Ӗнер, пуш уйӑхӗн 21-мӗшӗнче, 22:10 сехетре Шупашкарта хӑрушӑ авари пулнӑ: унта 47 ҫулти хӗрарӑм вилнӗ.
ШӖМ пӗлтернӗ тӑрӑх, авари Трактор тӑвакансен проспектӗнчи ҫул ҫаврӑнӑшӗнче Тасатакан сооруженисем патӗнче пулнӑ. «Сузуки» иномарка рулӗ умӗнче ларнӑ 52-ри арҫын дистанцие пӑхӑнмасӑр ВАЗ-2115 машинӑпа ҫапӑннӑ, унтан юпа ҫине пырса тӑрӑннӑ. Аварире «Сузукире» пулнӑ 47 ҫулти хӗрарӑм вилнӗ. Тепӗр иккӗшӗ, 48-ти хӗрарӑмпа 52-ри арҫын, аманнӑ.
«Сузуки» водителӗ ӳсер пулни паллӑ, вӑл хӑй суранланман. ВАЗ-2115 машина водителӗ те аманман. Халӗ ӗҫ-пуҫа уҫӑмлатаҫҫӗ.
Шупашкар районӗн сучӗ тӑватӑ ҫынна вӗлерме тӑнӑ 31 ҫулти арҫын тӗлӗшпе приговор вуланӑ.
Ӑна 4 ҫынна вӗлерме тӑнӑшӑн, ҫурт чӗртсе янӑшӑн, пикене мӑшкӑлланӑшӑн, ун тӗлӗшпе ясар шухӑшне пурнӑҫланӑшӑн айӑпланӑ. Суд палӑртнӑ тӑрӑх, арҫын савнийӗнчен уйрӑлсан ӑна тавӑрас тесе Шупашкар округӗнчи ҫуртне чӗртсе яма шухӑшланӑ. Ку ӗҫе хӑй туман, пӗлӗшне явӑҫтарнӑ. Телее, пике ҫав каҫ килӗнче пулман. Пӳртре ҫывӑрнӑ ашшӗпе амӑшӗ, пӗртӑванӗ ҫунакан ҫуртран тухса ӗлкӗрнӗ.
Тӑкак 7,5 млн тенкӗпе танлашнӑ. Прокурор арҫынна тӗрмене 19 ҫуллӑха ӑсатма ыйтнӑ. Суд приговора ҫемҫетнӗ. Приговорпа килӗшӳллӗн, арҫыннӑн ҫирӗп режимлӑ колонире 13 ҫул ирттерме тивӗ.
Паян ҫӗрле Шупашкар округӗнчи Ишлей станцийӗнче икӗ хутлӑ ҫурт ҫунса кайнӑ.
Инкеклӗ лару-тӑру министерстви пӗлтернӗ тӑрӑх, пушара икӗ сехетрен сӳнтернӗ. Анчах ҫулӑм ҫурта, гаража тӗп тума ӗлкӗрнӗ. Гаражра вара «Тойота Марк 2» машина ларнӑ. Вӑл ҫунса кайнӑ. Юрать-ха, хӑть ҫывӑхра ларнӑ икӗ машинӑна ҫӑлса хӑварма май килнӗ.
Малтанлӑха пӗлтернӗ тӑрӑх, пушар электросеть авариллӑ режимра ӗҫленине пула тухнӑ.
Канашра пурӑнакан арҫынна тытса чарнӑ. Вӑл арӑмне вӗлернӗ тесе шутлаҫҫӗ.
Следстви версийӗ ҫапларах: кӑҫал пуш уйӑхӗн 17-мӗшӗнче ҫак арҫын килӗнче ӳсӗр пулнӑ. Хайхискер арӑмӗпе вӑрҫӑнса кайнӑ та ҫӗҫӗ ярса тытнӑ – хӗрарӑма кӗлеткин тӗрлӗ пайӗнчен 10 хутчен чикнӗ. Арӑмӗ йывӑр сурансене пула ҫавӑнтах кӑшт вӑхӑт иртсен вилнӗ.
