«За рулем» порталти сӑн

Пуш уйӑхӗн 30-мӗшӗнчен пуҫласа республикӑра регион пӗлтерӗшлӗ ҫулсем ҫинче вӑхӑтлӑх чарусем пулӗҫ. Ку мерӑсем 6 тоннӑран ытларах таякан йывӑр тиевлӗ машинӑсене пырса тивет.

Ҫав кунран пуҫласа Шупашкарта кунашкал машинӑсене укҫа тӳлесен кӑна кӗртӗҫ – вӗсем ятарлӑ пропуск туянӗҫ. Ку укҫа ҫула юсама кайӗ. Ҫул-йӗр хуҫалӑхӗн ӗҫченӗсем ӑнлантарнӑ тӑрӑх, юр ирӗлнӗ тапхӑрта тата ейӳ вӑхӑтӗнче ҫул тӗпӗ нӳрелет, ҫавна май хӑвӑрт арканать.

Шупашкарта тӗрӗслев пункчӗсем хулана кӗмелли вырӑнсенче пулӗҫ: Канаш, Сӗнтӗрвӑрри, Улатӑр, Етӗрне тата Вӑрнар ҫулӗсем ҫинче.

Ку чару пассажирсене илсе ҫӳрекен автобуссене, юсав ӗҫӗсем пурнӑҫлакан бригадӑсене транспортне тата экстреннӑй служба машинисене пырса тивмест.

https://t.me/salaevaalla каналтан илнӗ сӑнӳкерчӗк

Пирӗн ҫӗршывра пассажирсене самолетпа турттармалли тата хӑна ҫурчӗсен правилисене ҫӗнетнӗ. Ҫӗнӗ йӗрке кӑҫалхи пуш уйӑхӗн 1-мӗшӗнчен вӑя кӗнӗ.

Тавӑрса памалла мар билета та ӳлӗмрен тавӑрса пама май килӗ. Анчах кун валли шута илме тивӗҫ сӑлтав пулсан: сӑмахран, авиарейса 30 минут ытларах тытса чарсан е ҫула тухма шутланӑ ҫыннӑн ҫывӑх ҫыннисем е пассажир хӑй чирлесен.

Электрон тата хут документсем пӗр пек праваллӑ пулса тӑнӑ – ӳлӗмрен аэропорта ҫитсен документсене пичетлемесен те юрать.

Салона вара ача люльки, кӳми, кресло-кӳме, туя, сусӑр ҫынсене ҫулта-йӗрте кирлӗ ытти япалана илсе кӗртме юрать.

Ҫакӑ туризм инфраструктурине тата хамӑр ҫӗршыври туризма вӑйлӑрах аталантарма пулӑшасса шанаҫҫӗ.

Шупашкарта юр тасатма кансӗрлекен ҫӑмӑл машинӑсемпе ҫине тӑрса кӗрешме тытӑннӑ. Нарӑс уйӑхӗнче пурӗ 114 машинӑна штрафлапамсене турттарса кайнӑ. Вӗсем юр хыракан ткхникӑна ӗҫлеме чӑрмантарнӑ.

Парковка правилине пӑхӑнманнисенчен 73-шӗ чарӑну правилине пӑснӑ.

cap.ru сайтри сӑн

Кӑҫал ака уйӑхӗ тӗлне Чӑваш Енре 18 ӑслӑ «зебра» тума палӑртнӑ. Ку – нейросетьлӗ видеоаналитикӑллӑ комплекс пирки: смарт-камерӑсем ҫуран утакана асӑрхасан «зебра» проекци ҫуттине, «Ҫуран ҫӳрекен ирттерсе яр» ҫутӑ таблоне, хӑрушсӑрлӑх йӗрки пирки аса илтерекен сасса ҫутаҫҫӗ.

Хальхи вӑхӑтра регионти ҫулсем ҫинче ҫавӑн пек 9 система пур: Етӗрнере, Муркашра, Кӳкеҫре, Хӗрлӗ Чутайра, Красноармейскинче, Нурӑсра, Йӗпреҫре. Ака уйӑхӗччен тепӗр 9 вырнаҫтарӗҫ: Стрелецкинче, Шӑнкӑртамра, Ҫӗмӗрлере, Элӗкре, Вӑрнарта тата Патӑрьелте.

Прокуратура тунӑ сӑн

Ҫӗрпӳ округӗнчи Чурачӑк ялӗнче нумай хваттерлӗ ҫурт тӑрри йӑтӑнса аннӑ. Вырӑна район прокурорӗ ҫитнӗ.

Ку паян 13 сехетре Савут урамӗнчи 3-мӗш ҫуртра пулнӑ. Пӗр подъезд тӑрринчи ҫивитти йӑтӑнса аннӑ.

Халӗ прокуратура тӗрӗслев ирттерет. Ҫакӑ паллӑ: ҫурт авариллисен йышне кӗмен. Юсав ӗҫӗсене пуҫӑннӑ ӗнтӗ.

vk.com/airport_cheboksary сӑнӳкерчӗкӗ

Шупашкарти аэропорт ют ҫӗршыва авиарейс уҫма ӗмӗтленет. Кун пирки вӑл халӑх тетелӗнчи хӑйӗн страницинче хыпарланӑ. Ҫак йӗркесен авторӗ шухӑшланӑ тӑрӑх, кунта сӑмах Турци пирки пыма пултарать. Темиҫе ҫул каялла унта Шупашкартан чартер рейс пурччӗ.

