Электронлă вулавăш

Ку сайтра эсир чăвашла çырнă хайлавсене тупма пултаратăр. Пур хайлава та авторĕ, çырнă çул тăрăх çăмăллăн тупма пулать. Ку архива ятарласа хатĕрленĕ — сире килĕшекен хайлавсене эсир ку сайтра та, уйрăммăн уçласа илсе те вулама пултаратăр.

Пӗлме: хайлавсем вырнаҫтармалли йӗрке.

Лартрăм эпĕ çамрăк улмуççи,

Пултăр терĕм тутлă пан улми.

Час та часах тăтăм шăварса,

Мĕншĕн пур пĕр хăрса ларчĕ-ши?

Пурччĕ манăн шурă перчетке

Хутран-ситрен кăна тăхăнма.

Тăхăнтăм ăна пит упраса,

Мĕншĕн пур пĕр час хуралчĕ-ши?

Пурччĕ манăн хам юратнă тус

Ĕмĕр пĕрле савса пурăнма.

Чĕремре ман çунчĕ юрату,

Мĕншĕн ăна систермерĕм-ши?

Хăрса ларман пулсан улмуççи

Пан улми çиеттĕм савăнса.

Çумра пулнă пулсан чун савни

Çӳремĕттĕм чунтан хурланса.

Пĕлмен çынна тухрăм эп качча,

Пулаймарĕ ырă курасси.

Савăнма пӳрмен мана шăпа,

Мĕншĕн мăшăр çĕре кĕчĕ-ши?

Çул хĕрринчех сар чечек

Кăпкаланчăк сар çӳç пек.

Чылай тăтăм тинкерсе,

Аса илтĕм савнине.

Çӳлте шăпчăк юр юрлать,

Çамрăк пике сасси пек.

Чылай тăтăм итлесе,

Илтрĕм савни сассине.

Хурăнлăхра шур хурăн

Йăрăс пӳллĕ пике пек.

Ыталарăм хурăна,

Кĕтĕм савни ытамне.

Çӳл тӳпере сар хĕвел

Ăшăтать çут тĕнчене.

Чылай тăтăм ăшăнса,

Туйрăм савни ăшшине.

Савăнăçлă кăмăлпа

Тухрăм эп тăван хире.

Сив çил сирчĕ ĕмĕте,

Хурлантарчĕ чунăма.

Йĕри-тавра пăхрăм та —

Чечек те çук, шăпчăк та,

Сар хĕвел те, хурăн та.

Юлтăм хуçăк кăмăлпа.

— Ытлашши, чĕлхем, эс калаçан,

Пуш сăмах нумай-çке çаптаран, —

Пуç пĕрре ятлать тет чĕлхине, —

Кăшт тытма вĕрен тилхепӳне! —

Чим-ха, эсĕ мар-им тилхепем?

Эс калаçтаран-çке мана тем.

Эс мĕн хушнă, эп çавна тăвап,

Санăн шухăшна эпĕ калап.

Ху вĕрен-ха тĕрĕс уйлама,

Пĕлерех мана калаçтарма, —

Хуравларĕ тет чĕлхе лешне.

Пуçĕ тытрĕ тет вара... пуçне.

Ватă Атăл çĕрĕпе

шур тĕтре пуçтарчĕ.

Лешĕ кăмăлсăр хĕр пек

Йăлăм енне тарчĕ.

Çамрăк хырлăх пур кунта,

хӳтлĕх лăсă пур пек.

Тĕтрене малаш кунта

çакă çитмĕ пурпĕр.

Мĕн кĕтсе явăнать-ши

хĕр-тĕтре çĕр-ирĕн?

Сивĕ сывлăш, ăшă шыв –

ак ăна мĕн кирлĕ.

Çитĕ хĕл. Пĕр ирхине

тĕтрене хыр чĕнтĕр,

вырăн чатăрĕ çине

картăр кĕмĕл чĕнтĕр.

31.10.2007. Ир кӳлĕм.

Вăхăт çитĕ, пырса тăрăп,

Чĕркуçленĕп Сан умна.

«Каçарсамччĕ, — тейĕп, — Турă,

Мана — çылăхлă чуна!»

Каçарсамччĕ шанманнишĕн

Эсĕ чăн та пуррине.

Çавăнпа, тен, пуçтарнишĕн

Çĕр çинче çылăхсене.

Кантăкран кам шаккать?

Чи-чи-чи!

Кăсăям, пулаймарĕ апатăм.

Çук ман çу та, тырă пĕрчи, –

хăнама хĕвел çаврăнăш патăм.

Пĕр сăхать те тарса тĕшĕлет,

е каллех çывхарса вĕçсе анчĕ.

