Ҫӗнӗ Шупашкар хулинче пурӑнакан 66 ҫулти хӗрарӑм ултавҫӑсен серепине лекнӗ. Вӑл вӗсене 3 миллион тенкӗ куҫарса панӑ.
Ун патне икӗ уйӑх каялла палламан ҫын шӑнкӑравланӑ. Хайхискер хӑйӗнпе «банк ӗҫченӗ» тесе паллаштарнӑ, такамсем унӑн укҫине вӑрлама хӑтланнине ӗнентернӗ, укҫана ҫӑлас тесен ӑна «хӑрушсӑр счет» ҫине куҫарма ӳкӗтленӗ.
Тивӗҫлӗ канури хӗрарӑм палламан ҫынна ӗненсе вӑл хушнине пурнӑҫланӑ та нимсӗр-мӗнсӗр тӑрса юлнӑ.
Унӑн полицирен пулӑшу ыйтма тивнӗ.
Шупашкарти 74 ҫулти хӗрарӑм ултавҫӑсене ӗненсе 3,5 миллион тенкӗ ҫухатнӑ.
Ун патне палламан ҫынсем ҫурла уйӑхӗн вӗҫӗнчех шӑнкӑравланӑ. «Домофон ӗҫлет-и?» – тесе кӑсӑкланнӑ. Ӑна вара чӑнах та юсамалла пулнӑ иккен. Хӗрарӑм смс-ҫырупа килнӗ кода пӗлтернӗ. Кайран ун патне татах палламан ҫынсем шӑнкӑравланӑ. Пӗри ҫӗнӗ телефон туянса тӗрлӗ счет ҫине укҫа куҫарма хушнӑ.
Ҫак кунсенче хӗрарӑм патне «ФСБ ӗҫченӗ» шӑнкӑравланӑ. Хльхинче такамсем пенсионеркӑн хваттерне сутма хӑтланнине хӑратнӑ. Хӗрарӑм кун пирки хӗрне пӗлтермен, тӳрех риэлтор патне ҫул тытнӑ. Вӑл хваттере мӗншӗн сутма палӑртнине ӑна та каламан.
Ултавҫӑсен серепине лекнине ӑнлансан ватӑ хӗрарӑм полицие кайнӑ.
Патӑрьел округӗнче вӑрманта 6 ҫын кӑмпана кайсан ҫухалса кайнӑ. Кун пирки полицие кӑнтӑрла пӗлтернӗ.
Ҫак ҫынсем Люля поселокӗ ҫывӑхӗнче кӑмпана кайнӑ. Анчах вӗсем шала кӗрсен каялла тухмалли ҫула тупайман.
Кун пирки шӑнкӑравласа пӗлтерсен вӗсене полицейскисем тата нимеҫӗсем шырама тытӑннӑ. Малтан вӗсен машинине тупнӑ. Ун хыҫҫӑн сасӑ тата ҫутӑ сигналӗсем пама тытӑннӑ. Ҫапла кӑмпаҫӑсем тупӑннӑ.
Ҫурлан 24-мӗшӗнче Куславкка округӗнчи Кивӗ Тӗрлемес ялӗнчи автозаправкӑра ӗҫлекенсем фура водителӗ кабинӑран нумай вӑхӑт тухманнипе кайса тӗрӗслеме шутланӑ. Лешӗ унта тӑнсӑр выртнӑ.
Тӳрех медпулӑшу чӗннӗ. Тухтӑрсем Ставрополь крайӗнче пурӑнакан 46-ри арҫынна тӑна кӗртнӗ. Анализ илсен юнра юраман япаласем пуррине тупса палӑртнӑ.
Полици фура салонне пӑхнӑ хыҫҫӑн наркотик тӗрки тата шприцсем тупнӑ. Водитель наркотике ҫул ҫинче вӑрттӑн вырӑнтан илнӗ иккен.
Вӑл Мускаври транспорт компанийӗнче ӗҫлени паллӑ. Ун тӗлӗшпе пуҫиле ӗҫ пуҫарнӑ.
ВТБ банк менеджерӗ Михаил Осипов тивӗҫлӗ канури арҫынна ултавҫӑсене 7 миллион тенкӗ куҫарса парасран ҫӑлнӑ.
Ӗҫ-пуҫ ҫапла пулнӑ. Ватӑ арҫын банка пырса пухнӑ укҫине йӑлтах, процентсем ҫухалнине пӑхмасӑр, илесшӗн пулнӑ. Хӑй питӗ пӑлханнӑ. Менеджер сисчӗвленнӗ, пӗр иккӗленмесӗр полици чӗннӗ.
Кайран ҫакӑ паллӑ пулнӑ: ватӑ арҫын ҫӗрӗпе «ятарлӑ службӑсен» ӗҫченӗсемпе калаҫнӑ-мӗн. Лешсем унӑн укҫи хӑрушлӑхра пулнине, ӑна часрах «хӑрушсӑр счет» ҫине куҫармаллине ӗнентернӗ.
Михаил Осипова шалти ӗҫсен министрӗн тивӗҫӗсене пурнӑҫлакан Иван Языковӑн Тав хучӗпе чысланӑ.
Амӑшӗ кухньӑна тухнӑ та пӳлӗм алӑкӗ питӗрӗнсе ларнӑ, шалта вара 1,5 ҫулти ача юлнӑ. Ку Шупашкарти общежитире пулнӑ.
