Улатӑрта тухтӑрсем 6-ри ачана экстреннӑй майпа операци туса тип пырӗнчен чӗрне кӑларнӑ.
Чӗрне ҫӑтса янӑ ачана пульницӑна илсе ҫитернӗ. Тухтӑрсем тӗрӗсленӗ хыҫҫӑн акӑ мӗн палӑртнӑ: пыра лекнӗ япала сывлав ҫулне лексе сывлӑша пӳлме е йӑлмака сие сиенлетме пултарать. Санавиаци линийӗпе Республикӑри ача-пӑча клиника больницин тухтӑрӗсем килнӗ. Вӗсем ачана пӑхнӑ хыҫҫӑн часрах операци тунӑ.
Тухтӑрсем темиҫе кун сӑнанӑ хыҫҫӑн ачана киле янӑ.
Ҫӗнӗ Шупашкарти тухтӑрсем арҫыннӑн организмӗнчен 25 сантиметр тӑршшӗ пӑрӑх туртса кӑларнӑ. Ӑна васкавлӑн операци тунӑ.
Арҫын хӑй каланӑ тӑрӑх, вӑл хӗрӗнкӗ чухне нӳхрепе ӳкнӗ те пӑрӑх ҫине тӑрӑннӑ. Анчах кун хыҫҫӑн медпулӑшу чӗнмен, пульницӑна кайман.
Виҫӗ кунран вара вӑл хӑйне питӗ япӑх туйма пуҫланӑ, васкавлӑ медпулӑшӑва шӑнкӑравланӑ. Хирург операци тунӑ чухне организмӗнчен 25 сантиметр тӑршшӗ пӑрӑх татӑкӗ кӑларнӑ.
Тухтӑрсем каланӑ тӑрӑх, арҫын кипкепе ҫуралнӑ. Тимӗр вуник пумӑклӑ пырша кӑна сиенлетнӗ, ытти пӗлтерӗшлӗ органа пырса тивмен.
Чӑваш Енре арҫын кӑкӑр тӗлӗнчен вӑйлӑ ыратнине пульницӑна пынӑ. Тухтӑрсем тӗрӗсленӗ те – апат ҫулӗ ҫурӑлса кайнӑ иккен. Кун пекки ытлашши нумай ҫинипе, эрех ӗҫнипе е хырӑмлӑхра тӑрук юн пусӑмӗ ӳснипе пулать.
Арҫынна пӗр тӑхтамасӑр операци тунӑ. Кун хыҫҫӑн ӑна сиплеме пуҫланӑ. Халӗ пациент пульницӑра вӑй пухать, зонд урлӑ апат ҫиет. Сывалса ҫитме ӑна 3 уйӑх таран кирлӗ пулӗ.
Республикӑри клиника пульницин тухтӑрӗ Руслан Рыжков ӑнлантарнӑ тӑрӑх, ку – хӑрушӑ диагноз. Анчах вӑхӑтра медпулӑшу парсан пациентӑн пурнӑҫне ҫӑлса хӑварма пулать.
Шупашкарти фармаколог, вӗрентекен, ӑсчах тата медблогер Ксения Георгиева медиа тата журналистика енӗпе «ШУМ» Пӗтӗм Раҫҫейри ҫамрӑксен преминче ҫӗнтернӗ. Вӑл «Ҫамрӑклӑх энергийӗ» номинацире мала тухнӑ.
Ксения – 30 ҫулта. Вӑл Республикӑри кардиологи центрӗнче ӗҫлет, И.Н.Ульянов ячӗллӗ ЧПУра фармакологи предметне вӗрентет, ӑслӑлӑх енӗпе ӗҫлет. Ҫав вӑхӑтрах вӑл блог ертсе пырать, унӑн «Будь здоров с доктором Георгиевой» рубрикине пин-пин ҫын пӑхса тӑрать.
Республикӑри онкодиспансер тухтӑрӗсем 50 ҫулти арҫыннӑн пурнӑҫне ҫӑлнӑ. Вӗсем ӑна операци туса 3 килограмм таякан шыҫӑ касса кӑларнӑ.
Арҫыннӑн хырӑмӗ ӳссе пынӑ. Анчах вӑл утма тата сывлама йывӑрлансан кӑна вырӑнти больницӑна кайнӑ. Унти тухтӑр вара ӑна онкологи диспансерне направлени панӑ.
Онкодиспансерти специалистсем унӑн хырӑмлӑхӗнче усал шыҫӑ ӳснине палӑртнӑ. Операци темиҫе сехете тӑсӑлнӑ, ӑнӑҫлӑ вӗҫленнӗ.
«Халӗ малалла пурӑнма вӑй пур», – тенӗ пациент.
23 ҫулти каччӑ тату тутарнӑ хыҫҫӑн С гепатит ҫаклатнӑ.