Арҫынна тытса чарнӑ хыҫҫӑн тӗпчесе ыйтса пӗлнӗ. Вӑл айӑпне йышӑннӑ. Халӗ следстви вӑхӑтӗнче ӑна хупса усрас ыйтӑва пӑхса тухаҫҫӗ.
Улатӑрти 62 ҫулти хӗрарӑм ултавҫӑсене ылтӑн катӑкӗсем тата укҫа паса янӑ.
Хӗрарӑмпа упӑшкине хӑйсемпе «Тӗп банк ӗҫченӗсем» тесе паллаштарнӑ ҫынсем хӑратма тытӑннӑ. Унччен маларах «Пенси фондӗнчен» шӑнкӑравланӑ. Хӗрарӑм темиҫе кун афристсен витӗмӗнче пулнӑ, вӗсемпе кунне 10 сехет таран та калаҫнӑ. Ултавҫӑсем каланипех вӑл ҫӗнӗ телефон тата сим-картта туяннӑ.
Пуш уйӑхӗн 10-мӗшӗнче арӑмӗпе упӑшки ятарласа Шупашкара банка кайнӑ, унта ылтӑн катӑкӗсемпе монетӑсене кӑтартма ыйтнӑ, вӗссене туяннӑ. Банк ӗҫченӗсем сисчӗвленсе вӗсенчен ултавҫӑсем пирки ыйтнӑ. Арӑмӗпе упӑшки вара мӑнукӗсен пуласлӑхӗшен ылтӑн туяннине пӗлтернӗ. Ҫав кунах вӗсем ылтӑн катӑкӗсене курьера парса янӑ.
Тепӗр кунхине ултавҫӑ упӑшкине счет ҫинчи 2,5 млн тенке илме ӳкӗте кӗртнӗ. Вӑл банкра заявка хӑварнӑ, укҫана тепӗр эрнерен илмелле пулнӑ. Ҫав вӑхӑтрах ултавҫӑсем арӑмне вкладри 1,3 млн тенке илтернӗ, ӑна Улатӑрта курьер илсе кайнӑ.
Юлашки укҫине парса ярсан тин хӗрарӑм ултавҫӑсен тӗлне лекнине ӑнланнӑ.
Паян, пуш уйӑхӗн 16-мӗшӗнче, Ҫӗрпӳ округӗнче тырӑ склачӗ ҫуннӑ. Пушар Йӗкӗрвар ялӗнчи ял хуҫалӑх предприятийӗнче пулнӑ. Ҫапла пӗлтерет Инкеклӗ лару-тӑру министерствин Чӑваш Енри Тӗп управленийӗ.
Паян ирхи 4 сехетре ял хуҫалӑх предприятийӗнче склад ангарӗ ҫунма тытӑннӑ. Ҫулӑм 1200 ытла тӑваткал метр лаптӑк ҫинче алхаснӑ. Малтанлӑха пӗлтернӗ тӑрӑх, складра 100 тоннӑна яхӑн тырӑ упраннӑ.
Ҫулӑмпа 14 ҫӑлавҫӑ, 4 техника кӗрешнӗ. Хальхи вӑхӑтра пушар мӗнрен тухнине уҫӑмлатаҫҫӗ.
Паян ҫӗрле Шупашкарти «Ярмарккӑ» пасар патӗнче, Асанне тӑкӑрлӑкӗнчи 80-мӗш «а» адреспа вырнаҫнӑ хулаҫум автостанцийӗнче, вӑйлӑ пушар пулнӑ. Унта темиҫе транспорт ҫунса кайнӑ.
Малтанлӑха пӗлтернӗ тӑрӑх, ҫулӑм икӗ автобуса тӗппипех тӗп тунӑ. Тепӗр 7 маршрутка сиенленнӗ. Инкеке курнӑ ҫынсем каланӑ тӑрӑх, пӗр автобусра пулнӑ газ хатӗрӗ сирпӗннӗ.
