Олег Николаев. pravdapfo.ru сӑнӳкерчӗкӗ

Раҫҫей Президенчӗн хушӑвне пурнӑҫласа Чӑваш Ен Элтеперӗ Олег Николаев Оперативлӑ штаб йӗркеленӗ. Паянах унӑн пӗрремӗш ларӑвне ирттернӗ.

Ҫав штаб регионти тата муниципалитетри влаҫ органӗсен, федерацин ӗҫ тӑвакан органӗсен территорири органӗсен ӗҫне йӗркелесе пырӗ. Штабӑн йӗркелӳпе техника ӗҫне йӗркелессишӗн Чӑваш Енӗн Гражданла хӳтӗлевпе чрезвычайлӑ лару-тӑру енӗпе тимлекен патшалӑх комитечӗ яваплӑ.

Халӑха инкеклӗ тата техногенлӑ лару-тӑруран сыхлассипе пирӗн тӑрӑхра никӗс шайӗнче хатӗр пулмалла.

culture.cap.ru сӑнӳкерчӗкӗ

Чӑваш патшалӑх оперӑпа балет театрӗнче юпа уйӑхӗн 28-мӗшӗнчен пуҫласа чӳк уйӑхӗн 6-мӗшӗччен М.Д. Михайлов ячӗллӗ Пӗтӗм тӗнчери опера фестивалӗ иртӗ. Унта тӗрлӗ театр коллективӗнче тӑрӑшакан 170 ытла артист хутшӑнӗ.

Фестиваль Екатерина Иванова-Блинован «Сӑр чикки» оперӑпа уҫӑлӗ. Культура программинчи тепӗр премьера – М.М. Ипполитов-Ивановӑн «Ася» оперине ҫӗнетсе куракан патне ҫитерни. «Асьӑн» сцена ҫинчи ҫӗнӗ версине икӗ аслӑ шкул студенчӗсемпе преподавателӗсем «Росконцерт» организаци пулӑшнипе хатӗрленӗ. Ӑна юпа уйӑхӗн 29-мӗшӗнче курма май килӗ.

Куракансем гала-концерта уйрӑмах кӑмӑлланине кура ун пирки те каласа хӑварас килет. Концерт программине Екатерина Фенина, Иван Васильев, Дамир Закиров, Виктория Войтенкова, Михаил Журков, Алиса Шалгинова, Алексей Сазонов, Регина Рустамова тата Маргарита Финогентова хутшӑнӗҫ. Дирижёрӗ – Михаил Леонтьев.

culture.cap.ru сӑнӳкерчӗкӗ

Чӑваш патшалӑх академи юрӑпа ташӑ ансамблӗ черетлӗ сезона чӳк уйӑхӗн 2-мӗшӗнче уҫӗ.

«Чечеклен тата юрла, манӑн Чӑваш Ен» программӑна Герман Лебедевӑн, Григорий Хирпӳн, Филипп Лукинӑн, Юрий Жуковӑн, Юрий Кудаковӑн тата ытти пултаруллӑ ӑстан хайлавӗсене кӗртӗҫ. Куракансене ансамблӗн ылтӑн фондӗнчи вокалпа хореографи композицийӗсемпе те, ҫӗнӗ постановкӑсемпе те савӑнтарма палӑртаҫҫӗ.

Премьерӑна Кирилл Кассович илемлӗх ертӳҫи, ансамблӗн тӗп балетмейстерӗ, Раҫҫей Федерацийӗн культурӑн тава тивӗҫлӗ ӗҫченӗ Анатолий Музыкантов хатӗрлеҫҫӗ. Сцена ҫине ансамблӗн мӗнпур цехӗн ӑстисем (пурӗ 50 артист) тухӗ.

Ыран, юпа уйӑхӗн 21-мӗшӗнче, ансамбль хор, оркестр тата балет ҫӗнӗ пултарулӑх сезонне епле хатӗрленнине массӑллӑ информаци хатӗрӗсенче ӗҫлекенсене уҫӑ репетици вӑхӑтӗнче кӑтартса парасшӑн.

cheb-centr.soc.cap.ru сӑнӳкерчӗкӗ

Республикӑн тӗп хулинче пурӑнакан пӗр хӗрача шкула ҫӳреме пӑрахнӑ.

Шупашкар хулинчи халӑхӑн социаллӑ ыйтӑвӗсене тивӗҫтерекен комплекслӑ центрӑн специалисчӗсем ҫемьере темиҫе хутчен те пулнӑ. Хӗр шутне кӗнӗ ачапа темиҫе хутчен те калаҫнӑ, ашшӗпе те сӑмахланӑ, анчах усси пулман.

Комплекслӑ центрӑн специалисчӗсем пӗлтернӗ тӑрӑх, ҫемьере хальхинче «Полици тата ачасем» акци ирттернӗ май кайнӑ. Йышра ҫул ҫитменнисемпе тата ашшӗ-амӑшӗпе ӗҫлекен тӗрлӗ специалист пулнӑ.

Маларах асӑннӑ ача пӗчӗк чухнех амӑшӗсӗр тӑрса юлнӑ, вӑл ашшӗпе пурӑннӑ. Анчах юлашки ҫулсенче арҫын воспитани енӗпе ҫителӗксӗр вӑй хунӑ – пике уроксене сиктерме пуҫланӑ. Нумаях пулмасть ӑна хулари Социаллӑ реабилтаци центрне вырнаҫтарнӑ.

gkchs.cap.ru сайтран илнӗ скриншотпа усӑ курнӑ

Паян, юпа уйӑхӗн 20-мӗшӗнче, Чӑваш Енӗн Гражданла оборона тата чрезвычайлӑ лару-тӑру енӗпе ӗҫлекен патшалӑх комитечӗн председателӗн заместительне ҫирӗплетнӗ. Документа республика ертӳҫи Олег Николаев алӑ пуснӑ.

