Священниксем чӑвашла вӗренма пуҫланӑ. Шупашкар тата Чӑваш митрополичӗ Савватий тӗслӗх кӑтартать: вӑл кӗлӗсене чӑвашла ирттерет.
Малашне ытти священник те кӗлӗсене чӑвашла ирттерме пултарӗ — Шупашкар епархинче чӑвашла вӗренес текенсем валли курс уҫӑлнӑ. Унӑн йӗркелӳҫи тата ертӳҫи – Илий атте. Священниксене чӑваш чӗлхин чи лайӑх учителӗсем вӗрентеҫҫӗ: ЧР тава тивӗҫлӗ учителӗ Александр Степанов тата Шупашкарти 33-мӗш шкул учителӗ Ирина Диарова.
Шупашкарта ашшӗпе ывӑлӗ хирӗҫсе кайнӑ. Шел те, ку пысӑк инкекпе вӗҫленнӗ: ывӑлӗ ашшӗне вилмеллех амантнӑ.
Следстви пӗлтернӗ тӑрӑх, кӑрлачӑн 24-мӗшӗнче каҫхине 39 ҫулти арҫын ашшӗпе вӑрҫӑнса кайнӑ. Кӗҫӗнни аслине ҫӗҫӗпе сулахай пӗҫҫинчен чикнӗ. Ашшӗ вилмеллех аманнӑ – вӑл ҫавӑнтах сывлама пӑрахнӑ.
39-ти арҫынна тытса чарнӑ. Вӑл хӑйӗн айӑпне йышӑнать.
Шупашкарти педагог Пӗтӗм Раҫҫейри «Раҫҫейри ҫулталӑк методисчӗ» конкурсра ҫӗнтернӗ. Лариса Анатольевна Н.В.Никольский ячӗллӗ Чӑваш педагогика колледжӗнче вӑй хурать, педагогика практикин уйрӑмне ертсе пырать, вӑл — педагогика наукисен кандидачӗ.
Конкурса 82 регионти 1800 ҫын хутшӑннӑ. Лариса Анатольевна вӗсен йышӗнче пӗрремӗш вырӑн йышӑнма пултарнӑ. Вӑл «СПО преподавателӗ» номинацире мала тухса 100 пин тенке тивӗҫнӗ.
Республикӑри катастрофа медицинин центрӗн васкавлӑ медпулӑшу бригади пациентӑн пурнӑҫне ҫӑлнӑ – вӗсем унӑн чарӑнса ларнӑ чӗрине ӗҫлеттерсе янӑ.
Шӑнкӑрав килсен Дарья Мустафина тухтӑр тата Маргарита Ильина фельдшер пациент патне ҫула тухнӑ. Арҫын ӗҫленӗ хыҫҫӑн кӑкӑр тӗлӗнчен хӗссе ыратма пуҫланине каланӑ. Тухтӑрсем унӑн сывлӑхне тӗрӗсленӗ: пысӑк хӑрушлӑх пулман.
Ҫапла вӗсем пациента пульницӑна илсе кайма тухнӑ. Анчах ҫул ҫинче тӑрук пациентӑн чӗри чарӑнса ларнӑ. Водитель машинӑна чарнӑ, тухтӑрсем пациент пурнӑҫӗшӗн кӗрешме тытӑннӑ. Телее, вӗсем унӑн чӗрине ӗҫлеттерсе янӑ. Пациента пульницӑна илсе ҫитернӗ.
Шупашкарта «Тӑван чӗлхепе тӑван литературӑна чи лайӑх вӗрентекен» конкурсӑн хула тапхӑрӗ вӗҫленнӗ.
Чӑваш Республикин Вӗренӳ институчӗн ӗҫченӗ Анна Егорова халӑх тетелӗнчи хӑйӗн страницинче пӗлтернӗ тӑрӑх, «конкурса хутшӑнакансем пурте питӗ пултаруллӑ, тавҫӑруллӑ, ӑслӑ, хастар» пулнӑ.
Вӗрентекенсем «Меслетлӗх лаҫҫи», «Ӑсталӑх лаҫҫи», «Чӑвашлӑха упрар!» пултарулӑх лаҫҫи» ӑмӑртусенче хӑйсен пултарулӑхӗпе паллаштарнӑ.
