Шупашкар спортсменӗ Виталий Глазков пауэрлифтинг енӗпе иртнӗ Ази первенствинчен ылтӑн медальпе таврӑннӑ. Ӑмӑрту Китайри Хайнань провинцире ҫу уйӑхӗн 10-12-мӗшӗсенче иртнӗ. Китайри первенствӑна каймалли путевкӑна вӑл кӑҫал нарӑс уйӑхӗнче Мускавра иртнӗ Раҫҫей первенствинче ҫӗнсе илнӗ. Ун чухне Виталий 490 килограмм пухса пӗрремӗш вырӑн йышӑннӑ.
Пирӗн ентеш Китайра 53 килограмм тайманнисен виҫе категорийӗнче вӑй виҫнӗ. Вӑл виҫӗ енлӗ кӗрешӳре пӗтӗмпе 500 килограмм пухнӑ.
Палӑртса хӑварар: Виталий В.С.Соколов ячӗллӗ спорт шкулӗнче ӑсталӑхне туптать. Тренерӗ – Чӑваш Республикин тава тивӗҫлӗ тренерӗ Вячеслав Кастрюков.
Чӑваш Ен спортсменӗсем Сарӑту облаҫӗнче иртнӗ Samba Trail Team ӑмӑртуран ылтӑн медальсемпе таврӑннӑ. Тупӑшу икӗ кун иртнӗ. Спортсменсен тӗрлӗ вӑрӑмӑш дистанцие парӑнтарма тивнӗ: 19, 33 тата 60 ҫухрӑм. Вӗсем чӑрмавлӑ пулнӑ.
Ӑмӑртӑва 22 регионти 500 ытла спортсмен хутшӑннӑ. Пирӗн ентешсем унта пысӑк ҫитӗнӳсем тунӑ.
Мальвина Петрова 33 тата 19 ҫухрӑмсенче– 1-мӗш вырӑн йышӑннӑ. Александр Новиков та 33 тата 19 ҫухрӑмсене чупса финиша пӗрремӗш ҫитнӗ. Владимир Нестеров вара 60 ҫухрӑма парӑнтарнӑ та 3-мӗш вырӑн йышӑннӑ.
Хӗрлӗ Чутайӗнчи тӗп пульницӑра Константин Будков ҫамрӑк тухтӑр тӑрӑшать. Вӑл Чӑваш патшалӑх университетӗнчен 2025 ҫулта вӗренсе тухнӑранпа тухтӑр пулса тимлет.
МАХри «Хыпар-Вести Чувашии» каналта пӗлтернӗ тӑрӑх, Костя Шупашкарта ҫуралнӑ, ачалӑхӗ Сургут тӑрӑхӗнче иртнӗ. Вӑл 15 ҫулта чухне Будковсем тӑван тӑрӑха таврӑннӑ.
Ҫамрӑк тухтӑр спорт туризмӗпе кӑсӑкланать. Виҫӗ ҫулта каччӑ чылай ҫӗрте пулса курнӑ, вун-вун километра хыҫа хӑварнӑ.
Тухтӑр пулма вӑл ачаранпах ӗмӗтленнӗ май шапасемпе нӑрӑсене сиплеме юратнӑ. Чӑнласа мар-ха. Вылямалла.
Шкулта хими юратса вӗреннӗскер шкул пӗтерсен И.Н. Ульянов ячӗллӗ ЧПУ-ри медицина факультетне вӗренме кӗнӗ. Унтан вӗренсе тухсан вӑл Хӗрлӗ Чутайӗнчи тӗп пульницӑра ӗҫлеме тытӑннӑ. Ӑна унта пурӑнмалли вырӑнпа та тивӗҫтернӗ.
Красноармейскинче «Ял пурнӑҫӗ» район хаҫачӗн парнисемшӗн ӑмӑрту иртнӗ. Старта ҫӑмӑл атлетсем тухнӑ.
МАХри «Хыпар-Вести Чувашии» каналта пӗлтернӗ тӑрӑх, ҫӑмӑл атлетсен эстафетине кӑҫал Раҫҫейри Халӑхсен пӗрлӗхӗн тата Чӑваш Республикинчи Халӑхсен туслӑхӗн ҫулталӑкне халалланӑ.
Ӑмӑртӑва садике ҫӳрекенсен, шкул ачисен, предприяти-организацире ӗҫлекенсен, ветерансен пӗрлештернӗ 23 команди хутшӑннӑ.
