Чӑваш Енре «Чӗнтӗрлӗ чаршав» республика конкурсне пӗтӗмлетнӗ. Кун пирки Телеграмри» Пуринчен малтан» каналта пӗлтернӗ.
«Чи лайӑх сценографи» номинацире «Сашка» спектакле илемлетнӗ Булат Ибрагимова палӑртнӑ (Чӑваш патшалӑх драма эксперимент театрӗ).
«Музыка енчен чи лайӑх илемлетнӗ спектакль» номинацире Чӑваш патшалӑх пукане театрӗн ӗҫченӗ Татьяна Алешина ҫӗнтернӗ.
Вырӑс драма театрӗнче тӑрӑшакан Вадим Валов «Иккӗмӗш планри чи лайӑх роль» номинацире палӑрнӑ.
«Ачасем валли чи лайӑх спектакль» – «В поисках Большой Медведицы» (К.В.Иванов ячӗллӗ Чӑваш патшалӑх академи драма театрӗ).
«Чи лайӑх арҫын ролӗ» номинаци ҫӗнтерӳҫи - Ҫеҫпӗл Мишши ячӗллӗ ҫамрӑксен театрӗнчи Николай Миронов. Вӑл «Мцыри» спектакльте тӗп роле вылянӑ.
Екатерина Апполонова (Вырӑс драма театрӗ) «Чи лайӑх хӗрарӑм ролӗ» номинацире палӑрнӑ.
«Ҫулталӑкри чи лайӑх спектакль» – «Мцыри» постановка. Ӑна Ҫеҫпӗл Мишши ячӗллӗ ҫамрӑксен театрӗн сцени ҫинче лартнӑ.
Мускавра «Раҫҫей регионӗсем: ҫирӗп аталану малашлӑхӗ» конференци иртнӗ. Унта ертӳҫӗсен хушшинче иртнӗ конкурса пӗтӗмлетнӗ.
Чӑваш Ен валли кӑмӑллӑ хыпар пур: «Паха тӗрӗ» фабрикӑн тӗп директорӗ Наталия Посынкина «Раҫҫейӗн тава тивӗҫлӗ директорӗ» ята тивӗҫнӗ.
Чӑваш Ен Правительствин премьер-министрӗ Дмитрий Краснов пирӗн республика пултаруллӑ хӗрарӑм-ертӳҫӗсемпе мухтаннине палӑртнӑ.
«Пуринчен малтан» телеграм-канал пӗлтернӗ тӑрӑх, чӑваш хӗрӗ «Науруз Гузеле» конкурса хутшӑннӑ
Вӑл – илем тата пултарулӑх конкурсӗ. Унта тӗрӗк халӑхӗсен хӗрӗсем хутшӑнаҫҫӗ.
Кӑҫал конкурсра 10 чиперкке пулнӑ. Пирӗн чӑваш хӗрӗ Лика Кашкарова «Ачашлӑх мисӗ» ята тивӗҫнӗ. Тӗп коронӑна таджик хӗрӗ Хуснура Таирова ҫӗнсе илнӗ.
Республикӑра кашни ҫулах «Ҫулталӑкри воспитателе» суйлаҫҫӗ. Шупашкарти 200-мӗш ача пахчинче вӗсем хӑйсен ӑсталӑхне кӑтартнӑ. Тепӗр кунхине конкурс 7-мӗш ача пахчинче пулнӑ.
Жюри вӗсен профессионал пахалӑхне кӑна мар, аудитори умӗнче тухса калаҫма пӗлнине те хакланӑ. 22 воспитательтен чи лайӑххисене суйлама ансат пулман.
Пилӗк лауреата палӑртнӑ. Вӗсем – Ҫӗнӗ Шупашкарти Наталия Андреева, Канаш округӗнчи Марина Васильева, Шупашкар округӗнчи Мария Емельянова, Шупашкарти Дарья Жигарь, Ҫӗрпӳ округӗнчи Зинаида Павлова.
Республикӑра «Ветеринари чиперкки» конкурс иртнӗ. Унта 17 ветеринар хутшӑннӑ. Кашниех видео- тата фотохӑтлавпа паллаштарнӑ, хӑйсен ӗҫӗ пирки каласа кӑтартнӑ, ыйтусене хуравланӑ.
Ҫӗнтерӳҫӗ ятне Екатерина Чучулина тивӗҫнӗ. Вӑл Шупашкарти ветеринари станцинче ӗҫлет. «Ветеринари – чун ӗҫӗ», – тет вӑл.
Кунсӑр пуҫне призерсене 8 номинацире палӑртнӑ.
Шупашкарти Трактор тӑвакансен культура керменӗнче пуш уйӑхӗн 22-мӗшӗнче Пӗтӗм Раҫҫейри хор фестивалӗн регионти тапхӑрӗ иртӗ.
