2017 ҫулхи ҫулла Етӗрне хулинче Сӑр юханшывӗ хӗрринчи вакунран икӗ ҫын вырнаҫмалли кимӗ, мотор тата пулӑ тытмалли хатӗрсем ҫухалнӑ. Такам вакун ҫӑрине ҫӗмӗрсе шала кӗнӗ.

Полицейскисем вӑрра шырама пуҫланӑ. Вӑхӑт иртсен ҫак ӗҫе Етӗрне районӗн арҫынни тума пултарни пирки хыпар ҫитнӗ. Ҫав арҫын унччен те судпа айӑпланнӑ.

Хайхискер йӗр ун ҫине ӳкнине туйсан кимме тавӑрса пама шутланӑ. Вӑл кимме урӑх ҫынсем урлӑ хуҫине тавӑрса панӑ. Кимме йӑкӑртнӑранпа 2 ҫул иртнӗ пулнӑ ӗнтӗ.

ЧР ШӖМӗ пӗлтернӗ тӑрӑх, 2017 ҫулхи ҫурла уйӑхӗн 2-мӗшӗнче пуҫарнӑ пуҫиле ӗҫе тепӗр хутчен тӗпчеме тытӑннӑ. Халӗ следстви пырать.

Кӑҫал ейӳре Улатӑр районӗнче 765 ҫурт шар курма пултарать. Кун пирки Улатӑр хула администрацийӗн пресс-служби хыпарланӑ.

Ҫак ҫуртсенче 1760 ҫын пурӑнать. Ейӳ сарӑлас тӑк ҫынсене шкулсене вырнаҫтарӗҫ. Килти выльӑх-чӗрлӗхе вара «Рассветовский» ял хуҫалӑх кооперативне вӑхӑтлӑха илсе кайӗҫ. Шыв илме пултарнӑ ҫуртсенче йывӑр чирлӗ ҫынсем пурӑнаҫҫӗ тӗк вӗсене маларах Улатӑрти тӗп пульницӑн стационарне вырнаҫтарӗҫ.

Палӑртмалла: Сӑр юханшывӗнче юр хулӑнӑшӗ нормӑран 15-20 сантиметр ҫӳллӗрех. Улатӑрта ейӳре шар курнисене пулӑшакан ятарлӑ ушкӑн йӗркеленӗ: унта 90 ҫын кӗнӗ.

Нарӑс уйӑхӗн 18-мӗшӗнче ҫӗрле Сӑр юханшывӗ урлӑ Пӑрачкав районӗнче хывнӑ кӗперӗн карлӑкӗ йӑтӑнса аннӑ. Унсӑр пуҫне хунар ҫутин линийӗ сиенленнӗ, светофор ӗҫлеме пӑрахнӑ. Кун пирки «Мой город Чебоксары» портал хыпарлать.

Хайхи ҫӑлкуҫ пӗлтернӗ тӑрӑх, хальхи вӑхӑтра авари пулма пултаракан ҫак кӗпер ҫинче юсав ӗҫӗсем пыраҫҫӗ. Хунарсене, светофора тӳрлетеҫҫӗ, карлӑка юсаҫҫӗ.

Палӑртса хӑварни вырӑнлӑ пулмалла, кӑҫал ҫак кӗпере «Хӑрушсӑр тата паха ҫулсем» наци проекчӗпе килӗшӳллӗн тӗплӗ юсама тытӑнӗҫ. Ҫитес уйӑхра ҫак ӗҫе ирттерме тивӗҫ подрядчике палӑртма аукцион йӗркелӗҫ. Строительство организацийӗн икӗ ҫул хушшинче кӗпере тӗпрен юсамалла. Унсӑр пуҫне вӗсемех карлӑксене тӑвӗҫ, тротуар плитине хурӗҫ, ытти ӗҫе пурнӑҫлӗҫ.

