Шупашкарти 50 ҫулти арҫын пӗр заведенире хӗрарӑмпа паллашнӑ та ӑна тара илнӗ хваттере чӗннӗ. Вӗсем ҫӗр каҫнӑ. Ҫав ҫын хӗрарӑм мар, арҫын пулнине вӑл кайран полицире пӗлнӗ.
Вӑл раштавӑн 9-мӗшӗнче полици уйрӑмне пулӑшу ыйтма пынӑ. Хӑй каласа кӑтартнӑ тарӑх, ҫӗр каҫнӑ хыҫҫӑн унӑн кӗсйинчен 10 пин тенкӗ ҫухалнӑ.
Уголовлӑ шырав ӗҫченӗсем ҫав ҫынна часах шыраса тупнӑ. Вӑл хӗрарӑм мар иккен. Хайхискер – унччен судпа пӗрре мар айӑпланнӑ арҫын, хамӑр республикӑранах. Вӑл хӗрарӑм пек курӑнма юратать иккен.
Тытса чарнӑ арҫын айӑпне йышӑннӑ, тӑкака саплаштарнӑ. Пуҫиле ӗҫе малалла тӗпчеҫҫӗ.
Етӗрне округӗнче 2008 ҫулта ҫуралнӑ хӗре шыраҫҫӗ. Галина Александрова раштавӑн 1-мӗшӗнче ирхи 9 сехетре килтен кайнӑ та таврӑнман. Хӗр Етӗрнери ЯМОЗ микрорайонта пурӑнать.
Галина Александрова ҫухални пирки Етӗрне округӗн пуҫлӑхӗ Станислав Трофимов та халӑх тетелӗнчи страницинче пӗлтернӗ. Ҫынсене шырамашкӑн пулӑшма ыйтнӑ.
Ун пирки мӗн те пулин пӗлекенсене Етӗрнери полици уйрӑмне шӑнкӑравласа пӗлтерме ыйтаҫҫӗ: (83547) 2-22-74).
Йӗпреҫ округӗнчи икӗ тӑван ултавҫӑсен аллине лекнӗ.
45 ҫулти арҫына аферистсем ҫуллах улталанӑ, инвестицие укҫа хывма сӗннӗ. Ҫапла вӑл палламан ҫынна 1,7 миллион тенкӗ куҫарса панӑ. Кун пирки вӑл полицие пӗлтернӗ.
Нумаях пулмасть ун патне каллех шӑнкӑравланӑ, укҫана тавӑрса пама шантарнӑ. Анчах ку ӗҫе кредитпа ҫыхланман ҫынна явӑҫтармалла-мӗн. Арҫын тӑванне явӑҫтарнӑ. Ҫапла лешӗ 1,5 миллион ытла тенкӗ ҫухатнӑ.
Ку тӗслӗх тӗлӗшпе пуҫиле ӗҫ пуҫарнӑ.
Ҫӗмӗрле округӗнчи 48 ҫулти арҫын Мускава кайса палламан ҫынна укҫа куҫарса панӑ, унтан Хусана кайса машинине сутса янӑ, укҫине каллех куҫарса панӑ. Унтан тин вӑл полицие кайнӑ.
Ултавҫӑсем стандартлӑ схемӑпа усӑ курнӑ: мессенджерта шӑнкӑравланӑ, унӑн счечӗ ҫинчи укҫана террористсем патне куҫарнӑ имӗш. Унпа йӗрке хуралҫи калаҫать имӗш.
Арҫын кун пирки арӑмне каланӑ. Лешӗ ку ултавҫӑсем пулнине каланӑ. Анчах арҫын ӗненмен. Малтан вӑл хӑйсен тӑрӑхӗнче 2,5 млн кредит илнӗ. Унтан Мускава кайса укҫана палламан ҫынна тыттарнӑ. Мускавра вӑл тепӗр 1,3 млн кредит илсе палламан ҫынна панӑ.
Киле таврӑннӑ чухне ун патне каллех шӑнкӑравланӑ. Унӑн машини арестра имӗш. Арҫын Хусана кайса ӑна йӳнӗрехпе сутнӑ. Укҫине каллех куҫарса панӑ.
Иномаркк ҫухалнине арӑмӗ асӑрханӑ, ыйтма пуҫланӑ. Арҫын нумай вӑхӑт каласа паман, мӗншӗн тесен следстви пирки пӗлтерместӗп тесе сӑмах панӑ. Кайран арӑмне итлесе полицие кайнӑ. Ҫапла вӑл ултавҫӑсене пӗтӗмпе 5 млн та 480 пин тенкӗ куҫарса панӑ.
Чӑваш Енри транспорт полицийӗ Мари Элти браконьерсем Атӑлта пулӑ тытнине асӑрханӑ. Вӗсем иккӗн пулнӑ. Пӗри Козьмодемьянск хулинчен 3800 метр аякра, Шупашкарти шыв управӗнче, саккуна пӑсса пулӑ тытнӑ.Тепри кӑшт аяккарах, 1200 метрта, пулнӑ.
Арҫынсенчен пӗри – 40 ҫулта, тепри – 37-ре. Вӗсем тӗрлӗ пулӑ тытнӑ. Ҫапла патшалӑха 20 пин ытла тӑкак кӳнӗ.