Шупашкарти аэропорт пулӑшӑвӗпе усӑ куракан авиапассажирсен шучӗ пӗлтӗр унчченхи ҫултинче 12 процент ӳссе 645 пине ситнӗ. Утӑ тата ҫурла уйӑхӗсенче халӑх ҫула уйрӑмах йышлӑн тухнӑ.

Аэропорт ҫӗнӗ хуласене авиарейссем уҫассипе те ҫине тӑрать. Кӑҫалхи кӑрлач уйӑхӗнче самолётсем Новосибирска вӗҫме пуҫлани пирки эпир пӗлтернӗччӗ. Пассажирсене ку маршрут Ҫӗпӗре ҫитме питех те меллӗ, ҫав шутра туристсем кӑмӑллакан Алтай тӑрӑхне те. Унсӑр пуҫне унтан Инҫет Хӗвелтухӑҫне, Китая та инҫе мар.

chuvashia.media сӑнӳкерчӗкӗ

Ҫӗмӗрле районӗнче каллех Сӑр урлӑ кӗпер хывнӑ. Пӑр ҫийӗн каҫса ҫӳремелли кӗпер кӑрлач уйӑхӗн 16-мӗшӗнчен ӗҫлеме тытӑннӑ.

Вӑл Чӑваш Ене Чулхула облаҫӗпе тӳррӗн ҫыхӑнтарать.

Чӑваш Енӗн Инкеклӗ ӗҫсен министерствинче пӗлтернӗ тӑрӑх, пӑр ҫийӗн хывнӑ кӗпер урлӑ ҫӑмӑл машинӑсен ҫеҫ каҫса ҫӳреме юрать тата вӗсен пассажирсемсӗр пулмалла.

Ҫӗнӗ Шупашкарти инкекре тӑватӑ ҫын аманнӑ.

Инкек кӑрлач уйӑхӗн 11-мӗшӗнче 18 сехет те 30 минутра Шуршӑл проездӗнче пулса иртнӗ. Патшалӑхӑн автоинспекцийӗ малтанласа палӑртнӑ тӑрӑх, «Volkswagen Passat» хирӗҫ килекен ҫул ҫине тухса кайса «Toyota RAV4» машинӑпа ҫапӑннӑ.

Фольксвагента ларса пынӑ тӑватӑ пассажира, ҫав шутран виҫҫӗшӗ 15, 12 тата 9 ҫулсенчи ачасем, пульницӑна илсе кайнӑ. Водителе те тухтӑр пулӑшӑвӗ кирлӗ пулса тухнӑ.

«Ҫыхӑнура» форумран илнӗ сӑнӳкерчӗк

Ӗнер хуҫаланнӑ «Фрэнсис» циклона пула Мускавра юр тасатса ӗлкӗреймен. Ҫавна май авиатранспорт та йӗркеллӗ ҫӳреймен. Тӗрӗссипе, ку циклон Калининградран пуҫласа Камчатка таранах витӗм кӳнӗ.

Ҫӗршывӑн тӗп хулинчи аэропортсенче авиарейссен вӑхӑчӗ те улшӑнса пӗтнӗ.

Кӑрлач уйӑхӗн 9-мӗшӗнче Мускавран Шупашкара килмелли «Победа» самолечӗ ҫула тухайман. Вӑл рейспа Мускава ҫитме палӑртнисем те ҫавна май каяйман.

«Победа» авиакомпанин Шупашкара 19 сехет те 15 минутра килмелли самолечӗ те вӑхӑтра ҫитеймен, вӑл 23 сехет те 23 минутра ҫеҫ Чӑваш Ен тӗп хулине ҫитнӗ.

forum.na-svyazi.ru сайтран илнӗ сӑнӳкерчӗк

Кӑрлач уйӑхӗн 2-мӗшӗнчен Улатӑртан Саранска пуйӑс ҫӳреме пуҫлӗ. Пуйӑс эрнекунсерен, шӑматкунсерен тата вырсарникунсерен хутлӗ.

6491-мӗш номерлӗ пуйӑс Улатӑртан ирхи 7 сехетре тапранса кайӗ, Саранска 10 сехет те 5 минута илсе ҫитерӗ.

Кӳршӗлле республикӑн тӗп хулинчен 6492-мӗш номерлӗ пуйӑс 11 сехет те 31 минутра ҫула тухӗ те Улатӑра 14 сехет те 50 минута илсе ҫитерӗ.

Пуйӑс Светотехника, Ардатов, Разъезд Кечушево, Бобоедово, 135 км, Атяшево, Мачкасси, Нуя, Комсомольский, Чамзинка, Огаревка, Ремезенки, Рейтарский, Кочуново, Ромаданово, Сахарный Завод, Красный Узел чарӑнусенче чарӑнӗ.