«Лиза Алерт» шыравпа ҫӑлав отрячӗн хастарӗсем Шупашкарти Александр Владимирович Матвеева шыраҫҫӗ. 50 ҫулти арҫын раштав уйӑхӗн 8-мӗшӗнче килтен тухса кайнӑ.
Ҫав кун вӑл тӗттӗм хура тӗслӗ куртка, тӗттӗм спорт шӑлаварӗ, тӗттӗм карттус тӑхӑннӑ. Хӑй 170 сантиметр ҫӳллӗш, туллирех кӗлеткеллӗ, куҫӗ сӑрӑ-симӗс тӗслӗ, ҫӳҫӗ ҫутӑ ҫырӑ.
Ҫак арҫын пирки мӗн те пулине пӗлекенсене ҫак номерсемпе шӑнкӑравлама ыйтаҫҫӗ: 8(800)700-54-52 е 112. «Лиза Алерт» инфоргӗ: Елена (Касатка), 89520203557.
Шупашкарта Ӳнер музейӗнче Петр Егоров архитектора халалланӑ курав ӗҫлет. Вӑл раштав уйӑхӗн 8-мӗшӗнче уҫӑлнӑ, раштавӑн 23-мӗшӗнче вӗҫленӗ.
Курав «Петр Егоров – пирӗн вӑхӑтри ҫын» ятлӑ. Вӑл 18-мӗш ӗмӗрте Питӗрте пултарулӑхпа аппаланнӑ. Кӑҫал ҫурла уйӑхӗнче ҫак хулара плэнер иртнӗ, унта Шупашкарти студентсемпе вӗрентекенсем, Мускаври тата Питӗрти академи живописецӗсем хутшӑннӑ. Плэнерта 15 ӳнерҫӗ 150 яхӑн картина хатӗрленӗ, вӗсене Ӳнер музейӗнчи куравра курма пулать.
Петр Егорович 1731 ҫулта Курмӑш (Етӗрне) уесӗнче ҫуралнӑ. 1789 ҫулта Питӗрте вилнӗ. Унӑн паллӑ ӗҫӗсенчен пӗри – Ҫуллахи сад карти (вӑл унӑн авторӗсенчен пӗри), Христос ҫуралнине халалласа лартнӑ чиркӳ (Питӗр).
Ҫитес ҫул нарӑс уйӑхӗн 10-мӗшӗнче Пӗтӗм Раҫҫейри «Йӗлтӗр йӗрӗ» иртӗ. Раштавӑн 5-мӗшӗнче патшалӑх пулӑшӑвӗсен порталӗнче унта хутшӑнакансен регистрацилеме пуҫланӑ. Вӑл 2024 ҫулхи нарӑс уйӑхӗн 8-мӗшӗччен пырӗ.
Ҫак мелпе ҫӗршыври 73 регионта пурӑнакансем регистрациленме пултараҫҫӗ. Заявлени парсан унӑн статусне ҫавӑнтах сӑнама пулать.
«Йӗлтӗр йӗрӗнче» 18 ҫултан кӗҫӗнреххисем 5 ҫухрӑм чупӗҫ. Аслисем вара 10 ҫухрӑм чупӗҫ. Тӗп старт Шупашкарта Станци ҫумӗнчи урамра 10-мӗш ҫуртра иртӗ.
Ӗнер, раштав уйӑхӗн 10-мӗшӗнче, Шупашкарти пӗр ҫемьери виҫӗ ҫынна сӗрӗм тивнӗ.
Васкавлӑ пулӑшу тухтӑрӗсенчен ҫемье каҫхи вунӑ сехет тӗлӗнче пулӑшу ыйтнӑ. Хулари Гузовский урамӗнчи 10 ҫуртри хваттерте пурӑнаканскерсене: 43 ҫулхи хӗрарӑма, унӑн 11 ҫулти хӗрне тата 3 ҫулти ывӑлне — сӗрӗм тивнӗ. Ачасене Республикӑри ача-пӑча пульницине илсе кайнӑ, вӗсен амӑшне — Васкавлӑ медицина пулӑшӑвӗ паракан пульницӑна.
Каҫхине ҫемье ваннӑйӗнче ҫӑвӑннӑ. Ҫав вӑхӑтра хваттерте газ плити тата колонки ӗҫленӗ. Сывлӑш лайӑх ҫӳременрен кил хуҫисене сӗрӗм тивнӗ.
Шупашкарта пурӑнакан 36 ҫулти хӗрарӑма суя мелпе ача-пӑча пособине илсе тӑнӑшӑн айӑпласшӑн. Ун тӗлӗшпе пуҫиле ӗҫ пуҫарнӑ.
ШӖМ пӗлтернӗ тӑрӑх, ҫак хӗрарӑм виҫӗ ҫул патшалӑхран уйӑхсерен пособи илсе тӑнӑ. Ҫак тапхӑрта вӑл упӑшкин тупӑшне кӑтартакан суя справкӑсем тӑратнӑ. Ҫапла вӑл ачи 3 ҫул тултариччен 300 пин тенкӗ ытла илнӗ.
