Чӑваш Енре тӗрмере ларнӑ чухне Хӳтӗлев министерствипе контракт ҫырнӑ 6 ҫын тарнӑ. Хальлӗхе вӗсене тытса чарайман.
Ӗҫ-пуҫ ҫапларах пулса иртнӗ: вӗсене «Томск – Адлер» пуйӑспа ятарлӑ вакунсенче илсе кайнӑ. Пуйӑс Йӗпреҫре икӗ минутлӑха чарӑнсан хайхискерсем чӳречене ҫӗмӗрсе тарнӑ-мӗн. Пиллӗкӗшӗ тапочкӑпа пулнӑ, тепри — кроссовкӑпа пулнӑ. Пӗр арҫынни вакунран сикнӗ чухне урине амантнӑ, ҫавна май халӗ уксахлать.
Айӑпланнӑ ҫынсем тарнине машинист курнӑ, вӑл кун пирки тӳрех ятарлӑ службӑсене пӗлтернӗ. Ҫакӑ паллӑ: арҫынсем вӑрланӑшӑн, наркотикшӑн тата ясар шухӑшсене пурнӑҫланӑшӑн тӗрмене лекнӗ. Хальхи вӑхӑтра йӗрке хуралҫисем кӳршӗ ял-салара шыраҫҫӗ.
Вӑрнар районӗнчи Пӑртас ялӗнчи нумай хваттерлӗ ҫурта йӗркеллӗ тытса тӑман. Унӑн ҫивиттийӗнчен шыв кайса пурӑннӑ, нӳхрепе вара шыв тулнӑ.
Пӑтӑрмах пирки ҫав ҫуртра пурӑнакан хӗрарӑм Раҫҫейӗн Следстви комитечӗн Чӑваш Енри управленийӗн пуҫлӑхне Александр Полтинина пӗлтернӗ. Вӑл Пӑртас ялӗнчи Шкул тӑкӑрлакӗнчи 6-мӗш ҫурт адреспа вырнаҫнӑ ҫурт никӗсӗ йӑтӑнса та анма, инженери коммуникацийӗсем юрӑхсӑра тухма пултараҫҫӗ тесе пӑшӑрханнӑ.
Ҫурта йӗркеллӗ тытса тӑманран Александр Полтинин ӗҫтешӗсене РФ Пуҫиле кодексӗн 293-мӗш статйипе ӗҫ пуҫарма хушнӑ.
Шупашкарта Африкӑран пирӗн хулари аслӑ шкулсенчен пӗрне вӗренме килнӗ хӗр тавар вӑрланӑ.
Пӑтӑрмах иртнӗ уйӑх вӗҫӗнче Энгельс урамӗнчи пысӑк пӗр лавккара пулса иртнӗ. Сентре ҫинчен косметика, гигиена хатӗрӗсем, соуссем, кофе, пылак апат-ҫимӗс тата ҫӗр ҫырли ҫухалнӑ. Ку тавара укҫа ҫине куҫарсан 17 пинрен иртсе каять иккен.
Йӗрке хуралҫисем видеокамера пӑхнӑ та касса патӗнчен Африкӑран килнӗ ҫын сӑнлӗ хӗр иртсе кайнине асӑрханӑ. Кӗҫех вӗсем Мароккӑран Шупашкара вӗренме килнӗ 18 ҫулти студенткӑна тытса чарнӑ. Чӑваш Ене вӗренме вӑл 2025 ҫул вӗҫӗнче килсе ҫитнӗ иккен, анчах кӑштахран пӑтӑрмаха ҫакланнӑ.
Тӳрӗ ҫултан пӑрӑннӑ студентка тӗлӗшпе тӗпчевҫӗсем РФ Пуҫиле кодексӑн 158-меш статйипе пуҫиле ӗҫ пуҫарнӑ.
Шупашкар округӗнче 17 султи каччӑ ҫул ҫинче выртакан ҫын урлӑ машинӑпа каҫса кайнӑ.
Ку тискерле тӗслӗх Янӑш ялӗнче ака уйӑхӗн 5-мӗшӗнче ирхи 5 сехетре пулнӑ. Малтанлӑха палӑртнӑ тӑрӑх. Каччӑ «Шевроле Нива» машинӑпа ялта пынӑ чухне ҫул ҫинче выртакан 54 ҫулти арҫынна таптаса кайнӑ. Кун хыҫҫӑн вӑл хӑраса ӳкнӗ те вырӑнтан тарнӑ.