Пӑрачкаври Сӑр юханшывӗ урлӑ хывнӑ кӗпер япӑх лару-тӑрура. Ӑна кӑҫӑл юсама палӑртнӑ. Ӗҫе «Хӑрушсӑр тата пахалӑхлӑ автомобиль ҫулӗсем» наци проекчӗпе килӗшӳллӗн темиҫе ҫул юсӗҫ, мӗншӗн тесен республика хыснинчи укҫапа кӑна вӑй ҫитерме йывӑртарах. Проектпа смета докуменчӗсене хатӗрленӗ ӗнтӗ. Подрядчике иккӗмӗш кварталта палӑртӗҫ.

Хальлӗхе автомобильсене кӗпер урлӑ пӗр ҫулпа кӑна ҫӳреттереҫҫӗ, йывӑр тиевлӗ машинӑсене кӗртмеҫҫӗ. Кӗпере юлашки хутчен 2016 ҫулта юсанӑ. Ун чухне бетонӑн пӗр пайӗ йӑтӑнса аннӑ.

Палӑртмалла: кӗпере 1970 ҫулта хута янӑ.

Чӳк уйӑхӗн 28-мӗшӗнче ирхи 8 сехетре «Сурские зори» турбазӑран инҫех мар, Сӑр юханшывӗ ҫинче, пулӑҫӑ пӑр айне кайнӑ. Юрать, ку инкекпе вӗҫленмен, ӑна ҫавӑнтах пулӑ тытакан арҫынсем ҫӑлнӑ.

Инкеклӗ лару-тӑру министерстви тепӗр хутчен асӑрхаттарать: пӑр хулӑнӑшӗ 7 сантиметр пулсан ҫеҫ ҫыннӑн ун тӑрӑх утма юрать. Хальлӗхе пӑр ҫирӗпех мар-ха, хӑш-пӗр вырӑнта ҫӳхерех. Пӑр мӗн хулӑнӑш пулнине ҫак каҫӑпа кайсан пӗлме пулать: http://gov.cap.ru/SiteMap.aspx?gov_id=203&id=1164999.

Тата ҫакна астумалла: пулӑҫӑсен пӗр вырӑнта ушкӑнпа пухӑнма, вак нумай касма юрамасть.

Проектра палӑртнӑ тӑрӑх, Сӑр урлӑ каҫмалли эстакадӑна 2020 ҫулхи ҫулаччен туса пӗтермелле. Кун пирки сайтра хыпар пулнӑччӗ. Ҫак кунсенче Правительство ҫуртӗнче иртнӗ канашлура «Волго-Вятскуправдор» пуҫлӑхӗ Илдар Мингазов пулнӑ.

Ертӳҫӗ каланӑ тӑрӑх, эстакада тӑвас ӗҫе 2020 ҫулхи утӑ уйӑхӗн 31-мӗшӗччен вӗҫлемелле, анчах кӗпере 2019 ҫултах хута ярасшӑн. Паянхи кун тӗлне строительство валли 100 миллион тенкӗ уйӑрнӑ.

Аса илтерер: эстакада строительствин аукционӗ кӑҫал ҫулла иртнӗ. Унта Мускаври «Мостотрест» ПАО фирма (унӑн тӗп аукционерӗ – Раҫҫейри миллиардерӑн Аркадий Ротенбергӑн компанийӗ) ҫӗнтернӗ, вӑл ӗҫе 1,4 миллиард ытла тенкӗпе тума килӗшнӗ.

Сӑра тасатма ЧР Министрсен Кабинечӗн резерв фондӗнчен укҫа-тенкӗ уйӑрнӑ. Иван Моторин чӳк уйӑхӗн 7-мӗшӗнче алӑ пуснӑ распоряжение республикӑри влаҫ органӗсен сайтӗнче вырнаҫьӑ.

Пӗтӗмпе 10 785,54 тенкӗ уйӑрӗҫ. Ӑна Ҫӗмӗрле администрацине куҫарса парӗҫ. Ку укҫа-тенкӗпе Сӑрӑн сылтӑм енне тасатӗҫ.

Палӑртмалла: Ҫӗмӗрле хулишӗн Сӑр юханшывӗ шыв ҫӑлкуҫӗ шутланать. Ҫӗмӗрле водоканалӗ ҫурт-йӗрпе коммуналлӑ хуҫалӑх ӗҫӗшӗн те пӗлтерӗшлӗ. Предприяти ҫынсене сивӗ шывпа тивӗҫтерет.

