«Патшалӑх знакӗ» Шупашкар 555 ҫул тултарнӑ тӗле сувенир банкнотине кӑларӗ. Тираж нумаях пулмӗ.
Кам тивӗҫӗ-ха ӑна? Сувенирлӑ укҫана Шупашкарӑн ҫуралнӑ кунне паллӑ тунӑ ҫӗре пысӑк тӳпе хывакансем илейӗҫ. Ҫавӑн пекех хула конкурсӗнче ҫӗнтернисем, хӑнасем тивӗҫӗҫ. Ӑна хулан юбилейлӑ ҫулӗнче ҫуралнӑ ачасене те, ҫемье чӑмӑртанӑ мӑшӑрсене те парӗҫ. Банкнота ҫине вырӑнти паллӑ вырӑнсене сӑнлӗҫ.
Аса илтерер: Шупашкар хӑйӗн ҫуралнӑ кунне ҫурла уйӑхӗнче паллӑ тӑвать.
Чӑваш наци музейӗнче тӗлӗнмелле курав уҫӑлнӑ. Республикӑра кӑҫал ирттерме йышӑннӑ Экологи культурин ҫулталӑкне халалланӑскер усӑ курнӑ япаларан ҫӗнӗ япаласем ӑсталама май пуррипе паллаштарать.
«Шупашкарти пӗр предприятире усӑ курнӑ полиэтилен хутаҫпа пластик савӑт-сапаран картлашкасем кӑларма пуҫланӑ. Продукцие ытти регионсенче те туянаҫҫӗ. Чӑваш Енри кун пек предприятисем пӗр тытӑма пӗрлешнӗ. Вӗсем ӑпӑр-тапӑртан мӗн тума пултарассине те тӗпчеҫҫӗ. Сӑмахран, розетка корпусӗсенчен чавсапа чӗркуҫҫине хӳтӗлекен хатӗр ӑсталаҫҫӗ. Ҫавӑн пекех пластик палассем, шӑвармалли шлангсем, калча ӳстермелли савӑтсем тата ытти нумай усӑллӑ япала туса кӑлараҫҫӗ», — хыпарлать музйери куравпа паллашнӑ хыҫҫӑн Чӑваш Енӗн патшалӑх телерадиокомпанийӗ.
Куравра Шупашкарти тата Ҫӗнӗ Шупашкарти «Кванториумсенче» вӗренекенсем шутласа кӑларнӑ япаласене те курма пулать иккен. Сӑмахран, ҫӗр улми хуппинчен хатӗрленӗ чашӑк-тирӗке тата пултӑранран ӑсталанӑ музыка инструменчӗсене.
Чӑваш Енӗн тӗп хули кӑҫал 555 ҫулхине уявлӗ.
Паллӑ датӑна республика сумлӑн уявласшӑн. Ӑна хатӗрленсе ирттерме ӗҫлӗ ушкӑн туса та хунӑ ӗнтӗ. Документа республика ертӳҫи Олег Николаев паян, нарӑс уйӑхӗн 8-мӗшӗнче, алӑ пуснӑ.
Ӗҫлӗ ушкӑна Павел Данилов вице-премьер ертсе пырӗ.
Сочире Хӗллехи Олимп вӑййисем иртнӗренпе 10 ҫул ҫитнине халалласа «Раҫҫейри шкул ачисен спартакиади» иртнӗ. Спортмсенсем фристайл енӗпе иртнӗ.
Олимп резервӗсен 2-мӗш спорт шкулӗнче ӑсталӑхне туптакан Дмитрий Салмин биг-эйр дисциплинӑра мала тухнӑ. 15 ҫулти Дима Шупашкарта пурӑнать. Вӑл ылтӑн медальсӗр пуҫне чи вӑйлисен спартакиадине кайма путевка ҫӗнсе илнӗ. Ӑмӑрту Миассе хулинче нарӑс уйӑхӗн 12-мӗшӗнче пуҫланӗ. Унта Лана Пусаковӑпа Дмитрий Мулендеев фристайлҫӑсем те хушӑнӗҫ.
Паян, нарӑс уйӑхӗн 8-мӗшӗнче, Шупашкарти Эльмен урамӗнчи чарӑнура арҫын виллине тупнӑ. Кун пирки «Про Город» хаҫата халӑх корреспонденчӗ пӗлтернӗ.
Арҫын чарӑнура сак ҫинче ларнӑ вӑхӑтрах вилсе кайнӑ. «Васкавлӑ медпулӑшу килчӗ. Арҫын ирхи 8 сехетренпех ҫапла ларнӑ теҫҫӗ», - пӗлтернӗ халӑх корреспонденчӗ «Про Город» хаҫата.
