Паян ирхи 10 сехетре Шупашкар районӗнчи Аркасси ялӗ ҫывӑхӗнче уйра типӗ курӑк ҫуннӑ. Кун пирки "Про Город" хаҫата халӑх корреспонденчӗ пӗлтернӗ.
Аркасси ҫывӑхӗнче ҫӑра тӗтӗм сарӑлнӑ. Халӑх корреспонденчӗ пӗлтернӗ тӑрӑх, ҫулӑм коттеджсем патӗнчен "Вятка" ҫул еннелле "Ирбис" автозаправка еннелле сарӑлма пуҫланӑ.
Пушарнӑйсем ҫулӑма сӳнтернӗ.
Ӗнер, ҫу уйӑхӗн 5-мӗшӗнче, каҫхи 7 сехет хыҫҫӑн Ҫӗрпӳ районӗнчи Михайловка ялӗнче Чапаев урамӗнче нумай нумай хваттерлӗ ҫуртра пушар тухнӑ. Унта иккӗмӗш хутри виҫӗ пӳлӗмлӗ хваттер ҫуннӑ.
Пушар вӑхӑтӗнче ҫуртра пурӑнакан 20 ҫынна эвакуациленӗ. Ҫӑлавҫӑсем ҫулӑма ҫур сехетренех сӳнтернӗ. Телее, инкекре ҫынсем шар курман. Халӗ пушар мӗнрен тухнине тӗпчеҫҫӗ.
Палӑртмалла: ҫав ҫурт кивӗ, 1952 ҫулта хута янӑскер.
Ҫу уйӑхӗн 1-мӗшӗнче республикӑра типӗ курӑк, ҫӳп-ҫап ҫуннӑ 7 тӗслӗх пулнӑ. Кун пирки Инкеклӗ лару-тӑру министерстви пӗлтерет.
Пӑрачкав районӗнче пысӑк пушарсемех пулнӑ. Пӑрачкав ҫывӑхӗнче типӗ курӑк ҫуннӑ. Вӑл 2 гектар ҫӗре ярса илнӗ.
Ҫак районта Ряпино ялӗ ҫывӑхӗнче те типӗ курӑк ҫуннӑ. Унта пушарнӑйсем 3 гектар ҫинчи ҫулӑмпа кӗрешнӗ.
Паян 17 сехет тӗлӗнче Шупашкарта агрегат савучӗ патӗнче тӳпенелле хура тӗтӗм хӑпарнине асӑрханӑ. Кун пирки "Про Город" хаҫата халӑх корреспонденчӗ пӗлтернӗ.
Агрегат савутӗнчи цех ҫуннӑ иккен. Вырӑна пушарнӑйсем, васкавлӑ медпулӑшу машинисем ҫитнӗ.
Пушара алхасма паман, сӳнтернӗ. Халӗ ӗҫ-пуҫа уҫӑмлатаҫҫӗ.
Паян ҫӑлавҫӑсем Шупашкарти Трактор тӑвакансен проспектӗнче ҫунакан типӗ курӑка сӳнтернӗ. Ҫулӑм промзонӑра алхаснӑ. Ҫӑлавҫӑсем унта 14 сехетре ҫитнӗ, 100 тӑваткал метр ҫинчи ҫулӑма сӳнтернӗ.
Паян Ҫӗрпӳ районӗнче те типӗ курӑк ҫуннӑ. Унта 500 тӑваткал метра ҫӗре ярса илнӗ.
Тунтикун пушарнӑйсен Шупашкар районӗнче ҫулӑмпа кӗрешме тивнӗ. Унта икӗ вырӑнта типӗ курӑк ҫуннӑ. Пӗтӗмпе – 1 гектар ҫинче.
Ҫуркунне пуҫланнӑранпа Чӑваш Енре типӗ курӑк ҫуннӑ 20 тӗслӗх пулнӑ.
Паян каҫхи 6 сехетре Шупашкарти "Ярмӑрккӑ" суту-илӳ комплексӗнче пушар пулнӑ. Вырӑна пушарнӑйсем часах ҫитнӗ. Ҫулӑма 10-а яхӑн техника сӳнтернӗ. Ҫавӑнтах пушара сӳнтерес енӗпе ӗҫлекен оперштаб йӗркеленӗ.
