elista.bezformata.com сайтри сӑн

Ӗнер Атӑл леш енчи Ҫурҫӗр поселокӗнче ҫил алхаснӑ, пӑр ҫунӑ. Шупашкар хула администрацийӗн пуҫлӑхӗ Денис Спирин Телеграм-каналӗнче пӗлтернӗ тӑрӑх, унта 6 ҫурт сиенленнӗ. Ҫавӑн пекех темиҫе машина шар курнӑ, йывӑҫсем персе аннӑ.

Асар-писер ҫанталӑк хыҫҫӑн поселока Инкеклӗ лару-тӑру министерствин ӗҫченӗсем, депутатсем, «Горсвет» авариллӗ бригадӑсем, управляющи компани ҫитнӗ. Вӗсем унта арканнӑ объектсене йӗркене кӗртнӗ.

Юрать-ха, ҫил-тӑвӑлпа пӑр ҫынсене амантман.

Хӑрушсӑрлӑх федераци служби тунӑ сӑн

Пӗр предприятин 48 ҫулти тӗп директорне тытса чарнӑ. Вӑл паллӑ мар ҫынсемпе калаҫса татӑлса район судне суя документсем тӑратнӑ тесе шутлаҫҫӗ.

Вӑл тата контрагенчӗсем каланӑ тӑрӑх, М-12 ҫула тумашкӑн патшалӑх ҫӗр лаптӑкӗсене илсен вӗсем 25 миллион тенкӗлӗх тӑкак кӳнӗ имӗш. Унччен унта хӑмла ӳстернӗ.

Хӑрушсӑрлӑх федераци служби пӗлтернӗ тӑрӑх, чӑннипе вара ҫак ҫынсем хӑмла производствине хута яма шухӑшламан та-мӗн. Ҫапла вӗсем тӑкак та тӳсмен.

Ҫак ҫынсенчен пӗри айӑпне йышӑннӑ, полицие хӑйех пынӑ. Пуҫиле ӗҫе малалла тӗпчеҫҫӗ.

Приставсен федераци службин архивӗнчи сӑн

Хӗрлӗ Чутай районӗнче пурӑнакан 28 ҫулти арҫыннӑн кашни уйӑхрах тупӑшӗн пӗрре тӑваттӑмӗш пайне ачишӗн алимент тӳлемелле пулнӑ. Анчах вӑл укҫа куҫарса тӑман. Ҫапла парӑм 667 пин тенке ҫитнӗ.

Приставсем унӑн пурлӑхне арестлесен, хӑйне машинӑпа ирӗклӗ ҫӳреме чарсан тин вӑл парӑма татасси пирки шутлама пуҫланӑ. Пакунлисем ӑна унсӑрӑн пурлӑхне сутма пултарасси, хӑйне штраф тӳлеттересси пирки асӑрхаттарнӑ. Кун пек чухне пуҫиле ӗҫ пуҫарассине те каланӑ.

Приставсемпе калаҫнӑ чухне арҫын парӑма тахҫанах татма, ывӑлӗпе хутшӑнма шухӑшланине каланӑ. Кӗҫех ача амӑшӗн расчет счечӗ ҫине пӗтӗм парӑм укҫи куҫна.

ШӖМ тунӑ сӑн

Республикӑри икӗ районта полицейскисем икӗ ватӑ ҫын мӑкӑнь ӳстернине тупса палӑртнӑ. Ӳсен-тӑрана кӑкласа экспертизӑна янӑ.

Елчӗк районӗнчи пӗр ялта 61 ҫулти арҫын хуҫалӑхӗнче полицейскисем 657 тӗм мӑкӑнь тупнӑ. Пӗччен пурӑнаканскер ӑна ӳстерме юраманнине пӗлнӗ-ха, анчах чечек пахчана илем кӳнипе тӑпӑлтарма хӗрхеннӗ.

Етӗрне районӗнчи пӗр ялта 70 ҫулти кинемейӗн пахчинче 99 тӗм мӑкӑнь тупнӑ. Вӑл полицейскисене ҫак чечекпе киленнине пӗлтернӗ.

Йӗрке хуралҫисем пахчара мӑкӑнь ӳссе тухсан ӑна кӑклама ыйтаҫҫӗ.

Муркаш тӑрӑхӗн пилӗк гражданне савӑнӑҫлӑ лару-тӑрура вӗсене Муркаш районӗн Хисеп Кӗнекине кӗртесси пирки Свидетельствӑсем панӑ. Вӗсенчен пӗри — Татьяна Огандерова (Моисеева) — Раҫҫей биатлонистки. Спорт мастерӗ, биатлон енӗпе тӗнче шайӗнчи Раҫҫей спорт мастерӗ, Раҫҫей тава тивӗҫлӗ спорт мастерӗ, вӑл ҫамрӑксен хушшинче биатлон енӗпе тӗнче чемпионки, ҫуллахи биатлонта тӗнче чемпионки, Чӑваш Енри, Раҫҫейри тата Европӑри ӑмӑртусен ҫӗнтерӳҫи, тӗнче ӑмӑртӑвӗнче виҫӗ хут ҫӗнтерӳҫӗ ятсене ҫӗнсе илнӗ. Биатлон енӗпе Тӗнче Кубокӗн тапхӑрӗн кӗмӗл призерӗ, Раҫҫейри хӗрарӑмсен команди йышӗнче эстафетӑра тӗнче чемпионачӗн бронза призерӗ шутланать.

