Чӑваш тӗррин музейӗнче «Тутарсем патӗнче – хӑнара» курав ӗҫлеме пуҫланӑ. Унта тутар культурипе, йӑли-йӗркипе ҫывӑхрах паллашма пулать.
Экспозицисене аякран, Тутарстанри Елабугӑри музей-заповедникран, илсе килнӗ. Тӗслӗхрен, музейра тутарсен наци тумӗсене курма пулать. Унта коранӑн хӑйне евӗр копийӗ те пур. Ӑна кушак ҫурин ҫӑмӗнчен хатӗрленӗ киҫтӗкпе ӳкернӗ.
Курава 2026 ҫулхи кӑрлач уйӑхӗн 31-мӗшӗччен ҫитсе курма май пур. Музея Пушкин карттипе те кӗртеҫҫӗ.
Шупашкарта пурӑнакан Валентина Кириллова илеме темре те курма пӗлет. Кӑҫал вӑл тӗрлӗ формӑллӑ кишӗре пухса пынӑ. Ҫавсенчен Валентина Степановна Шупашкар хулинчи халӑхӑн социаллӑ ыйтӑвӗсене тивӗҫтерекен комплекслӑ центрта курав йӗркеленӗ.
Асӑннӑ учреждение тава тивӗҫлӗ канури хӗрарӑм тӑванӗн ывӑлне Игоре илсе пырать. Ҫамрӑк арҫын унти Тренировка хваттерне ҫӳрет.
«Унччен эпӗ хосписра медсестрара ӗҫленӗ. Тӗрлӗ мероприяти валли унта та куравсем йӗркелеттӗм», — каласа кӑтартнӑ илеме темре те курма пӗлекен хӗрарӑм центрӑн пресс-службине.
Нумаях пулмасть Чӑваш Енӗн Наци вулавӑшӗнче «Ачасен чи ҫывӑх тусӗ» ятлӑ куҫса ҫӳрекен куравне йркеленӗ. Экспозицие Николай Ытарай ача-пӑча ҫыравҫин пурнӑҫӗпе тата пултарулахӗпе паллаштарас тӗллевпе йӗркеленӗ.
Мероприяти вӑхӑтӗнче тухса калаҫакансем хушшинче Чӑваш патшалӑх гуманитари ӑслӑлӑхӗсен институчӗн ӑслӑлӑх ӗҫченӗ Надежда Ефремова-Ильина та пулнӑ. Вӑл Н.В. Васильев (Ытарай) пурнӑҫӗпе пултарулӑхӗ ҫинчен каласа панӑ. Николай Ытарай пултаруллӑ ача-пӑча ҫыравҫи кӑна мар, тӑван халӑх сӑмахлӑхне ырми-канми пуҫтаракан пулни, Ытарай Тӗпчев институчӗн штатра тӑман ӗҫченӗ пулнӑ май комплекслӑ фольклор экспедицийӗсене тулай чӑвашӗсем патне тухса ҫӳрени ҫинчен каласа кӑтартнӑ. Кун пирки институтра пӗлтернӗ.
Авӑн уйӑхӗн 17-мӗшӗнче, 18 сехетре, Чӗмпӗрти ӑста Сергей Кольцов Шупашкарта вырнаҫнӑ Раҫҫейӗн тӗрленӗ карттинче экскурси ирттерӗ.
Экскурси тӳлевсӗр пулӗ-ха, анчах музея кӗме тӳлемелле: аслисен — 300 тенкӗ, шкул ачисен, студентсен тата пенсионерсен – 150 тенкӗ.
Сергей «Раҫҫейӗн тӗрленӗ картти» проекта хутшӑннӑ пӗртен-пӗр арҫын. Чӗмпӗр облаҫӗн карттине вӑл хӑй тӗрленӗ.
Николай Ытарай (1925-2005) ача-пӑча ҫыравҫи, халӑх фольклорне пухакан, иллюстратор ҫуралнӑранпа 100 ҫул ҫитнӗ.
Ҫавна май Чӑваш Республикин Наци вулавӑшӗнче авӑн уйӑхӗн 11-мӗшӗнче 12 сехет те 30 минутра «Ачасен чи ҫывӑх тусӗ» курав уҫӑлӗ.
Унта ҫыравҫӑн мӑшӑрӗ Елена Васильева та хутшӑнӗ.
Николай Ытарай ачасем ҫинчен тата ачасем валли ҫырнӑ. Пурӑннӑ чухне 30 ытла кӗнеке кӑларнӑ.
Аван уйӑхӗн 6-мӗшӗнче чӑвашсене ҫутта кӑларнӑ Иван Яковлев ҫуралса ӳснӗ тӑрӑхра, Тутарстанри Теччӗ районӗнчи Кӑнна Кушки ялӗнче, Чӳклеме ирттерӗҫ. Кун пирки Константин Малышев халӑх тетелӗнчи страницинче пӗлтернӗ.