Чӑваш Енре арҫын ултавҫӑсене 900 пин тенкӗ куҫарса панӑ та хӑйӗн ҫине алӑ хунӑ. Тӑванӗсем полицие кайса заявлени ҫырнӑ. Вӗсен шухӑшӗпе, арҫын ултавҫӑсене пула пурнӑҫпа сывпуллашнӑ.
Вӑл кун пирки вилес умӗн ҫырнӑ хут ҫинче те палӑртса хӑварнӑ. Арҫын 40 ҫулта пулнӑ. Вӑл хӑйӗн ҫине алӑ хунӑ хыҫҫӑн тӑванӗсем ҫакна пӗлнӗ: вӑл 900 пин тенкӗ кредит илнӗ те палламан ҫынна куҫарса панӑ. Кун пирки вӗсем пӗлмен. Арҫын хӑй те полицие кайса пулӑшу ыйтман.
Ку тӗслӗх тӗлӗшпе тӗрӗслев иртет.
Шупашкарта 14-мӗш троллейбус водителӗ автобус водителӗ патне пынӑ та ҫапма пуҫланӑ. Ҫакна пӗр пассажир видео ӳкернӗ.
Ку юпа уйӑхӗн 17-мӗшӗнче ирхи 7 сехет ҫурӑра «Богдан Хмельницкий урамӗ» чарӑнура пулнӑ.
Икӗ водитель мӗншӗн вӑрҫни паллӑ мар. Ахӑртнех, троллейбус водительне автобус ытлашши патӗнче пыни, пассажирсене маларах пуҫтарни килӗшмен.
Полици ку тӗслӗх тӗлӗшпе тӗрӗслев ирттерет. Ҫакна курнӑ ҫынсенчен пулӑшу ыйтать.
Шупашкарта пурӑнакан 35 ҫулти хӗрарӑм полицие пынӑ. Вӑл ултавҫӑсен аллине лекнӗ.
Вӑл тӳлевсӗр пӗлтерӳсен сайтӗнче ӗҫ шыранӑ, резюме хӑварнӑ. Кӗҫех ун патне хӗр шӑнкӑравланӑ, килтен тухмасӑрах тупӑш тума сӗннӗ. Анчах малтан онлайн мелпе вӗренмелле, унта вара укҫа хывмалла имӗш. Кайран ку тупӑш пама тытӑнассине ӗнентернӗ.
Хӗрарӑм ӑна ӗненсе темиҫе банкра кредитсем илнӗ, укҫине лешӗ каланӑ счет ҫине куҫарнӑ. Темиҫе уйӑхра вӑл пӗр пус та ӗҫлесе илеймен, укҫине вара самаях хывнӑ – 2 миллион тенке яхӑн.
Шупашкарти 40 ҫулти арҫын, сварщикре ӗҫлекенскер, юрату шыраса укҫасӑр тӑрса юлнӑ. Вӑл паллашу сайтӗнче Америкӑри хӗрарӑмпа паллашнӑ. Унтан вӗсем мессенджерта ҫырӑннӑ.
Кӗҫех хӗрарӑм ӑна юратни пирки пӗлтернӗ, ун патне посылкӑпа хаклӑ парне янине каланӑ.Анчах вӑл таможньӑра чарӑнса тӑнӑ-мӗн, ӑна илме укҫа тӳлемелле.
Арҫын иккӗленнӗ, полицие пырса каласа кӑтартнӑ. Полицейскисем ку, ахӑртнех, ултавҫӑ пулнине каланӑ, ӑна ҫыхӑнӑва татма хушнӑ.
Арҫын итлесе ҫапла тунӑ-ха, анчах «савнийӗ» ун патне тепӗр номертен ҫырса янӑ, ҫапла каллех калаҫса кайнӑ. Кайран сварщик пӗлӗшӗсенчен 98 пин илсе «савнийӗ» кӑтартнӑ счет ҫине куҫарнӑ. Укҫине илсен «Америкӑри савни» ҫухалнӑ.
Шупашкарти медицина организацийӗнче ӗҫлекен 50 ҫулти хӗрарӑм хӑйӗн укҫине кӑна мар, тӑватӑ банкран тата тӑванӗсенчен кивҫен илнисене те ултавҫӑсене куҫарса панӑ. Пӗтӗмпе 9 миллион тенкӗ ытла.
Ун патне палламан ҫын шӑнкӑравланӑ. Вӑл Сывлӑх сыхлавӗн министерствин ӗҫченӗ-мӗн. Сасси те ун пекрех пулнипе хайхи хӗрарӑм ӗненнӗ. Вӑл кӗҫех ун патне йӗрке хуралӗнчен шӑнкӑравлассине пӗлтернӗ. Чӑнах та, шӑнкӑрав килнӗ. Такамсем ун ячӗпе кредит илме хӑтланаҫҫӗ тесе укҫана «хӑрушсӑр счет» ҫине куҫарма хушнӑ. Хӗрарӑм пӗр эрнере 9 миллион та 400 пин тенкӗ куҫарнӑ.
Тӑванӗсем вӑл кивҫен нумай ыйтнипе сисчӗвленнӗ, ывӑлне амӑшӗпе калаҫма сӗннӗ, мӗншӗн тесен хӑй хӗрарӑм хӑранипе ним те ӑнлантарайман. Ҫапла полицирен пулӑшу ыйтма тивнӗ.
+26.3 °C