Италире иртнӗ Паралимп вӑййисенче Раҫҫейӗн пӗрештернӗ команди медальсен зачетӗнче виҫҫӗмӗш вырӑн йышӑннӑ. Унтан пирӗн 6 спортсмен хутшӑннӑ. Вӗсем 12 медаль ҫӗнсе илнӗ: 8 ылтӑн, 1 кӗмӗл тата 3 пӑхӑр медаль. Палӑртса хӑвармалла: Паралимп вӑййисен историйӗнче ҫавӑн пек сахал атлетпа ҫавӑн чухлӗ медаль ҫӗнсе илни пулман.
Анастасия Багиян йӗлтӗрпе чупса 3 ылтӑн медаль ҫӗнсе илнӗ, Иван Голубков вара — 2 ылтӑн медаль. Ту йӗлтӗрӗпе янӑракан Варвара Ворончихина тӳрех 4 медаль илнӗ: 2 ылтӑн, пӗр кӗмел тата пӗр пӑхӑр. Алексей Бугаев пухмача пӗр ылтӑнпа тата икӗ пӑхӑрпа пуянлатнӑ.
Пуш уйӑхӗн 14-мӗшӗнче Хӗрлӗ Чутайра «Сӑр тӑрӑхӗ — шахмат тӑрӑхӗ» фестиваль иртрӗ. Кӑҫал ку ӑмӑрту ҫирӗммӗш хут йӗркеленнипе уйрӑмах пӗлтерӗшлӗ пулчӗ. Шахмат ӑстисем Совет Союзӗн Паттӑрӗсен И.В. Индряковпа А.Р. Логиновӑн кубокӗшӗн кӗрешрӗҫ.
Юбилейлӑ хут иртекен спорт мероприятине республикӑри 17 хулапа округран пурӗ 118 ҫын пухӑнчӗ. Хутшӑнакансен ӳсӗмӗ те тӗрлӗрен: чи пӗчӗк выляканӗ халь тин 7 ҫул тултарнӑ пулсан (2019 ҫулта ҫуралнӑ), чи аслӑ хутшӑнаканӗ — 96 ҫулхи ватӑ (1930 ҫулта ҫуралнӑ).
Тӗрлӗ ӳсӗмри абсолютлӑ ҫӗнтерӳҫӗсене — пуҫламӑш класс ачисенчен пуҫласа ӗҫ ветеранӗсем таран — кубоксемпе, медальсемпе тата хаклӑ парнесемпе чысларӗҫ. Ку ӑмӑртура уйрӑм ҫемьесем те, сывлӑхӗпе хавшакрах ачасем те хӑйсен пултарулӑхне кӑтартма пултарчӗҫ.
Кӗрешӳ Пӗтӗм Раҫҫейри XVIII ҫамрӑксен ҫар искусствин вӑййисен программине кӗнӗ. Кун пирки ЧР Элтеперӗ Олег Николаев пӗлтернӗ.
«Ку паллӑ пулӑм: кӗрешӳ кун пек пысӑк ӑмӑртусенче пӗрремӗш хут пулӗ», — тесе ҫырнӑ Элтепер. Ӑмӑртура республика чысне кам хӳтӗлесси ака уйӑхӗн 19-мӗшӗнче паллӑ пулӗ. Ун чухне республика III чемпионачӗпе тата первенствипе килӗшӳллӗн суйлав тупӑшӑвӗсем иртӗҫ.
Пӗтӗм Раҫҫейри XVIII ҫамрӑксен ҫар искусствин вӑййисем авӑн уйӑхӗн 7-23-мӗшӗсенче Анапӑра тата кӳршӗ Витязево поселокӗнче иртӗҫ. Ӑмӑрту 4 категорипе пулӗ: 10-11 ҫулсенчисем, 12-13 ҫулсенчисем, 14-15 ҫулсенчисем, 16-21 ҫулсенчисем.
Чӑваш Енри велочупуҫӑ Евгений Евграфов нейтраллӑ статус илнӗ. Ку ӑна тӗнче шайӗнчи ӑмӑртусене хутшӑнма май парать.
Нейтраллӑ статуса вӑл Пӗтӗм тӗнчери велочупуҫӑсен пӗрлӗхӗнчен илнӗ. Ҫапла вӑл халӗ UCI календаре кӗртнӗ тупӑшусене хутшӑнма пултарать.
Палӑртса хӑварар: Евгений Евграфов 27 ҫулта, вӑл – Раҫҫей спорт мастерӗ тата Раҫҫейӗн велоспорт (маунтинбайк) енӗпе пӗрлештернӗ командин пайташӗ. Евгений Шупашкарти Олимп резервӗсен В.Ярды ячӗллӗ 7-мӗш спорт шкулӗнче ӑсталӑхне туптать.
Чӑваш Енри спортсменка, пӑр ҫинче эрешлесе ярӑнакан Камилла Нелюбова Раҫҫей Гран-при финалӗнче пӑхӑр медаль ҫӗнсе илнӗ.
