Ҫулла пуҫланнӑранпа Чӑваш Енре икӗ ача ҫӗлен сӑхнинчен шар курнӑ. Иккӗшне те Республикӑри ача-пӑча клиника пульницине илсе килнӗ.
11 ҫулти арҫын ача ашшӗ-амӑшӗпе пӗрле дачӑра пулнӑ. Уҫӑлса ҫӳренӗ чухне вӑл хура ҫӗлен ҫине пуснӑ. Ӑна васкавлӑ медпулӑшу машинипе Шупашкарти пульницӑна илсе ҫитернӗ. Унта тухтӑрсем хура ҫӗлен наркӑмӑшне пӗтерекен сыворотка янӑ. Арҫын ача стационарта 10 кун сипленнӗ.
13 ҫулти арҫын тусӗпе уҫӑлса ҫӳренӗ чухне ури тӗлӗнчен темӗн чикнине туйнӑ. Ун хыҫҫӑн вӑл ҫав вырӑнта хӗрлӗ пулнине асӑрханӑ. Вӑл та пульницӑра сипленнӗ.
Аса илтерер: ҫӗртме уйӑхӗнче республикӑра ҫичӗ ҫынна хура ҫӗлен сӑхнӑ.
Шупашкарти тухтӑрсем 13 ҫулти пулӑҫӑн куҫ хупанкинчен вӑлта йӗппине кӑларнӑ.
Арҫын ача пулла кайнӑ. Ӑнсӑртран вӑлта ҫиппи тӑрук вӑйлӑ туртӑннӑ та йӗппи татӑлса куҫ хупанкине кӗрсе ларнӑ. Ачан ашшӗ-амӑшӗ часрах васкавлӑ медпулӑшу чӗннӗ. Арҫын ачана Республикӑри офтальмологи клиника пульницине илсе ҫитернӗ. Унти хирургсем йӗппе кӑларнӑ. Офтальмолог килте сипленмелли рецепт ҫырса парса ачана киле янӑ.
Офтальмологсем асӑрхаттараҫҫӗ: вӑлта йӗппи пӗчӗк пулсан та хӑрушлӑх кӑларса тӑратать. Вӑл куҫа тӑрӑнсан куҫ ҫивӗчлӗхне те ҫухатма пулать.
Чӑваш Ене, Канаш хулине, Раҫҫейри паллӑ юрӑҫ Михаил Гребенщиков ҫитсе курнӑ.
Вӑл «Артистика» пултарулӑх академийӗн вӗренекенӗсемпе тӗл пулнӑ. Ачасем аякран килнӗ хаклӑ хӑнана «Твори, раз Бог возможность дал» спектакльпе паллаштарнӑ. Михаил Гребенщиков ачасен пултарулӑхне пысӑка хурса хакланӑ. Шӑпӑрлансем паллӑ юрӑҫа пушӑ алӑпа яман — ӑна хӑйсем хатӗрленӗ картинӑна парнеленӗ.
Кайран ачасем Михаила Гребенщиковпа пӗрле Канашри тӗп сцена ҫине тухнӑ, концерта хутшӑннӑ. Хӑна пулас артистсене Мускав хулине чӗннӗ, вӗсем валли юрӑ ҫырса хатӗрлеме шантарса хӑварнӑ.
Шупашкарти Граждан урамӗнче пӗр водитель асламӑшӗпе (тен, кукамӑшӗ-тӗр. Вырӑсла хыпарта бабушка тенӗ) мӑнукне таптаса кайнӑ.
Ҫул урлӑ каҫнӑ чухне питех те асӑрхануллӑ пулмалла ҫав. Светофорӑн симӗс ҫутипе каҫнӑ чухне те малтан пӑхса илмелле. Светофор ҫук ҫӗрте пушшех те асӑрханмалла, мӗншӗн тесе тепӗр водитель йӑпӑр-япӑр чарӑнасшӑн мар.
Ҫавӑн пек инкек Шупашкарта пулса иртнӗ. Аслӑ ҫынпа ача Граждан урамӗнчи 20-мӗш ҫурт патӗнче пассажирсене каҫса ҫӳремелли вырӑнтан ҫул урлӑ каҫма тӑнӑ. Ҫав вӑхӑтра вӗсем ҫине пырса кӗнӗ.