Пӗррӗмӗш вырӑна Шупашкарти 62-мӗш шкулта ӗҫлекен Роза Морозова йышӑннӑ, иккӗмӗшне — 40-мӗш шкулти Татьяна Николаева, виҫҫӗмӗшне — 33-мӗш шкулти Ирина Диарова.
Паян Шупашкарта 33-мӗш автобус ҫул ҫитмен 3 ача ҫине пырса кӗнӗ. Ку Мир проспектӗнче «Иван Яковлев проспекчӗ» чарӑну патӗнче 17:13 сехетре пулнӑ.
ШӖМ пӗлтернӗ тӑрӑх, 64 ҫулти водитель ҫанталӑка пула хӗрлӗ светофор умӗнче вӑхӑтра чарӑнса ӗлкӗреймен те ҫул урлӑ каҫакан хӗрачасем ҫине пырса кӗнӗ. Вӗсене медпулӑшу панӑ.
Шупашкарта пурӑнакан 87 ҫулти Нина Шушканова чунне юрласа уҫать. Кинемее хулари халӑхӑн социаллӑ ыйтӑвӗсене тивӗҫтерекен комплекслӑ центрӑн социаллӑ ӗҫченӗ Ольга Филиппова пӑхса пулӑшать.
Инженер шухӑшлавӗллӗ хӗрарӑм тӗрӗс наукӑсене аван пӗлсен те чунӗпе ҫемҫе, юрлама ӑста. Хӗрарӑм инженер пулса Трактор заводӗнче, ВНИИРта, Электроаппаратура заводӗнче нумай ҫул ӗҫленӗ.
Урама уҫӑлма тухсан та (унта тухса кӗме ӑна социаллӑ ӗҫчен пулӑшать) вӑл юрлама хатӗр. Унӑн репертуарӗнче — халӑх юррисемпе хӑй ҫамрӑк пулнӑ ҫулсенчи шлягерсем.
Нина Ивановнӑна Ольга Валентиновна соцӗҫчен ӑшӑ сӑмахпа та хавхалантарса тӑрать.
Нарӑс уйӑхӗн 1-мӗшӗнчен Шупашкарти 1-мӗш клиника пульницин поликлиники эрнере ҫичӗ кун ӗҫлеме пуҫлӗ. Ҫӗнӗ графикпа ӗҫлеме Трактор тӑвакансен проспектӗнчи 46-мӗш ҫуртра вырнаҫнӑ 1-мӗш поликлиника тытӑнӗ. Вӑл ҫынсене кашни кунах ирхи 8 сехетрен пуҫласа 8 сехет каҫхиччен йышӑнӗ.
Асӑннӑ поликлиникӑна асӑннӑ пульницӑн ытти поликлиникӑсем патне ҫирӗплетнӗ пациентсем те кайма пултараҫҫӗ.
Чӑваш Енре ку ҫула Халӑхсен туслӑхне халалланӑ. Ҫулталӑка нарӑс уйӑхӗн 3-мӗшӗнче официаллӑ майпа уҫӗҫ.
Мероприяти Шупашкарти Трактор тӑвакансен культура керменӗнче иртӗ. Унта республикӑра пурӑнакан тӗрлӗ халӑх ҫыннисем хутшӑнӗҫ. Ҫавӑн пекех наци тумӗсен куравӗ пулӗ, кунсӑр пуҫне тӗрлӗ ӑсталӑх класӗ йӗркелӗҫ. «Сувар», «Дети гор», «Эрзянка», «Адана» тата ытти халӑх ушкӑнӗсем сцена ҫине тухса пултарулӑхӗпе савӑнтарӗ.
Мускавра ҫанталӑк япӑхланнӑран Шереметьево аэропорчӗ вӑхӑтлӑха самолетсене йышӑнма чарӑннӑ.
Авиакомпани расписание улшӑнусем кӗртет. Пассажирсем рейссем пулнипе пулманни пирки контакт-центрсенче тата авикомпанисемпе аэропортӑн коммуникаци каналӗсемпе пӗлме пултараҫҫӗ.
Сӑмах май, паян ирхине «Победа» авиакомпанин рейсӗ Мускава (Шереметьево) вӗҫмен, пӗр сехет ҫурӑ тытӑнса тӑнӑ.
-8.7 °C