pixabay.com сӑнӳкерчӗкӗ

Чӑваш Енри икӗ арҫын тата тӑватӑ хӗрарӑм ӳт сутса пурӑнакан пикесен шучӗпе укҫа туса пурӑннӑ. Халӗ ҫав ушкӑна суд тунӑ.

Асӑннӑ ушкӑн 2006 ҫулхи ака уйӑхӗнчен тытӑнса 2019 ҫулхи утӑ уйӑхӗччен проституцие пирӗн республикӑри тата кӳршӗллӗ регионти 50-ран кая мар хӗр-хӗрарӑма явӑҫтарнӑ. Хайхи хӗрарӑмсен ҫулӗ — 15-рен пуҫӑнса 47-ччен.

Секс-пулӑшӑва кӳме хӗрарӑмсем клиентсем патне киле, хӑна ҫурчӗсемпе саунӑсене ҫӳренӗ. Пӗр сехетшӗн ҫавсем 2 пинрен пуҫласа 2,5 пин тенкӗ таран илнӗ.

Преступлени ушкӑнне кӗнӗ арҫынсенчен пӗрне пӗтӗмӗшле режимлӑ колоние 4,5 ҫуллӑха, теприне ҫирӗп режимлӑ колоние 9 ҫуллӑха ӑстама йышӑннӑ. Виҫӗ хӗрарӑма тӗрмене хупса хумасӑр айӑпланӑ. Вӗсен айӑплав вӑхӑтне 2, 3,5 тата 4 ҫуллӑха палӑртнӑ. Пӗр хӗрарӑма вара 50 пин тенкӗлӗх штрафланӑ, ӑна 6 ҫуллӑха пӗтӗмӗшле режимлӑ колоние ӑсатӗҫ. Суд приговорӗ вӑя кӗреймен-ха.

Пӗлтӗрхи юпа уйӑхӗн 3-мӗшӗнче Шупашкарти пӗр ҫуртра 65 ҫулти арҫын виллине тупнине Чӑваш халӑх сайчӗ пӗлтернӗччӗ-ха. Аса илтерер: ӑна мӑйӗ тавра электричество кабелӗпе ултӑ хутчен ҫавӑрса пӑвнӑ.

Тӗпчевҫӗсем тата хулари Ленин район сучӗ ҫакна палӑртнӑ. Усал ӗҫ тӑваканни — Шупашкарта пурӑнакан 63 ҫулти арҫын. Пӗлтӗрхи авӑн уйӑхӗн 30-мӗшӗнче арҫын пахча кооперативӗсенчен пӗринче хӑйӗн пӗлӗшӗ патӗнче эрех ӗҫнӗ. Кайран унпа кӳршӗри дача хуҫи хушшинче хирӗҫӳ сиксе тухнӑ. Кӗҫех ҫапӑҫмах тытӑннӑ. Хайхи арҫын дача хуҫине тапса ҫапса пӗтернӗ, урайне пусса ӳкернӗ хыҫҫӑн электричество кабелӗпе мӑйӗнчен пӑвса лартнӑ, унпа арҫыннӑн аллине те ҫыхса хунӑ. шар кураканни вилсе кайнӑ.

Преступление тӑвакан арҫын чирлӗ иккен. Вӑл хӑй мӗн тунине ӑнланман, ӑнланма та пултараймасть. Ӑна психиатри пульницине ӑсатма йышӑннӑ.

fototelegraf.ru сайтри сӑн

Чӑваш Енре 29 ҫулти арҫынна аҫа ҫапнӑ. Кун пирки «Про Город» хаҫата халӑх корреспонденчӗ пӗлтернӗ.

Ку инкек Канаш районӗнчи Ухман ял тӑрӑхӗнче пулнӑ. Ашшӗпе ывӑлӗ сурӑхсем пӑхнӑ. Каҫхи 4 сехет тӗлне вӑйлӑ ҫумӑр ҫума тытӑннӑ. Ҫав вӑхӑтра ашшӗне аҫа ҫапнӑ. Ывӑлӗ часрах ун патне чупса пынӑ, анчах разряд хӑйне лекнӗ.

Халӗ ашшӗ пульницӑра. Ывӑлӗ вара ҫав вӑхӑтрах, васкавлӑ медпулӑшу ҫитиччен, вилнӗ.

