Пысӑк хуласенче пурӑнакансем машинӑсене ниҫта лартма аптӑрани час-часах пулать. Ятарлӑ парковкӑсем ҫывӑхра мар, кашни килсерен тенӗ пек автомобиль.
Уйрӑмах сӗмсӗррисем нумай хваттерлӗ ҫурт умӗнчи лаптӑка хӑйсем тӗллӗн ярса илеҫҫӗ. Ҫав вырӑнта машина номерне ҫырса ҫакса хураҫҫӗ, тӗрлӗ майпа (кивӗ кустӑрма хурса, тимӗртен карта тытса) паллӑ тӑваҫҫӗ.
Шупашкарти Эгер бульварӗнчи, Кӑкшӑм, Хусанкай урамӗсенчи, 9-мӗш пилӗкҫуллӑх проспектӗнчи ҫавӑн пек картасемпе кустӑрмасене, машина номерӗсене ҫырса ҫакса хунисене хулари яваплӑ службӑсем сӳтсе тиесе кайнӑ.
Патшалӑх тата муниципалитет пулӑшӑвӗсен порталӗпе усӑ куракансем асӑннӑ ҫӑлкуҫ урлӑ илекен тӗрлӗ тӳлевшӗн хальхи вӑхӑтра сахалтарах тӑкакланаҫҫӗ. 30 процент йӳнӗрех.
Сӑмахран, 10 ҫуллӑха тутаракан ют ҫӗршыв паспорчӗшӗн 5 пин тенкӗ тӳлемелле пулсан, портал урлӑ саккас парсан тӳлевӗн 30 процентне перекетлеме май килетчӗ. Е тата водитель правишӗн. Кунта сӑмах электрон мелпе тӳлени пирки пырать-ха.
Ҫӗнӗ ҫул хыҫҫӑн, 2023 ҫулхи кӑрлачӑн 1-мӗшӗнчен, ун пек ҫӑмӑллӑха пӗтерӗҫ.
Чӑваш Енре ҫемье ҫавӑрас кӑмӑллӑ арҫынсем юлашки кунсенче йышланнӑ. Ку хыпара республикӑн Юстици ӗҫӗсен патшалӑх службинче пӗлтернӗ.
Алла ҫӗрӗ тӑхӑнас ӗмӗтлисен йышӗ авӑн уйӑхӗн 21-мӗшӗ хыҫҫӑн йышланнӑ. Мобилизацие лекекен арҫынсем ҫемье ҫавӑрни ҫинчен ӗнентерекен штампа паспорт ҫине васкавлӑн ларттарма талпӑнаҫҫӗ-мӗн. Ҫавна кура вӗсен кӑмӑлне заявлени панӑ кунах тивӗҫтерме йышӑннӑ.
Авӑн уйӑхӗн 21-мӗшӗ хыҫҫӑн 52 арҫын мӑшӑрланнӑ. Ытти категорие кӗрекенсен заявлени панӑ хыҫҫӑн пӗр уйӑхран кая мар кӗтмелле.
Федерацин налук службин Чӑваш Енри управленийӗн ӗҫченӗсем ҫывӑх вӑхӑтра ҫынсене пропискӑна пӑхмасӑрах йышӑнма тытӑнӗҫ. Ҫӗнӗ йӗрке кӑҫалхи ҫурла уйӑхӗн 29-мӗшӗ хыҫҫӑн вӑя кӗрӗ.
Хальхи вӑхӑтри налукҫӑсен регионсенчи уйрӑмӗсем ҫынсене регистрацие кура йышӑнаҫҫӗ. Малалла вӗсем икӗ шайлӑ управлени тытӑмӗпе ӗҫлеме пуҫлӗҫ. Федерацин налук службин тытӑмне пур ҫӗрте те улӑштарса пыраҫҫӗ.
Федерацин налук службин Чӑваш Енри управленийӗн пӗрлештернӗ подразделенийӗсен йышне 9 налук инспекцине кӗртнӗ. Хальхи вӑхӑтра ӗҫлекен Йӗпреҫри, Куславккари, Муркашри пайсем юлмӗҫ.
Паян ҫӗршыв Президенчӗ Владимир ️Путин РФ Пенси тата Социаллӑ страховани фончӗсене пӗрлештересси ҫинчен калакан саккуна алӑ пуснӑ. Вӗсем малашне пӗрлехи Социаллӑ фонд шутланӗҫ.
Ҫӗнӗлӗх патшалӑха социаллӑ тӳлевсене оперативлӑ, адреслӑ йӗркелесе пыма май парӗ.
Раҫҫей Федерацийӗн пенси тата социаллӑ страховани фончӗ (Социаллӑ фонд) ӗҫе 2023 ҫулхи кӑрлач уйӑхӗн 1-мӗшӗнчен тытӑнӗ. Куҫӑм тапхӑрӗ 2 ҫула та тӑсӑлма пултарӗ.
Ҫынсен пулӑшу ыйтма унчченхи адреспах каймалла.
Чӑваш Енри айтишниксем ҫар ретне тӑмӗҫ. Хӗсмете каяссинчен 67 яша хӑтарӗҫ.
