Мускавра Чулхулари скрипка ӑстине Наталья Маурер виллине тупнӑ. Пӑтӑрмах ҫу уйӑхӗн 3-мӗшӗнче пулса иртнӗ.
Икӗ ача амӑшӗ ҫав каҫхине Алексей Паштаев офтальмолог патӗнче пулнӑ.
Асӑннӑ пӑтӑрмахпа ҫыхӑннӑ лару-тӑрӑва Пӗрремӗш каналпа «Пусть говорят» кӑларӑмра сӳтсе яврӗҫ.
Хӗрарӑм скрипка калама пӗлнисӗр пуҫне илем конкурсӗсене хутшӑннӑ. Унӑн упӑшки (иккӗшӗ нумаях пулмасть уйрӑлнӑ) — балет артисчӗ.
Алексей Паштаев — Николай Паштаев профессор ывӑлӗ. Наталья тата Алексей хӑй вӑхӑтӗнче Шупашкарти аслӑ шкулта пӗр вӑхӑтра вӗреннӗ, пӗрне пӗри палланӑ.
Алексей Мускавра ӗҫлесе пурӑннӑ.
Ҫу уйӑхӗн 15-мӗшӗнче Чӑваш Енӗн Культура институчӗн концерт залӗнче пултаруллӑ балетмейстерӑн, педагогӑн, Людмила Нянинӑн 85 ҫулхи юбилейне халалланӑ савӑнӑҫлӑ каҫ иртӗ.
Сцена ҫине Культура колледжӗн студенчӗсем, ача-пӑча ансамблӗсен воспитанникӗсем тухӗҫ. Вагаповсем, «Катюша» тата «Сарпике» халӑх ташшин коллективӗсем, Чӑваш патшалӑх юрӑпа ташӑ ансамблӗн артисчӗсем те пулӗҫ.
Пултарулӑх каҫӗ ӳнер ӗҫӗнче нумай ҫул тӑрӑшнӑ Людмила Нянинӑн хӑйне евӗрлӗ пултарулӑхӗпе паллаштарӗ.
Нянина Людмила Николаевна ҫинчен тӗплӗнрех Рувикин чӑваш уйрӑмӗнче вуласа пӗлме пулать.
Ҫу уйӑхӗн 15-мӗшӗнче Шупашкарти Ф.П.Павлов ячӗллӗ музыка училищинче паллӑ совет тата Раҫҫей композиторне, пианистне, педагогне, СССР халӑх артистне Андрей Эшпая халалласа концерт иртӗ. Вӑл ҫуралнӑранпа 100 ҫул ҫитнӗ.
Андрей Эшпай Чӑваш Ене хӑйӗн иккӗмӗш тӑван ҫӗршывӗ тесе каланӑ. Унӑн амӑшӗ, Александр Тогаев чӑваш композиторӗн тӑванӗн хӗрӗ, Шупашкар районӗнчи Шемшер ялӗнче ҫуралнӑ. Унӑн ашшӗ — ҫармӑссен профессиллӗ пӗрремӗш композиторӗ. Вӑл фольклор пухнӑ. Ҫемье Степан Максимов чӑваш композиторӗпе туслӑ пулнӑ.
Пӗчӗк Андрей кашни ҫуллах Сӗнтӗрвӑррине Тогаевсем патӗнче пурӑннӑ. Унта Родион Щедрин тата Ростислав Бойко композиторсем те пӗрре ҫеҫ мар хӑнана килсе ҫӳренӗ.
Муркашра нумаях пулмасть Юрий Жуковӑн концерчӗ иртнӗ. Пултаруллӑ ҫыннӑн 75 ҫулхине халалланӑ мероприятие зал тулли халӑх пуҫтарӑннӑ. Вырӑнтисем хыпарланӑ тӑрӑх, зал концерт пуҫланиччен ҫур сехет маларахах лӑк тулли пулнӑ.
Юрий Нестерович 1950 ҫулхи ака уйӑхӗн 17-мӗшӗнче ҫуралнӑ. Вӑл — композитор, баянист, педагог, Чӑваш Республикин культурӑн тава тивӗҫлӗ ӗҫченӗ, Муркаш районӗн хисеплӗ ҫынни.
Юбиляра район администрацийӗн культура тата архив ӗҫӗн пайӗн пуҫлӑхӗ Любовь Рыжкова саламланӑ.
Сумлӑ композитора саламлама пырса ҫитнисем хушшинче Чӑваш патшалӑх юрӑпа таша ансамбльне нумай ҫул ертсе пынӑ Раҫҫӗй халӑх артисчӗ Юрий Васильев та пулнӑ.
Ака уйӑхӗн 26 мӗшӗнче Чӑваш академи драма театрӗнче «Ылтӑн маска» Раҫҫей Наци театр премийӗн «Сезонти чи лайӑх 100 спектаклӗ» списокне кӗнӗ «Аманнӑ шӑпа» спектакле кӑтартӗҫ.
Асӑнна ӗҫ пӗтӗм Раҫҫейри «Za жизнь» патриотла спектакльсен виҫҫӗмӗш фестивалӗнче палӑрнӑ.
Спектакль режиссёрӗ — Борис Манджиев. Ӗҫе вӑл Тӑван ҫӗршывӑн аслӑ вӑрҫин салтакӗсемпе ветеранӗсене халалласа лартнӑ. Унта пӗр салтак историпе паллаштарнӑ.
