Чӑваш Енри 5 ҫемье «Это у нас семейное» ҫӗршыври конкурса хутшӑнса унӑн финалне лекнӗ. Вӗсене Ӗпхӳре палӑртнӑ.
Сумлӑ йыша ҫаксем кӗнӗ: Рыжовсем‑Квасовсем, Федоровсем‑Столяренкосем‑Рассказовсем, Пермяковсем, Рахминсем, Митрофановсем‑Федотовсем.
Ҫемье командисем хӑйсем епле пурӑннипе, мӗнпе кӑсӑкланнипе тата мӗне курса савӑннипе паллаштарнӑ. Телейлӗ кашни ҫемьен пӗр пеклӗхӗ — ҫемьере «эп» тенине мала хуманни, «эпир» тенине мала кӑларни. Ҫавӑнпа та вӗсем пӗрне пӗри хисеплеҫҫӗ, ватти те, вӗтти те кун пек ҫемьере хисеплӗ те сумлӑ.
Финала тухма пултарнӑ ҫемьесен конкурсӑн финалне хутшӑнмалла. Вӑл утӑ уйӑхӗн 5-8-мӗшӗсенче Мускавра иртӗ.
Пӗрремӗш каналпа кӑтартакан «Мужское/Женское» телекӑларӑмра ӗнер, ҫу уйӑхӗн 13-мӗшӗнче, Чӑваш Енри ҫемьене кӑтартнӑ. Унта пӗр хӗрарӑм хӑйӗн кӳршӗ хӗрарӑмне эрех ӗҫсе пурӑнать тесе ӳпкелесе калаҫнӑ, амӑшӗ эрех ӗҫсе пурӑннӑран унӑн виҫӗ ачи нушаланать тесе пӑшӑрханнӑ.
Нумай ачаллӑ хӗрарӑм, Надежда Колосьева, ӗнентернӗ тӑрӑх, вӑл хӑй нуша курса пурӑнать. Унпа пӗрле пурӑнакан арҫын усал иккен, ӑна хӗнет имӗш, ачисене килтен те хӑваласа кӑларса ярать-мӗн. Хӗрарӑм ӗнентернӗ тӑрӑх, арҫын икӗ ҫулхи ывӑлне хӑйӗн ашшӗ-амӑшӗ патне илсе кайнӑ. Вӗсем вара 200 километрта пурӑнаҫҫӗ. Нумай ача амӑшӗ каланӑ тӑрӑх, ниҫта кайма ҫукран вӑл усал арҫынна чӑтса пурӑнать.
Пӗрле пурӑнакан арҫын тата вӗсен кӳршисем пачах урӑхла ӗнентереҫҫӗ. Вӗсем Надеждӑна эрех ӗҫет тесе калаҫҫӗ иккен.
Шупашкарта пурӑнакан Мария Дементьева паян 100 ҫул тултарнӑ.
Ҫӗрпӳ районӗнчи Патӑрьел ялӗнче ҫуралнӑ хӗрарӑма юбилейпе саламлама Шупашкар хулин Мускав районӗнчи управин пуҫлӑхӗн ҫумӗ Наталия Яхатина, Шупашкар хулинчи халӑхӑн социаллӑ ыйтӑвӗсене тивӗҫтерекен комплекслӑ центрӑн директорӗ Светлана Милкина пырса ҫитнӗ. Вӗсем кинемее ӑшӑ сӑмах каласа хавхалантарнӑ, Раҫҫей Президенчӗн саламлӑ открыткине вуласа панӑ, парнепе савӑнтарнӑ.
Мария Дементьевна мӑшӑрӗпе, 95 ҫула кайнӑ Василий Мироновичпа, шӑкӑл-шӑкӑл калаҫса-савӑнса пурӑнать. Вӗсем Шупашкарти Агрегат заводӗнче ӗҫленӗ чухне паллашнӑ та 73 ҫул ӗнтӗ телей кайӑкне алӑран вӗҫертмесӗр пурӑнаҫҫӗ. Икӗ ывӑлӗ те, шел те, пурнӑҫран уйрӑлса кайнӑ. Анчах мӑнукӗсем тата мӑнукӗсен ачисем пур.
Шупашкарта пурӑнакан нумай ачаллӑ Терентьевсем «Ашшӗ-амӑшӗн мухтавӗ» орден медальне тивӗҫнӗ. Кун пирки калакан хушӑва РФ президенчӗ Владимир Путин алӑ пуснӑ.
