Ҫӗнӗ Шупашкарти 66 ҫулти хӗрарӑм, тухтӑр, ултавҫӑсене ӗненсе 6 миллион тенкӗсӗр тӑрса юлнӑ.
Ун патне мессенджерта палламан ҫын шӑнкӑравласа вӗсен ҫуртӗнче домофона улӑштарни пирки пӗлтернӗ. Хӗрарӑм 3 уҫӑ саккас панӑ, смс-ҫырупа килнӗ кода каланӑ. Кун хыҫҫӑн хайхи палламан ҫын, унччен кӑмӑллӑ калаҫнӑскер, ӑна хӑртма тытӑннӑ.
Кайран хӗрарӑм «Госуслуги» порталта унӑн харпӑр кабинетне такам кӗнӗ тесе хыпар илнӗ. Унта телефон номерне кӑтартнӑ, хӗрарӑм унпа шӑнкӑравланӑ. Хальхинче «Роскомнадзор» специалисчӗ калаҫнӑ, кӗҫех унпа «ахаль-махаль мар организацири ҫын» ҫыхӑнассине пӗлтернӗ.
Кун хыҫҫӑн хӗрарӑм «Росфинмониторинг», «ФСБ», ытти «служба» специалисчӗсемпе калаҫнӑ. Вӗсем каланипе 1 миллион ытла тенкӗ чикнӗ хутаҫа вӑл килӗ умӗнче палламан ҫынна тыттарса янӑ.
Ултавҫӑсем кунпа та чарӑнман. Юлнӑ укҫи-тенкине вӗсем Тӗп банка пама ӳкӗте кӗртнӗ. Анчах ку ӗҫпе хӑй пултараймасть тесе доверенноҫ ҫырма хушнӑ. Ҫапла хӗрарӑм нотариус патӗнче ҫак хута туса Хусана кайнӑ, унта документа аферистсен ҫыннине панӑ. Кун хыҫҫӑн ултавҫӑсем ҫак хутпа хӗрарӑмӑн счечӗ ҫинчен 4 миллион та 800 пин тенкӗ илнӗ.
Шупашкарти Петӗр Хусанкай ячӗллӗ культура керменне юсама 258,3 миллион тенкӗ уйӑрӗҫ.
Юсав ӗҫне 2027 ҫулхи чӳк уйӑхӗн 1-мӗшӗччен туса пӗтермелле. Ҫав тӗллевпе республика хысничнен 258,3 миллион тенкӗ уйӑрма палӑртнӑ.
Подряд организацин ҫурт йӗри-тавра бетон ярса ҫирӗплетмелле, кирпӗчпе купаланин ҫӗввисене ҫӗнетмелле, нӳхрепе кӗмелли алӑксене юсамалла. Алӑксене ылмаштарма та палӑртнӑ, хӑш-пӗр ҫӗрте урая ҫӗнетӗҫ, инженер сечӗсене ылмаштарӗҫ тата ытти ӗҫе туса ирттерӗҫ.
Курмалли зала тата сценӑна та юсама палӑртнӑ.
Шупашкар округӗнчи Тутаркасси ялӗнче пурӑнакан сусӑр ҫыннӑн енчӗкӗ ҫухалнӑ. Унта вара 40 пин тенкӗ тата паспорт пулнӑ.
Шупашкарти полицейскисем ку ӗҫе кам тунине ҫийӗнчех тупса палӑртнӑ. Вӑл – 38 султи хӗрарӑм, ун патне хӑнана килнӗскер.
Оксана Самсон участковӑй тата оперативниксем вырӑна тӳрех ҫитнӗ. Вӑрра «йӗрӗпе» тупнӑ. Ҫак хӗрарӑм сусӑр ҫын ӑна шыв ярса панӑ чухне унӑн енчӗкне йӑтса тухса кайнӑ. Укҫана та, паспорта та хуҫине тавӑрса панӑ.
Ҫу уйӑхӗн 14-мӗшӗнче Шупашкарта пурӑнакан 84 ҫулти арҫын патне палламан хӗрарӑм шӑнкӑравланӑ та «вӑрҫӑ ачисене» пӗр хутчен пособи парассине, ӑна илме СНИЛС номерне каламаллине пӗлтернӗ. Ватӑ ҫын ӗненнӗ.
