Ӗнер каҫхине 22 сехет тӗлӗнче Етӗрне округӗнче М-7 ҫул ҫинче пулнӑ аварире ҫамрӑк водителӗн пурнӑҫӗ татӑлнӑ.
Авари Сучково тата Кӗҫӗн Тӳмерле ялӗсем патӗнче пулнӑ. Малтанлӑха палӑртнӑ тӑрӑх, йывӑр тиевлӗ машина водителӗ, 48 ҫулти арҫын, руле итлеттереймен. Хыҫран «ГАЗельпе» пынӑ 23 ҫулти водитель, Тутарстан арҫынни, ҫапӑнасран тарма хӑтланнӑ. Анчах малтан «Ниссана» пырса лекнӗ, унтан фура ҫине пырса тӑрӑннӑ. 23-ри арҫын ҫавӑнтах йывӑр сурансене пула вилнӗ.
Халӗ ӗҫ-пуҫа уҫӑмлатаҫҫӗ.
Ҫӗмӗрле округӗнче М-12 ҫул ҫинче наркокурьера тытса чарнӑ. Ун ҫумӗнче наркотик самаях пулнӑ: 3 килограмм.
Ӗҫ-пуҫ ҫапла пулнӑ: ФСБ ӗҫченӗсем Ленинград облаҫӗнче пурӑнакан 26 ҫулти арҫынна чарнӑ. Ӑна ухтарсан 3 килограмм синтетика наркотикӗ тупнӑ.
Следстви версийӗ тӑрӑх, ҫак арҫын преступниксен ушкӑнӗнче курьер пулса ӗҫленӗ. Вӑл Мускавра тата Калуга облаҫӗнче наркотика фасофка тунӑ, кайран Свердловск облаҫне сутма илсе кайнӑ.
Халӗ ун тӗлӗшпе пуҫарнӑ пуҫиле ӗҫе Ҫӗмӗрле районӗн судне ярса панӑ.
Ҫӗнӗ Шупашкарти 47-ри арҫын Европӑран «Хонда» машина туянма ӗмӗтленнӗ. Анчах юмахри карчӑк пек ҫурӑк валашка умӗнче тӑрса юлнӑ.
Машина сутни пирки пӗлтерӗве вӑл мессенджерта курнӑ: 2021 ҫулта туса кӑларнӑ «Хондӑна» Европӑран хӑваласа килме шантарнӑ. Арҫын ку пӗлтерӗве 20-ри ывӑлне кӑтартнӑ, лешӗ тӗнче тетелӗнче компани пирки ҫынсем мӗн ҫырнине тишкернӗ – ним япӑххи те тупӑнман. Кун хыҫҫӑн ывӑлӗ сутуҫӑпа ҫыхӑнса машинӑна илессине пӗлтернӗ.
«Менеджер» паспорт сканне, адреса, телефон номерне ярса пама ыйтнӑ. Унтан килӗшӳ ярса панӑ. Ҫапла каччӑ нарӑсӑн 27-мӗшӗнче Ҫӗнӗ Шупашкарти банкра 400 ытла пин тенкӗ куҫарса панӑ. Пушӑн 5-мӗшӗнче вӑл тепӗр 500 пин тенкӗ куҫарнӑ. Тепӗр кунхине «менеджер» утильсборшӑн тепӗр 1,5 млн тенкӗ тӳлемелли пирки сӑнӳкерчӗк ярса панӑ. Кун хыҫҫӑн тин арҫын ултав серепине лекнине ӑнланнӑ та полицие кайнӑ.
Кун тӗлӗшпе пуҫиле ӗҫ пуҫарнӑ
Канаш округӗнче пушар пулнӑ – ялти лавкка ҫуннӑ. Ку паян ҫӗрле Кивӗ Ахпӳрт ялӗнче пулса иртнӗ.
Пушара ҫур сехете яхӑн сӳнтернӗ. Ку ӗҫе 6 ҫӑлавҫӑ, 2 техника хутшӑннӑ. Шел те, ҫулӑм самай сиен кӳрсе ӗлкӗрнӗ: 25 тӑваткал метр лаптӑк ҫинчи суту-илӳ павильонӗ ҫуннӑ.
Инкеклӗ лару-тӑру министерствин Чӑваш Енри тӗп управленийӗ пӗлтернӗ тӑрӑх, пушар электрохатӗр юсавсӑр ӗҫленӗрен тухнӑ.
Ҫӗнӗ Шупашкар хулинче паян чукун ҫул урлӑ каҫмалли вырӑнта инкек пулнӑ: унта локомотив тата «Форд Фокус» машина ҫапӑннӑ.
Ҫӑмӑл машина рулӗ умӗнче 46 ҫулти хӗрарӑм ларнӑ. Шел те, вӑл вырӑнтах вилнӗ. Инкек вырӑнӗнчи сӑнӳкерчӗке пӑхсан локомотив машинӑна сӗтӗрсе кайни курӑнать.
Ҫав вырӑнта пулса курнӑ ҫынсем «Про Город» телеграм-каналӗнчи пост айӗнче комментарисем ҫырнӑ тӑрӑх, чукун ҫул урлӑ каҫмалли вырӑнта юр ҫӳллӗ. Ҫапах та унта светофор пур. Ахӑртнех, вӑл хӗрлӗ ҫуннӑ пулнӑ.
Халӗ ӗҫ-пуҫа уҫӑмлатаҫҫӗ.
Паян Куславкка округӗнчи Энтри Пасар ялӗнче авариллӗ ҫуртра пушар пулнӑ. Пушар Ҫамрӑксен урамӗнчи 1-мӗш ҫуртра пулнӑ. Ҫулӑм тухни пирки ҫур ҫӗр иртни 15 минутра хыпарланӑ.