Кĕреке йĕркине вăл пĕлет,

хăнари чăваш майăн хăтланчĕ.

Хула кайăкĕсем сĕре сĕмсĕр,

ямăтти пуласса çеç кĕтеç.

Вăрманта пурнакан тусăмсемсĕр

чухăн пулĕччĕ пирĕн кĕтес.

… Ир-ирех хăнана килсе кайрĕ

ман пата чи-чи-чи кăсăя.

Камăн чунĕ-ши

çав симĕс кайăк?

Кураймарĕ те пуль ман сăя?

30.10.2007. Ир кӳлĕм.

Çĕтĕк-çатăк, выççăн, çара аллăн

Эпĕр тухнă тăшмана хирме.

Юлашки, пĕтсе çитнĕ вăй-халлăн

Эпĕр пĕлнĕ пур пĕр çĕнтерме...

Каç иртрĕ. Сывлăм улăхра

Шăрçаланса пит вĕттĕн ӳкрĕ.

Ак шурăмпуç та улăхса

Каçхи сĕме пуç пĕкрĕ.

Атте ĕнер каçпа мана,

«Ыран ирех тăр! — терĕ, —

Акса хурас пĕр анана,

Халь çур. Кĕске çур çĕрĕ».

Чăнах, пĕлмен эп хальчченех, —

Çĕр çуркунне кĕске-мĕн.

Пĕрре ларан та ирчченех

Хĕрпе пуплен чеченĕн.

...Çул тăрăх тек чупать кĕсре;

Сиктерчĕк — урапийĕ.

Çанталăк лăпкă та хитре,

Шеп вăхăт çуракийĕ.

Ак çитрĕмĕр ана çине.

Аттен алра – сар кунтă.

Сапать тырра вăл ик енне,

Тырри кĕрнеклĕ пултăр!

Ун хыççăнах тăвап сӳре, —

Йăлт вантăр муклашкийĕ!..

Кахаллăн тек утать кĕсре,

Чупать çумра тихийĕ.

Таçта çӳлтех, хĕвел çумĕнчех,

Тăри юрлать хавассăн.

Тек кĕçенет кĕсре умĕнче

Çӳрен тиха, йĕс саслăн.

Нӳрелнĕ çĕр пит кăпăшка,

Нӳрелнĕ çĕр пит мăнтăр...

Кĕсре — те ывăннă — хашкать,

Сисмен те — çитнĕ кăнтăр.

Тепĕр Çĕн кун илсе килчĕ шуçăм,

Еплерех вăл иртĕ-ши паян?

Ĕнерхи пекех-ши пулĕ уçă

Е хуралĕ пĕлĕт тухнăран?

Пĕлĕтлĕ кунсем ытла чылай-çке,

Ах, сайра, сайра хĕвел пăхать!

Шалкăм çумăр ытларах çăвать-çке,

Пĕрмаях çил-тăвăл тустарать.

Çил тухмасăр çулçă хумханмасть вăл,

Тинĕс хумĕ çилсĕр вылямасть,

Чунсене кирлех, кирлех çил-тăвăл!

Пуç тулли — сапаланчăк шухăш,

Ăçта пăхан — кун çутти палăрмасть.

Пит варкать, пит çунать яш чух ăш,

Никам та çул уççи кăтартмасть.

Вĕлтĕртетрĕ кĕрхи сарă çулçă,

Вĕлтĕртетрĕ те ӳкрĕ çĕре.

Мантан пурнăç темме хытă кулчĕ...

...Çухалс(а) юлнă телей инçетрех...

Çамрăк пуç ытлашши йăваш пулнă,

Пит юратнă тĕнчен илемне.

Çут тĕнче илемпе миме тулнă,

Юр юрланă ялан çуркунне.

Эп юратнă ялан ирĕк сăвă,

Поэт ячĕ илĕртнĕ мана.

Чунăм та ун чухне пулнă сывă,

Ĕмĕтпе хуçăлман çамрăклах...

Генрих Гейне хăват мана пӳрчĕ,

Пушкин сăвăç пиллерĕ пуçа.

Çеçпĕл чунĕ манра та вĕт пурччĕ!

Сăвăç çулĕ ман пулнă уçах.

Çук, мĕн-ма-ха, ухмах, суеçетĕп?!

— Маншăн сăвăç ăраскаллă пулман!

Вĕт хамах та пит лайăх пĕлетĕп,

Эп поэзие çывăх курман!..

...Каçхине шурăмпуç пĕлĕт çийĕн

Хĕвел хыççăн анса пытансан,

Ушкăн-ушкăн тухаççĕ ретшерĕн

Ылтăн хĕм çăлтăрсем катаран.

Малалла