Темиҫе кунран ун патне «ФСБ ӗҫченӗ» шӑнкӑравланӑ. Хайхискер СНИЛС номерӗпе ултавҫӑсем усӑ курнине каланӑ. Ҫавна май ӑна мӗнпур укҫине «деклараци тумаллине» пӗлтернӗ.
Ватӑ арҫын пӗтӗм укҫине – 1,7 миллон тенке, «налук службинчи курьера» тыттарса янӑ. Ун хыҫҫӑнах шӑнкӑравланӑ палламан ҫынпа ҫыхӑнма тӑрӑшнӑ – усси пулман. Ҫавӑн чухне тин вӑл хӑйне улталанине ӑнланнӑ.
Чӑваш Енри тӳре-шара VPN пулӑшӑвне туянассине пӗлтернӗ. Тата тӗрӗсрех каласан, Шупашкар районӗнчисем. Асӑннӑ муницпалитет округӗн администрацийӗ VPN пулӑшӑвӗшӗн 1,4 миллион тенкӗ тӳлеме хатӗр. Асӑннӑ ҫыхӑну каналӗ Пӗрлехи дежурствӑпа диспетчер службипе ҫыхӑнма кирлӗ иккен.
Асӑннӑ пулӑшӑвӑн пуҫламӑш хакне 1,4 миллион тенкӗ тесе кӑтартнӑ. Унпа «Безопасный город» (чӑв. Хӑрушсӑр хула) камерисенчи даннӑйсене пама тата вырнаҫтарнӑ сиренӑсене ӗҫлеттерме усӑ курӗҫ. Даннӑйсене парас хӑвӑртлӑх ҫеккунтра 10-70 Мбитран кая пулмалла мар.
Пулӑшӑва 2026 ҫулхи ҫертме уйӑхӗн 1-мӗшӗнчен пуҫласа 2027 ҫулхи пуш уйӑхӗн 31-мӗшӗччен кӳмелле.
Шупашкарта 400 миллион тенкӗпе пӳрт сутаҫҫӗ. Пирӗн ҫӗршывра ун пеккисене коттедж теме юратаҫҫӗ-ха. Акӑлчан чӗлхинчен кӗнӗ ҫав сӑмах пӗр ҫемье пурӑнмалли пӳрте пӗлтерет. Анчах пирӗн ҫӗршывра ку сӑмахпа усӑ курса калани пӳрт чаплине, сумлине пӗлтерет.
400 миллион тенкӗпе сутма палӑртнӑ ҫурт, чӑн та, чаплӑ темелле пуль. Тепӗр тесен, кама епле пӳртре пурӑнма хӑтлӑ ӗнтӗ: тепӗр ҫынна пӗр хутли те килӗшет. Юрӗ, Шупашкарти патнех таврӑнар-ха. Ку ҫурт 4 хутлӑ иккен. Вӑл 1200 тӑваткал метр лаптӑк йышӑнать, унӑн ҫӗр лаптӑкӗ — 40 сотка.
Хаклӑ ҫурт «Волжский-2» микрорайонти Пукрав урамӗнче вырнаҫнӑ. Пӳрте 2010 ҫулта кирпӗчрен туса лартнӑ. Шалта мунча е сауна, бассейн пур иккен. Гараж та пур.
Ку ҫуртӑн пӗр тӑваткал метрӗ вӑтамран 333 пин тенке кайса ларать.
Чӑваш Енре Сарту облаҫӗнчи виҫӗ арҫынна суд тунӑ. Вӗсене кунти усламҫӑна вӑрланӑшӑн явап тыттарнӑ. Вӗсене 7 ҫултан пуҫласа 12 ҫул таран ҫирӗп тата ятарлӑ режимлӑ колоние хупма йышӑннӑ, пӗрне вара малтанхи икӗ ҫулне тӗрмене лартма йышӑннӑ, кайран ӑна колоние куҫарӗҫ.
Сарту тӑрӑхӗнчи ҫав виҫӗ этем усламҫӑна вӑрласа кайнӑ та укҫа тапӑннӑ. Ӑна ирӗке яма 1 миллион тенкӗ укҫа ыйтнӑ. Усламҫӑна хӗненӗ, ҫӗҫӗпе хӑратнӑ. Чӑваш Ен тӑрӑх ҫӳренӗ чухне вӗсем шар курнин банк карттипе топливӑшӑн тӳленӗ.