"Про Город" сайтран илнӗ сӑн

Паян Ҫӗнӗ Шупашкарта пысӑк пушар пулнӑ – «Хмпромра» ҫулӑм тухнӑ. Кун пирки «Про Город» хаҫата халӑх корреспонденчӗ пӗлтернӗ.

Паян 13 сехетре иртен-ҫӳрен тӳпенелле хура тӗтӗм хӑпарнине, вӑл темӗнле шӑршлӑ пулнине асӑрханӑ. «Сывлама ҫук», - пӗлтернӗ Татьяна. «Пластик ҫуннӑ шӑршӑ», - тенӗ Николай, Ҫӗнӗ Шупашкарта пурӑнаканскер. Надежда вара ҫапла пӗлтернӗ: «Хлор шӑрши кӗме тытӑнчӗ. Чӳречесене хупӑр».

14 сехет те 15 минутра пушарнӑйсем ҫулӑма сӳнтернӗ. Унта 12 техника, 36 ҫын хутшӑннӑ.

Шупашкар хулинчи йӗрке хуралҫисем ҫын хутаҫне йӑтса кайнӑ хӗрарӑма шыраҫҫӗ.

Чӑваш Ен Шалти ӗҫсен министерствинче пӗлтернӗ тӑрӑх, хутаҫра 500 пин тенкӗ укҫа пулнӑ.

Пӑтӑрмах паян, ҫӗртме уйӑхӗн 11-мӗшӗнче, кӑнтӑрла, Карл Маркс урамӗнчи кредит учрежденийӗнче пулса иртнӗ.

Ҫур миллион тенкӗ чикнӗ хутаҫ 71 ҫулти арҫыннӑн пулнӑ. Ӑна вӑл айккинелле хурса янӑ.

Вӑхӑтлӑха хуҫасӑр выртнӑ хутаҫа ҫулланнӑ хӗрарӑм йӑтса тухса кайнӑ. Сӑнпа пӑхсан ҫав хӗрарӑм 55-60 ҫулсенче, унӑн ҫӳллӗшӗ 160-170 сантиметр, тӗреклӗ хул-ҫурӑмлӑ, ҫӳҫӗ ҫутӑ, ӑна кӗске кастарнӑ. Хӗрарӑм ҫутӑ хӗрлӗ платье тӑхӑннӑ.

Ҫак ҫынна уйӑрса илнисене 24-20-03 е 102 номерпе полицие шӑнкӑрӑвласа пӗлтерме ыйтаҫҫӗ.

"Антидилер" тунӑ сӑн

Паян, ҫӗртме уйӑхӗн 10-мӗшӗнче, Шупашкар районӗнчи Карачура ҫывӑхӗнче авари пулнӑ. Унта ҫыннӑн пурнӑҫӗ татӑлнӑ.

Ҫул ҫинче Land Cruiser, бетон пӑтратакан машина тата VW Polo ҫапӑннӑ. Пӗрремӗшӗн тӑрри йӑлтах арканса пӗтнӗ. Бетон ҫӑракан машина отбойнике пырса тӑрӑннӑ.

Васкавлӑ медпулӑшу пресс-служби пӗлтернӗ тӑрӑх, аварире пӗр ҫын вилнӗ. Вӑл хӑш машинӑра пулнине хальлӗхе хыпарламан.

Сӑмах май, ҫав вырӑнтан инҫех мар 2019 ҫулта микроавтобуспа КамАЗ ҫапӑннӑччӗ. Автобус Канашран Мускава кайма тухнӑ. Аварире темиҫе ҫын вилнӗччӗ.

РФ Следстви комитечӗн Чӑваш Енри управленийӗн тӗпчевҫисем Ҫӗмӗрле районӗнчи Мӑн Улхаш ял тӑрӑхӗн пуҫлӑхӗ тӗлӗшпе пуҫарнӑ пуҫиле ӗҫе тӗпчесе пӗтернӗ. Тӳре-шарана РФ Пуҫиле кодексӗн 286-мӗш статйин 2-мӗш пайӗпе (вырӑнти хӑй тытӑмлӑх органӗн пуҫлӑхӗ ӗҫ тивӗҫне ӳстерсе усӑ курни) тата 292-мӗш статьян 2-мӗш пайӗпе (ӗҫ вырӑнӗпе усӑ курни) явап тытарасшӑн.