Унта Элӗк, Патӑрьел, Вӑрнар, Йӗпреҫ, Канаш, Куславкка, Комсомольски, Красноармейски, Хӗрлӗ Чутай, Сӗнтӗрвӑрри, Муркаш, Ҫӗрпӳ, Шупашкар, Ҫӗмӗрле, Етӗрне, Елчӗк тӑрӑхӗсенчи, Улатӑр, Канаш, Ҫӗнӗ Шупашкар, Шупашкар тата Ҫӗмӗрле хулисенчи 59 вокалпа хор коллективе хутшӑнӗ.
Ижевск хулинче «Атӑлҫи федераци округӗн мисӗ тата мисиссӗ» илем конкурсӗ вӗҫленнӗ. Унта Чӑваш Енри, Удмуртири, Пушкӑртстанри тата Тутарстанри 99 чиперкке тупӑшнӑ.
Пирӗн ентеш Алина Денисова «Атӑлҫи федераци округӗн мисиссӗ» ята ҫӗнсе илнӗ. Вӑл Канаш округӗнче ҫуралса ӳснӗ, халь Ижевск хулинче ӗҫлесе пурӑнать. Вӑл - усламҫӑ. Ача ҫурчӗсене, йывӑрлӑха лекнӗ хӗрарӑмсене, килсӗр чӗрчунсене пулӑшать. Халӗ Мускаври конкурса хутшӑнма хатӗрленет, пурӑна киле тӗнче шайне тухма ӗмӗтленет.
«Пуринчен малтан» телеграм-канал пӗлтернӗ тӑрӑх, Санкт-Петербургра «Тӗп район миссисӗ» конкурс пуҫланнӑ. Унта пӗтӗмпе 12 хӗрарӑм хутшӑнать.
Ҫак йышран виҫҫӗшӗ — чӑваш: Татьяна Байбарина, Анастасия Букина тата Ирина Кондакова. Вӗсем ыттисемпе пӗрле коронӑшӑн кӗрешӗҫ. Чиперккесем тӗрлӗ тупӑшура вӑй виҫӗҫ. Унсӑр пуҫне конкурсҫӑсем ӑсталӑх класӗсем ирттереҫҫӗ. Вӗсенчен пӗрне Анастасия Степанова (сӑн ӳкерчӗкре хӗрлӗ хӑю ҫакнӑ пике) йӗркеленӗ. Вӑл – чӑваш, илем конкурсӗсене хутшӑнать.
Шкулчченхи вӗренӳ организацийӗсен воспитателӗсене «Тӑван чӗлхе управҫи» конкурса хутшӑнма йыхравлаҫҫӗ. Ӑна Чӑваш Республикин Вӗренӳ институчӗ ирттерет.
Конкурса хамӑр республикӑри ача пахчисенче тӑрӑшакансем ҫеҫ мар, чӑвашсем йышла пурӑнакан регионсенчисем те хуишӑнса хӑйсен пултарулӑхне кӑтартса пама пултарӗҫ. Воспитательсен ӑмӑртӑвӗ ҫу уйӑхӗн 16-мӗшӗччен пырӗ.
«Ҫамрӑксен хаҫачӗ» йӗркелесе янӑ ырӑ йӑлана малалла тӑсать: «Поэзи баттлӗ» конкурс кӑҫал та иртӗ. Ӑна кӑларӑм кун ҫути курма тытӑннӑранпа 100 ҫул тултарнине халаллаҫҫӗ. Поэзи тупӑшӑвӗ пуш уйӑхӗн 28-мӗшӗнче, эрнекун, Шупашкарти Пичет ҫуртӗнче (И.Яковлев проспекчӗ, 13-мӗш ҫурт) пулӗ.
Хаҫат вулаканӗсене, чӑваш поэзине юратакансене унта хутшӑнма чӗнеҫҫӗ. Заявкӑсене пуш уйӑхӗн 26-мӗшӗччен йышӑнаҫҫӗ. Конкурса хутшӑнас тесен чӑвашла 5 сӑвӑран кая мар вӗренмелле. Хӑвӑр ҫырнӑ сӑвӑсене те калама юрать.
Жюри членӗсем ӑсталӑха, хайлава илемлӗ вуланине, хӑйне евӗрлӗхе хаклӗҫ. Конкурса хутшӑнакансене сертификатпа хавхалантараҫҫӗ. Ҫӗнтерӳҫе вара парнепе чыслаҫҫӗ. Кунсӑр пуҫне ятарлӑ парне выляттараҫҫӗ. Заявкӑсене ҫак номерпе йышӑнаҫҫӗ: 8-967-470-13-38.
Сӑн ӳкерчӗкре: пӗлтӗрхи конкурс ҫӗнтерӳҫи — Элӗк округӗнчи Чӑваш Сурӑм шкулӗнче вӗренекен Семен Семенов.
+10.3 °C