Шупашкарта пурӑнакан ҫемье тин ҫуралнӑ хӗр пӗрчине Февралина ят панӑ. Ку ята Калинин районӗн администрацийӗн ЗАГС пайӗнче регистрациленӗ.
Пӗлме интереслӗ: революци хыҫҫӑн ачасене Февраль революцине халалласа ҫакнашкал ят пама тытӑннӑ. Вӑл «февральте ҫуралнӑскер» тенине пӗлтерет.
Ҫавӑн пекех Калинин районӗн администрацийӗн ЗАГС пайӗнче Мелания ята регистрациленӗ.
Нарӑс уйӑхӗн 5-мӗшӗнче Шупашкарти Алькеш поселокӗнче Гоголь урамӗнче васкавлӑ медпулӑшу пациент патне ҫитеймен. Йӑлтах - юртан тасатман ҫула пула.
Васкавлӑ медпулӑшу машини тасатнӑ ҫул таран ҫеҫ ҫитейнӗ, малалла каяйман. Амӑшӗпе ачин машина патне хӑйсен утса тухма тивнӗ. Кун пирки «Про Город» хаҫат пӗлтернӗ.
Малтанлӑха хыпарланӑ тӑрӑх, ҫав ҫулӑн участокӗ «Дорэкс» килӗшӗвӗнче ҫук. Епле майпа? Прокуратура ӗҫ-пуҫа малалла тӗпчет.
Шупашкарта чи лайӑх класс ертӳҫине суйланӑ. Телеграмри «Пуринчен малтан. Ҫывӑрса юлмасан» каналта пӗлтернӗ тӑрӑх, ӑмӑртӑва 20 педагог хутшӑннӑ.
«Вӗсем ачасемпе класс сехечӗ ирттернӗ. Унсӑр пуҫне ашшӗ-амӑшӗпе ачасен хутшӑнӑвӗсенче класс ертӳҫи епле вырӑн йышӑннине палӑртакан лекци йӗркеленӗ», — хыпарланӑ маларах эпир асӑннӑ ҫӑлкуҫра.
Пӗрремӗш вырӑна Шупашкарти 59-мӗш шкулта тӑрӑшакан Андрей Гарифуллин тухнӑ, иккӗмӗшӗнче — 45-мӗш шкулти Любовь Салмина, виҫҫӗмӗшӗнче — 43-мӗш шкулти Алёна Львова. Хулари 27-мӗш шкулта тӑрӑшакан Светлана Михайловӑна тата 2-мӗш гимназири Ольга Ярукинӑна лауреат ят панӑ.
Кӑҫал «Ҫӗрулми» курав нарӑсӑн 29-мӗшӗнче, пуш уйӑхӗн 1-мӗшӗнче иртессине пӗлтернӗччӗ. Аса илтерер: вӑл Шупашкарти суту-илӳпе курав центрӗнче пулӗ, унта вӑрлӑх ҫӗрулми сутӗҫ.
Кӑҫал курава ҫӗрулмин 18 сортне илсе килӗҫ: «Аван», «Бельмондо», «Бернина», «Верди», «Гала», «Гулливер», «Жуковский ранний», «Ирбитский», «Кармен», «Коломбо», «Королева Анна», «Легенда», «Метеор», «Ред Леди», «Ривьера», «Родриго», «Самбо», «Фламинго».
Ытти ҫулти пекех, ватӑсене, сусӑрсене тавара киле илсе ҫитерме нимеҫӗсем пулӑшӗҫ.
Кӑҫал Шупашкар хулин ҫуралнӑ кунне Раҫҫейӗн чечеклӗ карттине тӑваҫҫӗ. Тӗп хуламӑр 555 ҫул тултарӗ.
Карттӑна ҫу уйӑхӗнчех тума пуҫлӗҫ. Ун чухне чечек хунавӗсене лартма тытӑнӗҫ. Акцие ҫӗршыври тӗрлӗ регион хутшӑнӗ.
Чечексене, тӗрлӗ регионти питомникре ӳстернӗскере, кӳлмекре лартӗҫ. Хальлӗхе заявкӑсене йышӑнаҫҫӗ. Хула администрацийӗн пуҫлӑхӗ Денис Спирин пӗлтернӗ тӑрӑх, нарӑс вӗҫӗнче, пуш пуҫламӑшӗнче акцие миҫе регион хутшӑнни паллӑ пулӗ.
+11.3 °C