Валерипе Анна пилӗк ача ӳстереҫҫӗ: виҫӗ ывӑл та икӗ хӗр. Ҫемье пуҫӗ Валерий «ЭКРА» НПП-ра департамент ертӳҫинче ӗҫлет, Анна вара – усламҫӑ, вӑл — «Тонкие вкусы» компанин тӗп директорӗ.
Терентьевсен аслисем вӗренӳре ҫитӗнӳсем тӑваҫҫӗ, кӗҫӗннисем вара спортра тата пултарулӑхра палӑраҫҫӗ. Пысӑк наградӑна тивӗҫнӗ ятпа ҫемьене ЧР Элтеперӗ Олег Николаев саламланӑ.
Елчӗк округӗнчи Шӑмалак ялӗнче пурӑнакан Раиса Петровна ывӑлӗ Юрий патне хӑнана килнӗ. Юрий Львов — нумай ача ашшӗ. Мӑнукӗсем асламӑшне парне тума шухӑшланӑ. Тӑхӑр ачаран тӑваттӑшӗ хулара вӗренет. Тепӗр пиллӗкӗшӗ вара асламӑшӗпе Мӑнкун умӗнхи фотосесси тунӑ.
Раиса Львовна – 85 ҫулта. Вӑл 4 ачана ура ҫине тӑратнӑ. Паянхи кун вӑл 17 мӑнукӗпе, 8 кӗҫӗн мӑнукӗпе савӑнса пурӑнать.
Унӑн ывӑлӗ Юрий тата кинӗ Надежда — Елчӗк округӗнчи питӗ хастар ҫемье: округ тата республика шайӗнчи конкурссене хутшӑнаҫҫӗ. Ҫав вӑхӑтрах кил хуҫалӑхне тытса пыраҫҫӗ.
Сӑмах май, вӗсен ҫемйинче кашнинех чӑваш тумӗ пур.
Патӑрьел округӗнче Пӑла шывӗ ҫыранран тухнипе икӗ ял шар курнӑ. Пӗтӗмпе 9 кил хуҫалӑхне сиен кӳнӗ.
Патӑрьел салинчи – ултӑ, Кивӗ Ахпӳрт ялӗнчи виҫӗ ҫурт патне шыв пынӑ. Хальхи вӑхӑтра виҫӗ ҫынран тӑракан ҫемье (пӗри ача) тӑванӗсем патне вӑхӑтлӑха пурӑнма куҫнӑ. Ыттисен хальлӗхе килтен каймалли пысӑк сӑлтав ҫук. Ҫапах ҫынсене йышӑнмалли вӑхӑтлӑх пункт хатӗрленӗ.
Сӑмах май, пуш уйӑхӗн 28-мӗшӗнчен Патӑрьел округӗнче ейӳпе кӗрешме хатӗр режим вӑйра. Ейӳпе кӗрешекен комисси тата ҫул-йӗр службисем лару-тӑрӑва талӑкӗпех сӑнаса тӑраҫҫӗ.
Сӗнтӗрвӑрри районӗнче пурӑнакан Надежда Михайлова пӗлтӗр хӑйӗн ӗҫне пуҫарса янӑ. Нумай ачаллӑ хӗрарӑм какайран ҫурма фабрикат хатӗрлесе сутать.
Хӑйӗн ӗҫне пуҫарса яма ӑна патшалӑх укҫи пулӑшнӑ. Кунта сӑмах социаллӑ контракт пирки пырать.
Социаллӑ контрактпа илнӗ укҫа пулӑшнипе хӗрарӑм кирлӗ оборудовани туяннӑ. Унтан вӑл пельмен ҫупма, фрикадельки тата котлет хатӗрлеме пуҫланӑ. Ҫак ҫурма фабриката хӗрарӑм сутса укҫа тӑвать.
Надежда каланӑ тӑрӑх, пельмене ҫупасси ачаран пыракан йӑла. Унччен йӑлт алӑпа тумалла пулнӑ. Ун чухнехи ал арманӗсем вырӑнне электричествӑпа ӗҫлекеннисем пур, ӗҫе ытти енӗпе те ҫӑмаллатма май пур. Килте хатӗрленӗ продукци пысӑк производствӑсенче туса кӑлараканнисенчен чылай чухне тутлӑрах та.