Спортсменсене Красноармейски округӗн пуҫлӑхӗн ҫумӗн тивӗҫӗсене пурнӑҫлакан Олег Николаев, «Хыпар» издательство ҫурчӗн директорӗ - тӗп редакторӗ Дмитрий Моисеев, «Ял пурнӑҫӗ» хаҫат редакторӗ Валентина Багадерова ӑнӑҫу суннӑ.
Ҫӗнтерӳҫӗсене кубоксемпе, дипломсемпе, медальсемпе тата асӑнмалӑх парнесемпе хавхалантарнӑ.
Чӑваш Енри спорт хастарӗсем пӗтӗм Раҫҫейри «Кӗрешӳ» организацие йӗркелесшӗн.
Ака уйӑхӗн 30-мӗшӗнче Республикӑри «Кӗрешӳ» центрта чӑвашсен наци кӗрешӗвӗн тӳрисен семинарӗ иртнӗ. Мероприятие Чӑваш Енри «Кӗрешӳ» федераци йӗркеленӗ, спикерсем пулса унта Геннадий Егоров президент тата Чӑваш Енӗн спорт министрӗн канашҫи Ольга Букина тухса калаҫнӑ.
Семинарта Раҫҫейри «Кӗрешӳ» организаци йӗркелеме сӗннӗ. Спортӑн ҫак енӗ юлашки ҫулсенче вӑйлӑ аталанса пырать тенӗ унта. 2023 ҫулта Пӗтӗм тӗнче шайӗнче наци кӗрешӗвӗн енӗпе вӑйӑ ирттерни витӗм кӳнӗ. Кӗрешӳ енпе Чӑваш Енре паян 700 ытла спортсмен ӑсталӑха туптать. Муниципалитесенчи 22 тата республика шайӗнчи 3 шкулта ку енӗпе кӗрешме хӑнӑхма май пур.
Авӑн уйӑхӗнче Анапӑра Раҫҫейӗн ӑмӑртӑвне ирттермелле.
Раҫҫейӗн биатлонистсен союзӗпе «МАТЧ» спорт каналӗ Чӑваш Ене килнӗ. Курма мар, тӗрӗслевпе килсе ҫитнӗ.
Шупашкарти Олимп резервӗн 2-мӗш спорт шкулӗ «Контактра» халӑх тетелӗнчи хӑйӗн пабликӗнче пӗлтернӗ тӑрӑх, делегаци Лапсарти биатлон комплексне тӗрӗсленӗ.
Асӑннӑ комплекса нушаланса туни пирки Чӑваш халӑх сайчӗ те хыпарласа тӑнӑччӗ. Дмитрий Губерниев телеертӳҫӗ те биатлона тӳрӗ эфирта комментариленӗ чух республика ертӳҫисене ку ыйту пирки темиҫе хутчен те аса илтернӗччӗ.
Делегаци пайташӗсем объекта техника енчен хакланӑ, пӑшалтан пемелли хатӗрсене пӑхса ҫӳренӗ, инфраструктурӑна пахаланӑ.
Комплекс йӑлтах тивӗҫтерсен кӑҫал кӗркунне, авӑн уйӑхӗнче, унта ҫуллахи биатлон енӗпе Раҫҫей шайӗнчи ӑмӑрту ирттересшӗн.
Красноармейски муниципаллӑ округне кӗрекен Сурӑмхӗрри ялӗнче стадион тума пуҫланӑ. Вырӑнти хастар, Зинаида Михайлова, «Контактра» халӑх тетелӗнчи хӑйӗн страницинче пӗлтернӗ тӑрӑх, «ялти хастарсен пуҫарӑвне Красноармейски муниципалитет округӗн пуҫлӑхӗ Павел Семенов тата Карай территори пайӗн ертӳҫи Геннадий Сверчков ырласа йышӑннӑ, май пур таран пулӑшма шантарнӑ».
Стадиона туса пӗтерсен унта мини-футбол тата волейбол выляма май килӗ.
Зинаида Михайлова хыпарланӑ тӑрӑх, ҫав стадиона тӑвасса ачасемпе ҫамрӑксем хавхаланса кӗтеҫҫӗ. Ачасем спортпа туслӑ пулни калама ҫук лайӑх, паллах.
Спорт лапамӗ Карай ялӗнчен килекен ҫул хӗрринче, Сурӑмхӗрри ялӗ ҫывӑхӗнче, пулӗ. Унӑн тӑршшӗ — 50 метр, сарлакӑшӗ — 35 метр.
