Ӗнер Шупашкарта банк ӗҫченӗсем ултавҫӑсен капкӑнне ҫакланнӑ хӗрарӑма пулӑшнӑ.
Пӑтӑрмах пирки банк ӗҫченӗсем йӗрке хуралҫисене шӑнкӑравласа пӗлтернӗ. Кредит учрежденине хӗрарӑм машина туянма кредит илесшӗн тесе пырса кӗнӗ.
Банка пыриччен хӗрарам ултавҫӑсене 400 пин тенкӗ ытла куҫарса пама ӗлкӗрнӗ те иккен.
Хӗрарӑм укҫана такамсене куҫарса ан патӑр тесе банк ӗҫченӗсемпе йӗрке хуралҫисем унӑн ывӑлне те чӗнсе илнӗ. Вӑл пырса ҫитсен хӗрарӑм тӗрӗссине каласа кӑтартнӑ.
Маларах ун патне Федерацин хӑрушсӑрлӑх службин ӗҫченӗ текен ҫын шӑнкӑравланӑ иккен. Вӑл ӑна ун счечӗ ҫинчен такамсем укҫана Украинӑна куҫарса панӑ, тӗрмене хупса ан хуччӑр тесен укҫана ятарлӑ счет ҫине куҫармалла тесе ӗнентернӗ. Хӗрарӑм ют ҫынсем каланине пурнӑҫласан та вӗсем унран хӑпман.
Шупашкар хулинче пурӑнакан пӗр арҫын нумай хваттерлӗ ҫуртри пӗрремӗшпе иккӗмӗш хутсем хушшинче тимӗр карта тытса лартнӑ, унта вӑл япала упрамалли вырӑн туса хунӑ. Кӳршӗ-арша ҫакӑ килӗшмен.
РФ Ҫурт-йӗр кодексӗн 40-мӗш статйин 2-мӗш пайӗнче пӑхса хӑварнӑ тӑрӑх, планировкӑна улӑштарас тесен нумай хваттерлӗ ҫуртра пурӑнакансенчен ирӗк илмелле.
Суд арҫынна тимӗр картана сӳттермелле йышӑну кӑларнӑ. Ҫак ӗҫе унӑн 30 кунта пурнӑҫламалла. Ахальлӗн унӑн кашни куншӑн 2-шер пин тенкӗ неустойка тӳлесе тӑма тивӗ.
Шупашкарта пурӑнакан пӗр арҫын хӑйӗн ватӑ амӑшне эрех ӗҫме укҫа тапӑнса хӗнесе пӗтернӗ.
Шар курнӑ ватта пуш уйӑхӗн 5-мӗшӗнче пульницӑна илсе кайнӑ. Унта вӑл ывӑлӗ хӗнесе пӗтернине йышӑннӑ. Кӑшт маларах арҫын наркологи диспансерӗнче сипленнӗ иккен, анчах унта выртса тухни нумая пыман, каллех ӗҫес килнӗ. Амӑшӗ эрех ӗҫме укҫа паманран 46-ри арҫын 77-ри амӑшне хӗнеме пуҫланӑ.
Арҫын тӗлӗшпе халӗ пуҫиле ӗҫ пуҫарнӑ.
Ӗнер, ака уйӑхӗн 1-мӗшӗнче, Муркаш округӗнчи Эхветкасси ялӗ ҫывӑхӗнче типӗ курӑк ҫунма тытӑннӑ. Пӗтӗмпе – 2 гектар ҫӗр ҫинче.
Малтанлӑха палӑртнӑ тӑрӑх, унта электролини пралукӗ татӑлса ӳкнӗ те ҫулӑм тухнӑ. Ҫулӑм ял, дача патнелле ҫывхарас хӑрушлӑх пулман, пушӑрнӑйсем ӑна сӳнтернӗ.
Халӗ прокуратура электролиние пӑхса тӑракан организаци ӗҫӗ-хӗлне тишкерет.
Ӗнер Канаш округӗнче машина кювета чӑмса ҫаврӑнса ӳкнӗ. Салонра 6 ҫамрӑк ҫын пулнӑ. Шел те, иккӗшӗ вилмеллех аманнӑ.
