Чӑваш Республикин Граждан оборони тата чрезвычайлӑ лару-тӑру енӗпе ӗҫлекен патшалӑх комитечӗн председательне Олег Яковлева паян, нарӑс уйӑхӗн 25-мӗшӗнче, ӗҫрен кӑларнӑ.
Республика Элтеперӗн Олег Николаевӑн хушӑвӗнче Олег Яковлева ӗҫрен мӗншӗн кӑларнине те пӗлтернӗ. Олег Николаевич пуҫлӑх тилхепине хӑй пӑрахас тенӗ-мӗн.
Олег Яковлев 1969 ҫулта Канаш районӗнчи Шаккӑлта ҫуралнӑ. И.Я. Яковлев ячӗллӗ Чӑваш патшалӑх пединстиутӗнче вӗреннӗскер ӗмӗрне Шалти ӗҫсен министерствин тытӑмӗнче ӗҫлесе ирттернӗ. Вӑл Чӑваш Енре кӑна мар, Ненецк автономи облаҫӗнче те тӑрӑшнӑ.
Чӑваш Республикин Граждан оборони тата чрезвычайлӑ лару-тӑру енӗпе ӗҫлекен патшалӑх комитечӗн председателӗн тивӗҫне пурнӑҫлама Сергей Павлова шаннӑ.
Пӗлтӗр республикӑри ӗҫ тӑвакан влаҫ органӗсенче оптимизаци проектне пурнӑҫласа тӳре-шаран 527 пин ӗҫ сехетне перекетлеме май килнӗ. Кун пирки ЧР Экономика аталанӑвӗн министерстви пӗлтерет.
Малта — оптимизацин виҫҫӗмӗш тапхӑрӗ. Пӗлтӗр тӳре-шаран ӗҫне оптимизацилес тӗллевпе 107 проект пурнӑҫланнӑ. Тӗслӗхрен, ахаль ҫынсене тата усламҫӑсене патшалӑх пулӑшӑвӗсем парассипе ҫыхӑннӑ оптимизаци.
Тӳре-шара пӗлтернӗ тӑрӑх, перекетленӗ 527 пин ӗҫ сехечӗ 50 миллион тенкӗпе танлашать.
Халӗ проекта мӗнпур муниципалитетра пурнӑҫлама тытӑннӑ. Вӗсенче 99 проект пуҫарнӑ.
Ӗнер, нарӑс уйӑхӗн 20-мӗшӗнче, Ҫӗмӗрле хула администрацийӗн пуҫлӑхӗ Валерий Шигашев хулари пӗр ҫуртпа ҫыхӑннӑ пӑтӑрмах пирки Фейсбукра пӗлтернӗ.
Кивӗ ҫуртсенчен пӗрин ҫивиттийӗнче ҫӗрле юр йӑтӑнса аннӑ та ҫурта кӗмелли вырӑнти ҫивиттие тата вӗри шыв тытӑмне сиенленӗ. Хула администрацийӗн пуҫлӑхӗ ҫв ҫуртра пурӑнакансемпе тата ҫурта тытса тӑракан управляющи компанин директорӗпе Микаэл Гурбановпа тӗл пулнӑ. Вырӑнтисем кӑлтӑка ҫийӗнчех пӗтернӗ-ха, анчах, Валерий Шигашев калашле, ыйтусем юлнӑ.
Темиҫе хваттерлӗ йывӑҫ ҫурт кивӗ. Управляющи компани ӑна тытса тӑма пайталлӑ маррине пӗлтернӗ. Унтан та ытларах — компани панкурата тухать, ҫурта ҫӗнӗ управляющи компанин тытса тӑма тивӗ. Кивӗ ҫуртсене никам та тытса тӑрасшӑн мар. Ку ыйтӑва хулара паян канашлу ирттерсе сӳтсе явма палӑртнӑ.
Ял хуҫалӑх министерстви кӑҫал мӗнле ҫимӗҫсем хакланма пултарассине пӗлтернӗ. Ҫак йыша пилӗк продукци кӗнӗ.