Пушар авариллӗ ҫуртри икӗ пӳлӗмлӗ хваттере ярса илнӗ. Шел те, инкексӗр пулман. Пушара сӳнтерсен хӗрарӑм виллине тупнӑ.
Кунсӑр пуҫне авариллӗ ҫуртри тепӗр тӑватӑ хваттер шар курнӑ. Ҫавӑн пекех ҫурт тӑррин 400 тӑваткал метр лаптӑкӗ сиенленнӗ.
Хальхи вӑхӑтра уҫӑ ҫулӑма сӳнтернӗ. Халӗ пушар мӗне пула тухнине уҫӑмлатас тӗлӗшпе ӗҫлеҫҫӗ.
Чӑваш Енре каллех юр йывӑрӑшне пула ҫурт тӑрри ишӗлсе аннӑ. Хальхинче – Куславкка хулинче. Унта ку юр йывӑрӑшне пула Карл Маркс урамӗнче вырнаҫнӑ почта уйрӑмӗ шар курнӑ.
Ку паян 10 сехет ҫурӑра пулса иртнӗ. Тӑрӑн пӗр пайӗ ишӗлнӗ. Халӗ район прокуратури ку тӗслӗх тӗлӗшпе тӗрӗслев ирттерет. Кун хыҫҫӑн ведомство ҫурт тӑррине юсас ӗҫе тата малашне ун пек ан пултӑр тесе тӗрӗслесе тӑрӗ.
Аса илтерер: ӗнер Ҫӗрпӳ округӗнчи Кӑнар поселокӗнчи ача пахчин тӑрри ишӗлни пирки хыпарланӑччӗ. Юсав ӗҫӗсене тунӑ вӑхӑтра ашшӗ-амӑшне ачисене урӑх учреждение илсе кайма сӗннӗ.
Чӑваш Енри полицейскисем ултавҫӑсен аллине лекнӗ хӗрарӑма ҫӑлнӑ. Ҫапах та унччен 32 ҫулти хӗрарӑм 400 пин тенкӗ куҫарса ӗлкӗрнӗ.
Шупашкарти полицейскисем патне хулара пурӑнакан пӗр хӗрарӑма ултавҫӑсем, тӑшман территорийӗнчисем, дистанци мелӗпе витӗм кӳни пирки информаци ҫитнӗ. Хӗрарӑм кун пирки упӑшкине ним те каламан. Анчах йӗрке хуралҫисем унран хӑйӗнчен ыйтма шутланӑ.
Полицейскисем хӗрарӑма полици уйрӑмне чӗнсе илнӗ. Унта хӗрарӑм йӑлтах каласа кӑтартнӑ. Вӑл «антитеррор комитечӗн ятарлӑ операцине хутшӑннӑ» иккен.
Йӗпреҫ округӗнчи Пӑва поселокӗнче культура ҫурчӗн тӑрри ишӗлсе аннӑ. Ҫак пӑтӑрмах пирки округ пуҫлӑхӗ Игорь Семенов хӑйӗн телеграм-каналӗнче пӗлтернӗ. Ку ҫурта 1937 ҫултах туса лартнӑ. Игорь Семенов палӑртнӑ тӑрӑх, ҫурт кивӗ пулин те, пӑтӑрмаха ҫавах сирӗҫ.
Округ пуҫлӑхӗ тӳрех пӑтӑрмах пулнӑ вырӑна ҫитнӗ. Унта вӑл мӗн пур служба ертӳҫисемпе канашлу ирттернӗ. Ҫак тӗлпулӑва район прокурорӗ Василий Николаев та хутшӑннӑ.
Ҫурт таврашне тӳрех картласа хунӑ. Администраци ӗҫченӗсене, библиотекарьсене тата культура ӗҫтӗшӗсене вӑхӑтлӑха урӑх ҫӗре куҫарнӑ. Вӗсене Пӑва поселокӗнчи ача пахчинчи пушӑ пӳлӗмсенче вырнаҫтарнӑ. Унта кӗмелли уйрӑм алӑк пур. Ҫавӑнпа социаллӑ учрежденисен ӗҫӗ пӗр вӑхӑтлӑха та чарӑнса тӑмӗ.
Ҫав хушӑрах ятарлӑ специалистсем культура ҫуртне тӗпчесе тухнӑ. Вӗсен пӑтӑрмах калӑпӑшне тата укҫа-тенкӗ енчен мӗн чухлӗ сиен кӳнине палӑртмалла пулӗ.
Шупашкар муниципалитет округне кӗрекен Тутаркасси тӗлӗнче йӗрке хуралҫисем пӗр водителе хӑваланӑ. Ҫул-йӗр хӑрушсӑрлӑхӗн инспекторӗсем «Лада Ларгус» ҫӑмӑл машинӑна асӑрханӑ. Пакунлисене машина ҫулпа епле пыни сисчӗвлентернӗ. Вӗсем машинӑна чарас тенӗ те водитель йӗрке хуралҫисем ыйтнине пӑхӑнман. Вӑл вӗсенчен тарса пытанма шухӑш тытнӑ.
Пакунлисенчен тарма хӑтланса ҫӑмӑл машина хирӗҫ килекен ҫул ҫине те тухса кайнӑ, светофорӑн хӗрлӗ ҫутине те пӑхӑнса тӑман.
Пакунлисем таркӑн-водителе пӗрех тытса чарнӑ. Вӑл ӳсӗр пулнӑ, салонта водительсӗр пуҫне пӗрле эрех ӗҫнӗ виҫӗ тусӗ ларса пынӑ. Кунсӑр пуҫне тата
унччен судпа айӑпланнӑ 45 ҫулти арҫыннӑн водитель правине унччен виҫӗ хутчен туртса илнӗ иккен.
+24.7 °C