Комсомольски тӑрӑхӗнчи пӗр ялта пурӑнакан 39 ҫулти хӗрарӑм патне «Смотри, на видео это ты?» (чӑв. Пӑх, ку видео ҫинче эсӗ-и?) тесе ҫырнӑ ҫыру килсе выртнӑ. Хӗрарӑм ҫав ҫырӑва уҫса пӑхас тенӗ ултавҫӑсен капкӑнне ҫакланнӑ.

Вируслӑ APK-файл вӗсене ют ҫын телефонӗнчи хыпарсене (push-хыпарсене, смс-ҫырусене, галерейӑри сӑнӳкерчӗксене) пӑхма май парать. Вара хайхисем ниҫта та ӗҫлемен хӗрарӑм ячӗпе 170 пин тенкӗ кредит илнӗ.

Вӑрмарти Г.Е. Егоров ячӗллӗ вӑтам шкулта тӑрӑшнӑ хӗрарӑма пӗлтӗрхи чӳк уйӑхӗн 1-мӗшӗнче ӗҫрен кӑларса янӑ. Анчах саккуна пӑсса кӑларса янӑ-мӗн.

Хӗрарӑм пус усса ларакан йышши пулман, саккуна та аван пӗлнӗ, ҫавна май вырӑнти прокуратурӑна пулӑшу шыраса кайнӑ. Хӗрарӑма ӗҫе кӑҫалхи пуш уйӑхӗн 14-мӗшӗнчен каялла илмелле тунӑ. Анчах ӑна тепӗр тӑватӑ кунтан, пуш уйӑхӗн 18-мӗшӗнче, ҫеҫ, илнӗ.

Прокуратура хута кӗнӗ хыҫҫӑн хӗрарӑма ӗҫе 2024 ҫулхи чӳк уйӑхӗн 2-мӗшӗччен илмелле тунӑ.

pravdapfo.ru сайтран илнӗ сӑнӳкерчӗк

Етӗрне районӗнче тӳре-шара тупӑша туллин кӑтартман. Ҫавна май Етӗрне муниципалитечӗн тӑрӑхӗн пуҫлӑхне вырӑнти прокуратура тупӑш ҫинчен калакан справкӑсенче йӑнӑш пурри пирки хут ҫырса панӑ.

Администрацире ӗҫлекен 5 тӳре-шара хӑйсен тупӑшне туллин кӑтартман: мӗнпур счёчӗ тата куҫман пурлӑх пирки пӗлтермен. Уншӑн вӗсене административлӑ майпа явап тыттарнӑ.

Кунсӑр пуҫне прокуратура ҫав тӑрӑхри территори пайӗсенчен пӗрин пуҫлӑхӗ ӗҫри машинӑпа хӑйӗн валли усӑ курнӑ. Ун тӗлӗшпе административлӑ ӗҫ пуҫарнӑ.

Чӑваш Ен ШӖМӗн сӑнӳкерчӗкӗсемпе усӑ курса хатӗрленӗ коллаж

Арӑмӗпе упӑшки ҫӳпҫипе хупӑлчи теҫҫӗ те Шупашкарта пурӑнакан ҫамрӑк мӑшӑр та пӗр ҫӑвартан пурӑннӑ. Анчах ырӑ ӗмӗт-шухӑшпа ҫунатланса та ӗмӗтленсе мар. Вӗсем иккӗшӗ те преступлени ҫулӗ ҫине тӑнӑ.

Арҫынпа хӗрарӑма пакунлисем хулари Гагарин урамӗнче асӑрханӑ. Вӗсем сутма юраман япаласене сутакан интернет-лавкка пирки пӗлтерӳ ҫыпӑҫтарса ҫӳренӗ.

Хӑйсем ӗҫленине вӗсем ӳкерсе илнӗ, сӑнӳкерчӗсем отчёт валли кирлӗ пулнӑ.

Халӗ иккӗшне те административлӑ майпа явап тыттарӗҫ.

pravdapfo.ru сайтра вырнаҫтарнӑ сӑнӳкерчӗк

Шупашкар районӗнчи Ҫӗктер поселокӗнче, «Волжанка» санатори тӗлӗнче пулса иртнӗ ҫул ҫинчи инкекре тӑваттӑн аманнӑ.

«Лады Калина» машинӑпа пыракан 20 ҫулти качча хирӗҫ килекен ҫул ҫине тухса кайнӑ. Вӑл «Мазда» автомобильпе пырса ҫапӑннӑ. «Маздӑн» 45 ҫулти водительне, «Калинӑра» пулнӑ 19-ти икӗ хӗре пульницӑна ӑсатнӑ.

