Пӑрачкавра та Вилӗмсӗр ҫулӑм ҫунма пуҫланӑ. Ӑна Тӑван ҫӗршывӑн аслӑ вӑҫинче пуҫ хунисене асра тытса лартнӑ мемориалта авӑн уйӑхӗн 23-мӗшӗнче чӗртнӗ.
Вӑрҫа ҫав тӑрӑхри 8 519 ҫын тухса кайнӑ, 5 230-шӗ каялла таврӑнайман.
Мемориала 1967 ҫултах уҫнӑ. Ӑна газификацилеме халӗ 83 метр тӑршшӗ газ пӑрӑхӗ хунӑ.
Вилӗмсӗр ҫулӑм пирӗн республикӑра ҫапла вара 13 ҫӗрте ҫунать: Шупашкарти «Ҫӗнтерӳ» мемориал паркӗнче тата 1-мӗш масар ҫинчи тӑванла вил тӑпри ҫинче, Канашра, Кӳкеҫре, Ҫӗрпӳре, Патӑрьелте, Красноармейскинче, Шӑмӑршӑра, Етӗрнере, Куславкка районӗнче уҫнӑ Сӑр чиккине чавнисене асра тытса уҫна мемориалта, Шупашкар районӗнчи Урай Макаҫра.
Чӑваш Ен спортсменки Дина Александрова марафонра пурне те парӑнтарса финиша пӗрремӗш ҫитнӗ.
Марафон Исландин тӗп хулинче Рекъявикире иртнӗ. 33 ҫулти Дина 42,2 ҫухрӑма 2 сехет те 35 минут та 51 ҫеккунт кӑтартупа вӗҫленӗ. Ку — Рекъявикири марафон трасси ҫинчи ҫӗнӗ рекорд.
Палӑртса хӑварар: Дина Александрова Шупашкарта ҫуралса ӳснӗ, вӑл Олимп резервӗсен 8-мӗш спорт шкулӗнче ӑсталӑхне туптанӑ, унтан Курск хулинче тренировкӑсем тума пуҫланӑ та 2 ҫухрӑмлӑ дистанцире Раҫҫей чемпионки пулса тӑнӑ.
Шупашкарта пурӑнакан 73-ри хӗрарӑн инвестици платформине укҫа хывса пуяс тенӗ.
Пӗлтерӗве вӑл мессенджерсенчен пӗринче асӑрханӑ. Хӑйӗнпе ҫыхӑннӑ консультант сӗннипе «бизнес-проекта» хӑй пухса пынӑ 300 пин тенке хывнӑ.
Укҫа процентпа таврӑнманнине кура вӑл хӑйне улталанине ӑнланса илнӗ та пакунлисенчен пулӑшу ыйтнӑ. Пӑтӑрмах тӗлӗшпе пуҫиле ӗс пуҫарнӑ.
Ӗнер, ҫурла уйӑхӗн 24-мӗшӗнче, Ҫӗнӗ Шупашкарта пурӑнакан 71 ҫулти хӗрарӑм светофорӑн хӗрлӗ ҫутипе чупса каҫма тӑнӑ. Пӑтӑрмах видеокамера ҫине лекнӗ.
Васкакан хӗрарӑм ҫине «Тойота Королла» автомобиль пырса кӗнӗ, ҫуран ҫӳрекенпе ҫапӑннӑ хыҫҫӑн шар курнӑ хӗрарӑм малалла темиҫе метра ыткӑнса кайнӑ.
Совет урамӗнчи 15-мӗш ҫурт патӗнче каҫхи сакӑр сехетре пулнӑ инкекре хӗрарӑм вилнӗ.
Ҫӑмӑл машина водителӗ, 1997 ҫулта ҫуралнӑ каччӑ, урах пулнӑ.
Ҫурла уйӑхӗн 23-мӗшӗнче Драмӑн сӑнавлӑ театрӗ черетлӗ, 31-мӗш, сезона уҫнӑ.
Куракансене ҫав кун театр хӑйӗн ҫӗнӗ спектакльне, «Праздник непослушания» юмаха, кӑтартнӑ. Чӑваш Енӗн Культура министерствинче пӗлтернӗ тӑрӑх, юмаха ачасем те, аслисем те килӗштереҫҫӗ. Аслӑ куракансене Антон Чеховӑн «Врач без пациентов, или Чехов без пауз» ӗҫне кӑтартнӑ.
Ҫитес уйӑхра театр Свердлов облаҫӗнчи Первоуральск хулине гастрольпе тухса кайӗ, унтисем кунта спектакльсемпе килӗҫ.
Паян Шупашкар хулинчи халӑхӑн социаллӑ ыйтӑвӗсене тивӗҫтерекен комплекслӑ центрта ӗҫ кунне «Под одним флагом» (чӑв. Пӗр ялав айӗнче) флешмобран пуҫланӑ. Ӑна Раҫҫейӗн патшалӑх ялавӗн кунне хаалланӑ.
