Шупашкар хулинче пурӑнакан Аблесовсен ҫемйинче икӗ йӗкӗреш. Аслисем, ывӑлсем, самай ӳснӗ ӗнтӗ, вӗсем вунӑ ҫулта. Ҫулталӑк каялла ҫуралнӑ хӗр пӗрчисем те вӑй илсе пыраҫҫӗ.
Паян ҫемье Шупашкарти халӑхӑн социаллӑ ыйтӑвӗсене тивӗҫтерекен комплекслӑ центрти Прокат пунктне пынӑ. Унта вӗсем йӗкӗрешсене лартса урама уҫӑлма илсе тухма меллӗ кӳме, ачасене апатлантармалли икӗ сӗтел тата шӑпӑрлансене аталанма пулӑшакан икӗ тетте вӑхӑтлӑха усӑ курма илнӗ.
«Кун пек прокат пункчӗ пурри питех те аван. Туянма туянӑн-ха, анчах кайран ӑҫта хумалла тесе пуҫ ватмалла. Кун пек килетӗн те ачасем кӑшт ӳссен япаласене каялла килсе паратӑн», — хавхаланса тав тунӑ кил хуҫи Пётр Васильевич.
Прокат пункчӗ хулари Стрелоксен 324-мӗш ҫуртӗнчи 21А ҫуртра вырнаҫнӑ. Ыйтса пӗлмелли телефон номерӗ: 51-02-68.
Вӗсем ЗАГСа 55 ҫултан каллех пӗрле килнӗ. Хальхинче – чӑваш тумӗпе. Сӑмах – Вӑрнар округӗнчи Мӑньял Хапӑс ялӗнче пурӑнакан Тикиневсем пирки.
Валериян Васильевичпа Галина Александровна Мӑньял Хапӑс клубӗнче пӗрремӗш хут тӗл пулнӑ. Ун чухне иккӗшӗ те спектакльте вылянӑ. Ҫапла туслашса кайнӑ вӗсем, 1970 ҫулхи юпан 1-мӗшӗнче вара ҫемье ҫавӑрнӑ.
Галина Александровна Вӑрнарти аш-какай комбинатӗнче бухгалтерта 25 ҫул ӗҫленӗ, Валериян Васильевич Вӑрнарти МСОра тракторист тата водитель пулнӑ.
Халӗ вӗсен ҫемйи пысӑк: уявсенче 40 ҫын таран сӗтел хушшине пухӑнать. Тикиневсен – 16 мӑнук, 8 кӗҫӗн мӑнук.
Ҫӗмӗрле хулинче пурӑнакан Ядуванкинсем изумруд туйне паллӑ тунӑ.
Сергей Ивановичпа Зинаида Александровна 55 ҫул пӗрле пурӑнаҫҫӗ. Вӗсем шкулта чухнех туслӑ ӳснӗ. Сергей купӑс калама, юрлама, ташлама ӑста пулнӑ. Хитре, ӗҫчен Зинаида вара кӳршӗ ялта пурӑннӑ. Каччӑ ӑна куҫ хывнӑ.
Салтаксен таврӑнсан Сергей хӗре качча тухма ыйтнӑ. Зинаида килӗшнӗ. Ҫапла 1970 ҫулта Ядуванкинсен ҫемйи чӑмӑртаннӑ. Мӑшӑр малтан – СУ-8 организацире, унтан Ҫӗмӗрлери автофургонсем туса кӑларакан савутра ӗҫленӗ.
Ядуванкинсем икӗ ывӑл ӳстернӗ. Халӗ пӗртен-пӗр мӑнукӗпе савӑнса пурӑнаҫҫӗ.
Чӑваш Республикинчи пултаруллӑ ҫемье «Ҫемье зарници» Пӗтӗм Раҫҫейри вӑйӑсенче 3-мӗш вырӑн йышӑннӑ. Сӑмах — Ҫӗрпӳре пурӑнакан Семеновсен ҫемйи пирки.
Ӑмӑрту ҫак кунсенче Волгоград хулинче иртнӗ. Семеновсен 24 ҫемьепе тупӑшма тивнӗ. Пирӗн ештешсен команди «Ҫӗрпӳ патриочӗсем» ятлӑ пулнӑ. Вӗсене унта хутшӑнмашкӑн «ВОИН» центрӑн республикӑри филиалӗ хатӗрленӗ.
Красноармейски округӗнчи Алманч ялӗнчи Матвеевсен ылтӑн туйӗ ҫитнӗ. Ҫак ятпа вӗсене ЗАГС ӗҫченӗсем саламланӑ.
Кил ӑшшин управҫи Искра Афанасьевна Шупашкарти 15-мӗш ача пахчи-яслире нумай ҫул тӑрӑшнӑ. Владимир Максимович Шалти ӗҫсен министерствинче аслӑ следователь пулнӑ, подполковник званийӗ таран ҫитнӗ.
Ҫемье телейӗн вӑрттӑнлӑхне уҫнӑ вӗсем: пӗр-пӗрне хисеплемелле, пулӑшса пымалла.
Ҫак кунсенче Ҫӗнӗ Шупашкарта байкерсем пӗрлешнӗ. Вӗсен туйне хӑнасем мотоциклпа пынӑ.