Ӗнер, ака уйӑхӗн 19-мӗшӗнче, К.В. Иванов ячӗллӗ Чӑваш патшалӑх академи драма театрӗнче Чӑваш АССР тава тивӗҫлӗ артистне Леонид Семенова аса илнӗ. Вӑл ҫуралнӑранпа кӑҫал 115 ҫул ҫитнӗ.
Леонид Федорович 1910 ҫулхи ака уйӑхӗн 17-мӗшӗнче Чикме уесӗнчи (халӗ – Шупашкар районӗ) Ҫӗньял ялӗнче ҫуралнӑ.
1934 ҫулта Чӑваш патшалӑх музыкӑпа театр техникумӗн театр уйрӑмне пӗтернӗ хыҫҫӑн Чӑваш театрӗнче вӑй хунӑ.
Театрта пӗлтернӗ тӑрӑх, 36 ҫул хушшинче 200 ытла роль калӑпланӑ: «Хӗн-хур айӗнче» спектакльте Чакка тата Пахомка, «Тутимӗрте» Тутимӗр, «Тӗпӗнче» драмӑра Васька Пепел, «Аслатире» Тихон, «Ялта» спектакльте Ванюк тата нумай-нумай сӑнар.
Театра Леонид Семеновӑн тӑванӗсем те ҫитрӗҫ, ӑна ӑшӑ сӑмахсемпе саламларӗҫ.
Ака уйӑхӗн 25-мӗшӗнче Чӑваш патшалӑх академи драма театрӗнче Валентина Трифонован пултарулӑх каҫӗ иртӗ.
Валентина Ивановна — Чӑваш АССР тава тивӗҫлӗ артистки (1979), чӑваш халӑх артистки (1989), Раҫҫей тава тивӗҫлӗ артистки (1998).
Пулас артистка 1950 ҫулхи ака уйӑхӗн 25-мӗшӗнче Тӑвайӗнче ҫуралнӑ. Ленинградри А.Н. Островский ячӗллӗ патшалӑхӑн театр, музыка, кинематографи институтӗнчен вӗренсе тухнӑ. 1972 ҫултан пуҫласа 2008 ҫулччен Чӑваш патшалӑх академи драма театрӗнче ӗҫленӗ.
Валентина Трифонова ҫинчен тӗплӗнрех РУВИКИн чӑваш уйрӑменче вуласа пӗлме май пур.
Ӗнер, ака уйӑхӗн 13-мӗшӗнче, театр ӳнерӗн ҫутӑ ҫӑлтӑрӗ, чӑваш сценин илемӗ пулнӑ Нина Григорьева артистка куҫне ӗмӗрлӗхе хупнӑ. Кун пирки ҫак йӗркесен авторне Наталия Володина хыпарларӗ.
Нина Ильинична К. В. Иванов ячӗллӗ Чӑваш патшалӑх академи драма театрӗнче 65 ҫула яхӑн ӗҫленӗ. Вӑл кирек мӗнле сӑнара та тӗлӗнмелле ӑста та ӗнентерӳллӗ калӑплама пултарнӑран ӑна халӑх юратнӑ. Театрта ӗҫлеме вӑл пӗлтӗр пӑрахнӑччӗ.
Нина Григорьева пирки тӗплӗнрех РУВИКИн чӑваш уйрӑмӗнче вуласа пӗлме пулать.
Раҫҫейӗн тӗрленӗ картти Никита Михалкова Раҫҫейӗн театр атласне йӗркелеме хавхалантарнӑ.
Мускаври «Россия сегодня» (чӑв. Раҫҫей паян) пӗтӗм тӗнчери мультимеди центрӗнче Хальхи вӑхӑтри музыка карттине сӳтсе явнӑ. Унта РСФСР халӑх артисчӗ Никита Михалков режиссёр хӑйӗн ҫӗнӗ проекчӗ ҫинчен каласа кӑтартнӑ. Вӑл — «Атлас театральной России» (чӑв. Театр Раҫҫейӗн атласӗ) фестиваль. Ҫавӑн чухне ҫӗршыври регионсенчи театрсем тата пултарулӑх коллективӗсем Никита Михалковӑн «Мастерская «12» сцени ҫинче хӑйсен чи лайӑх ӗҫӗсемпе паллаштарӗҫ.
«Пӗтӗмпех Раҫҫӗйӗн тӗрленӗ карттинчен пуҫланчӗ, вал мана хавхалантарчӗ», — палӑртса хӑварнӑ Никита Михалков.
Ака уйӑхӗн 10-мӗшӗнче Шупашкара Адыгей Республикинчи патшалӑхӑн академи халӑх ташшин ансамблӗ концертпа килӗ. Унти артистсен пултарулӑхӗпе Чӑваш патшалӑх академи драма театрӗнче паллашма май килӗ.
«Нальмэс» — халӑх ташшин академи ансамбльне 1936 ҫулта йӗркеленӗ. Вал асӑннӑ регионӑн визит карточки шутланать. Коллектива хамӑр ҫӗршывра ҫеҫ мар, тӗнчере те пӗлеҫҫӗ.
Ансамбль репертуарӗ ташӑсенчен ҫеҫ мар, тӗрлӗ трюкпа музыкӑран тӑрать. Сцена ҫине 60 ытла артист тухӗ.
Концерт 19 сехетре пуҫланӗ, 1 сехет те 30 минута пырӗ.
+32.3 °C