Хӑнасене 11 сехетре кӗтсе илӗҫ. Концерта халӑх ташшин «Сувар» ансамблӗ, халӑх ташшин «Суварята» ача-пӑча ансамблӗ хутшӑнӗҫ
Ҫавӑн пекех ЧР культурӑн тава тивӗҫлӗ ӗҫченне, чӑваш эстрада юрӑҫине Алексей Шадрикова чӗннӗ.
Кунсӑр пуҫне «Кӗр кӗреки», «Кӗр мӑнтӑрӗ» куравсем пулӗҫ.
Чӑваш наци библиотекин «Серебряный век» залӗнче ҫак кунсенче ҫӗнӗ курав уҫӑлчӗ. Ун авторӗ – Раҫҫӗй Федерацийӗн пӗтӗмӗшле пӗлӳ тава тивӗҫлӗ ӗҫченӗ, Пушкӑрт Республикин тава тивӗҫлӗ вӗрентекенӗ Анатолий Яковлев. Курава вилӗмсӗр «Нарспи» поэмӑн авторӗ К.В. Иванов ҫуралнӑранпа 135 ҫул ҫитнине халалланӑ.
– Картинӑсен авторӗ нумай ҫул Ӗпхӳри педагогика институчӗн художествопа графика факультетӗнче вӑй хунӑ, педагогика наукисен кандидачӗ. Маларах вӑл Мияки районӗнчи Тимеш ялӗнчи вӑтам шкулта ӗҫленӗ. Кунта вӑл изостуди йӗркеленӗ, ачасене ӳкерме тата илемлӗх вӑрттӑнлӑхӗсене ӑнланса илме вӗрентнӗ, – терӗ курава уҫнӑ май Г. Иванов-Орков искусствовед. – Паянхи экспозицире эреш нумай. Ҫав эрешсем «Нарспи» поэмӑри геройсене, чӑвашсен паллӑ ҫыннисене (И.Я. Яковлев, А.Г. Николаев, К.В. Иванов, Ҫеҫпӗл Мишши), вӑрҫӑ ветеранӗсене, Пушкӑртстанри паллӑ чӑвашсене пӗрлештерсе тӑраҫҫӗ. Автор хальхи вӑхӑтра ӳнер искусствинче сайра тӗл пулакан ҫапнӑ эреш (чеканка) меслетне чӗртсе тӑрас текенсемпе пӗр шухӑшлӑ пулни сисӗнет.
Шупашкарта пуҫласа алӑк куравӗ иртӗ. Мероприяти икӗ куна пырӗ. Вӑл авӑн уйӑхӗн 17–18-мӗшӗсенче пулӗ.
Курав-форума пӗтӗм Раҫҫей шайӗнче йӗркелеме палӑртнӑ. Унта алӑк туса кӑларакансем, ҫав енӗпе тӑрӑшакан дизайнерсем пуҫтарӑнӗҫ.
«Двери России – 2025» (чӑв. Раҫҫей алӑкӗсем — 2025) форум-курав «Шупашкар-Аренӑра» иртӗ.
Паянтан Чӑваш биеннали юлашки эрни пуҫланнӑ. Ҫавна май расписание улӑштарма йышӑннӑ.
Паян, ҫурла уйӑхӗн 4-мӗшӗнче, Чӑваш академи драма театрӗн тата «Сверхновый» культура центрӗн алӑкӗсем куракансем валли уҫӑ пулӗҫ.
«Куравсемпе паллашма сире меллӗрех пултӑр тесе биеннален юлашки эрнинче хушма ӗҫ кунӗ туса хутӑмӑр», — пӗлтернӗ мероприятие йӗркелекенсем.
Куравсемпе медиатор тӳлевсӗр паллаштарӗ. Анчах малтан регистрациленмелле. Театра кӗме билет туянмалла. Унӑн хакӗ — 250 тенкӗ.
Иркутск облаҫӗнче «Байкал ҫинчи этноподиум. Модӑллӑ Ангара» фестиваль иртнӗ.
Унта чӑваш костюмӗсен «Атӑлпирӗн» коллекцине хӑтланӑ. Ӑна Шупашкарти «Паха тӗрӗ» фабрика тата Иркутскри ӑста Татьяна Бочкарева хатӗрленӗ. Уйрӑмах пуҫа тӑхӑнмалли хатӗрсене тимлӗх уйӑрнӑ. Ӗлӗкхи сурпансене Иркутск облаҫӗнчи Надежда Фидикова ҫӗнетнӗ.
-0.7 °C