35 ҫулти Николай тата Ольга Ефимовсен туйӗнче байкерсем пулнӑ. Вӗсем хӑйсем – «Ночные Волки» тата «Ночные Валькирии» мотоклуб пайташӗсем.
«Оля «А» категорие вӗреннине курсан эпӗ вӑл манӑн шӑпа пулнине ӑнлантӑм», – ҫапла каланӑ Николай. Вӑл мотоциклсемпе интересленет, ҫавӑнпа пулас мӑшӑрӗ те унӑн кӑсӑкланӑвне пайлани пӗлтерӗшлӗ пулнӑ уншӑн.
Ольӑна байкер пурнӑҫӗ килӗшнине курсан Николай унпа ҫывӑхрах туслашнӑ. Туслӑх юратӑва куҫнӑ. Акӑ халӗ ҫамрӑксем пӗрлешнӗ.
Канашри ЗАГСра 50 ҫул пӗрле пурӑнакан Кузнецовсене чысланӑ. Вӗсем 1975 ҫулта Сиккассинче пӗрлешнӗ.
Валентин Николаевичпа Людмила Ильинична икӗ ача ҫуратса ӳстернӗ, халӗ пилӗк мӑнукӗпе савӑнса пурӑнаҫҫӗ.
Валентин Николаевич культура тытӑмӗнче ӗҫленӗ: Сиккассинчи ача-пӑча ӳнер шкулӗнче вӗрентекен тата директор пулнӑ. 1986 ҫулта «Чӑваш АССРӗн тава тивӗҫлӗ культура ӗҫченӗ» ята тивӗҫнӗ. 1991 ҫултанпа вара вӑл – Раҫҫей композиторӗсен ассоциацийӗн пайташӗ.
Кузнецовсен ҫемйи – ҫамрӑксемшӗн тӗслӗх.
Канаш округӗнче пурӑнакан Кудряшовсем ҫемье ҫавӑрнӑранпа 60 ҫул ҫитнине паллӑ тунӑ.
Георгий Павловичпа Мария Тимофеевна 1965 ҫулта пӗрлешнӗ. Вӗсем тӑватӑ ача ҫуратса ӳстернӗ. Халӗ тӑхӑр мӑнукпа тата икӗ кӗҫӗн мӑнукпа савӑнса пурӑнаҫҫӗ. «Пирӗн чи пысӑк пуянлӑх – ачасемпе мӑнуксем», – теҫҫӗ вӗсем.
Георгий Павлович пушар хуралӗн водителӗнче 35 ҫул ытла ӗҫленӗ. Мария Тимофеевна вара медицина тытӑмӗнче вӑй хунӑ, вӑл – Чӑваш АССРӗн тава тивӗҫлӗ фельдшерӗ. Халӗ те вӗсем ӗҫсӗр лармаҫҫӗ, кил хуҫалӑхӗнче тӑрмашаҫҫӗ.
Азербайджанра ҫывӑх тӑвансене мӑшӑрланма чарнӑ. Пирӗншӗн, чӑвашсемшӗн (чӑвашсемшӗн кӑна-и, вырӑссемшӗн те) кун пек хыпар тӗлӗнмеллисен йышӗнчен-ха. Ара, пирӗн халӑхӑмӑр ун пек аташмасть. «Ҫичӗ ӑру таран хутшӑнса пурӑнмалла, ҫичӗ ӑру таран пӗрлешме юрамасть», — тесе кукамай хамӑра та калатчӗ.
Иккӗмӗш сыпӑкри тӑвансене мӑшӑрланма кӑҫалхи утӑ уйӑхӗнченпе чарнӑ хыҫҫӑн Азербайджанра ҫемье ҫавӑрнисен шучӗ икӗ хут чакнӑ. Асӑннӑ уйӑхра унта 2694 мӑшӑр ҫемье ҫавӑрнӑ, ку вӑл ҫӗртме уйӑхӗнчинчен икӗ хута яхӑн сахалрах-мӗн.
«Хӗрӗхри юрату. Вӑл тата хӗрӳрех», — тесе юрлатчӗ пӗр юрӑҫ хӑй вӑхӑтӗнче. Шупашкар хулинчи халӑхӑн социаллӑ ыйтӑвӗсене тивӗҫтерекен комплекслӑ центрти стационар уйрӑмӗнче пурӑнакан Мильковсем хӑйсен телейне 70 ҫул урлӑ каҫсан тупнӑ.
Паян та 74 ҫулти Галина Александровнӑпа 75-ри Сергей Степанович пӗрне пӗри юратса та хисеплесе, пӗр-пӗрин ҫине ӑш пиллӗн те юратуллӑн пӑхса пурӑнаҫҫӗ.
Паян республикӑра суйлав пуҫланчӗ те, суйлава та вӗсем пӗрле кайнӑ. Таҫта аякка мар-ха. Ватӑсене хӗрхенсе центр суйлав комиссийӗн членӗсене социаллӑ учреждение йыхравланӑ. Центрта унта-кунта тухса ҫуреймен ватӑсем те пурӑнаҫҫӗ-ҫке.
-19.7 °C