Спортсменка хӑй ҫапла пӗлтернӗ: «Муркаш район администрацийӗ мана ҫакӑн пек чыс туни кӗтмен ҫӗртен пулчӗ, ҫакӑ вара питӗ кӑмӑллӑ».

Чӑваш Республикинчи — Чӑваш Енри — Раҫҫей УФСИНӗ хӑйӗн ӗҫтешне саламласа ҫирӗп сывлӑх, ырлӑх, ыранхи кун пирки пӑшӑрханмасӑр пурӑнма тата вӑрӑм ӗмӗр сунать, ҫывӑх ҫыннисем ӑна пулӑшса та тимлӗх уйӑрса тӑрассине шанать!

k-kompas.ru сайтри сӑн

Кӑҫал ака уйӑхӗнче Куславкка районӗнчи 42 ҫулти арҫын, цемент турттараканскер, полицие пырса ултавҫӑсен аллине ҫакланни пирки пӗлтернӗ.

Ун патне палламан арҫын шӑнкӑравланӑ. Вӑл строительство организацийӗн пуҫлӑхӗ-мӗн, Куславккара социаллӑ пӗлтерӗшлӗ объект хута ярать имӗш. Вӑл цемент илсе килме ыйтнӑ.

Ку вара ӗненнӗ. Цемент илсе килнӗ чухне ҫав арҫын патне шӑнкӑравланӑ. Лешӗ ӑна телефон номерӗсем ҫине укҫа хума ыйтнӑ. Куславкка арҫынни каланине пурнӑҫланӑ. Пӗтӗмпе 6200 тенкӗ хунӑ вӑл.

Стройка вырӑнне ҫитсен тин вӑл ултавҫӑсен серепине лекнине ӑнланнӑ.

cap.ru сӑнӳкерчӗкӗ

«Чӑвашбройлерӗнче» ӗҫленӗ ҫынсем тинех ӗҫ укҫине илнӗ. Прокуратура пулӑшнипе вӗсен умӗнчи парӑма - 3 миллион тенке - татнӑ. Пӗтӗмпе 40 ҫын шалу илнӗ.

Предприяти панкрута тухнине Арбитраж сучӗ 2018 ҫултах ҫирӗплетнӗ. Унти ӗҫченсен умӗнчи парӑма вара кӑҫал ака уйӑхӗнче татма шантарнӑ. Анчах ку тӳрре тухман.

Организацие тата ертӳҫине административлӑ майпа явап тыттарнӑ, штраф тӳлеттернӗ. Ертӳҫине уголовлӑ майпа та явап тыттарнӑ.

Яндекс.дзен сайтри сӑн

Ҫӗрпӳ районӗнчи "Звездный" уйлӑхан директорӗ пулнӑ ҫынна тӗрмене хупмасӑр айӑпланӑ тата штрафланӑ. Кун пирки прокуратура тата Следстви комитечӗн Чӑваш Енри следстви органӗсем пӗлтереҫҫӗ.

Директор пулнӑ чухне ҫак арҫын 2019 ҫулхи ҫу уйӑхӗнче арӑмӗ урлӑ пӗр ҫынран 14 пин тенкӗ илнӗ. Куншӑн вӑл унӑн икӗ ачине уйлӑха путевкӑсӑрах илме шантарнӑ. 2019 ҫулхи ҫӗртме-чӳк уйӑхӗсенче вӑл кӗсйине 180 пин тенкӗ чикнӗ. Ку укҫана вӑл бухгалтерирен илнӗ. Анчах ӑна вӑл уйлӑхшӑн тӑкакламан, хӑй пӗлнӗ пек усӑ курнӑ, штрафсем тӳленӗ.

Арҫынна тӗрмене хупмасӑр 4 ҫуллӑха айӑпланӑ тата 28 пин тенкӗ штраф тӳлеттерме йышӑннӑ

t.me/nikamran каналтан илнӗ сӑнӳкерчӗк

Чӑваш Енри икӗ хулара –

Сӗнтӗрвӑрринче тата Куславккара – пӑрахутсем чарӑнмалли ятарлӑ вырӑн тӑвӗҫ.

Ҫак ӗҫ йӳнӗ мар. Кашни пристань валли 100 миллиона яхӑн тенкӗ уйӑрӗҫ. Анчах чарӑну вырӑнӗсем кирлех. Пристаньсем пулсан Атӑл тӑрӑх ҫӳрекен круиз теплохочӗсене ҫав хуласенче чарӑнайӗҫ. Чарӑну вырӑнӗсене 2025-2026-мӗш ҫулсенче тума палӑртнӑ.

Юлашки ҫулсенче пирӗн ҫӗршывра тата республикӑра туризма аталантарассипе ҫине тӑраҫҫӗ. Мӑнаҫлӑ ҫӗршывӑмӑрта тата тӑван Чӑваш Енӗмӗрте ҫын курса тӗлӗнмелли вырӑн пайтах.

chfila.ru сайтран илнӗ скриншот

Чӑваш патшалӑх филармонийӗн директорӗ пулма Максим Матросова шаннӑ. Йышӑнӑва республика ертӳҫи Олег Николаев ӗнер, утӑ уйӑхӗн 12-мӗшӗнче, алӑ пуснӑ. Документа республикӑн влаҫ органӗсен официаллӑ порталӗнче вырнаҫтарнӑ.

Филармонире илемлӗх ертӳҫи пулса Николай Казаков тӑрӑшать.

Максим Юрьевичӑн заместителӗсем иккӗн: Татьяна Фролова пӗтӗмӗшле ыйтусемпе ӗҫлет, Ирина Фролова – экономика тата финанс енӗпе.