Халӑх хушшинче экстремаллӑ спортпа ҫамрӑксем кӑна аппаланма пултараҫҫӗ текен шухӑш анлӑ сарӑлнӑ. Тӗслӗхрен, сӑрт-ту юрҫӳренӗпе ытларах чухне ҫамрӑксем ярӑннине курма хӑнӑхнӑ. Ватӑ ҫынсене вара ун пек хатӗрсемпе ярӑнма питӗ йывӑр, хӑрушӑ тесе шутлаҫҫӗ. Чӑнах та, ҫулсем иртнӗҫемӗн ҫыннӑн сывлӑхӗ чакать, шӑм-шакӗ те малтанхи пек йӑрӑ та ҫирӗп мар. Ҫавӑнпа та нумайӑшӗ экстремаллӑ кану пенсионерсем валли мар тесе шухӑшлать.
Анчах та ку чӑннипех ҫапла-ши? Чӑн та 50–60 ҫултан иртнӗскерсен диван ҫинче кӑна вӑхӑта ирттерме пултараҫҫӗ-ши? Ҫук пуль. Пенсие тухсан та кӑмӑл пур пулсан адреналин шырама май пур. Паянхи кун ҫак стереотип йӑнӑш пулнине час-часах курма пулать. Ятарлӑ хатӗрленӳ, ӑста инструкторсем тата хальхи вӑхӑтри шанчӑклӑ инвентарь пулӑшнипе аслисем те ту ҫинчен ҫилпе вӗҫтерсе анаҫҫӗ. Чи кирли кунта — ҫын миҫе ҫулта пулни мар, хӑйӗн вӑй-халне тӗрӗс хаклани тата пурнӑҫа юратни.
Сӑрт-ту юрҫӳренӗсемпе кӑсӑкланакансем «Ревущие в глуши» канал пирки илтнех ӗнтӗ. Нумай пулмасть ҫак каналта пӗр кӑсӑклӑ ролик курма тиврӗ.
Улатӑрта пурӑнакан Варвара Николаева 9 ҫулта кӑна-ха. Анчах ҫитӗнӗвӗсем хӑйӗнчен пысӑк.
Варвара спортра ҫитӗнӳсем тӑвать. Ахӑртнех, ун пирки кӗҫех Улатӑрта мар, ҫӗршывӗпех пӗлӗҫ. Вӑл халӗ Чӑваш Енӗн каратэ енӗпе пӗрлештернӗ командине кӗрет.
Варвара татами ҫинче – 4 ҫул ҫурӑранпа. Тантӑшӗсем урамра пуканелле вылянӑ чухне вӑл спортпа пиҫӗхнӗ. Вӑл тӗнче чемпионӗ Сергей Сергеев патӗнче ӑсталӑхне туптать.
Варя ку таранччен вун-вун турнира хутшӑннӑ. Анчах ку уншӑн – ӑнӑҫу ҫулӗн пуҫламӑшӗ кӑна-ха.
Ялти культура учрежденийӗсенче спорт секцийӗсем уҫӗҫ. Кун пирки «Хыпар» издательство ҫурчӗн сайтӗнче пӗлтернӗ.
Республикӑри спорт объекчӗсене инвентаризацилеме пуҫлаҫҫӗ иккен. Унта ял-хулари спорт лапамӗсене те шута илӗҫ. Ялти культура учрежденийӗсенче спорт секцийӗсем уҫасшӑн. Библиотекӑна шашкӑлла-шахматла выляма юратакансем пуҫтарӑнӗҫ. Шупашкарта ҫӑмӑл атлетика манежӗ тӑвӗҫ, унӑн проектне хатӗрлеме тытӑннӑ иккен.
Спорт министрӗ Василий Петров каланӑ тӑрӑх, 5 ҫулта 110 спорт объектне ҫӗнетсе ӗҫе кӗртнӗ, вӗсенчен 18-шне пӗлтӗр тунӑ. 2025 ҫулта Чӑваш Енри 388 яшпа хӗр Раҫҫейӗн пӗрлештернӗ командисене кӗнӗ. Пирӗн спортсменсем тӗрлӗ ӑмӑртура 2338 медаль ҫӗнсе илнӗ. Яланхи пекех вӗсене стипендисемпе тивӗҫтереҫҫӗ, премисемпе хавхалантараҫҫӗ. Пирӗн республикӑра спортӑн уйрӑмах аталантармалли тӗсӗсен йышне ӳстернӗ, унта кӗрешӳ кӗртнӗ.
+16.0 °C