«Калина» водителӗ уйрӑмах хытӑ аманнӑ. Вӑл водитель правине 2023 ҫулта илнӗ иккен, хӑвӑртлӑха ӳстернӗшӗн кӑҫал кӑна ӑна административлӑ майпа 10 хутчен явап тыттарнӑ.

Йӗпреҫ округӗнчи 66 ҫулти арҫын пӗр эрнере тӑватӑ велосипед вӑрланӑ. Нумаях пулмасть суд ун тӗлӗшпе приговор вуланӑ.

Вӑл кӑҫалхи ҫӗртме уйӑхӗн 9-мӗшӗнче Йӗпреҫри лавкка умӗнче велосипед тӑнине асӑрханӑ, тытнӑ та ӑна илсе ларса кайнӑ. Ку кӑна мар, ҫӗртмен 15-мӗшӗччен вӑл тепӗр виҫӗ велосипед вӑрланӑ.

Ҫакӑ паллӑ: арҫын судпа унччен те айӑпланнӑ. Хальхинче суд ӑна ҫирӗп режимлӑ колоние 1,6 ҫуллӑха ӑсатма йышӑннӑ. Арҫын велосипедсене хуҫисене тавӑрса панӑ.

Муркаш районӗнчи 75-ри арҫын авӑн уйӑхӗн 2-мӗшӗнче фура айне пулнӑ.

Фура пысӑк хӑвӑртлӑхпа пыман-мӗн, хирӗҫ килекен машинӑсенчен пӗри автомобиле хӑрушлӑх пирки систерме хӑтланнӑ. Анчах пысӑк машина ҫул урлӑ каҫма тӑнӑ, тӗксӗм ҫипуҫ тӑхӑннӑ ватӑ ҫине пырса кӗнӗ.

Инкек авӑн уйӑхӗн 2-мӗшӗнче 20 сехетре М-7 ҫул ҫинче пулса иртнӗ. Шар курни кам иккенне унӑн арӑмӗ ирхине ҫеҫ палӑртма май килнӗ. Унӑн арӑмӗ упӑшки киле таврӑнманран йӗрке хуралҫисенчен пулӑшу ыйтнӑ.

"На связи" форумри сӑн

Ҫак самантра Шупашкарта «Нарспи» суту-илӳ ҫурчӗ ҫунать. Ҫынсем каланӑ тӑрӑх, ҫулӑм алхасни виҫӗ хутлӑ ҫуртӑн ҫӳлти хутӗнче курӑнать.

Суту-илӳ ҫурчӗ Кривов урамӗнчи 4-мӗш ҫуртра вырнаҫнӑ.

Шупашкар районӗнче пурӑнакан 71 ҫулти хӗрарӑм ултавҫӑсен капкӑнне ҫакланса 13 миллион тенке чутах куҫарса паман.

Ун патне карас ҫыхӑнӑвӗн операторӗ текен ҫын шӑнкӑравланӑ. Вӗсем ӑна килӗшӗве тӑсма сӗннӗ. Ватӑ ҫын хӑйӗн даннӑйӗсене пӗлтермен пулин те ун патне Федерацин хӑрушсӑрлӑх службин тата Раҫҫей банкӗн ӗҫченӗсем текенсем шӑнкӑравласа ӑна укҫана декларацилемелле, ахальлӗн кӗмӗл Украинӑна куҫса кайӗ тесе хӑратма тапранса кайнӑ.

13 миллион тенке темле счёт ҫине куҫариччен хӗрарӑм Шалти ӗҫсен министертсивн дежурство чаҫӗпе ҫыхӑнма ӑс ҫитернӗ. Унтисем ӑна ултавҫӑсем шӑнман пӑрпа лартса яма хӑтланни пирки ӑнлантарса панӑ.

Инкеклӗ лару-тӑру министерстви тунӑ сӑн

Канаш округӗнчи Янкӑлч ялӗнче пулнӑ пушарта 85-ри кинемейпе унӑн ывӑлӗ ҫунса кайнӑ,

Пушар ӗнер 22 сехетре тухнӑ. Ҫулӑм тӳрех пӳрте, хуралтӑ таврашӗсене ярса илнӗ. Ӑна сӳнтерес ӗҫе 9 ҫӑлавҫӑ тата 3 техника хутшӑннӑ.

Пушар хыҫҫӑн 85-ри хӗрарӑмӑн тата унӑн 1964 ҫулта ҫуралнӑ ывӑлӗн виллисене тупнӑ. Малтанлӑха пӗлтернӗ тӑрӑх, ҫулӑм пирус асӑрханмасӑр туртнӑран тухнӑ.