Чарӑнусенчен пӗринче усламҫӑ тарса ӳкме пултарнӑ. Ҫынна вӑрлакансене Росгварди ӗҫченӗсемпе пӗрле тытса чарнӑ.
Пысӑк пахалӑхлӑ хайлавсемшӗн тата ӑслӑлӑх, литература тата ӳнер енӗпе никӗс шайӗнчи тӗпчев ирттернӗшӗн республикӑри темиҫе ҫынна кӑҫал уйӑхсерен патшалӑх стипендине парса тӑрӗҫ. Кашнине — 7200-шер тенкӗ.
Сумлӑ йышра ҫаксем: Чӑваш патшалӑх юрӑпа ташӑ ансамблӗн илемлӗх ертӳҫи Алексей Тимошенко тата коллективӑн дирижёрӗ Александр Возяков, Чӑваш академи драма театрӗн артисчӗсем Александр Демидов тата Надежда Зубкова, Чӑваш патшалӑх драмӑн сӑнавлӑ театрӗн артисчӗ Евгений Евграфов, И.Я. Яковлев ячӗллӗ Чӑваш патшалӑх педагогика университечӗн истори кафедрин профессорӗ Лев Ефимов, Василий Кошкин ҫыравҫӑ, Чӑваш патшалӑх оперӑпа балет театрӗн артист-вокалисчӗ Сергей Кузнецов, Чӑваш патшалӑх гуманитари ӑслӑлӑхӗсен институчӗн аслӑ ӑслӑлӑх ӗҫченӗ Алексей Леонтьев, И.Н. Ульянов ячӗллӗ Чӑваш патшалӑх университечӗн анатоми кафедрин профессорӗ Лариса Меркулова, Валентина Милославская художник, И.Н. Ульянов ячӗллӗ Чӑваш патшалӑх университечӗн чӑваш филологийӗпе культурин кафедрин профессорӗ Виталий Родионов, Лолита Чекушкина композитор, Вырӑс драма театрӗн артисчӗ Диана Яковлева, Чӑваш Енри Театр ӗҫченӗсен союзӗн ертӳҫин ҫумӗ Зоя Яковлева.
Шупашкар районӗнчи ялсенче нимелле ҫул юсаҫҫӗ. Укҫан пӗр пайне халӑхран пухнӑ, ыттине — республика тата муниципалитет хыснинчен уйӑрнӑ. Вырӑнти администрацин хӑтлӑх кӳрессипе тата территорие аталантарассипе ӗҫлекен управлени 11,5 миллион тенкӗлӗх контракт алӑ пуснӑ. Ӗҫе пурнӑҫлакана Мускавран тупнӑ.
Мускаври подряд организацийӗн ҫулсене ҫӗртме уйӑхӗн 15-мӗшӗнчен юсаса пӗтермелле.
«Автомобиль ҫулӗсене юсасан транспорт инфраструктури лайӑхланӗ, ку вӑл ялсенче пурӑнакансемшӗнех лайӑх», – тенӗ республикӑн Тариф енӗпе ӗҫлекен патшалӑх службӑн ертӳҫи Сергей Егоров.
Ҫӗнӗ Шупашкарта пурӑнакан, унччен судпа темиҫе хутчен те айӑпланнӑ арҫын ӳсӗр хӗрӗн (вӑл унӑн пӗлӗшӗ пулнӑ) укҫине тата телефонне вӑрланӑ.
Пӑтӑрмах кӑҫалхи нарӑс уйӑхӗн вӗҫӗнче Шупашкарти Ленин районӗнчи хавасланмалли заведенисенчен пӗринче пулса иртнӗ. Хӑй пӗлекен хӗр ӳсӗрӗлсе кайнипе усӑ курса арҫын хайхин телефонӗнчи банк приложенийӗ урлӑ 150 пин тенкӗ укҫа куҫарнӑ. Унсӑр пуҫне 20 пин тенкӗ тӑракан телефона вӑрланӑ.
Тӗпчевҫӗсем тӗрӗслев пуҫарсан Ҫӗнӗ Шупашкар арҫынни хӑйӗн айӑпне йышӑннӑ, укҫана каялла куҫарса панӑ.
Ун тӗлӗшпе пуҫарнӑ пуҫиле ӗҫе халӗ прокуратура суда ярса панӑ.
+20.5 °C