ГКЧС комитетӗнчи сумлӑ должноҫе Александр Степанов йышӑннӑ. Александр Васильевич председателӗн ҫумӗн тивӗҫне тата территори хӳтӗлевӗпе мобилизаци ӗҫне йӗркелекен сектор заведующийӗ пулса тӑрӑшӗ.

www.9111.ru сайтри сӑн

Шупашкарта пурӑнакан 91 ҫулти арҫынна палламан ҫынсем улталама, унран 900 пин тенкӗ сӑптӑрма хӑтланнӑ. Анчах ватӑскер хӑйне улталама паман.

Ун патне палламан ҫын шӑнкӑравланӑ та мӑнукӗ аварие лекнине пӗлтернӗ. Куншӑн мӑнукӗ айӑплӑ-мӗн, хӗр шар курнӑ имӗш. Кӗҫех тепӗр арҫын калаҫӑва хутшӑннӑ, следователь-мӗн. Хайхискер ыйтӑва 900 пин тенкӗпе татса пама шантарнӑ.

Старик ывӑлӗ патне шӑнкӑравлама шутланӑ, анчах хайхи следователь ҫакна тума чарнӑ, вӑл манукӗн характеристикине илме кайнӑ имӗш. Старик ӑна кӗтсе илессине пӗлтернӗ. Кӗҫех телефон патне арҫын пынӑ, ывӑлӗ имӗш. Ватӑскер унран вӑл, хӑйӗн ывӑлӗ ӗнтӗ, ӑҫта ӗҫленине, арӑмӗ мӗн ятлине ыйтнӑ. Хуравӗ пулман. Ҫапла 91 ҫулти старик телефона сӳнтернӗ. Кун пирки вӑл полицие пӗлтернӗ.

cheb-centr.soc.cap.ru сӑнӳкерчӗкӗ

Шупашкар хулинчи халӑхӑн социаллӑ ыйтӑвӗсене тивӗҫтерекен комплекслӑ центра ҫӳрекен ватӑсем нумаях пулмасть поэтпа чей ӗҫме пуҫтарӑннӑ. Культура мероприятийӗ хулари А. Гайдар ячӗллӗ вулавӑшра иртнӗ. Ватӑ ҫынсемпе тӗл пулма паллӑ чӑваш поэчӗ Альбина Юрату пырса ҫитнӗ.

Поэт хӑйӗн кун-ҫулӗ, пултарулӑхӗнчи паллӑ утӑмсем ҫинчен каласа кӑтартнӑ. Ватӑсем унран асӑнмалӑх автограф та ыйтнӑ, Альбина Юрату никама та хирӗҫлемен, алӑ пусса панӑ.

«Чӑваш юрӑҫисем шӑрантаракан чылай юрра пӗлетӗп. Анчах вӗсенчен самайӑшӗн сӑввине Альбина Юрату ҫырнине эпӗ пӗлмен те», — хавхаланса калаҫнӑ тӗлпулӑва хутшӑннӑ Людмила Васильева.

Федерацин Атӑлҫи округӗнче стрит-артӑн «ФормART» фестивалӗн финалӗ иртет.

Финала лекнӗ ӗҫсемшӗн пирӗнтен кашниех сасӑлама пултарать. Ҫав тӗллевпе 8 (800) 301-50-23 телефон номерӗпе юпа уйӑхӗн 23-мӗшӗччен шӑнкӑравласа ӗлкӗрмелле. Унтан графитти номерне палӑртмалла. Чӑваш Енрен тӑратнӑ «Пултарулӑх» граффити номерӗ — 6.

Пӗрремӗш вырӑн йышӑнакана 200 пин тенкӗ парса хавхалантарӗҫ, иккӗмӗш вырӑншӑн – 150 пин тенкӗ, виҫҫӗмӗш вырӑншӑн – 100 пин тенкӗ.

Конкурса хутшӑнакан ӗҫсене formartpfo.ru сайтри «финалистсем» страницӑра вырнаҫтарнӑ.

fotovmire.ru сайтри сӑн

Улатӑр районӗнчи Атрать ялӗнче пурӑнакан 64 ҫулти арҫын тӗлӗшпе пуҫиле ӗҫ пуҫарнӑ. Вӑл пӑшие пӗрсе вӗлернӗ, ашне хӑйӗн валли илнӗ тесе шутлаҫҫӗ.

Юпа уйӑхӗн 15-мӗшӗнче Сӑрҫи заповедник ӗҫченӗсем вӑрманта пӑшие вӗлернӗ вырӑна тупнӑ. Чӗрчунӑн пӗр пайӗ те ҫавӑнтах выртнӑ. Браконьер ӑна илсе кайса ӗлкӗреймен.

Заповедник ӗҫченӗсем сыхласа тӑрса ҫав арҫынна ярса тытнӑ. Вӑл пӑши ашӗ патне велосипедпа килнӗ.

Паян Ҫӗнӗ Шупашкарта Промышленноҫ урамӗнче вырнаҫнӑ склад ҫуннӑ. Унта сӑрӑсем туса кӑлараҫҫӗ.

Ҫулӑм 100 тӑваткал метр лаптӑк ҫинче алхаснӑ. Тӳпенелле хӑпаракан ҫӑра хура тӗтӗм таҫтанах, Шупашкартан та, курӑннӑ. Ҫулӑма пушарнӑйсем хӑвӑрт сӳнтерме пултарнӑ.

Пушар склад ҫуртне сиенлетнӗ. Сӑрӑсем те ҫуннӑ.