Етӗрне хули ҫумӗпе юхса иртекен Сӑр юханшывӗ урлӑ эстакада тума пуҫлассине Чӑваш халӑх сайчӗ пӗлтернине пирӗн вулакансем астӑваҫҫӗ пулӗ. «Волго-Вятскуправтодор» федерацин хысна учрежденийӗ ҫав ӗҫе хӑш организаци пурнӑҫлассине утӑ уйӑхӗн 17-мӗшӗнче палӑртнӑ.

Подрядчикӑн ӗҫе ҫурла уйӑхӗн 1-мӗшӗнчен кӳлӗнмелле. Эстакада ҫулӗ 768 метр тӑршшӗ пулӗ.

Строительсем 33 метр тӑршшӗ тимӗр пӑрӑссем вырнаҫтарӗҫ. Эстакада патне пыракан ҫул-йӗре те вӗсен йӗркене кӗртме тивӗ. Ҫӗр ҫийӗнсе ишӗлсе пырасран та тӗплӗ ӗҫсем пурнӑҫламалла.

Чӑваш Енӗн Транспорт тата ҫул-йӗр хуҫалӑхӗн министерствинче пӗлтернӗ тӑрӑх, подрядичикӑн мӗнпур ӗҫе 2020 ҫулхи утӑ уйӑхӗн 31-мӗшӗ тӗлне вӗҫлемелле. Тепӗр майлӑ каласан, эстакадӑна шӑп та лӑп икӗ ҫулта хута ямалла.

Чӑваш Енри Ҫӗмӗрле хулипе Нават ялне (выр. Наваты) Сӑр юханшывӗ урлӑ понтон кӗперпе ҫыхӑнтарнӑ. Икӗ региона тӳрремӗн ҫитме май паракан ҫула ӗнер уҫнӑ.

Хӗлле пӑр вӑйлӑ ларсан Сӑр урлӑ пӑр ҫулпа машинӑсем ҫӳремелле туса параҫҫӗ.

Аса илтерер, кӑҫал ӑна кӑрлач уйӑхӗн 15-мӗшӗнче хута янӑччӗ. Вӑхӑтлӑх ҫулпа 3 тоннӑран ҫӑмӑлтарах машинӑсен ҫеҫ каҫма юратчӗ. Пӑр ҫулпа иртнӗ чух пӗр сехетре вунӑ ҫухрӑмран ытла хӑваламалла марччӗ. Юханшыв урлӑ ҫула кӑҫал ака уйӑхӗн 4-мӗшӗнче хупрӗҫ. Ҫапла туни пӑр ҫӳхелнипе ҫыхӑннӑччӗ.

Сӑр урлӑ халӗ хывнӑ вӑхӑтлӑх понтон кӗпер урлӑ 5 тоннӑран йывӑр мар машинӑсен иртсе ҫӳреме юрать. Вӗсене талӑкӗпех каҫма ирӗк панӑ.

Ака уйӑхӗн 16-мӗшӗнче Ҫӗмӗрлере Сӑр юханшывӗнчен тухнӑ шывра, вӑрман хӗрринче, арҫын виллине тупнӑ. Тӗнче тетелӗнче ҫынсем пӗлтернӗ тӑрӑх, вӑл пулӑҫ ахӑртнех.

РФ Следстви комитечӗн Чӑваш Енри следстви управленийӗн пресс-службинчен кун пирки официаллӑ хыпар ҫук. Кун пирки «Про Город» хаҫата йӗрке хуралне ҫывӑх ҫӑлкуҫ пӗлтернӗ.

Кунашкал пӑтӑрмах паян Красноармейски районӗнче те пулнӑ. Тусай ҫывӑхӗнчи пӗвере 69 ҫулти арҫыннӑн виллине тупнӑ. Ӑна ял ҫыннисем асӑрханӑ та ҫӑлавҫӑсене чӗннӗ. Арҫын пулла кайнӑ-мӗн, тетелте ҫыхланса ларса путнӑ. Водолазсем унӑн виллине ирхине туртса кӑларнӑ.