Ҫак автостанцире хула ҫумне ҫӳрекен автобуссен юлашки чарӑнавӗ шутланать. Унтан 137-мӗш, 230-мӗш 321-мӗш, 217-мӗш тата 330-мӗш маршруткӑсем ҫӳреҫҫӗ.
Халӗ специалистсем пушар ӑҫтан тухнине тӗпчеҫҫӗ.
Макао хулинче кӑсӑклӑ пӑтӑрмах пулса иртнӗ: полици 70 ҫулхи хӗрарӑма хӑратнӑ робота тытса чарнӑ.
Каҫхине пенсионерка тротуар тӑрӑх телефон ҫине пӑхса пынӑ. Вӑл вулама чарӑннӑ вӑхӑтра ун хыҫне ҫын евӗрлӗ Unitree G1 робот пырса тӑнӑ. Тротуар ансӑр пулнӑран робот ӑна пӑрӑнса иртсе каяйман. Хӗрарӑм хыҫалалла ҫаврӑнса пӑхсан ҫутатса тӑракан робота курах кайнӑ, ҫакӑ ӑна хытӑ хӑратнӑ. Вӑл кӑшкӑрма пуҫласан робот аллисене ҫӳлелле ҫӗкленӗ.
Хӗрарӑм аманман пулин те, ӑна тӗрӗслеме пульницӑна илсе ҫитернӗ, сывлӑхне тӗрӗсленӗ хыҫҫӑн пӗтӗмпех йӗркеллӗ пулни палӑрнӑ. Полици вара робота тытса чарнӑ та хуҫине тавӑрса панӑ. Лешӗ ӑна аякран тытса пынӑ иккен, машинӑпа вӑл пулас реклама акцийӗ валли усӑ курма шутланӑ.
2024 ҫулта Китайра кӑларнӑ ҫак робот чӑрмавсенчен ҫӑмӑллӑн пӑрӑнса иртет, анчах ку хутӗнче урам ансӑр пулни пӑтӑрмах патне илсе ҫитернӗ.
Шупашкарта хӗрача канализаци люкне кӗрсе ӳкнӗ. Юрать, ку пысӑк инкекпе вӗҫленмен.
Пӑтӑрмах паян 12 сехетре Чапаев поселокӗнчи Киров урамӗнче пулнӑ. Хӗрача утса пынӑ чухне юр айӗнчи люка кӗрсе ӳкнӗ. Унӑн хуппи уҫӑ пулнӑ.
Юрать-ха, хӗрачан тусӗ вӑхӑтра пулӑшу чӗннӗ. Иртен-ҫӳрен хӗрачана канализаци люкӗнчен хӑвӑртах кӑларнӑ. Кун хыҫҫӑн ӑна медпулӑшу панӑ.
Ҫав вырӑна тӗрӗсленӗ хыҫҫӑн ҫакӑ палӑрнӑ: хуппи юнашар выртнӑ. Халӗ прокуратура тӗрӗслев ирттерет.
Паян Шупашкарта Ленин проспектӗнче «Петровский» киоск тӑррине юр персе аннӑ. Ку 25-мӗш ҫурт патӗнче пулнӑ. Сутуҫӑ ишӗлчӗк айне пулнӑ, ҫынсем ӑна унтан тухма пулӑшнӑ. Хӗрарӑма пульницӑна янӑ, тӗрӗсленӗ хыҫҫӑн киле кайма ирӗк панӑ.
Акӑ мӗн паллӑ: ҫав самантра «Ӑшӑ кил» управляющи компанийӗ ҫурт тӑрринчен юр антарнӑ. Киосксен сутуҫисене вӑхӑтлӑха ӗҫе чарма, киоска хупма ыйтнӑ. Анчах хӗрарӑм юр антарса пӗтеричченех киоска таврӑннӑ. Ҫурт тӑрринче ӗҫлекенсем вара юра тытса чарайман, вӑл киоск тӑррине ӳкнӗ.
+24.7 °C