Арҫын васкавлӑ медпулӑшу киличчен вилнӗ. Руль умӗнче пулнӑ каччӑна часах тупса палӑртнӑ. Вӑл – Шупашкарти колледжра 2-мӗш курсра вӗренекен студент. Амӑшӗ каланӑ тӑрӑх, машина уҫҫине илме вӑл хӑй ирӗк панӑ.
Халӗ тӗрлӗ экспертиза ирттереҫҫӗ, кӳнтеленсенчен ыйтса пӗлеҫҫӗ.
Муркаш районӗнчи Мӑн Сӗнтӗр ялӗнче пурӑнакан пӗр арҫыннӑн ҫӗрне туртса илесшӗн.
Вырӑнти прокуратура тӗрӗслев ирттернӗ чухне 2025 ҫулти раштав уйӑхӗнче Мӑн Сӗнтӗр арҫыннине нимле суту-илӳ ирттермесӗрех пахча валли тесе ҫӗр уйӑрса пани палӑрнӑ. Кӑштахран арҫын ку ҫӗре «уйрӑм хушма хуҫалӑх валли» тесе улӑштарнӑ, кӗҫех ӑна сутасси пирки тӗнче тетелӗнче пӗлтерӳ вырнаҫтарнӑ.
Саккун вара апла хӑтланма ирӗк памасть иккен. Ку вӑл ҫӗрпе саккуна пӑсса усӑ курни пулать.
Ҫӗре ятарлӑ йӗркене пӑхӑнмасӑр ҫынна пани саккуна пӑсни пулать, ун пек суту-илӳ килӗшӗвне пӑрахӑҫламалла, ҫӗре унӑн ҫӗнӗ хуҫинчен туртса илмелле тесе прокуратура суда тавӑҫпа тухнӑ.
Ака уйӑхӗн 5-мӗшӗнче ҫур ҫӗр ҫитеспе Канаш хулинче ҫурт ҫунма тытӑннӑ.
Инкек Анӑҫ тӑкӑрлӑкӗнчи ҫуртра пулнӑ. Ҫулӑм 60 тӑваткал метр лаптӑк ҫинче алхаснӑ. Пушара пилӗк техника тата 12 ҫӑлавҫӑ сӳнтернӗ. Ҫулӑма виҫӗ сехетрен кӑна парӑнтарма май килнӗ.
Инкек вырӑнӗнче икӗ ҫын виллине тупнӑ. Вӗсем – 63 ҫулти хӗрарӑм тата 69 ҫулти арҫын.
Палӑртмалла: ҫулталӑк пуҫланнӑранпа республикӑра 291 пушар пулнӑ. Инкексенче 18 ҫын вилнӗ, тепӗр 18 ҫын аманнӑ. Пушарсенче 47 ҫынна ҫӑлма май килнӗ.
Шупашкарта вӑйпитти арҫын ҫивитти айне пулса вилнӗ. Инкек ака уйӑхӗн 2-мӗшӗнче пулса иртнӗ.
РФ Следстви комитечӗн Чӑваш Енри управленийӗн пресс-службинче пӗлтернӗ тӑрӑх, пӑтӑрмах тӗлӗшпе РФ Пуҫиле кодексӗн 216-мӗш статйин 2-мӗш пайӗпе пуҫиле ӗҫ пуҫарнӑ. Ку статьяпа строительство ӗҫӗ пынӑ чухне хӑрушсӑрлӑх правилине пӑснӑран астумасӑр ҫын вилсен явап тыттараҫҫӗ.
Шупашкарти суту-илӳ комплексӗсенчен пӗрин склачӗн ҫивиттийӗ йӑтӑнса аннӑ пулнӑ. Ҫавна тирпейленӗ чухнӗ тӑрса юлнӑ конструкци персе аннӑ, вӑл рабочисенчен пӗрне аяла тунӑ. Шар курнӑ арҫын инкек вырӑнӗнчех куҫне ӗмӗрлӗхе хупнӑ.
Халӗ тӗпчневҫӗсем ӗҫе малалла тӗпчеҫҫӗ.