Мӗнлисем? Сӗт, сӗт юр-варӗ, ҫӑкӑр, пахча ҫимӗҫ тата сахӑр. Ведомство хаксене шайлаштармашкӑн тивӗҫлӗ мерӑсем йышӑнасшӑн. Тӗслӗхрен, ҫӑкӑр пӗҫерекенсене пӗр килограмм пуҫне 2 тенкӗ мар, 2,5 тенкӗ субсиди парасшӑн.
Пахча ҫимӗҫе мӗнле йӳнетмелле? Харпӑр хуҫалӑхсенче шанчӑк пур. Ҫавӑн пекех тӳре-шара пахча ҫимӗҫ, ҫӗр улми туса илессине аталантармашкӑн федераци проекчӗ пуҫарасшӑн. Ҫавна май 2023 ҫулта ку тӗллевпе хушма укҫа уйӑрасшӑн.
Чӑваш Республикин Элтеперне Олег Николаева Александр Андреев коммунист ыйтӑвӗ килӗшмен. Ӑна вӑл: «Каждый говорит в меру своей испорченности», — тесе хунӑ. Ку ӗнтӗ вӑл ҫыннӑн калаҫӑвӗ тӑрӑх этем епли курӑнать тенине пӗлтерет-тӗр.
Паян регион ертӳҫи республика Правительстви пӗлтӗр мӗнле ӗҫлени ҫинчен ЧР Патшалӑх Канашӗн депутачӗсен умӗнче отчет тунӑ. Доклад хыҫҫӑн ыйту панисенчен пӗри – Александр Андреев коммунист. Унӑн сӑмахне Чувашинформ.рф (асӑннӑ ҫӑлкуҫ Правительство хыпарӗсене ҫутатать) «ыйту та мар, ҫӑхав» тесе хакланӑ. Депутат муниципалитет пӗрлешӗвӗсене васкаса пӗрлештерни, сасӑлав вӑхӑтӗнче административлӑ майпа пусахлани ҫинчен асӑнса хӑварнӑ.
Капла калани Олег Николаева килӗшмен, вӑл фактсем илсе кӑтартма ыйтнӑ. Маларах эпир асӑнса хӑварнӑ сӑмах ҫаврӑнӑшӗпе усӑ курнӑ.
Шупашкарти «Садовӑй» микрорайонти ҫӗнӗ шкул валли директор шыпаҫҫӗ. Конкурс ыран, нарӑс уйӑхӗн 18-мӗшӗнче, 14 сехетре иртмелле.
Конкурс условийӗнче палӑртса хӑварнӑ тӑрӑх, шкул директорӗн пуканне йышӑнас кӑмӑллӑ ҫыннӑн аслӑ пӗлӳллӗ пулмалла. Дипломпа диплом пӗр мар. Шкул директорӗн е патшалӑхпа муниципалитет управленийӗ енӗпе, е менеджмент тӗлӗшпе, е персонала ертсе пырассипе ятарлӑ пӗлӳ илни кирлӗ. Ҫав вӑхӑтрах педагогра 5 ҫултан кая мар ӗҫленине шута илӗҫ.
Конкурс иртесси ҫинчен Шупашкар хула администрацийӗн вӗренӳ управленийӗ пӗлтернӗ.
Шӑмӑршӑ районӗнчи Карапай Шӑмӑршӑри психоневрологи диспансерӗнче ҫӗнӗ ҫын пуҫлӑх тилхепине тытнӑ. Социаллӑ учреждение ертсе пыма Андрей Вазанова шаннӑ.
Андрей Петровичпа коллектива ӗнер, нарӑс уйӑхӗн 15-мӗшӗнче, республикӑн ӗҫ тата социаллӑ хӳтлӗх министрӗ Алёна Елизарова паллаштарнӑ. Унччен Андрей Вазанов Шӑмӑршӑ районӗнчи халӑха социаллӑ хӳтлӗх паракан центрта 14 ҫул тӑрӑшнӑ.