Инкеклӗ лару-тӑру министерстви пӗлтернӗ тарӑх, ҫулӑм парковка енчи 8-9-мӗш ретсенче тухнӑ. Ӑна часах сӳнтернӗ. Малтанлӑха пӗлтернӗ тӑрӑх, ҫулӑм темиҫе контейнера сиенлетнӗ. Хальлӗхе пушар мӗнрен тухнине пӗлтермен.
Ака уйӑхӗн 8-мӗшӗнче каҫхи 5 сехетре пушарнӑйсем патне шӑнкӑрав ҫитнӗ: Шупашкар районӗнчи Ҫӗнӗ Тутаркасси ялӗнче ҫулӑм алхасма пуҫланӑ. Октябрь – 70 ҫул урамӗнчи 23-мӗш ҫуртри пӗрремӗш хутри хваттерте пушар тухнӑ.
Кил хуҫисем урама хӑйсемех тухӑ. Анчах ҫӑра тӗтӗм сарӑлнипе виҫҫӗмӗш хутри икӗ хваттерти ҫынсем урама тухайман. 46-ри хӗрарӑм, 85 ҫулти кинемейпе унӑн 14-ри мӑнукӗ килӗсенчех юлнӑ. Вӗсене ҫӑлавҫӑсем илсе тухнӑ.
Кинмейпе мӑнукне пульницӑна ӑсатнӑ, вӗсене тухтӑрсен пулӑшӑве кирлӗ пулнӑ. Халӗ пушар мӗнрен тухнине уҫӑмлатаҫҫӗ.
Ӗнер, ака уйӑхӗн 3-мӗшӗнче, 16 сехет те 47 минутра Йӗпреҫ поселокӗнче харпӑр ҫурт ҫунма тытӑннӑ. Шел те, инкекре ҫыннӑн пурнӑҫӗ татӑлнӑ.
Пушарта ҫурт тӑрри, хуралтӑ таврашӗ ҫунса кайнӑ. Кил хуҫи хӗрарӑмӗн пурнӑҫӗ те "хӗрлӗ автана" пула татӑлнӑ. Халӗ пушар мӗнрен тухнине уҫӑмлатаҫҫӗ.
Ҫав кунах Патӑрьел районӗнчи Шӑнкӑртамра машина ҫунма пуҫланӑ. Хуҫи ҫулӑма пушарнӑйсем киличчен сӳнтернӗ. "Хӗрлӗ автан" кузова та сиенлетме ӗлкӗрнӗ.
Ӗнер Чантӑрта та пушар пулнӑ. Унта мунча ҫуннӑ. Элӗк районӗнче веранда ҫунма пуҫланӑ.
Ҫӗмӗрлере арҫын хӑйӗн ҫуртӗнче ҫунса вилнӗ. Кун пирки Инкеклӗ лару-тӑру министерстви пӗлтерет.
Пуш уйӑхӗн 30-мӗшӗнче 13 сехет те 55 минутра Ҫӗмӗрле хулинчи пӗр ҫуртра пушар тухнӑ. Ҫулӑм йӑлтах тӗп тунӑ, пӳрт кӑмрӑк купине ҫаврӑннӑ тесен те юрать.
Ҫуртра 38 ҫулти арҫын пурӑннӑ. Шел те, вӑл пушартан ҫӑлӑнайман. Инкеклӗ лару-тӑру министерстви пӗлтернӗ тӑрӑх, пушар пирус асӑрханмасӑр туртнӑран та тухма пултарнӑ.
Паян, пуш уйӑхӗн 29-мӗшӗнче, ирхи 6 сехетре Комсомольски районӗнчи Урмаелте пушар пулнӑ. Инкеклӗ лару-тӑру министерстви пӗлтернӗ тӑрӑх, унта пӗр хутлӑ кирпӗч ҫурт ҫунса кайнӑ.
Юрать-ха, никам та вилмен. Анчах кил хуҫисем шар курнӑ, ӳт-пӗвне ҫулӑмпа пӗҫертсе янӑ. Пушарта суранланнӑ арӑмӗпе упӑшки – 1969 тата 1973 ҫулсенче ҫуралнӑскерсем. Вӗсене пульницӑна илсе кайнӑ.
Пушӑн 26-мӗшӗнче Улатӑрта пилӗк хутлӑ ҫуртра хваттер ҫуннӑ. Пушар ирхи 5 сехетре тухнӑ. Унта 82 ҫулти кил хуҫи аманнӑ. Ӑна тухтӑрсем медпулӑшу панӑ.
+26.3 °C