Ҫакӑ паллӑ: ҫамрӑксем ача ҫуралнине паллӑ тунӑ. «Чеб.ру» портал пӗлтернӗ тӑрӑх, ҫамрӑк ашшӗ – вилнисен йышӗнче. Машина кювета чӑмсан 22 ҫулти каччӑ салонран тухса вӗҫнӗ. Вӑл ҫак округри Вӑтапуҫ ялӗнчен. Ҫавӑн пекех Сӗнтӗрвӑрринчи 26 ҫулти каччӑ вилмеллех аманнӑ. «Хондӑн» 28-ти водительне тата тепӗр 3 пассажира пульницӑна илсе кайнӑ, вӗсем йывӑр аманнӑ.
Паян Шупашкарта 61 ҫулти арҫыннӑн пурнӑҫӗ пушарта татӑлнӑ.
Инекек Октябрь: 50 ҫул урамӗнче пулнӑ. Ҫак урамри 6-мӗш ҫуртра 5-мӗш хутри икӗ пӳлӗмлӗ хваттер ҫуннӑ. Ҫӑлавҫӑсем ҫулӑма 20 минутран сӳнтернӗ. Кил хуҫи пульницӑна илсе кайнӑ чухне ҫул ҫинче вилнӗ. Вӑл сӗрӗмпе наркӑмӑшланнӑ.
Ҫулӑм 15 тӑваткал метр лаптӑкри отделкӑна сиенлетнӗ.
Пуш уйахӗн 26-мӗшӗнче, ӗнер, Тӑвай окургӗнчи Енӗш Нӑрваш ялӗнче 63 ҫулти арҫын пушарта ҫунса вилнӗ.
Ҫулӑм 70 тӑваткал метр лаптӑк ҫинче алхаснӑ. Пушара 9 ҫӑлавҫӑ, икӗ техника сӳнтернӗ.
«Хӗрлӗ автана» парӑнтарсан кил хуҫин виллине тупнӑ. Вӑл килте пӗччен пурӑннӑ.
Палӑртмалла: пӗр талӑкра 4 пушар пулнӑ. Ҫав шутран пӗри – типӗ курӑк ҫуннӑ тӗслӗх.
Паян Ҫӗрпӳ хулинче «Магнит» суту-илӳ центрӗ ҫунма тытӑннӑ. Ку кӑнтӑрла иртсен, 13 сехет ҫурӑра, пулнӑ.
Инкеклӗ лару-тӑру министерстви пӗлтернӗ тӑрӑх, суту-илӳ ҫурчӗ Шоссе урамӗнчи 2-мӗш «б» ҫуртра вырнаҫнӑ. Ҫулӑм иккӗмӗш хутри чӳречесенчен тухать.
Вырӑнта пушарнӑйсем ӗҫлеҫҫӗ. Пушара сӳнтернӗ ҫӗре 9 техника, 27 ҫын хутшӑнать.
Шупашкарта пурӑнакан иккӗмӗш ушкӑнри инвалид «Волжские зори» санаторие канма кайсан аллине хуҫнӑ.
Пӑтӑрмах 2024 ҫулхи ҫӗртме уйӑхӗнче пулса иртнӗ. 67-ри хӗрарӑм санаторие кӗнӗ чухне, алӑк урати урлӑ каҫма хӑтланса такӑнса ӳкнӗ, хулне хуҫнӑ.
Прокуратура тӗрӗслев ирттернӗ те алӑк урати виҫерен ҫӳллӗрех пулнине палӑртнӑ.
Хӗрарӑма хӳтӗлесе надзор органӗ суда тавӑҫ тӑратнӑ. Унта кӑмӑл-сипет тӗлӗшӗнчен сиен кӳни пирки сӑмах пырать.
Типӗ ҫанталӑк тӑнӑран республикӑра пӗлтӗрхи курӑк ҫуннӑ тӗслӗх нумайланнӑ. Инкеклӗ лару-тӑру министерстви пӗлтернӗ тӑрӑх, ҫуркуннехи сезон пуҫланнӑранпа ҫакнашкал 12 тӗслӗх пулнӑ. Пӗтӗмпе 15 гектар лаптӑк ҫинчи типӗ курӑк ҫуннӑ.
Чи пысӑк пушар Канаш округӗнчи Чӑрӑшкасси ялӗ хӗрринче пулнӑ. Унта 20 пин тӑваткал лаптӑк ҫинчи ҫулӑма сӳнтернӗ. Юрать-ха, ҫулӑм юнашарти вӑрман ҫине куҫман. Малтанлӑха пӗлтернӗ тӑрӑх, унта тивӗҫлӗ канури арҫын ҫӳп-ҫап ҫунтарнӑ.
+4.3 °C