Хӗрарӑмӑн полицирен пулӑшу ыйтма тивнӗ. Пӗчӗк ача пӳлӗмре каҫӑхса кайсах макӑрнӑ. Ҫитменнине, чӳрече уҫӑ пулнӑ, ача москитлӑ сетка ҫине таянса аялалла ӳкме пултарнӑ.
Полицин кӗҫӗн лейтенанчӗ Руслан Анюров тата аслӑ лейтенанчӗ Азер Мамедов пӳлӗм алӑкне уҫайман, урамран пӑрӑх тӑрӑх хӑпарма шутланӑ. Руслан Анюров пӑрӑхпа виҫҫӗмӗш хута хӑпарнӑ, напарникӗ троспа страховка тунӑ. Ҫапла вӗсем хӑрушлӑха лекнӗ пӗчӗк ачана ҫӑлнӑ.
Шупашкарти таксист кинемее ултавҫӑсене укҫа парасран ҫӑлса хӑварнӑ. Укҫи сахал мар – 600 пин тенкӗ ытла.
89 ҫулти кинемей патне «телефон ҫыхӑнӑвӗнче ӗҫлекен ҫын» шӑнкӑравланӑ та «килӗшӗве тӑсмалла» тата «укҫана сыхласа хӑвармалла» тесе ӗнентерсе 600 пин ытла тенкине счет ҫинчен илме ӳкӗте кӗртнӗ. Кинемей укҫана сумкӑна хурса тепӗр региона парса яма тесе такси чӗннӗ.
Анчах таксист тӳрех сисчӗвленнӗ: кинемей шанчӑксӑртарах калаҫнӑ, вӗчӗрхеннӗ. Водитель укҫана кӳршӗ региона илсе каяс вырӑнне полицие ҫитнӗ. Кинемее укҫана тавӑрса панӑ, унпа тата тӑванӗсемпе калаҫу ирттернӗ. Таксиста вара Тав хучӗ панӑ.
Шупашкарта полицейскисем ҫемьери пӑтӑрмаха лӑплантарма кайсан шар курнӑ.
Ҫурлан 5-мӗшӗнче Николаев урамӗнче пурӑнакан упӑшкипе арӑмӗ вӑрҫӑнса кайсан полици чӗннӗ. Хваттерте нимӗҫ овчарки пулнӑ. Полицейскисем ӑна ваннӑйне хупма ыйтнӑ.
Пакунлисем кил хуҫисемпе калаҫса ларнӑ вӑхӑтра йытӑ ваннӑйӗнчен тухса пӗрин ҫине сиксе ӳкнӗ. Полицейскин хайне хӳтӗлесе ӑна пӑшалтан пеме тивнӗ.
Пакунли кайран больницӑна кайнӑ – унӑн кӗлетки ҫинче йытӑ ҫыртнӑ йӗрсем пуррине палӑртнӑ. Халӗ ШӖМ ку тӗслӗх тӗлӗшпе тӗрӗслев ирттерет.
Украина ҫыннисем Шупашкарти 14-ри арҫын ачана вербовка тума хӑтланнӑ
Арҫын ача туссем тупас тесе анлӑ сарӑлнӑ паллашу платформинче регистрациленнӗ те темле «Ольӑпа» калаҫма тытӑннӑ. Кӑштахран хӗр курнӑҫма тесе ӑна хӑйӗн координачӗсене ярса пама ыйтнӑ. Каччӑ ярса панӑ хыҫҫӑн ун патне видео килнӗ, унта ӑна темӗн те каласа хӑратнӑ. Видеора Украина формине тӑхӑннӑ арҫын пулнӑ.
Кӑшт вӑхӑт иртсен «полицейски» тесе паллаштарнӑ арҫын шӑнкӑравланӑ. Саккуна пӑснӑ тесе вӑл арҫын ачан ашшӗ-амӑшӗн ятне-шывне, ӑҫта ӗҫленине ыйтса пӗлнӗ. Нумай вӑхӑт хӑратса (ҫемйине вӗлерессине те каланӑ) пурӑннӑ хыҫҫӑн палламан ҫын арҫын ачана задани панӑ: Чӑваш Енри оборона предприятине видео ӳкерсе ярса памалла. Ача хӑраса ӳкнипе кун пирки никама та каламан, задание пурнӑҫланӑ.
Кайран ӑна бензин туянма хушнӑ. Юрать-ха, ҫавӑн чухне телефонпа калаҫнине амӑшӗ илтнӗ. Ҫемье кун пирки тӳрех полицие пӗлтернӗ.
Шупашкарта пурӑнакан арҫын ултавҫӑсене 3 миллион тенкӗ ытла куҫарса панӑ. Полицие вӑл мар, унӑн тӑванӗсем шӑнкӑравласа пулӑшу ыйтнӑ.
50 ҫулти арҫын патне ҫӗртме уйӑхӗнчех пӗр хӗр шӑнкӑравланӑ. Укҫа ӗҫлесе илмелли мел пур тесе сӗннӗ. Арҫын килӗшнӗ те телефонне лешӗ каланӑ сарӑма вырнаҫтарнӑ. Укҫа ӗҫлесе илес тесе 3 миллион та 150 пин тенкӗ инвестици хывнӑ. Ку укҫана вӑл банкран кредит илнӗ. Анчах арҫын кайран укҫана тавӑрас тенӗ — май килмен, счета блокировка тунӑ.
+4.3 °C