Тӗпчевҫӗсем шухӑшланӑ тӑрӑх, ял тӑрӑхӗн пуҫлӑхӗ 2019 ҫулхи чӳк-раштав уйӑхӗсенче халӑхпа пуху ирттермесӗрех пуху пулнӑҫи туса протокол ҫырнӑ. Вырӑнти ял тӑрӑхӗнчи Депутатсен пухӑвӗн йышӑнӑвне те вӑл суйса ҫырнӑ. Ҫав хут тӑрӑх «Сычуань-Чӑваш Ен Агропромышленность суту-илӳ компанийӗ» предприятие ҫӗр лаптӑкӗ ҫинче силос курганӗсем тума ирӗк панӑ. Каярах вырӑнти Депутатсен пухӑвӗн йышӑнӑвне пӑрахӑҫланӑ-ха.

rbc.ru сайтри сӑн

Ҫӗртме уйӑхӗн 7-мӗшӗнче Шупашкарта каллех ҫын ҫӳллӗ хутран ӳкнӗ. Кун пирки «Про Город» хаҫата халӑх корреспонденчӗ пӗлтернӗ.

Инкек 17 сехет те 40 минутра пулнӑ. Арҫын 9-мӗш Пилӗкҫуллӑх проспектӗнчи 24-мӗш ҫуртӑн 9-мӗш хутӗнчен ӳкнӗ.

Куракансем каланӑ тӑрӑх, арҫын ҫӳллӗшӗнчен ӳксенех сывлама пӑрахнӑ. Вӑл 27 ҫулта пулнӑ. РФ Следстви комитечӗн Чӑваш Енри следстви органӗсем ӗҫ-пуҫа уҫӑмлатаҫҫӗ, кун хыҫҫӑн тивӗҫлӗ йышӑну тӑвӗҫ.

Чӑваш Енре пурӑнакан пӗр арҫын Патшалӑхӑн ҫул-йӗр хӑрушсӑрлӑхӗн инспекцине ӗҫе вырнаҫма ӗмӗтленнӗ. Пули-пулми илес ҫук тесе шухӑшланӑран ултавҫӑ-хӗрарӑм капкӑнне ҫакланнӑ.

Шупашкарта пурӑнакан 32 ҫулти хӗрарӑм хӑйӗнпе паллаштарнӑ чухне автоинспекцире тӑрӑшатӑп тесе тыттарнӑ. Ҫынна пулӑшма килӗшенҫи пулнӑ вӑл.

Арҫынран вӑл 21 пин тенкӗ ыйтнӑ. Ара, тӑкӑксӑр май ҫук: судпа айӑпланманни ҫинчен справка тутармалла, медицина тӗрӗслевӗ витӗр тухмалла, ӗҫре кирлӗ тумтире туянмалла, ШӖМӗн Чулхулари академийӗнче вӗренмелле.

Чӑннипе хӗрарӑм ҫынсене унччен те пӗрре кӑна мар улталаннӑ иккен. Халӗ ӑна РФ Пуҫиле кодексӗн 159-мӗш статйин 2-мӗш пайӗпе явап тыттарӗҫ. Ҫынна улталанӑшӑн 5 ҫул таран хупса хума пултараҫҫӗ.

Пушар ниме те шеллемест. Вӑл пӗр алхасма тытӑнсан пурне те тӗп тӑвать.

Ӗнер, ытларикун каҫхине, Кӳкеҫ поселокӗнче «Skoda-Octavia» ҫунма тытӑннӑ. 2007 ҫулта туса кӑларнӑ транспорт 18 сехет те 30 минутра хыпса илнӗ. Машина Шуршӑл урамӗнче ларнӑ. Вутра автомобилӗн двигатель патӗнчи пайӗ тата пассажир салонӗ сиенленнӗ.

20 сехет те 30 минутра Шупашкар районӗнчи Шупашкаркасси ялӗ патӗнчи автозаправкӑра пушар тухнӑ. Вӑл бензинлӑ автоцистернӑна пушатнӑ чухне хыпса илнӗ. Автозаправкӑра ӗҫлекенсем пушара хӑйсемех сӳнтерме пултарнӑ. Никам та шар курман.