«Лада Гранта» автомобиль урапи айне 55 ҫулти хӗрарӑмпа 6 ҫулти арҫын ача пулнӑ. Вӗсене иккӗшне те больницӑна илсе кайнӑ. Малтанласа палӑртнӑ тӑрӑх, вӗсен пуҫ мими чӗтреннӗ.
Инкек сӑлтавне палӑртассипе тӗпчевҫӗсем малалла ӗҫлеҫҫӗ.
Канаш хулинче пушарнӑйсем пилӗк ҫулти хӗрачана ҫӑлнӑ. Ку инкек ӗнер, ҫӗртме уйӑхӗн 26-мӗшӗнче, каҫхине пулнӑ.
Хӗвелтухӑҫ микрорайонӗнче 5 хутлӑ ҫурт хваттерӗнче пушар тухнӑ – унта япала типӗтекен машина ҫунма тытӑннӑ. Кил хуҫи хӗрарӑмӗ лавккана кайнӑ, машинӑна вара сӳнтерсе хӑварман.
Ҫулӑм мачча, стенасем тата япаласем ҫине куҫнӑ. Килте вара пилӗк ҫулти хӗрача пӗчченех пулнӑ. Амӑшӗ ӑна пӗрле илсе кайман, хӑварнӑ.
Тӗтӗм тухнине курсан пушарнӑйсене кӳршисем чӗннӗ. Вӗсем вырӑна ҫитсен хваттер алӑкне ҫӗмӗрсе шала кӗнӗ, пӗчӗк хӗрачана тӗтӗм ӑшӗнчен илсе тухнӑ. Ҫав самант тӗлне ача сӗрӗмпе наркӑмӑшланса тӑнне ҫухатнӑ. Вӑйлах аптӑранӑскере Шупашкар хулинчи пульницӑна илсе ҫитернӗ. Халӗ унӑн пурнӑҫӗ хӑрушлӑхра мар.
Чӑваш Енре «Мӑнастирте – пӗр кун» проект старт илнӗ. Вӑл пӗлтӗр те иртнӗ, ун чухне унта 500 ытла ача хутшӑннӑ.
Проектпа килӗшӳллӗн шкул ачисем мӑнастирти пурнӑҫпа ҫывӑхрах паллашаҫҫӗ.
Кӑҫал формат кӑштах улшӑннӑ: пӗлтӗр проекта 4 мӑнастир хутшӑннӑ пулсан кӑҫал ачасен республикӑри 3 мӑнастире ҫитсе курма май пур. Анчах географи анлӑ пулӗ: кашни округри ачасен мӑнастире ҫитсе курма май пултӑр.
Акӑ нумаях пулмасть Йӗпреҫ тӑрӑхӗнчи Хурамалти шкулта вӗренекенсем Ҫӗрпӳри хӗрарӑмсен мӑнастирӗнче пулса курнӑ. Ачасем валли унта тӗрлӗ ӑсталӑх класӗ йӗркеленӗ. Кунсӑр пуҫне храм историйӗпе паллаштарнӑ. Шӑпӑрлансем чан ҫапса та курнӑ.
Проект ку уйӑх вӗҫӗччен пулӗ. Ачасене мӑнастирсенче хапӑлласах йышӑнӗҫ.
Шупашкар хулинчи йӗрке хуралҫисем, ведомствӑн общество канашӗ, ирӗклӗ халӑх дружини пӗрле пулса «Ночной город» (чӑв. Каҫхи хула) рейд ирттернӗ. Хальхинче вӗсем тӗрӗслевпе ҫӗртме уйӑхӗн 19-20-мӗшӗсенчи каҫхине ҫӳренӗ.
Полицейскисемпе общество хастарӗсем яш-кӗрӗмпе хӗр-упраҫ тата вӗсен ашшӗ-амӑшӗ комендант сехетне пӑхӑннине тӗрӗсленӗ.