ИТ-специалистсене ҫара илессинчен хӑтарма ҫӗршыв Президенчӗ Владимир Путин сӗннипе йышӑннӑччӗ.
Ҫар ретне тӑратасран отсрочка пама ыйтса пирӗн ҫӗршыври 8,7 пин ытла ҫамрӑк заявка панӑ. Вӗсенчен 7695 ҫамрӑк саккун ыйтнине тивӗҫтернӗ, ҫав шутра – пирӗн республикӑри 67 IT-специалист. Отсрочка списокне лекнӗ ҫамрӑксен тӗлӗшпе тивӗҫлӗ йышӑнӑва призыв комиссийӗ тӑвать.
Чӑваш Енре патриотла воспитани парасси ҫинчен калакан саккун йышӑннӑ. Ӑна республика парламенчӗ ҫӗртме уйӑхӗн 30-мӗшӗнче ҫирӗплетнӗ, Олег Николаев Элтепер утӑ уйӑхӗн 5-мӗшӗнче алӑ пуснӑ. Халӗ документа республикӑн влаҫ органӗсен официаллӑ порталӗнче вырнаҫтарнӑ.
Саккунта пӑхса хӑварнӑ тӑрӑх, патриотла воспитани парассипе муниципалитетсенче программӑсем йышӑнмалла.
Ачасене ҫуралнӑ ҫӗре тата тӑван ҫӗршыва юратма вӗрентмелле. Юлашки ҫулсенче ку енӗпе пирӗн Раҫҫейре ҫине тӑрса ӗҫлемен тесен пысӑк йӑнӑш пулас ҫук.
Ҫӗнни – унччен пулса манӑҫа тухни теҫҫӗ те, пирӗн республикӑра урӑлтаркӑч уҫма йышӑннӑ. Ун пек саккуна маларах ҫӗршыв шайӗнче йышӑннӑччӗ, ҫавна май регионсенче те ӳсӗрсен ыйтӑвне татса пырӗҫ.
Эрех хыпса лартса урам тӑрӑх утакансене урӑлтаркӑча пуҫтарса кайӗҫ. Унта вӗсем ҫывӑрса урӑлӗҫ, унтан килӗсене саланӗҫ.
Ӳсӗр ҫынсене урӑлтаракан ҫурт уҫасси ҫинчен калакан саккуна Чӑваш Енӗн Патшалӑх Канашӗн депутачӗсем йышӑннӑ.
Ҫав ҫурта тытса тӑма хыснаран ҫулталӑкне 8 миллион тенкӗ уйӑрӗҫ. Каярах урӑлтаркӑчсене тата терӗр 4 хулара уҫӗҫ.
Сӑмах май каласан, депутатсенчен пӗри, Николай Степанов, урӑлтаракӑча лекнӗ ҫынсене штраф тӳлеттерме сӗннӗ.
РФ Патшалӑх Думи тислӗкпе каяш тӗлӗшпе харпӑрлӑх правине хатӗрлеме ирӗк паракан саккун йышӑннӑ. Малашне вӗсене нимле чӑрмавсӑр туянма та, сутма та май пулӗ. «Лента.ру» ӑнлантарнӑ тӑрӑх, ҫӗнӗ йӗрке ҫӗршывра органикӑллӑ имҫам отрасльне йӗркелеме пулӑшӗ.
Унччен тислӗке производствӑн каяшӗ тесе шутланӑ — ял хуҫалӑх ҫаврӑнӑшӗнче унпа усӑ курма чарнӑ. Уйсене унпа имҫамлас тесен экологи тӗлӗшпе экспертиза ирттерсе лицензи илмелле пулнӑ.
Ҫӗнӗ саккун вӑя кӗрсен тислӗкпе чӑх-чӗп каяшӗ выльӑх-чӗрлӗхрен юлакан, тӑпра пулӑхлӑхне ӳстерекен япала пек шутланӗҫ — урӑхла каласан, чарусене пӗтерӗҫ.
«Саккун проектне йышӑнни органикӑллӑ имҫамӑн уйрӑм отрасльне йӗркелеме, ҫак продукцие экспортлама, ҫавӑн пекех выльӑх-чӗрлӗх каяшне ял хуҫалӑхӗнче чӗртавар пек усӑ курма май парать», — тенӗ проекта ӑнлантарнинче.
Ҫак эрнекун, ҫӗртме уйӑхӗн 10-мӗшӗнче, кӗске ӗҫ кунӗ пулмӗ.
Пилӗк кунлӑ ӗҫ эрнипе ӗҫлекенсене ҫапах та 3 кун кантарӗҫ.
Тунтикун канни Раҫҫей кунӗпе ҫыхӑннӑ. Уяв вырсарникуна лекӗ, апла пулсан эрнекун уяв умӗнхи кун шутланмӗ. Вырсарникун вырӑнне вара тунтикун канӑпӑр.
Тепӗр майлӑ каласан, пилӗк кунлӑ ӗҫ эрнипе тимлекенсем шӑматкун, вырсарникун тата тунтикун канӗҫ. Апла пулсан, ҫитес эрне тӑватӑ кунлӑ пулӗ.
+21.3 °C