Министр ҫӗнӗ ӗҫе кӳлӗннӗ ҫынна тата психоневрологи диспансерӗн коллективне ӑнӑҫу суннӑ.
«Нумай ҫул таса чунпа ӗҫленӗшӗн» (Чӑваш Ен ертӳҫин йышӑнӑвӗнче ҫавӑн пек каланӑ) Шупашкарти юханшыв порчӗн генеральнӑй директорне Ванифатий Шайкина
«Чӑваш Республикин транспортӑн тава тивӗҫлӗ ӗҫченӗ» хисеплӗ ят панӑ.
Ванифатий Васильевич 1962 ҫулхи нарӑс уйӑхӗн 13-мӗшӗнче Патӑрьел районӗнчи Вӑтаелӗнче ҫуралнӑ. Малтанхи пӗлӗвне вӑл И.Н. Ульянов ячӗллӗ Чӑваш патшалӑх университетӗнче илнӗ, историк пулма вӗренсе тухнӑ.
1996 ҫулхи ҫӗртме уйӑхӗнче вӑл Шупашкар хула администрацийӗн пуҫлӑхӗн заместителӗнче – аппарат ертӳҫинче ӗҫлеме тытӑннӑ. 2003 ҫулхи ҫурла уйӑхӗнче вӑл Шупашкарти юханшыв портӗнче гендиректорӑн пӗрремӗш ҫумӗнче, 2005 ҫулхи ҫу уйӑхӗнченпе гендиректорта тӑрӑшма тытӑннӑ.
Кӑшӑвируспа чирлисем валли хатӗрленӗ койкӑсем сахаллансах пыраҫҫӗ. ЧР сывлӑх сыхлавӗн министрӗ Владимир Степанов ковид-госпитальсене ытларах камсем лекнине пӗлтернӗ.
Пульницӑна ытларах вӑраха кайнӑ чирсемпе нушаланакансем лекеҫҫӗ. Унашкал пациентсем 60-тан кӑна мар, 70-тен те иртнисем. Чылайӑшӗн ӳпкин 60-70 проценчӗ сиенленнӗ. Министр каланӑ тӑрӑх, халӗ те, унчченхи пекех, пульницӑна лекнисен 99 проценчӗ вакцинациленмен.
Паян стопкоронавирус.рф сайт пӗлтернӗ тӑрӑх, юлашки талӑкра 1104 ҫын кӑшӑлвируспа чирленӗ. 554 ҫын сывалнӑ. 180 ҫынна пульницӑна вырттарнӑ.
Нимеҫӗсем Шупашкарти тата Ҫӗнӗ Шупашкарти троллейбуссемпе тӳлевсӗрех ҫӳреме тытӑнӗҫ. Кун пирки ЧР Патшалӑх Канашӗн председателӗ тата "Эпир пӗрле" регионти штабӑн ертӳҫи Леонид Черкесов пӗлтернӗ. Ҫак хуласен троллейбус предприятийӗсемпе килӗшӳ тунӑ. Малашне ытти муниципалитетпа та калаҫса татӑласшӑн.
Нимеҫӗн транспортпа тӳлевсӗр ҫӳрес тесен бейдж, маршрут хутне тата удостоверение кӑтартмалла.
Пульницӑсенче ӗҫлекен нимеҫӗсене вӗри апатпа тивӗҫтермелле тӑвасшӑн. Ҫавӑн пекех вӗсене тӳлевсӗрех медтӗрӗслев витӗр тухма, сипленме, кирлӗ тӗк реабилитаци витӗр тухма май туса парасшӑн.
Леонид Черкесов палӑртнӑ тӑрӑх, нимеҫӗ-медиксен ординатурӑна вӗренме кӗмешкӗн, ӗҫе вырнаҫмашкӑн та ҫӑмӑллӑхсем пулмалла.
+28.3 °C