Эпир ытларах чухне арҫынсем алимент тӳлеме юратманнине пӗлетпӗр. Мӑшӑрӗсемпе уйрӑлсан вӗсем укҫа арӑмне каять тесе шухӑшлама пуҫлаҫҫӗ, ача сахалтан та кунне виҫӗ хутчен апатланни, ун валли тумтир, ытти япала туянмалли пирки шухӑшласшӑн мар. Паллах, пур арҫын та, тата тӗрӗсрех каласан, пур ашшӗ те апла мар-ха. Теприсем нимле алиментсӑрах кӑмӑлтан тӳлесе тӑраҫҫӗ.
Улатӑр районӗнче вара амӑшӗ хӑйӗн ачисене алимент тӳлесшӗн пулман. 36-ри хӗрарӑма суд приставӗсем темле ӳкӗте кӗртме хӑтлансан та вӑл итлемен. Парӑм 500 пинрен иртсе кайнӑ.
Малтанласа приставсем ӑна административлӑ майпа явап тыттарнӑ. Миравай судья 40 сехет ӗҫлеттерме йышӑннӑ. Ун хыҫҫӑн та хӗрарӑм парӑма татма шухӑшламан. Кайран ун тӗлӗшпе пуҫиле ӗҫ пуҫарнӑ. Ҫавӑн хыҫҫӑн хӗрарӑмӑн укҫа тупӑннӑ — алимент парӑмне тӳлесе татнӑ.
Шупашкарти Чӑвашгоснаб склад комплексӗнче ӗнер инкек пулнӑ: тӑрӑ йӑтӑнса аннӑ, унта ӗҫлекен арҫын айне пулса вилнӗ.
Малтанлӑха пӗлтернӗ тӑрӑх, ӗнер ирхи 9 сехет ҫурӑра тӑрӑн пӗр пайӗ йӑтӑнса аннӑ (вӑл юр йывӑрӑшне пула ишӗлнӗ-мӗн) складра ишӗлчӗксене тасатнӑ чухне 35 ҫулти арҫын ҫине сиенленнӗ тӑрӑн тепӗр пайӗ ишӗлсе аннӑ. Вӑл тухтӑрсем ҫитиччен вилнӗ.
Ҫак арҫыннӑн тӑванӗсем каланӑ тӑрӑх, склад тӑрри кӑрлач уйӑхӗнчех юр йывӑрӑшне пула ишӗлсе аннӑ. Унтанпа рабочисем ишӗлчӗксене тирпейленӗ,тавара ҫӑлнӑ. Ертӳлӗх конструкцисем хавшак пулнине пӗлнӗ, ӗҫсем ҫапах малалла пынӑ. Ҫав кун арҫын объектра ӗҫсене вӗҫлесе пынӑ, складӑн шалти кӗтесӗнчен чашӑк-тирӗке илсе тухмалли кӑна юлнӑ.
Вилнӗ арҫыннӑн мӑшӑрӗ, икӗ ача юлнӑ.
Халӗ Следстви комитечӗ ӗҫ-пуҫа уҫӑмлатать.
Чӑваш Енре вӑрманҫӑ тӗлӗшӗпе пуҫиле ӗҫ пуҫарнӑ. Пакунлисен куҫӗ тӗлне Ҫӗмӗрлери лесничествӑн участокӗн пуҫлӑхӗ лекнӗ. Анчах ӑна вӑрман сутса пуйнӑ тесе мар, лаша сутнӑ чух улталанӑ тесе шухӑшлаҫҫӗ.
59 ҫулти арҫын пӗлтӗрхи раштав уйӑхӗнче хӑйсен лесничестви ҫинче шутланса тӑракан тӑватӑ лашана сутса янӑ. Чӗлхесӗр янавар ватӑлнӑ, унпа усӑ курмасть тесе ҫакӑн пек йышӑннӑ. Тӑватӑ лашана 125 пин тенкӗпе сутса янӑ.
Анчах... суту-илу хучӗ ҫинче хака 40 пин тенкӗ йӳнетсе кӑтартнӑ.
Пӑтӑрмах ҫиеле тухсан участок начальникӗ айӑпа йышӑннӑ. Чӑваш Енӗн Ҫутҫанталӑк ресурсӗсен министерствине тӑкак кӳнӗ сиене саплаштарма йӗрке хуралҫисем тивӗҫлӗ мера йышӑннӑ та ӗнтӗ.
Пуҫиле ӗҫ ҫӑпах та судра вӗҫленӗ.
+25.8 °C