Инкеклӗ лару-тӑру министерстви тунӑ сӑн

Шупашкар округӗнчи арҫын кӑткӑ тӗмине ҫунтарса ярас тесе чутах ҫурт-йӗрсӗр юлман. Ҫавна пула пушар тухнӑ.

Кун пек тӗслӗх утӑ уйӑхӗн 9-мӗшӗнче пулнӑ. Шупашкар округӗнчи Ҫатракасси ялӗнче пурӑнакан арҫын ҫурт ҫамки ҫинчи кӑткӑ тӗминчен хӑтӑлас тесе ӑна чӗртсе янӑ. Анчах ҫулӑм сарӑлма пуҫланӑ, стена тата тӑрӑ ҫине куҫнӑ. Арҫын пушара сӳнтерме хӑтланнӑ та пуҫӗпе ҫапӑннӑ.

Пушарнӑйсем ҫулӑма 90 тӑваткал метр лаптӑк ҫинче пӗр сехет ҫурӑран сӳнтернӗ. Унта 14 специалист тата 4 техника хутшӑннӑ. Арҫынна вара тухтӑрсем вырӑнтах медпулӑшу панӑ.

Сӑмах май, республикӑра ҫулталӑк пуҫланнӑранпа 675 пушар пулнӑ.

#пӑтӑрмахсем, #Шупашкар районӗ, #Ҫатракасси, #пушарсем