Центрӑн пресс-служби ӗнентернӗ тӑрӑх, учрежденире Чӑваш Республикин тата Раҫҫейӗн элемӗпе ҫыхӑннӑ кунсене яланах чыслӑн уявлаҫҫӗ. Чӑваш тӗррин, Чӑваш чӗлхин кунӗсене те унта тӗрлӗ мероприти ирттерсе палӑртаҫҫӗ ҫеҫ мар, ватӑ ҫынсем чӑваш ушкӑнӗсенче юрлаҫҫӗ, чӑваш ташшисене вӗренеҫҫӗ, чӑваш эрешӗсемпе тӗрлӗ япала ӑсталаҫҫӗ.
Центрта хыпарланӑ тӑрӑх, паянхи флешмоба Олег Газмановӑн «Вперёд, Россия!» юррипе ирттернӗ. Хусканусене тума ятарласа никам та малтан вӗренмен те, вӗрентмен те. Физкультура инструкторӗ флешмоб умӗн кӑтартнӑ та — астуса та юлнӑ. Килтен хӗрлӗ, кӑвак тата шурӑ тӗслӗ футболка илсе килмеллине ҫеҫ пӗлнӗ центр ӗҫченӗсем.
Флешмоб хыҫҫӑн пурте пӗрле тӑрса ялав евӗр тӑрса тухса сӑн ӳкерӗннӗ.
Шупашкара Валерия Ланская актриса тата юрӑҫ килнӗ. Кун пирки Телеграмри «Пуринчен малтан» каналта паян хыпарланӑ.
Хӗрарӑм Чӑваш Енӗн вӗрентӳ ӗҫченӗсен августри конференцине хутшӑннӑ иккен. Валерия Ланская Раҫҫейри «Знание» обществӑн лекторӗ шутланать.
Валерия ҫемьере мӗне мала хумалли, ҫемье телейӗ мӗнрен тӑни пирки каласа кӑтартнӑ. Ачана тӗрлӗ енлӗ аталантармаллине палӑртса хӑварнӑ.
Валерия палӑртса хӑварнӑ тӑрӑх, унӑн ывӑлӗ тенниспа, гимнастикӑпа, музыкӑпа кӑсӑкланать иккен. Унсӑр пуҫне программӑлама хӑнӑхать тата акӑлчан чӗлхине ҫине тӑрса вӗренет.
Чӑваш Ене Никита Михалков режиссер килнӗ. Вӑл хӑйӗнпе пӗрле «12» спектакль илсе килнӗ.
Режиссер Шупашкара ҫурлан 19-мӗшӗнче каҫхине ҫитнӗ. Ӗнер вӑл «Раҫҫейӗн тӗрленӗ картти» музея кайса курнӑ. Каҫхине вара Оперӑпа балет театрӗнче « 12» спектакль пулнӑ. Унта Никита Сергеевич хӑй те хутшӑнать.
Сӑмах май, Никита Михалков 2023 ҫулта Шупашкара «12» спектакльпе килнӗ ӗнтӗ.
Чӑваш Ене ҫӗнӗ 39 автобус ҫитнӗ. Вӗсем авӑнӑн 1-мӗшӗнчен ачасене илсе ҫӳреме пуҫлӗҫ.
Ытларах автобуссене Канаш, Вӑрнар, Хӗрлӗ Чутай, Шупашкар округӗсене ярӗҫ. Комсомольски, Ҫӗрпӳ, Елчӗк округӗсене икшер автобус лекӗ. Элӗк, Патӑрьел, Йӗпреҫ, Куславкка, Красноармейски тата ытти округа (пӗтӗмпе 10 округа) пӗрер автобус парӗҫ.
Ҫавӑн пекех Ҫӗрпӳ агротехникумне, Ҫӗмӗрлери политеха, Шупашкарти тата Ҫӗнӗ Шупашкарти колледжсене те автобус лекӗ.
Шупашкарта «Пӗчӗк тӑван кӗтесӗн тӑван ячӗсем» проектпа килӗшӳллӗн виҫҫӗмӗш мурала ӳкерсе пӗтернӗ. Вӑл Трактор тӑвакансен проспектӗнчи 17-мӗш ҫуртӑн 25-мӗш корпусӗнче вырнаҫнӑ.
Мурала ҫамрӑк ӳнерҫӗсем Ксения Кокель тата Дмитрий Егоров ӳкернӗ. Ӑна ҫак кунсенче савӑнӑҫлӑ лару-тӑрура уҫнӑ.
Стена ҫине Совет Союзӗн Паттӑрӗн Александр Боголюбовӑн портретне сӑнланӑ. Вӑл Шупашкарта ҫуралса ӳснӗ, Граждан тата Тӑван ҫӗршывӑн Аслӑ вӑрҫисене хутшӑннӑ. Паттӑр 1945 ҫулта Хӗрлӗ Ҫӑлтӑра тивӗҫнӗ. Вӑл ун чухне генерал-полковник званийӗпе пулнӑ.
+10.3 °C