forum.zarulem.ws сайтран илнӗ сӑнӳкерчӗк

Ӗнер, юпа уйӑхӗн 12-мӗшӗнче, Ҫӗрпӳ районӗнче ҫул ҫинче пысӑк инкек пулни пирки Чӑваш халах сайчӗ пӗлтернӗччӗ. Аса илтерер: инкек Ҫӗрпӳел ялӗнчен инҫех мар вырӑнта 15 сехет ҫурӑра пулнӑ. «А-151» федераци ҫулӗ ҫинче виҫӗ машина ҫапӑннӑ: «Ауди», «Киа» тата «ВАЗ-21099».

«Ауди» юраман ҫӗрте пысӑк хӑвӑртлӑхпа хирӗҫ ҫул ҫине тухса «Киа» машинӑна пырса лекнӗ, ун хыҫҫӑн «Киа» хирӗҫ ҫул ҫине тухса кайса «ВАЗ» машинӑпа ҫапӑннӑ. «ВАЗ» темиҫе хут ҫаврӑнса кайса ҫул хӗррине тухса ӳкнӗ. Салонра 2005, 2008, 2009 тата 2010 ҫулсенче ҫуралнӑ каччӑсем пулнӑ. Вӗсем Ҫӗрпӳри техникумра вӗреннӗ. Пӗр ял каччисем киле, Чурачӑк ялне, кайма тухнӑ.

Халӗ РФ Следстви комитечӗн Ҫӗрпӳри пайӗ «Ауди» водителӗ тӗлӗшпе РФ Пуҫиле кодексӗн 264-мӗш статйин 5-мӗш пайӗпе пуҫиле ӗҫ пуҫарнӑ. Ӑна ҫичӗ ҫул таран хупса хума пултараҫҫӗ. Суд шеллемесен. Сахалтарах памасан.

Асӑннӑ машина водительне, Ҫӗнӗ Шупашкар арҫыннине, ОСАГО полисӗсӗр ҫӳренӗшӗн кӑҫал ҫеҫ виҫӗ хутчен явап тыттарнӑ.

#пӑтӑрмахсем, #Ҫӗрпӳ районӗ, #Чурачӑк, #пуҫиле ӗҫсем, #Ҫӗнӗ Шупашкар