«Раҫҫей. Чӗресене пӗрлештерсе» туй фестивалӗнче чӑвашсем те хут уйӑрттарӗҫ.
Фестиваль Мускавра утӑ уйӑхӗн 8-10-мӗшӗсенче иртӗ. Унта 20 регионти 200 ытла мӑшӑр хутшӑнӗ, пурте пӗрлешӗҫ.
Ҫав йышра Чӑваш Енрен Алексей Комлевпа Юлия Молчанова пулӗҫ. ЗАГС ӗҫченӗсем вӗсене «Раҫҫей» наци центрӗнче ҫырӑнтарӗҫ.
Йӗпреҫ округӗнчи Хурамал ялӗнче пурӑнакан Николайпа Раиса Кузюковсем пӗрлешнӗрӗнпе 67 ҫул ҫитнӗ. Вӗсем иккӗшӗ те – «вӑрҫӑ ачи».
Мӑшӑр 1955 ҫулта паллашнӑ. Ун чухне Николай Никифорович Хусанти ветеринари институтӗнче вӗреннӗ. Сӗнтӗрвӑрри районӗнчи Хуракасси хӗрӗ Раиса Петровна вара диплом илнӗ хыҫҫӑн направленипе Хурамала вырӑс чӗлхипе литературине вӗрентме килнӗ. Вӗсем 1958 ҫулта ҫемье ҫавӑрнӑ, 4 ывӑл ӳстернӗ. Тӑваттӑшӗ те ашшӗн ҫулӗпе кайнӑ.
Елчӗк районӗнчи Чӑваш Тӑрӑмӗнче пурӑнакан 39 ҫулти арҫыннӑн ҫул ҫитмен хӗрне алимент тӳлес килмен. Унӑн парӑмӗ 1,2 миллион тенкӗрен каҫса кайнӑ.
Вырӑнти район сучӗ ӑна РФ Пуҫиле кодексӗн 157-мӗш статйин 1-мӗш пайӗпе явап тыттарма йышӑннӑ. Унччен ӑна административлӑ майпа явап тыттарнӑ.
Халӗ арҫыннӑн 5 уйах ӗҫлесе юсанма тивӗ, унӑн тупӑшӗн 5 процентне патшалӑх тытса юлса пырӗ.
Чӑваш Республикинчи амӑшӗн капиталне 2030 ҫулхи раштавӑн 31-мӗшӗччен пама йышӑннӑ. Ку ыйтӑва ЧР Министрсен Кабинечӗн ларӑвӗнче сӳтсе явнӑ.
Унччен ку пулӑшу мери 2026 ҫулхи раштавӑн 31-мӗшӗччен вӑйра пулнӑ. Кӑҫалхи кӑрлачӑн 1-мӗшӗнчен республикӑри амӑшӗн капиталӗ 200 пин тенкӗпе танлашать.
Палӑртмалла: республикӑри амӑшӗн капиталне 2012 ҫултанпа пама тытӑннӑ. Ун чухне вӑл 100 тенкӗе танлашнӑ. Ку таранччен амӑшӗн капиталне 17487 ҫемье тивӗҫнӗ.
Шупашкарти пӗр ҫемьере ашшӗпе хӗре хушшинче пӑтӑрмах сиксе тухнӑ. 21 ҫулти хӗрне ашшӗ мӑйӗнчен ярса илнӗ, пӑвма пуҫланӑ, вӗлерессипе хӑратнӑ.
Хӗр чӑнах та хӑраса ӳкнӗ. Пӑтӑрмах пирки вӑл йӗрке хуралҫисене пӗлтернӗ.
Полицийскисем 52 ҫулти арҫын тӗлӗшпе РФ Пуҫиле кодексӗн 119-мӗш статйин 1-мӗш пайӗпе пуҫиле ӗҫ пуҫарнӑ.
Шупашкарти патшалӑхӑн ҫул-йӗр хӑрушсӑрлӑхӗн инспекторӗсем аслӑ ҫул хӗррипе утса пыракан ачана асӑрханӑ.
