forum.na-svyazi.ru сайтра вырнаҫтарнӑ сӑнӳкерчӗк

Юпа уйӑхӗн 14-мӗшӗнче ҫӗрле пирӗн республикӑра Узбекистан номерӗллӗ автобуса тытса чарнӑ.

А-151 автоҫулпа пыракан транспортра 50 ҫын ларса пынӑ, вӗсем Узбекистанран тата Таджикстанран килнӗскерсем пулнӑ. Автобус Мускавран тӑван ҫӗршыва кайма тухнӑ иккен. Салонта пулнисенчен ҫиччӗшӗн пирӗн ҫӗршывра пулма ирӗк паракан документсем пулман.

Саккуна пӑсса пирӗн ҫӗршывра пурӑннисем тӗлӗшпе административлӑ ӗҫ пуҫарнӑ.

Автобуса йӗрке хуралҫисем чикӗ леш енне каҫса кайичченех сӑнаса пынӑ.

Автобус водительне вара йӗркене пӑсса пирӗн ҫӗршыва килнӗ ҫынсене турттарса ҫӳренӗшӗн явап тыттарма йышӑннӑ.

kp.ru сайтри сӑн

Шупашкарти техникумра вӗренекен 18-ти студента палламан ҫынсем улталанӑ. Вӑл вӗсене ӗненсе ҫӗрле Хусана таксипе кайнӑ, банкомат урлӑ 600 пин тенкӗ куҫарса панӑ.

Ун патне «техникум администрацийӗнчен» шӑнкӑравланӑ, смспа килнӗ кода калама ыйтнӑ. Кӑшт вӑхӑт иртсен «Госуслуги» порталӗн ӗҫченӗ» унпа ҫыхӑннӑ. Вӑл ӑна хӑратса пӗтернӗ: унӑн даннӑйӗсене ют ҫынсем пӗлнӗ имӗш, ҫавна май ашшӗ-амӑшӗн укҫине такамсем вӑрлама пултараҫҫӗ. «Украина ҫарӗсене пулӑшнӑшӑн» мӗнле явап тыттарассине те аса илтернӗ.

Палламан ҫынсем кун пирки никама та шурлама хушман. Хӑраса ӳкнӗ студент ашшӗ-амӑшӗн пухнӑ укҫине илсе таксипе Хусана кайнӑ, унта ӑна банкомат урлӑ палламан ҫынсем пӗлтернӗ счет ҫине куҫарнӑ. Кун хыҫҫӑн та ултавҫӑсем хӑпман — кредит илме хушнӑ. Студент тинех хай ултавҫӑсен аллине лекнине ӑнланнӑ.

Инкеклӗ лару-тӑру министерстви тунӑ сӑн

Ӗнер, юпа уйӑхӗн 18-мӗшӗнче, Куславкка округӗнчи Ҫӳлти Улмалуй ялӗнче, 57-ри арҫын путса вилнӗ.

Ку инкек ял ҫывӑхӗнчи плотинӑра пулнӑ. Арҫыннӑн виллине ҫӑлавҫӑсем шыраса тупса ҫыран хӗррине илсе тухнӑ. Халӗ вӑл мӗнле сӑлтава пула путса вилнине уҫӑмлатаҫҫӗ.

Палӑртмалла: ҫулталӑк пуҫланнӑранпа республикӑра шыв ҫинче 26 инкек пулнӑ, вӗсенче 23 ҫын вилнӗ, ҫав шутран иккӗшӗ – ачасем.

Патшалӑх автоинспекцийӗ тунӑ сӑн

Ӗнер каҫхине, юпа уйӑхӗн 18-мӗшӗнче, М-7 ҫул ҫинче, Ҫӗрпӳ округӗнчи «Туҫи — Кивҫурткасси» патӗнче, пулнӑ аварире 2 ҫыннӑн пурнӑҫӗ татӑлнӑ.

Малтанлӑха палӑртнӑ тӑрӑх, «Хавал» водителӗ ҫул пӑрӑнӑшӗнче руле итлеттереймен. Машина кювета чӑмса ҫаврӑнса ӳкнӗ. Пӗр пассажир салонран тухса ӳкнӗ, вӑл ҫавӑнтах вилнӗ. Теприне больницӑна илсе кайма тухнӑ, анчах вӑл ҫул ҫинче сывлама пӑрахнӑ.

Водитель йывӑр суранланнӑ, ӑна Шупашкарти больницӑна илсе ҫитернӗ.

Инкеклӗ лару-тӑру министерстви тунӑ сӑн

Ҫӗрӑӳ округӗнчи Энӗшкасси Кушкӑ ялӗнче мунча ҫунса кайнӑ. Пушара сӳнтерсен 51 ҫулти арҫын виллине тупнӑ.

Ку инкек юпан 16-мӗшӗнче ирхи 5 сехет тӗлӗнче пулнӑ. 26 тӑваткал метр лаптӑк ҫинче алхаснӑ пушара 9 специалист тата 3 техника сӳнтернӗ. Малтанлӑха пӗлтернӗ тӑрӑх, ҫулӑм пирус асӑрханмасӑр

Сӑмах май, иртнӗ талӑкра республикӑра 3 пушар пулнӑ.

dzen.ru сайтри сӑн

Ҫӗнӗ Шупашкарта пурӑнакан 69 ҫулти хӗрарӑм 200 пин тенке микроволновкӑна чиксе почта урлӑ ултавҫӑсем патне ярса панӑ.