Камилла Шупашкарти Олимп резервӗсен 4-мӗш спорт шкулӗнче ӑсталӑхне туптать. Вӑл ӑмӑртура тӳресене кӑткӑс программӑпа тӗлӗнтернӗ: тӳрех икӗ хутчен виҫҫӗллӗ аксель тунӑ. Ку пӑр ҫинче пӗччен ярӑнакан хӗрарӑмсемшӗн йывӑр хусканусенчен пӗри шутланать.
Ҫапла пирӗн ентеш 210,67 балл пухса виҫҫӗмӗш вырӑна тухнӑ. Экспертсем акӑ мӗн палӑртаҫҫӗ: «Олимп таблици» ҫине куҫарас пулсан ку 8-мӗш вырӑнпа тан.
Камиллӑна пысӑк ҫитӗнӳ тунӑ ятпа ЧР Элтеперӗ Олег Николаев та саламланӑ.
Раҫҫейри ски-альпинист тата тепӗр медаль ҫӗнсе илнӗ. Сӑмах Никита Филиппов ски-альпинизм енӗпе Европа чемпионатӗнче финала тухнӑ ҫеҫ мар, ылтӑн медаль ҫӗнсе илнӗ.
Спринт финалӗнче Раҫҫей спортсменӗ 2 минут та 58,6 ҫеккунтра финиша ҫитнӗ. Иккӗмӗш вырӑна тухнӑ Швейцари спортсменӗ Тома Бюссар тепӗр 1,2 ҫеккунтран ҫитнӗ, виҫҫӗмӗш вырӑн йышӑннӑ Испани спортсменӗ Феррер Мартинес – тата тепӗр 1,6 ҫеккунтран.
Турнир Азербайджанри ту ҫинче йӗлтӗрпе ярӑнмалли Шахдаг курортра иртет.
23 ҫулти Никита Филиппов Камчаткӑран. Италире кӑҫал иртнӗ Олимпиадӑна нейтраллӑ пулса хутшӑннӑ пирӗн ҫӗршыв спортсменӗсенчен вӑл ҫеҫ медальпе таврӑнчӗ. Никита кӗмӗл медале тивӗҫрӗ. Ӑна ҫавӑншӑн тӑван тӑрӑхӗнче хваттер пама йышӑннӑ.
Чӑваш Ен чысне хӳтӗлекен Алина Скрипко Екатеринбургра йывӑр атлетика енӗпе иртнӗ Раҫҫей ӑмӑртӑвӗнчен виҫӗ ылтӑн медальпе таврӑннӑ.
Вӑл 76 килограмм тайманнисен виҫе категорийӗнче тупӑшнӑ. Пирӗн ентеш пьедесталӑн чи ҫӳллӗ картлашки ҫине виҫӗ хутчен хӑпарнӑ.
Палӑртмалла: Алина Скрипко Шупашкарти В.С.Соколов ячӗллӗ спорт шкулӗнче ӑсталӑхне туптать.
ШӖМре ӗҫлесе тивӗҫлӗ канӑва тухнӑ, халӗ 77 ҫул тултарнӑ Виктор Семенов Абу-Дабире иртнӗ Мастерс Уҫӑ Вӑйӑсенче 7 медаль ҫӗнсе илнӗ.
Милици полковникӗ старта 7 хут тухнӑ, 75 ҫултан аслӑраххисемпе тупӑшнӑ. Ҫиччӗшӗнчен те медаль ҫӗнсе илнӗ. Унӑн пухматӗнче – 4 ылтӑн тата 3 кӗмӗл.
Палӑртмалла: ӑмӑртӑва вун-вун ҫӗршыври 30 ҫултан аслӑрах 25 пине яхӑн спортсмен хутшӑннӑ.
Ку шӑматкун, ыран, Чӑваш Енре черетлӗ Сывлӑхпа спорт кунӗ иртӗ. Сывӑ пурнӑҫ йӗркине юратакансемшӗн 4,6 пин ытла объект уҫӑ пулӗ: бассейнсем, катоксем, фитнес-залсем, стадионсем…
Ҫавӑн пекех уҫӑ тренировкӑсем, юлташлӑх матчӗсем пулӗҫ, ӑсталӑх класӗсем ирттерӗҫ. Спорт учрежденийӗсен расписанийӗпе ЧР Спорт министерствин сайтӗнче тата спорт комплексӗсен халӑх тетелӗнчи ушкӑнӗсенче пӗлме пулать.
Шупашкарти спортсмен, 6-мӗш класра вӗренекен Дамир Васильев, хусканупа тӗрев енчен сусӑр спортсменсен хушшинче иртнӗ тупӑшура, йӗлтӗрпе чупассипе тата биатлонпа иртнӗ Пӗтӗм Раҫҫейри ӑмӑртура тӑватӑ медаль ҫӗнсе илнӗ.
Дамир йӗлтӗрпе чупса икӗ ылтӑн медаль илнӗ. Биатлонра вара икӗ кӗмӗл медале тивӗҫнӗ.
Саламлатпӑр ҫамрӑк спортсмена!
+6.3 °C