Малтанах каччӑ вӑй чакнине туйма пуҫланӑ, унӑн куҫӗ саралма тытӑннӑ. Ҫакӑ мӗн амакӗ иккенне пӗлес тесе вӑл Шупашкарти тӗп хула больницине кайнӑ.
Тухтӑр каччӑна биохими анализӗ тума направлени панӑ, ҫав шутра вирус гепатитне тӗрӗслеттерме те. Диагностика хыҫҫӑн С гепатитпа чирлине ҫирӗплетсе панӑ.
Каччӑна малтан гастроэнтерологи уйрӑмӗнче сипленӗ, кайран ӑна хулари 1-мӗш клиника больницине куҫарнӑ.
Чире каччӑ тату-салонта тату тутарнӑ хыҫҫӑн ҫаклатнӑ иккен.
Чӑваш Енре шӑла наркозпа сиплеме пуҫланӑ. Анчах пурне те мар, пӗчӗк ачасене.
Пӗтӗмӗшле наркозпа сиплекен операци пӳлӗмне Республикӑн ача-пӑча больницинче тепӗр хутчен ӗҫлеттерсе янӑ. Пӗчӗскерсене кун пек пулӑшу кӳрекен уйрӑма Республикӑн стоматологи больниципе пӗрле ӗҫлеттерсе янӑ.
Пӗтӗмӗшле наркозпа кариес анлӑ сарӑлнисене, шӑл тухтӑрӗсенчен тем пек хытӑ хӑракансене, вырӑнти анестикпа ҫыхӑннӑ аллергипе нушаланакансене, неврологи чирӗллисене, сусӑрсене, аутизм чирӗпе нушалакансене сиплеҫҫӗ.
Туркменистан хӗрӗ Чӑваш Енре аслӑ пӗлӳ илнӗ те кунтах кардиологра ӗҫлеме юлнӑ. Вӑл Ширин Мухаммедова ятлӑ. Хӗр чӑваш чӗлхине те вӗренме тытӑннӑ.
Ширин амӑшӗн ҫулне суйланӑ, пурнӑҫне медицинӑпа ҫыхӑнтарнӑ. Вӑл И. Н. Ульянов ячӗллӗ Чӑваш патшалӑх университетӗнче аслӑ пӗлӳ илнӗ. Ун хыҫҫӑн Республикӑри кардиодиспансера ӗҫе вырнаҫнӑ.
Чӑваш Ен уншӑн иккӗмӗш кил пулса тӑнӑ. «Чи ҫывӑх тусӑм – чӑваш. Ҫапла эпӗ те чӑваш чӗлхине ӑнкарма тытӑнтӑм. Чылайӑшӗ эпӗ туркмен пулнине пӗлмест, чӑваш тесе шухӑшлать», — ҫапла пӗлтернӗ Ширин.
Чӑваш АССРӗн тава тивӗҫлӗ тухтӑрӗ Михаил Сорокин паян 100 ҫул тултарнӑ. Вӑл травматологи уйрӑмне 51 ҫул ертсе пынӑ.
Михаил Сорокин Вӑрмар районӗнчи Эҫпепе ялӗнче ҫуралса ӳснӗ. Тӑван ҫӗршывӑн Аслӑ вӑрҫи вӑхӑтӗнче вӑл Сӑр юханшывӗ хӗррине окоп чавма кайнӑ. Кайран ӑна фронта илнӗ. Пӗр ҫапӑҫу унӑн шухӑшне тӗпрен улӑштарнӑ – вӑл пурнӑҫне медицинӑпа ҫыхӑнтарма палӑртнӑ. Вӑрҫӑран таврӑнсан Михаил Григорьевич Хусанти мединститутра вӗреннӗ, унтан – Ленинградри аслӑ шкулта.
Ксения Георгиева – икӗ ача амӑшӗ, клиника фармакологӗ, И.Н.Ульянов ячӗллӗ ЧПУ преподавателӗ. Ҫав вӑхӑтрах вӑл ЧР Сывлӑх сыхлавӗн министерстви пулӑшнипе йӗркеленӗ «Георгиева тухтӑрпа сывӑ пул» анлӑ сарӑлнӑ рубрикӑна ертсе пырать.
Хӑйӗн блогӗнче Ксения медицина пирки ансат чӗлхепе ӑнлантарать, медицинӑра сарӑлнӑ халапсене уҫӑмлатать.
Ксения Георгиевӑн проекчӗ Раҫҫейри чи лайӑх 30 медицина блогӗ йышне кӗнӗ. Вӑл Пӗтӗм Раҫҫейри «ШУМ» ҫамрӑксен премийӗн финалисчӗ пулса тӑнӑ. Халӗ сасӑлав пырать – ҫапла чи лайӑххине суйлӗҫ. Ксенийӑна ҫӗнтерме пулӑшӑр! Сасӑлав юпан 18-мӗшӗччен пулӗ.
+7.3 °C