Элӗк районӗнчи Илленушкӑнь ялӗнче пурӑнакан 51 ҫулти арҫын арӑмӗн ачине хӗнесе пурӑннӑ. Хале ун тӗлӗшпе РФ Следстви комитечӗн Чӑваш Енри управленийӗн тӗпчевҫисем РФ Пуҫиле кодексӑн 117-меш стайин 2-мӗш пайӗн «г» пункчӗпе пуҫиле ӗҫ пуҫарнӑ.
2024 ҫулхи кӗркуннерен пуҫласа 2025 ҫулхи кӗркуннеччен ҫав этем ачана пӗрмаях хӗнесе пурӑннӑ. Арҫын, сӑмах май каласан, опекун шутланнӑ. Халӗ арҫын ачана вӑл ҫемьерен туртса илнӗ, вӑл урӑх опекунпа пурӑнать. Ҫул ҫитменнисемпе ӗҫлекен комиссипе подразделение те пӑтӑрмах пирки пӗлтернӗ.
Следстви комитечӗн Чӑваш Енри управленийӗн пресс-службинче пӗлтернӗ тӑрӑх, халӗ тӗпчев малалла пырать. Ун вӑхӑтӗнче суд экспертизисем туса ирттермелле, кӳнтеленсемпе калаҫмалла.
Чӑваш Енре пурӑнакан 57 ҫулти арҫын арӑмне Пӗтӗм тӗнчери хӗрарӑмсен кунӗпе саламлас вырӑнне питрен турчкапа ҫапнӑ.
Арҫын ҫав кун киле кая юлса таврӑннӑ. Хӗрарӑм куншӑн, паллах, савӑнман. Вӑл ӑна вӑрҫнӑ. Арҫын каҫару ыйтас, ӳкӗнес вырӑнне турчка ярса илнӗ те унпа арӑмне питӗнчен ҫапнӑ.
Шар курнӑ хӗрарӑмӑн питне тухтӑрсем патне кайса ҫӗлеттерме тивнӗ.
Кайран арҫын ӳкӗннӗҫи пулнӑ-ха, вӑл мӑшӑрӗнчен каҫару ыйтнӑ. Анчах чавса ҫывӑх та ҫыртма ҫук тесе ахальтен каламан вӗт.
Пӑтӑрмах хыҫҫӑн пакунлисем тӗрӗслев пуҫарнӑ. Халӗ вӗсем арҫын тӗлӗшпе РФ Пуҫиле кодексӑн 115-мӗш статйин 2-мӗш пайӗпе ӗҫ пуҫарнӑ. Ку статьяпа айӑпланакан ҫынна 2 ҫул таран ирӗкрен хӑтарма пултараҫҫӗ. Кунсӑр пуҫне ӑна профилактика учетне илӗҫ.
Муркаш округӗнчи Ятман ялӗнче пурӑнакан Родионовсем пӗрлешнӗренпе 60 ҫул ҫитнине паллӑ тунӑ. Вӗсем пӗр-пӗрне ачаранпах паллаҫҫӗ, мӗншӗн тесен пӗр шкулта вӗреннӗ. Ун чухне, коридорта пӗр-пӗринпе ҫапӑнса иртсе кайнӑ чухне, ҫулсем иртсен ҫемье чӑмӑртасси пирки шухӑшламан та вӗсем.
Феликс Михайлович – Чӑваш патшалӑх ял хуҫалӑх интститучӗн пӗрремӗш выпускникӗ. Диплом илсен вӑл пурнӑҫне ял хуҫалӑхӗпе ҫыхӑнтарнӑ. Роза Романовна вара медучилище пӗтернӗ, ФАПра, район пульницинче ӗҫленӗ.
Мӑшӑр икӗ ача ҫуратса ӳстернӗ. Паянхи кун Родионовсен – 5 мӑнук, 4 кӗҫӗн мӑнук. Пӗр мӑнукӗ хальхи вӑхӑтра ятарлӑ ҫар операцийӗнче медсестрара ӗҫлет.
Упӑшкипе арӑмӗ – 89 ҫулта. Ҫапах ахаль лармаҫҫӗ – кил хуҫалӑхне тытса пыраҫҫӗ.
+20.0 °C