Тӑхӑр ҫулти арҫын ача Б. Хмельницкий урамӗн хӗррипе «Атӑл» М7ҫул ҫине тухма шухӑшланӑ иккен. Вӑл ҫуран утса Красноармейскинчи кукамӑшӗ кукамӑшӗ (тен, асламӑшӗ-тӗр. Вырӑсла хыпарта «бабушка» тенӗ) патне ҫитес тесе килӗнчен тухса кайнӑ.
Ҫул-йӗр хӑрушсӑрлӑхӗн инспекторӗсем ачана ҫул ҫитменнисемпе ӗҫлекен инспекторсем патне илсе кайса янӑ.
Шупашкарта пурӑнакан 63 ҫулти арҫын хӗрарӑмпа киленес тесе укҫасӑр юлнӑ. Ҫавӑн пирки пенсири ҫын йӗрке хуралҫисене пӗлтернӗ.
Тӗнче тетелӗнче вӑл интимлӑ пулӑшу кӳрекен хӗре чӗнсе илме май пурри пирки пӗлтерӳ курнӑ. Унта кӑтартнӑ номерпе шӑнкӑравласан менеджер текен ҫын телефона тытнӑ, укҫана тӳрех тӳлесе хумаллине пӗлтернӗ. Ӳсӗр арҫын укҫана куҫарса панӑ, кайран менеджер текен ҫын патне хӗр хӑҫан килет тесе ҫине-ҫине шӑнкӑравлама тапранса кайнӑ. Лешсем кашнинче укҫа куҫарма ыйтнӑ. Ҫапла пенсионер 48 пин тенкӗ куҫарса панӑ. Тата куҫаратчӗ пулӗ те, килне арӑмӗ пырса кӗнӗ.
Чӑваш Енри студенткӑсене 100-шер пин тенкӗ укҫа парӗҫ. Пурне те мар. Ача амӑшӗ пулма хатӗрленекеннисене.
Йывӑр ҫын пулнӑ май учета тӑнӑ ҫамрӑк хӗрарӑмсене патшалӑх хыснинчен хушма укҫа пама тытӑнӗҫ. Кӗмӗле кӑҫалхи кӑрлач уйӑхӗн 1-мӗшӗ хыҫҫӑн учета тӑнисене, ҫие юлнӑранпа 12 эрне иртсен парӗҫ. Укҫана Чӑваш Енре пурӑнакансене, хамӑр тӑрӑхри вӗренӳ заведенийӗсенче ӑс пухакансене парӗҫ.
Муркашра асӑннӑ тӑрӑхри мӑшӑр кил хуҫи хӗрарӑмӗн 95 ҫулхине уявлама кафере пуҫтарӑннӑ.
Лениана Александровна Егорова нумаях пулмасть 95 ҫул тултарнӑ. Ҫав куна телейлӗ мӑшӑр кафере тӑванӗ-пӗтенӗпе тата ҫывӑх ҫыннисемпе уявланӑ. Лениана Александровна упӑшки Николай Егорович та нумаях пулмасть 95 ҫул тултарнӑ. Кун пирки уявсене ертсе пыракан Алиса Александрова халӑх тетелӗнчи хӑйӗн страницинче пӗлтернӗ.
Мӑшӑр спортпа туслӑ, ӗҫчен. Педагогика ӗҫӗнче ҫур ӗмӗр ытла тӑрӑшнӑ. 6 хӗр ҫуратса ӳстернӗ.
Шупашкар хулинче пӗр-пӗрне ӑнланман ҫемьесем хулари халӑхӑн социаллӑ ыйтӑвӗсене тивӗҫтерекен комплекслӑ центра пырса мирлешме пултараҫҫӗ.
Асӑннӑ учрежденире йывӑр лару-тӑрури хӗрарӑмсене пулӑшакан уйрӑм пур. Кашӑк-тирӗк шӑкӑртатасси тӗрлӗ сӑлтавпа сиксе тухать. Кун пек чухне ҫемьесемпе центрӑн специалисчӗсем калаҫаҫҫӗ, пӗрне-пӗри ӑнланма вӗрентеҫҫӗ.
«Специалистсем лару-тӑрӑва тӗрлӗ енчен пӑхма вӗрентеҫҫӗ», — каласа кӑтартать центр специалисчӗ Александра Макарова.
+3.3 °C