Рейд вӑхӑтӗнче 14 ачана тупса палӑртнӑ. Вӗсем ҫӗрле ашшӗ-амӑшӗсӗр хула тӑрӑх ҫӳренӗ. Вӗсене полици уйрӑмне илсе кайнӑ, унтан вӗсене ашшӗ-амӑшӗ пырса киле илсе кайнӑ. 15 ҫулти шкул ачин ашшӗн ывӑлӗ патне Шупашкара Ҫӗрпӳрен килме тивнӗ. 15 ҫулти ӳсӗр яш патне амӑшӗ ирхи виҫҫӗре Куславккаран персе ҫитнӗ. Тепӗр виҫӗ ача патне ашшӗ-амӑшӗ Ҫӗнӗ Шупашкартан килнӗ.
Ашшӗ-амӑшӗ те йӗркене пӑсать. Шупашкарта 46 ҫулти хӗрарӑм ҫул ҫитмен ачисен умӗнчех общество вырӑнӗнче эрех ӗҫсе ларнӑ.
Паян Ҫӗнӗ Шупашкар хулинче Атӑлта 10 ҫулти арҫын ача путса вилнӗ. Вӑл юраман ҫӗрте шыва кӗнӗ.
Инкек каҫ кӳлӗм хула ҫывӑхӗнче пулнӑ. 2016 ҫулта ҫуралнӑ арҫын ачан виллине водолаз-ҫӑлавҫӑ тупса ҫыран хӗррине илсе тухнӑ. Халӗ ӗҫ-пуҫа тӗпчеҫҫӗ, инкек сӑлтавне уҫӑмлатаҫҫӗ.
Аса илтерер: ҫӗртме уйӑхӗн 10-мӗшӗнче Улатӑр округӗнчи Ахматово ялӗ ҫывӑхӗнче Улатӑр юханшывӗнче 14 ҫулти арҫын ача путса вилнӗ. Вӑл тусӗсемпе шыва кӗнӗ. Тахӑш самантра шывпа чыхӑнса кайнӑ та путнӑ.
Хӗрлӗ Чутай округӗнчи хӗрарӑм хӑйӗн ачисене хӗнесе пурӑннӑ тесе шутлаҫҫӗ. Ун тӗлӗшпе пуҫиле ӗҫ пуҫарнӑ.
Тӗрӗслев ҫакна палӑртнӑ: вӑл 2024 ҫулхи пуш-ака уйӑхӗсенче тата чӳк уйӑхӗнче 2009 ҫулта тата 2025 ҫулта ҫуралнӑ хӗрӗсене хӗненӗ.
Тӗслӗхрен, пуш уйӑхӗн пуҫламӑшӗнче хӗрарӑм хӗрне ӗнсерен ҫапнӑ, унтан пуҫӗпе компьютер сӗтелӗ ҫине кӗрслеттернӗ. Кун хыҫҫӑн ачан сӑмсинчен юн кайнӑ. Кунсӑр пуҫне вӑл ун пуҫӗнчен фарфор турилккене ҫапса ҫӗмӗрнӗ. Тӗрӗслев вӑхӑтӗнче ытти факта та тупса палӑртнӑ.
Халӗ следстви пырать. Ӗҫе район прокуратури сӑнаса тӑрать.
Шупашкарти Ача-пӑча пултарулӑх ҫуртӗнче «Ача пахчинчи Акатуй» конкурса пӗтӗмлетнӗ. Кун пирки МАХри «Хыпар-Вести Чувашии» каналта пӗлтернӗ.
Уява шӑпӑрлансем чӑваш ҫи-пуҫне тӑхӑнса пынӑ. «Хамӑрӑн тӑван халӑха хисеплени, юратни, унӑн йӑли-йӗркине, эткерлӗхне, юрри-ташшине сума суни тӳрех палӑрать. Ҫакӑ та вӗсене пӗрлештерет ӗнтӗ», — пӗлтернӗ Татьяна Филимонова репортажӗнче.
Пултаруллӑ чӑваш ачисене саламлама Чӑваш Ен Элтеперӗ Олег Николаев тата Чӑваш Енӗн вӗрентӳ министрӗ Дмитрий Захаров та пырса ҫитнӗ.
Элтепер ачасене «малалла та ҫавӑн пекех хамӑр йӑласене пӗлсе, хамӑр пурнӑҫра усӑ курса хастаррӑн утма» сӗнсе каланӑ.
«Ача пахчинчи Акатуй» конкурсра Гран-прие Шупашкарти 7-мӗш ача тивӗҫнӗ.
+21.9 °C