килнӗ кода пӗлтернӗ. Ҫапла ултавҫӑсем унӑн счечӗ ҫинчен ҫур миллион тенкӗ вӑрланӑ.
Архангельск облаҫӗнче Чӑваш Енри ҫухалнӑ арҫынна тупнӑ. Вӑл унта машинӑпа тиевпе кайнӑ та ҫыхӑнӑва тухма пӑрахнӑ. Тӑванӗсем кун пирки полицие пӗлтернӗ.
Йӗрке хуралҫисем арҫын тиевпе вырӑна ҫитнине палӑртнӑ. Кайран вӑл малалла кайнӑ. Кӗҫех унӑн машинине вӑрман ҫывӑхӗнче тупнӑ. Арҫынна вӑрманта шыранӑ.
Тупнӑ. Вӑл апат ҫименнипе хавшанӑ, ӑна вӑрӑм тунасем ҫыртса пӗтернӗ. Арҫын хӑй ӑҫтине те, кам пулнине те ӑнланман.
Каярахпа вӑл Чӑваш Енрен пулнине, кам иккенне аса илме пуҫланӑ. Ҫул ҫинче унӑн пуҫӗ вӑйлӑ ыратма пуҫланӑ иккен, ҫавӑнпа вӑл тӑна кӗме ҫулран пӑрӑннӑ. Арҫынна илме тӑванӗсем килнӗ.
Шупашкарта 12 ҫулти хӗрача укҫа ӗҫлесе илес тенӗ. Анчах вӑл ку преступлени пулнине ӑнланман.
Хӑй каланӑ тӑрӑх, тупӑш тумалли меле вӑл мессенджерта тупнӑ. Палламан ҫынсем ӑна 71 ҫулти арҫынран 800 пин тенкӗ кайса илме хушнӑ. Лешне хайхискерсем арӑмӗ аварие лекнӗ, ӑна сиплеме укҫа кирлӗ тесе суйнӑ.
Хӗрача укҫана кайса илнӗ, 790 пин тенкине ҫав палламан ҫынсене куҫарса панӑ, 10 пин тенкине хӑйӗн валли хӑварнӑ. Ачана кӗҫех тытса чарнӑ. Полици пӗлтернӗ тӑрӑх, ашшӗ-амӑшӗн арҫынна кӳнӗ тӑкака саплаштарма тивӗ.
Шупашкарта 3-мӗш класра вӗренекен хӗрача патне палламан ҫынсем шӑнкӑравланӑ та вӗсем каланине пурнӑҫламасан амӑшӗ тӗрмене 10 ҫуллӑха ларассипе хӑратнӑ. Ҫапла хӑраса ӳкнӗ ача лешсем хушнипе ашшӗпе-амӑшӗн банк карттисене ӳкерсе янӑ. Кун хыҫҫӑн карттӑсем ҫинчен 80 пин тенкӗ ҫухалнӑ. Тепӗр икӗ операцие блокировка тунӑ.
Ачан амӑшӗ, 42 ҫулти хӗрарӑм, полицие кайса заявлени ҫырнӑ.
Кун тӗлӗшпе пуҫиле ӗҫ пуҫарнӑ.
Шупашкарта пурӑнакан 48 ҫулти хӗрарӑм Тӗп пасара кайса банкоматра укҫа илнӗ, ӑна «хӑрушсӑр счет» ҫине куҫарма тӑнӑ. Юрать-ха, ҫакна туса ӗлкӗреймен – ӑна вӑхӑтра чарнӑ.
Палламан ҫынсем ӑна анлӑ сарӑлнӑ схемӑпа улталанӑ. Укҫине илсе «хӑрушсӑр счет» ҫине куҫарма ыйтсан хӗрарӑм банкомат умне пынӑ. Вӑл 45 пин тенкине куҫарса ӗлкӗрнӗ. Ҫав вӑхӑтра ун патне пасар ӗҫченӗ пырса банкомата ҫурӑмӗпе хупласа укҫана куҫарма чарнӑ, ултавҫӑсем пирки каланӑ, часрах полицие кайма сӗннӗ.
Халӗ ҫав хӗрарӑм пасар ӗҫченне тав туса пӗтереймест. Кун тӗлӗшпе пуҫиле ӗҫ пуҫарнӑ.
Шупашкарти хӗрарӑм, бухгалтерта ӗҫлекенскер, ултавҫӑсен аллине лекнӗ. Вӑл палламан ҫынсем каласа тӑнипе темиҫе кредит илнӗ. Пӗтӗмпе - 905 пин тенкӗ. Ҫак укҫана вӑл йӑлтах темӗнле счетсем ҫине куҫарнӑ.
Ун патне малтае пуҫлӑхӗнчен смс-ҫыру килнӗ, лешӗ палламан ҫынсем шӑнкӑравласан итлеме хушнӑ. Чӑннипе вара вӑл ултавҫӑ пулнӑ. Банксенчен кредит илнӗ чухне хӗрарӑм укҫа машина тата гараж илме кирлӗ тесе каланӑ. Унтан ултавҫӑсем амӑшӗн счечӗ те хӑрушлӑхра пулнине пӗлтернӗ. Хӗрӗ амӑшӗ патне кайнӑ. Амӑшӗ вара ӑна ултавҫӑсем пирки ӑнлантарнӑ, полицие кайма хушнӑ.
Кун тӗлӗшпе пуҫиле ӗҫ пуҫарнӑ.
+21.3 °C