Справка суя пулнине ШӖМӗн экономика хӑрушсӑрлӑхӗн тата коррупципе кӗрешекен пай ӗҫченӗсем тупса палӑртнӑ. Следстви пухнӑ материала Шупашкарти Ленин районӗн судне ярса панӑ.
Шупашкарта пурӑнакан Алексей Потапов 8 ҫул ӗнтӗ ҫынсене Ҫӗнӗ ҫул умӗн хаваслӑ кӑмӑл парнелет. Вӑл кӑҫал та Хӗл Мучи пек тӑхӑнса таксипе ӗҫлеме тухнӑ.
Алексей Потапов унччен хуралҫӑра тӑрӑшнӑ. Халӗ хӑйӗн машинипе такси пек ҫӳрет. Машинине тултан та, шалтан та илемлетнӗ вӑл. Кун валли 5 пин тенкӗ тӑкакланӑ. Ҫынсене савӑнтарас тесе укҫине хӗрхенмест. Вӑл Хӗл мучи пек ҫӳренӗшӗн арӑмӗ кӑмӑлсӑрланмасть, хӗрӗ те хӗпӗртет.
Ҫак таксие лексен сӑвӑ каласа памалла кӑна - вара пылак парнене тивӗҫме пулать.
Раштавӑн 7-мӗшӗнче ирхи 4 сехетре Патшалӑх автоинспекцийӗн инспекторӗсем Шупашкарта Вӑрнар ҫулӗпе пынӑ чухне ҫӑва патӗнче арҫын утнине асӑрханӑ. Мӗн туса ҫӳренӗ-ха вӑл тӗттӗмре масар ҫывӑхӗнче?
Инспекторсем чарӑннӑ. Ҫак 32 ҫулти арҫын наркотик витӗмӗнче пулни палӑрнӑ. Ун ҫумӗнче 450 грамм наркотик тупнӑ. Вӑл ӑна тин кӑна вӑрттӑн вырӑнтан илнӗ. Ун ҫумӗнче тупнӑ наркотик - 1,3 миллион ытла тенкӗлӗх.
Арҫын темиҫе уйӑх наркотик тутаннине каланӑ. Ун тӗлӗшпе пуҫиле ӗҫ пуҫарнӑ. Пысӑк виҫепе наркотик туяннӑшӑн 20 ҫул таран ирӗксӗр хӑварма пултараҫҫӗ.
Ҫитес ҫул нарӑс уйӑхӗн 29-мӗшӗнчен пуҫласа пуш уйӑхӗн 1-мӗшӗччен Шупашкарта «Ҫӗрулми» курав иртӗ. Вӑл хальхинче Суту-илӳпе курав центрӗнче пулӗ.
Пиллӗкмӗш хутра куравӑн ӗҫлӗ пайӗ иртӗ. Унта ӑслӑлӑхпа практика конференцийӗсем, ҫавра сӗтелсем иртӗҫ, вӗсенче ҫӗрулми ӳстерессипе ҫыхӑннӑ ыйтусене сӳтсе явӗҫ.
Чи аялти хутра ҫӗрулми ярмӑркки пулӗ, унта вӑрлӑх ҫӗрулми туянма май килӗ.
Паян, раштав уйӑхӗн 7-мӗшӗнче, Шупашкарта маршрут автобусӗ инкеке лекнӗ. Пӑтӑрмах Сӗнтӗрвӑрри шосси урамри 25-мӗш ҫурт тӗлӗнче пулса иртнӗ.
«КамАЗ» автомбиль умра пыракан «Форд Транзит» микроавтобус ҫине пырса кӗнӗ. Пассажирсене турттаракан транспорт «Йошкар Ола-Шупашкар» маршрутпа ҫула тухнӑскер пулнӑ. Микроавтобус унтан «Хавейл» машина ҫине пырса кӗнӗ.
Инкек вӑхӑтӗнче микроавтобусра 4 пассажир пулнӑ. Вӗсенчен пӗрне, Киров облаҫӗнче пурӑнакан 48 ҫулти хӗрарӑма, пульницӑна илсе кайнӑ, ӑна унта тухтӑрсем пулӑшнӑ хыҫҫӑн килне янӑ.
Ҫемьене ҫӗнӗ кайӑк килсен ӑна кашниех илемлӗ ят пама тӑрӑшать. Шупашкар хулинчи Мускав районӗн ЗАГСӗнче пӗлтернӗ тӑрӑх, хӑйсен ачисене Араслан тата Леван ят паракансем те тупӑннӑ.
Пӗтӗмӗшле илсен ҫапах та хӑйсен-ывӑл-хӗрне ытларахӑшӗ Анастасия тата Александра, Михаил тата София тесе чӗнме кӑмӑллать.
Маларах асӑннӑ Арасланпа Леван вара ҫак кунсенче ҫут тӗнчене килнӗ. Чӳк уйӑхӗн 24-мӗшӗнче — Леван, чӳк уйӑхӗн 30-мӗшӗнче — Араслан.
+22.3 °C