Паян Шупашкарта велосипедпа пыракан ҫынна пӑши амантнӑ.
38 ҫулти арҫын «Роща» ҫул ҫаврӑмӗ тӗлӗнчи Никольски проспектпа пынӑ. Вӑрҫӑ ветеранӗсен госпиталӗнчен инҫех мар велосипед умне кӗтмен-туман ҫӗртен пӑши сиксе тухнӑ.
Тискер чӗрчун ҫине пырса кӗрес мар тесе арҫын руле пӑрса янӑ, анчах хӑй асфальт ҫине хыттӑн персе аннӑ.
Инкек кӑнтӑрла иртни 12 сехет те 45 минутра пулса иртнӗ.
Мӑйракаллӑ ҫак чӗрчун йӗрке хуралҫисемпе тухтӑрсем пырасса кӗтсе тӑман — ҫывӑхри вӑрмана тарса кӗнӗ.
Шар курнӑ велосипедиста васкавлӑ медицина пулӑшӑвӗ паракан пульницӑна илсе кайнӑ, ӑна унти тухтӑрсем пулӑшаҫҫӗ.
Чӑваш Енре пушара хирӗҫле режим пуҫланнӑ. Вӑл ака уйӑхӗн 10-мӗшӗнчен вӑя кӗнӗ.
Ку эрнере Правительство ҫуртӗнче инкеклӗ лару-тӑрӑва сирес тата пушар хӑрушсӑрлӑхӗпе тивӗҫтерес енӗпе ӗҫлекен комиссин ларӑвӗ иртнӗ. Унта та хӑрушсӑрлӑх ыйтӑвне сӳтсе явнӑ.
Ларура пушар сезонне епле хатӗрленни ҫинчен тӗплӗн каласа панӑ. Ларура тимле итлесе ларнӑ «Хыпар» журналисчӗ Роза Власова пӗлтернӗ тӑрӑх, «вӑрмансене сыхлама 156 маршрут йӗркеленӗ. Диспетчер пункчӗсенче дежурствӑсем йӗркеленӗ».
Апла пулин те Куславкка тӑрӑхӗнче 2000 тӑваткал метр ҫинче типӗ курӑк ҫуннӑ.
Ларӑва ертсе пынӑ республика Элтеперӗ Олег Николаев питех те асӑрхануллӑ пулмаллине палӑртса хӑварнӑ. Кунта ӗнтӗ кашни ҫын тимлӗ пулни паха.
Шупашкарта вӑйпитти арҫын ҫивитти айне пулса вилнӗ. Инкек ака уйӑхӗн 2-мӗшӗнче пулса иртнӗ.
РФ Следстви комитечӗн Чӑваш Енри управленийӗн пресс-службинче пӗлтернӗ тӑрӑх, пӑтӑрмах тӗлӗшпе РФ Пуҫиле кодексӗн 216-мӗш статйин 2-мӗш пайӗпе пуҫиле ӗҫ пуҫарнӑ. Ку статьяпа строительство ӗҫӗ пынӑ чухне хӑрушсӑрлӑх правилине пӑснӑран астумасӑр ҫын вилсен явап тыттараҫҫӗ.
Шупашкарти суту-илӳ комплексӗсенчен пӗрин склачӗн ҫивиттийӗ йӑтӑнса аннӑ пулнӑ. Ҫавна тирпейленӗ чухнӗ тӑрса юлнӑ конструкци персе аннӑ, вӑл рабочисенчен пӗрне аяла тунӑ. Шар курнӑ арҫын инкек вырӑнӗнчех куҫне ӗмӗрлӗхе хупнӑ.
Халӗ тӗпчневҫӗсем ӗҫе малалла тӗпчеҫҫӗ.
Шупашкар районӗнчи Кивпулӑх ялӗнче пысӑк инкек пулса иртнӗ. Пушар 52 ҫулти арҫыннӑн килсе сиксе тухнӑ. Унӑн пӳрчӗ, мӗнпур хуралти хыпса илнӗ. Пушар 300 тӑваткал метр лаптӑк ҫинче алхаснӑ.
Инкеклӗ ӗҫсен министерствин Чӑваш Енри управленийӗн пресс-службинче пӗлтернӗ тӑрӑх, пушара сӳнтерме 16 специалист тата тӑватӑ единица техника пырса ҫитнӗ. Пушара сӳнтерме виҫӗ сехет ытла иртсе кайнӑ. Ҫӑлавҫӑсем тӑрӑшнипе пурӑнмалли пӳрте ҫӑлса хӑварма май килнӗ.
Иртнӗ талӑкра пирӗн республикӑра икӗ хутчен пушар алхаснӑ. 2026 ҫул пуҫланнӑранпа 287 хутчен вут-ҫулӑм ҫынсене шар кӑтартнӑ. Вӑрӑран юлать, пушартан юлмасть тесе ваттисем мӗн ӗлӗкрен тӗрӗсех каланӑ.
Красноармейски районӗнчи Кивьялта 85 ҫулти кинемей пушарта вилнӗ. Пӑтӑрмах пирки Чӑваш Енӗн Инкеклӗ ӗҫсен министерстви МАХри хӑйӗн каналӗнче пӗлтернӗ.