Палламан ҫынсем ӑна анлӑ сарӑлнӑ схемӑпах улталанӑ. Малтан стационар телефонӑн килӗшӗвне тӑсмалла тесе суйнӑ, паспорт номерӗсене ыйтса илнӗ. Кайран вара даннӑйсем ултавҫӑсем патне лекнӗ тесе хӑратма пуҫланӑ.

Ҫав палламан ҫынсемех пулӑшма шантарнӑ. Ҫапла кинемее укҫана счет ҫинчен илме хушнӑ, ӑна «деклараци» тума ямалла-мӗн. Анчах «хӑрушлӑх сиксе тухасран» тесе ултавҫӑсем 200 пин тенке микроволновкӑра пытарса почта урлӑ яма хушнӑ.

Чӑваш Енӗн Инкеклӗ ӗҫсен министерствин сӑнӳкерчӗкӗ

Шупашкарта 17-ри пике шыва путма тӑнӑ арҫын ачана ҫӑлса хӑварнӑ.

Юпа уйӑхӗн 4-мӗшӗнче ҫав хӗрача пӗлӗшӗпе хулари Ботаника пахчипе уҫӑлса ҫӳренӗ. Ҫав вӑхӑтра вӗсем патне хӗрарӑмсем пырса пулӑшма ыйтнӑ. Вӗсем пӗвене икӗ арҫын ача кӗрсе кайнине, вӗсенчен пӗри теприне унтан тухма пулӑшма хӑтланни пирки пӗлтернӗ.

17-ри Александра Железина пӗр шухӑшласа тӑмасӑр пӗве патне ыткӑннӑ. Ӳкнӗ йывӑҫ тӑрӑх арҫын ача патне шуса пырса ӑна куртка ҫухавинчен ярса илсе ҫыран хӗрне туртса кӑларнӑ.

Арҫын ачасем пӗве хӗрне пулӑ тытма кайнӑ иккен, анчах вӑлта шыва кайсан ӑна туртса кӑларма хӑтланнӑ. Вӑлтана кӑларма хӑтланса та хӑй те анса кайнӑ, хӑйӗнпе тантӑш тусӗ ӑна ҫӑлма хӑтланнӑ, анчах вӑйӗ ҫитмен.

Маттур хӗрача, Александра Железина, В.М. Краснов ячӗллӗ Шупашкарти олимп резервӗн училищинче вӗренет.

https://forum.zarulem.ws сайтран илнӗ сӑнӳкерчӗк

Сӗнтӗррвӑринче патшалӑхӑн ҫул-йӗр хӑрушсӑрлӑхӗн инспекторӗсем ашшӗн машинипе ҫула тухнӑ яша тытса чарнӑ.

16 ҫулти каччӑн водитель прави пулман. Вӑл вырӑнти автозаправкӑна бензин патне пынӑ. Пакунлисем вӑл ҫамрӑккине асӑрханӑ тата вӑл хӑрушсӑрлӑх пиҫиххийӗпе те ҫыхӑнман пулнӑ.

Каччӑ ӑнлантарса панӑ тӑрӑх, унӑн ашшӗпе амӑшӗ темиҫе кунлӑха Мускава ӗҫпе кайнӑ, яш пӗччен юлнӑ. Вӑхӑта кичем ирттересрен вӑл ашшӗн машинине чӗртсе тухас тенӗ.

Ҫамрӑк водитель тӗлӗшпе административлӑ ӗҫ пуҫарнӑ. Автомашинӑна ятарлӑ стоянкӑна илсе кайнӑ.

Кӑҫал кӑрлачӑн 2-мӗшӗнче ҫынна вӗлернӗ «Хӗл мучине» ҫирӗп режимлӑ колоние 12 ҫуллӑха ӑсатнӑ. Ҫак кунсенче суд пулнӑ.

Аса илтерер: ку Канаш хулинче «Березка» лавккара пулнӑ. Хӗл мучи тумне тӑхӑннӑ ҫын лавккана кӗрсе унӑн 54-ри хуҫине пӑшалтан персе вӗлернӗ.

«Хӗл мучи» камне ҫав кунах тупса палӑртнӑ

Вӑл – «Фортуна» суту-илӳ ҫурчӗн хуҫи пулнӑ 72-ри арҫын. Вӑл судра ӑнлантарнӑ тӑрӑх, вӗсен хушшинче укҫа тӗлӗшпе ӑнланманлӑх пулнӑ.

«Хӗл мучине» ҫав кун Канаш округӗнчи Вӑтапуҫ ялӗнче тытса чарнӑ. Пӑшала унӑн килӗнчех инҫех мар юр айӗнчи вӑрттӑн вырӑнта тупнӑ.

forum.zarulem.ws сайтра вырнаҫтарнӑ сӑнӳкерчӗк

«М-12» ҫулпа пынӑ чухне патшалӑхӑн ҫул-йӗр инспекторӗсем ватӑ ҫынна асӑрханӑ. Ун тӗлӗнче чарӑннӑ та калаҫу пуҫарнӑ. Ватӑ арҫын хӑй ӑҫта кайма тухнине те, ӑҫта пурӑннине те калайман.

Вӗсем хӑйсен базине тишкернӗ те ҫухалса ҫӳрекен арҫын Йӗпреҫре пурӑнакан 78 ҫулти мучи пулнине палӑртнӑ. Вӑл унччен те килӗнчен тухса кайкаланӑ иккен.

Йӗрке хуралҫисем ватӑ ҫынна килне леҫсе хӑварнӑ, ҫывӑх ҫыннисем уншӑн питӗ савӑннӑ.