Ҫӗрпӳ районӗнче вырнаҫнӑ алӑк фабрикинче пушар тухнӑ. Инкек шӑматкун, кӑрлач уйӑхӗн 24-мӗшӗнче, пулса иртнӗ.
Молодежнӑй поселокри фабрикӑра пӑчкӑ кӗрпи бункерӗ ҫунма пуҫланӑ.
Асӑннӑ поселокра «Estet» компанийӗн производстви вырнаҫнӑ.
Кӑрлач уйӑхӗн 21-мӗшӗнче Лапсарта лавкка ҫуннӑ.
Суту-илӳ точки унти Совхоз урамӗнчи 6-мӗш ҫуртра вырнаҫнӑ. Вӑл ҫурт — ҫынсем пурӑнмалли нумай хваттерлӗ ҫурт.
Электричество пӑралукӗнче кӗске замыкани пулса иртнӗрен мачча ҫинчи светильник сиенленнӗ. Пушара лавккара ӗҫлекенсем хӑйсемех сӳнтерсе ӗлкӗрнӗ. Никам та шар курман.
Паян Шупашкарта автобус ҫунса кайнӑ. Инкек 16 сехетре «Энергозапчасть» чарӑнура пулнӑ. Шупашкартан Ҫӗнӗ Шупашкара 101-мӗш маршрутпа ҫӳрекен автобус ҫунма пуҫланӑ. Пушарнӑйсем киличчен ҫулӑм хӑвӑрт сарӑлма ӗлкӗрнӗ: салона, транспорта йӑлтах ярса илнӗ.
16:20 сехетре пушара сӳнтернӗ. Телее, никам та шар курман
Паян ирхи 3 сехетре Муркаш округӗнчи заправкӑра машина ҫунса кайнӑ. Ку Ивановка ялӗ патӗнче пулнӑ.
Вырӑна ҫитнӗ ҫӑлавҫӑсем ҫунакан «Рендж Ровер» иномаркӑна часах сӳнтернӗ, ҫулӑма юнашарти бензоколонкӑсем ҫине куҫма паман.
Шел те, инкекре машинӑн 42 ҫулти хуҫи шар курнӑ. Вӑл тӗтӗм-сӗрӗмпе наркӑмӑшланнӑ. Ӑна медпулӑшу панӑ.
Паян ҫӗрле, ҫур ҫӗр ҫитеспе, Ҫӗнӗ Лапсарти кайӑк-кӗшӗк фабрикинче пушар алхасма пуҫланӑ.
Пушар самай сарӑлнӑ, 2100 тӑваткал метр лаптӑк ҫинче алхаснӑ. Ҫулӑма сӳнтерес ҫӗре 69 ҫӑлавҫӑ, 20 техника хутшӑннӑ.
Инкеклӗ лару-тӑру министерстви малтанлӑха пӗлтернӗ тӑрӑх, предприяти ӗҫченӗсем шар курман.
Канаш хулинче пулнӑ пушарта ватӑ арҫынпа хӗрарӑм, упӑшкипе арӑмӗ, пурнӑҫран уйрӑлнӑ.
Инкек ӗнер 20:30 сехетре Куйбышев урамӗнчи 19-мӗш ҫуртри 1-мӗш хутри хваттерте пулнӑ. Подъездра тӗтӗм сарӑлсан кӳршисем ҫӑлавҫӑсене чӗннӗ.
Ҫӑлавҫӑсем хваттере кӗрес тесе алӑка ҫӗмӗрнӗ. Унта вӗсем 71 ҫулти арҫынпа 70 ҫулти хӗрарӑмӑн виллине тупнӑ. Кухньӑра алхасакан ҫулӑма 5 минутран сӳнтернӗ.
Малтанлӑха пӗлтернӗ тӑрӑх, пушар пирус асӑрханмасӑр туртнӑран тухнӑ.
Паян Шупашкарта «Овас» суту-илӳ ҫуртӗнче пушар пулнӑ. Унта пӗрремӗш хутра вырнаҫнӑ сӗтел-пукан салонӗ ҫунма тытӑннӑ.
Пушар ирхи 9 сехетре тухнӑ. Ултӑ ҫын урама хӑйсем тӗллӗн тухайман, вӗсене ҫӑлавҫӑсем пулӑшнӑ.
Ҫулӑм 200 тӑваткал метр лаптӑк ҫинче алхаснӑ. Пушара 14 техника, 50 ҫӑлавҫӑ сӳнтернӗ. Телее, никам та шар курман.
Ӗнер, кӑрлачӑн 3-мӗшӗнче, Шӑмӑршӑ округӗнчи Баскак ялӗнче пушар пулнӑ. Инкекре 1 ҫулти хӗрачан пурнӑҫӗ татӑлнӑ.
Пушар 42 ҫулти хӗрарӑмӑн ҫуртӗнче тухнӑ. Ҫав вӑхӑтра вӑл картишре ӗҫленӗ, упӑшкипе аслӑ ачисем вара килте пулман. Пӳртре 1 ҫулти хӗрача пӗччен юлнӑ. Ҫулӑм тухнине курсан амӑшӗ хӗрне ҫӑлма чупса кӗнӗ, ӑна урама йӑтса тухнӑ. Вӗсене тухтӑрсем пульницӑна илсе ҫитернӗ. Анчах, шел те, пӗчӗк хӗрача паян сывлама пӑрахнӑ.
Ӗнер, раштав уйӑхӗн 28-мӗшӗнче, Канаш округӗнчи Йӑлмачча ялӗнче ҫурт ҫунса кайнӑ. Телее, 75 ҫулти кил хуҫи хӗрарӑмӗ урама тухса ӗлкӗрнӗ.
Малтанлӑха пӗлтернӗ тӑрӑх, ҫулӑм юсавсӑр холодильнике пула тухнӑ. Вӑл шалти отделкӑна, хушма ҫурта хӑвӑртах ярса илнӗ.
Ҫӑлавҫӑсем пушара 2 сехет сӳнтернӗ. Юрать-ха, вӗсем ҫулӑма хуралтӑ таврашӗ, кӳршисен ҫурчӗсем ҫине куҫма паман.
Куславкка округӗнче пушарта 78 ҫулти арҫын ҫунса вилнӗ. Инкек ӗнер, раштавӑн 11-мӗшӗнче, Пилешкасси ялӗнче пулнӑ.
Ҫулӑм ҫурт ҫинчен куҫса хуралтӑ таврашӗсем ҫине те лекнӗ. Пушара 10 ҫӑлавҫӑ тата 4 техника сӳнтернӗ. Ҫулӑм 73 тӑваткал метр лаптӑк ҫинче алхаснӑ.
Пушара сӳнтерсен 78 ҫулти арҫын виллине тупнӑ.
+25.2 °C