Пушар ҫурҫӗр хыҫҫӑн тухнӑ. Вут-ҫулӑм 110 тӑваткал ытла метр лаптӑк ҫинче алхаснӑ. Шел пулин те, ватӑ ҫын пӳртрен тухайман — инкекре унӑн пурнӑҫӗ татӑлнӑ.
Пушара сӳнтерме Инкеклӗ ӗҫсен министерствин сакӑр ӗҫченӗ тата ятарлӑ икӗ техника вырӑна пырса ҫитнӗ. Ҫӑлавҫӑсем газ баллонне илсе тухса ӗлкӗрнӗ. Вӑл сирпӗннӗ пулсан инкек тата ытларах шар кӑтартма пултаратчӗ тесе пӗлтереҫҫӗ ҫӑлавҫӑсем.
Пушара пӗтӗмпех сӳнтерме 1 сехете яхӑн вӑхӑт иртсе кайнӑ.
Кинемее, шел пулин те, ҫӑлма май килмен. Халӗ унӑн ҫывӑх ҫыннине пысӑкран та пысӑк хуйхӑ пырса ҫапнӑ.
Шупашкар муниципалитет округне кӗрекен Тутаркасси тӗлӗнче йӗрке хуралҫисем пӗр водителе хӑваланӑ. Ҫул-йӗр хӑрушсӑрлӑхӗн инспекторӗсем «Лада Ларгус» ҫӑмӑл машинӑна асӑрханӑ. Пакунлисене машина ҫулпа епле пыни сисчӗвлентернӗ. Вӗсем машинӑна чарас тенӗ те водитель йӗрке хуралҫисем ыйтнине пӑхӑнман. Вӑл вӗсенчен тарса пытанма шухӑш тытнӑ.
Пакунлисенчен тарма хӑтланса ҫӑмӑл машина хирӗҫ килекен ҫул ҫине те тухса кайнӑ, светофорӑн хӗрлӗ ҫутине те пӑхӑнса тӑман.
Пакунлисем таркӑн-водителе пӗрех тытса чарнӑ. Вӑл ӳсӗр пулнӑ, салонта водительсӗр пуҫне пӗрле эрех ӗҫнӗ виҫӗ тусӗ ларса пынӑ. Кунсӑр пуҫне тата
унччен судпа айӑпланнӑ 45 ҫулти арҫыннӑн водитель правине унччен виҫӗ хутчен туртса илнӗ иккен.
Чӑваш Енре пурӑнакан пӗр арҫын кӗпе ҫумалли машинӑна сӳнтерме хӑтланса шар курнӑ.
Инкек Шупашкарти Менжинский урамӗнче нарӑс уйӑхӗн 24-мӗшӗнче пулса иртнӗ. Унти ванна пӳлӗмӗнче кӗпе ҫумалли машина хыпса илнӗ.
Пушарпа кӗрешекенсем пырса ҫитнӗ ҫӗре 20 ҫулти кил хуҫи пушара сӳнтерме хӑтланса тӗтӗмпе чыхланса кайнӑ. Ӑна пульницӑна ӑсатнӑ.
Етӗрне районӗнчи Засурье посёлокӗнче тракторпа грузовик ҫунса кайнӑ.
Инкек нарӑс уйӑхӗн 21-мӗшӗнче унти кану базинче пулса иртнӗ.
Пушар гараж боксӗнче тухнӑ. Унта урапаллӑ трактор тата грузовик пулнӑ. Вӗсене урама илсе тухса ӗлкӗреймен.
Пушар 150 тӑваткал метр лаптӑк ҫинче алхаснӑ. Ӑна сӳнтерме икӗ техника пырса ҫитнӗ.
Шупашкарта пӗр кунта икӗ ачана ҫапса кайнӑ. Инкек нарӑс уйӑхӗн 9-мӗшӗнче пулса иртнӗ.
Президент бульварӗнчи инкекре 16 ҫулти хӗрача шар курнӑ. Вӑл чӗркуҫҫине ыраттарнӑ тата пуҫ мимине чӗтретнӗ. «Kia Rio» водителӗ урах пулнӑ.
Хусанкай урамӗнчи инкекре «Лада гранта» 9 ҫулти арҫын ача ҫине пырса кӗнӗ. Ача сулахай урине ыраттарнӑ. Ҫӑмӑл машина водителӗ урах пулнӑ.
Шупашкарта ҫӑмӑл машина тротуар ҫинчи рабочи ҫине пырса кӗнӗ. М950УТ 21 номерӗллӗ «Туарег» хуҫи автомобиле инкек вырӑнӗнче лартса хӑварса вырӑнтан тарса ҫухалнӑ. Инкек нарӑс уйӑхӗн 7-мӗшӗнче Шупашкарти Воробьев композиторсен урамӗнче пулса иртнӗ.
Рабочи картлашка ҫинчи юра тасатнӑ, ҫӑмӑл машина ун ҫине пырса кӗнӗ. Темиҫе сехетрен водителе тытса чарнӑ. 48 ҫулти арҫын тухтӑр патӗнче тӗрӗсленме килӗшмен. Аманнӑ 47 ҫулти арҫынна вара тухтӑрсем тӗрӗсленӗ хыҫҫӑн амбулатори мелӗпе (килте) сипленме сӗннӗ.
+13.0 °C